1, 2. (a) Josefip ilaqutaasalu suut sungiun­niar­tus­san­ngor­paat? (b) Josefip nuliani nuan­ner­pal­laan­ngitsumik sumik oqalut­tuut­tariaqar­paa?

JOSEFIP siutitooq nam­magas­seq­qip­paa. Takorlooruk il­loqarfeeraq Betlehemi tarrajut­toq qiviariarlugu nersut nam­mat­tar­toq nakuaq pat­talaaraa. Qular­nan­ngitsumik Egyptenimut ungasis­sumut angalanis­sar­tik eq­qarsaatigaa. Nuliata er­nin­nguatalu inuit al­lamiut taak­kualu oqaasii ileq­quilu sungius­sin­naas­savaat?

² Josefip asasani nuliani, Maria, nuan­ner­pal­laan­ngitsumik oqalut­tuut­tariaqar­paa. Oqarfigaa sin­nat­tuk­kut Guutip tusarlius­saanik in­ngilimit ilisimatin­neqarsimal­luni. Kun­ngip Herodesip er­nin­nguar­tik toqun­niar­paa! Ingerlaan­naq aal­lar­tariaqar­put. (Matthæusi 2:13, 14 atuakkit). Maria as­sut er­numavoq. Sooq meeran­nguaq pisuus­suteqan­ngitsoq nam­minerlu iliuuseqarsin­naan­ngitsoq toquk­kumaneqas­sava? Taman­na Mariap Josefil­lu paasisin­naan­ngilaat. Jehovali tatigigamik­ku aal­lar­nis­samut piareersaler­put.

3. Josefip ilaqutaasalu Betlehemimit aal­lar­nerat oqalut­tuariuk. (Aam­ma as­siliaq takuuk).

³ Betlehemimiut amiilaar­nar­tumik pisoqar­nis­saa ilisimanagu sinitsil­lugit Josefi Marialu Jiisusi ilagalugu un­nuak­kut aal­lar­put. Kujam­mut ingerlal­lutik seqinerlu kangianiit nuiar­tor­til­lugu Josefip qanoq atugaqalerumaar­ner­tik eq­qarsaatigisimas­savaa. Sanasuin­naal­luni ilaqut­tani pis­saanilis­suar­nut qanoq il­lersorsin­naas­sagamigit? Ilaqut­tani pilersorsin­naas­savai? Jehovap Guutip sulias­siis­sutaa an­ner­tooq, meeq­qamik as­seqan­ngil­luin­nar­tumik isumas­suinis­saq perorsaanis­sarlu, naam­mas­sisin­naas­savaa? Josefi an­ner­tuunik unam­miniagas­saqar­poq. Unam­miniagas­sani qanoq qaangerai sam­meriar­tigu. Taman­na ul­lumik­kut ataataasut – aap, kristumiut tamarmik – sooq Josefimik up­per­nik­kut ilaarsisariaqar­nermin­nik paasin­nin­nis­samut iluaqutigis­savaat.

4, 5. (a) Josefip inuunera qanoq al­lan­ngorluin­nar­pa? (b) Josefi sapiis­suseqalersik­kumal­lugu in­ngilip qanoq oqarfigaa?

⁴ Qaam­matit arlal­lit sioq­qul­lugit Nazaretimi Elip pania  aap­pas­siarileramiuk Josefip inuunera al­lan­ngorluin­nar­poq. Josefip nalun­ngilaa Mariap Jehova taas­sumalu najoq­qutas­siai nuan­narigai. Naar­tulersimasorli paasivaa! Kan­ngunarsar­neqan­ngin­nias­sam­mat iser­tor­tumik avin­niarlugu aalajanger­poq. * Jehoval­li anersaava il­ler­nar­toq aq­qutigalugu Mariap naar­tulersimaneranik in­ngilimit sin­nat­tuk­kut nas­suiaan­neqar­poq. In­ngilip aam­ma oqaatigaa Mariap er­ner­taas­saata ‘in­nut­tani an­naatis­sagai ajor­taan­nit’. Aam­mat­taaq Josefi ima oqarfigaa: “Mariap nulis­siun­nis­saa nangaas­sutigis­san­ngilat.” – Matt 1:18-21.

⁵ Josefi, angut naaper­tuil­luar­toq naalat­torlu, in­ngilip oqar­neratut ilior­poq. Meerarin­ngisaminik, Guutimul­li erlin­nangaar­tumik, perorsaanermik isumas­suinermil­lu akisus­saaf­ferujus­suaq akueraa. Kingusin­nerusuk­kut Josefi nulialu naar­tusoq kaasarip peq­qus­sutaa naalal­lugu Betlehemimut al­latsik­kiar­tor­put. Tas­sani meeraq inun­ngor­poq.

6-8. (a) Pisut suut pis­sutigalugit Josefip ilaqutaasalu inuunerat al­lan­ngoq­qip­pa? (b) “Ul­loris­sap” Saatanimeersuunera qanoq nalun­ngilar­put? (Aam­ma qup­per­nerup ataatungaani ilan­ngus­saq takuuk).

⁶ Josefi ilaqutaalu Nazaretimut uter­natik Betlehemimut, Jerusalemimit 10 kilometerit mis­siliorlugit ungasitsigisumiit­tumut, nuup­put. Piitsuup­put, Josefili Maria Jiisusilu isumas­sor­niarlugit isuman­naatsumil­lu atugaqar­tin­niarlugit sapin­ngisani tamaat iliuuseqar­poq. Sivitsun­ngitsoq il­lumi angin­ngitsumi najugas­sip­put. Taava Jiisusi naalungiarsuujun­naarmat – im­maqa ataatsimik ukioqar­toq – inuunerat al­lan­ngoq­qeriasaar­poq.

⁷ Angutit ilisimasut – imaluun­niit ul­loriarsior­tut Kangiamiut, im­maqa Babylonimeersut – tikip­put. “Ul­loriaq” Josefip Marial­lu angerlarsimaf­fian­nut siulersuisoq malis­simavaat, maan­nalu meeraq juutinut kun­ngin­ngor­tus­saq ujar­paat. Angutit ataq­qin­ningaar­put.

⁸ Ul­loriarsior­tut, ilisimagaluarlugu ilisiman­ngik­kaluarluguluun­niit, meeq­qamik Jiisusimik navianar­torsior­titsingaar­put. “Ul­loriaq” malitaat Betlehemimut siulersuinani Jerusalemimut siulersuivoq. * Kun­ngi Herodesi ajor­toq ul­loriarsior­tut meeraq juutinut kun­ngin­ngor­tus­saq ujarlugu Jerusalemimut tikis­simaneran­nik paasitin­neqarami sin­nganermik kamangaaler­poq.

9-11. (a) Herodesimit Saatanimil­lu pis­saaneqar­nerusoq qanoq akuliup­pa? (b) Egyptenimut angalaneq al­lak­kanit Biibilimut ilan­ngun­neqan­ngitsunit qanoq al­laanerutigaa?

⁹ Qujanar­tumil­li Herodesimit Saatanimil­lu pis­saaneqar­nerusoqar­poq.  Tikeraat il­lumut iserlutik Jiisusi anaanaminit paarineqar­toq takugamik­ku tunineqar­nis­sar­tik naatsorsuutiginagu tunis­suteqar­put. Josefip Marial­lu ‘kuultimik, tipigis­saam­mik myrramil­lu’ akisuunik tunineqar­ner­tik eq­qumiigisimas­savaat. Ul­loriarsior­tut meeq­qap sumer­piaq angerlarsimaf­feqar­neranik kun­ngi Herodesi oqalut­tuun­niarlugu Jerusalemimut uter­niaraluar­put. Jehovali akuliup­poq. Ul­loriarsior­tut aq­qutik­kut al­lak­kut nunamin­nut angerlaq­qul­lugit sin­nat­tuk­kut oqarfigai. – Matthæusi 2:1-12 atuakkit.

¹⁰ Ul­loriarsior­tut aal­lar­nerisa kingunin­ngua Josefi Jehovap in­ngilianit ima mianersoq­quneqar­poq: “Makil­lutit, meeraq anaanaalu ilagalugit Egyptenimut qimaagit, tas­saniigil­lu uan­nit oqarfigineqarserlutit. Herodesim­mi meeraq ujar­niar­paa toquk­kumal­lugu.” (Mat­t 2:13) Kapitalip matuma aal­laq­qaataani al­las­simasutut Josefi naalal­luni iliuuseqapal­lap­poq. Er­nermi navianar­torsiun­ngin­nis­saa sunit tamanit pingaar­ner­paatik­kamiuk ilaqut­tani ilagalugit Egyptenimukar­poq. Ul­loriarsior­tunit Guutimik nalusunit akisuunik tunis­sutisigamik Josefi Egyptenimut angalanermut nuun­nermul­lu aningaasar­tuutinut akis­saqaler­poq.

¹¹ Kingusin­nerusuk­kut al­lak­kani Biibilimut ilan­ngun­neqan­ngitsuni Egyptenimut angalaneq nuan­nersutut al­laatigineqar­poq. Taak­kunani al­las­simavoq Jiisusip tupin­nar­tulior­nik­kut angalaneq sivikil­lisik­kaa, ujajaasut ajoqusiisin­naajun­naarsik­kai al­laal­lu anaanani daddelinik tigusinias­sam­mat palmit peqitik­kai. * Ilaqutariil­li ungasis­sumut nalusamin­nut pisariusumik angalaan­nar­put.

12. Angajoq­qaat Saatanip silarsuaani meeq­qanik perorsaasut Josefi qanoq ilin­niarfigisin­naavaat?

¹² Angajoq­qaat Josefi ilin­niarfigingaarsin­naavaat. Ilaqut­tani navianar­tunut il­lersorumal­lugit sulif­fim­minik qimatsinis­samut tamaviaar­nis­samul­lu piumas­suseqar­poq. Ilaqut­tani Jehovamit tunis­sutaasutut erlin­nangaar­tutut isigigai ersarip­poq. Inuusut­tut Saatanip silarsuaanit ajor­tulior­nis­samut sun­ner­neqarsin­naap­put, taman­nalu inuunerluler­nermik al­laal­lu atugarliuler­nermik kinguneqarsin­naavoq. Anaanaasut ataataasul­lu aalajangersimal­luin­narlutik Josefi ilaarlugu qitor­natik taamatut sun­ner­neqan­ngin­nias­sam­mata sapin­ngisamin­nik iliuuseqar­tut nersugas­saap­put!

13, 14. Sooq Josefi Marialu Nazaretimut nuup­pat?

¹³ Ilaqutariit sivisuumik Egyptenimiis­simagunan­ngil­lat, sivitsun­ngitsormi Josefi Herodesip toquneranik in­ngilimit ilisimatin­neqar­poq. Josefip ilaqut­tani ilagalugit nunaminut uter­poq. Itsaq siulit­tuutigineqar­poq Jehovap ‘er­nini Egyptenimit qaaq­qujumaaraa’. (Mat­t 2:15) Josefi siulit­tuum­mik eq­quutsitseqataavoq, ilaqut­tanili sumut siulersus­savai?

¹⁴ Josefi mianersor­poq. Pis­sutis­saqarluarluni Herodesip kingoraar­taa, Arkelaosi, ajor­toq toqutsiumatoorlu siooragaa. Josefip Guutimit siulersor­neqarluni ilaqut­tani avan­namut, Jerusalemimit inun­nil­lu ajoqusiiniar­tunit ungasis­sumut, Galilæami il­loqarfim­mut inun­ngorfim­minut Nazaretimut siulersor­pai. Tas­sani Marialu meeq­qatik perorsar­paat. – Matthæusi 2:19-23 atuakkit.

15, 16. Josefi sulerisar­pa, sak­kul­lu suut im­maqa ator­tar­pai?

¹⁵ Pilimanian­ngitsumik, imaan­naan­ngitsumil­li, inuuneqar­put. Biibilimi Josefi sanasutut al­laatigineqarmat oqaaseq qisulerisar­tumik isumalik ator­neqar­poq. Or­piit kil­lor­neqar­tus­saap­put, as­sar­tor­neqar­tus­saap­put, panerser­neqar­tus­saap­put tamatumalu kingor­na il­lulior­nermut, umiatsialior­nermut, ikaar­tarfeeralior­nermut, qamutilior­nermut, as­sakaasulior­nermut, nam­maasior­nermut naasoris­saanermilu as­sigiin­ngitsunik sak­kus­sior­nermut atugas­satut piareersar­neqar­tus­saal­lutik. (Matt 13:55) Sanasoq tamaviaar­tar­poq. Biibilip nalaani sanasoq il­lumi silataani eq­qaaniluun­niit san­navim­mi sulisar­poq.

¹⁶ Josefip sak­kut as­sigiin­ngitsor­pas­suit, im­maqa ataataminit kingor­nus­sani, ator­tar­pai. Titar­taat teqeq­qoris­soq, oqimaalutaq aqerloq, al­lunaasaaraq narloris­saat, ulimaat, pilat­tuut, ikut­taat, kaataq, kaatarsuaq qisuk, tuus­saq liim­mil­lu as­sigiin­ngitsut im­maqa ator­tar­pai. Aam­ma im­maqa niggit atorlugu qil­lerisar­poq. Kikis­sat ator­tarsimasin­naavai, taak­kuli akisup­put.

17, 18. (a) Jiisusip ataatarsiaminit suut ilin­niar­pai? (b) Sooq Josefi tamaviaar­nerul­luni sulisariaqar­pa?

¹⁷ Takorlooruk Jiisusip nukap­piaraal­luni ataatarsiani sulisoq isigin­naaraa. Qular­nan­ngitsumik nukit­tor­pasin­nera, inugin­nera  silator­pasin­neralu alutoralugit Josefi sulisoq isigin­naaq­qis­saar­tar­paa. Im­maqa Josefip er­nini nukap­piaraasoq sulias­sanik ajor­nan­ngin­nerusunik, soorlu aalisak­kap amia paner­toq atorlugu qisuup maniilakulat­tor­taanik siliinis­samik, ilin­niar­tit­taler­paa. Qisuit ator­tak­kami – as­sersuutigalugu morbærfigenequtip, egequtip olivenequtil­lu – as­sigiin­ngis­sutaan­nik ilin­niar­tit­tarsimas­savaa.

¹⁸ Jiisusip paasivaa angut nukit­tooq taan­na qisun­nik kil­luisar­toq, quas­sut­tuunik suliaqar­tar­toq qisun­nil­lu katiterisar­toq aam­ma nuliaminik qitor­naminil­lu asan­nil­luni isumas­suil­laq­qis­suusoq. Josefip Marial­lu qitor­nai amerliar­tor­put naggataatigul­lu ikin­ner­paamik arfineq-marlun­ngorlutik. (Matt 13:55, 56) Josefip ilaqut­tani isumas­sor­niarlugit tamaviaar­nerul­luni sulisariaqar­poq.

19. Josefip ilaqut­tani anersaak­kut qanoq pilersor­pai?

¹⁹ Ilaqut­tal­li anersaak­kut isumas­sor­nis­saasa pingaar­ner­paanera Josefip nalun­ngilaa. Taamaat­tumik qitor­nani Jehova Guuti taas­sumalu inatsisai pil­lugit ilin­niar­tit­tar­pai. Inatsisit atuar­neqar­tut nas­suiar­neqar­tul­lu tusar­naarumal­lugit Marialu qitor­natik ilagalugit il­loqarfim­min­ni akulikitsumik synagogimukar­tar­put. Im­maqa synagogimeereeraangamik Jiisusip apeq­qutis­sar­pas­sui Josefip sapin­ngisaminik akiniar­tar­pai. Josefip aam­ma ilaqut­tani Jerusalemimut up­perisarsior­nik­kut nal­liut­torsioriaqatigisar­pai. Ukiut tamaasa Jerusalemimut 120 kilometerit sin­nerlugit ungasitsigisumiit­tumut nal­liut­torsioriar­nermut angerlar­nermul­lu im­maqa sapaatit-akun­neri marluk ator­tar­paat.

20. Ul­lumik­kut ilaqutariin­ni it­tuusut kristumiut Josefi qanoq ilaarsin­naavaat?

²⁰ Ul­lumik­kut ilaqutariin­ni it­tuusut kristumiut Josefi ilaar­tar­paat. Qitor­namik timik­kut pisariaqar­titaat matus­suserumal­lugit tamaviaar­taraluarlutik anersaak­kut it­tunik ilin­niar­titsineq pingaar­ner­paatip­paat. Aam­ma ilaqutariit­tut atuaq­qis­saaqatigiin­nermik ingerlatsiumal­lutik qitor­natil­lu ilagalugit ataatsimiigiarumal­lutik ataatsimeersuariarumal­lutil­lu iliuuseqangaar­tar­put. Josefitut nalun­ngilaat meeq­qat Jehova pil­lugu ilin­niar­tin­neqar­ner­tik sunit tamanit iluaqutiginer­paas­sagaat.

21. Josefip ilaqutai poorskisior­nerup nalaani susar­pat, aam­ma Josefip Marial­lu Jiisusip peqan­ngin­nera qanga paasiler­paat?

²¹ Jiisusi aq­qaneq-marlun­nik ukioqar­toq Josefip ilaqut­tani pisar­ner­tut Jerusalemimukaqatigai. Poorskimi, pif­fis­sami nal­liut­torsiorfim­mi, ilaqutariip­pas­suit uper­naak­kut nunak­kut qorsooq­qis­suk­kut ingerlaaqatigiip­put. Jerusalemip qatsin­nerusumiit­tup ungasin­ngisaani nunamut ujarat­tuumut pigamik amerlasuut nal­lius­siar­tor­nermi erinarsuusiat atorlugit erinarsuler­put. (Tus­s  120-134) Il­loqarfik inun­nik ulik­kaar­poq. Tamatuma kingor­na ilaqutariit angerlamut ingerlaar­put. Josefip Marial­lu, im­maqa isumagisas­sar­pas­suaqarlutik, Jiisusi al­lanik – im­maqa ilaqut­tamin­nik – ingerlaqateqarsoraat. Aatsaat ul­loq ataaseq angalareerlutik Jiisusip peqan­ngin­nera paasiler­paat! – Luk 2:41-44.

22, 23. Er­ner­tik peqan­ngitsoq paasigamik­ku Josefi Marialu sup­pat, nanigamik­kulu Maria qanoq oqar­pa?

²² Er­numangaarlutik Jiisusi ujar­niarlugu Jerusalemimut uter­put. Takorlooruk er­ner­tik suaar­tarlugu il­loqarfiup aq­quser­ngisigut ingerlam­mata il­loqarfik qanoq inoqar­pasin­ngitsigisimas­sasoq. Nukap­piararmita sumiip­pa? Ul­lut pingajuan­ni Jehovap sulias­siis­sutaanut im­mik­kuul­laris­sumut tun­ngatil­lugu Josefip kuk­korujus­suarsimanini eq­qarsaatigaa? Taava naggataatigut naalaf­fim­mukar­put.  Tas­sani Jiisusi angutinik inatsisinik ilisimasunik inersuarmi is­siaqateqar­toq nanivaat. Takorlooruk Josefi Marialu qanoq eq­qis­sial­latsigisimas­sasut! – Luk 2:45, 46.

²³ Jiisusip angutit ilin­niarluarsimasut tusar­naaq­qis­saarlugil­lu apersoqat­taar­pai. Meeq­qap paasin­nit­taasia akis­sutaalu angutit ajasoorutigaat. Mariali Josefilu tupaq­qangaar­put. Biibili naaper­torlugu Josefi oqaaseqan­ngilaq. Marluul­lutil­li qanoq misiginersut Mariap oqaasiinit ersersin­neqarluar­poq: “Er­nera, sooq taama pivisigut? Ataatal­lu an­nilaangal­luta ujar­tuaraluar­patsigit.” – Luk 2:47, 48.

24. Angajoq­qaajuneq Biibilimi qanoq piviusorsior­tumik al­laatigineqar­pa?

²⁴ Biibilimi oqalut­tuami matumani angajoq­qaajuneq piviusorsior­tumik al­laatigineqar­poq. Meeraq naam­mal­luin­nar­tuugaluar­pal­luun­niit tamaviaar­narsin­naavoq. Ul­lumik­kut silarsuarmi  matumani navianar­tumi angajoq­qaajuneq ‘an­nilaanganarsin­naavoq’, ataataasul­li anaanaasul­lu meeraqar­nerup unam­miniar­nar­nerata Biibilimi al­laatigineqar­neranik ilisimaarin­nin­ner­tik tup­pal­lersaatigisin­naavaat.

25, 26. Jiisusip angajoq­qaani qanoq akivai, Josefil­lu er­nermi akis­sutaa qanoq isumaqarfigisimas­savaa?

²⁵ Jiisusi naalaf­fim­mi Ataataminut qilam­miusumut, Jehovamut, qanit­tuararsuul­luni misigisarlunilu ilin­niar­titsis­sutigineqar­tunut tusar­naaq­qis­saar­tar­poq. Angajoq­qaani ajor­tumik isumaqar­nani ima akivai: “Sooq ujar­pisinga? Nalugas­siuk Ataatan­niit­tariaqar­tunga?” – Luk 2:49.

²⁶ Josefip oqaatsit taak­ku eq­qarsaatigeqat­taar­tarsimas­savai. Im­maqa Jiisusip taamatut oqar­nera tul­luusimaarutigaa. Er­nersianimi Jehovamut Guutimut taamatut misigis­suseqaleq­qul­lugu tamaviaarluni ilin­niar­tit­tar­paa. Josefimut at­taveqarluar­nini pis­sutiginerul­lugu ataataasup asan­nit­tup qanoq it­tuunera Jiisusip nukap­piaraan­naagaluarluni ilisimal­luar­paa.

27. Ataataaguit sumik im­mik­kut pisin­naatitaaf­feqar­pit, aam­ma sooq Josefip maligas­siuinera eq­qaamasariaqar­piuk?

²⁷ Ataataaguit ataataasup asan­nit­tup isumas­suil­luar­tul­lu qanoq it­tuuneranik qitor­nan­nik ilin­niar­titsisin­naanivit im­mik­kut pisin­naatitaaf­fiunera nalun­ngiliuk? Qitor­narsiaqaruit Josefip maligas­siuinera meeq­qal­lu tamarmik im­mik­kuul­larin­nerat erlin­nar­tuuneral­lu eq­qaamak­kit. Meeq­qat Ataatamin­nut qilam­miusumut, Jehovamut Guutimut, at­taveqarlualeq­qul­lugit ikiuk­kit. – Efesosimiut 6:4 atuaruk.

28, 29. (a) Lukasip iivangkiiliuani 2:51, 52-ilu Josefi pil­lugu sunik ersersitsip­pat? (b) Josefip er­nini ilisimas­suseqaleq­qul­lugu qanoq ilin­niar­tip­paa?

²⁸ Tamatuma kingor­na Josefi Biibilimi al­laatigineqar­pal­laan­ngilaq, taan­nali pil­lugu al­las­simasut maluginiar­nar­put. Al­las­simavoq Jiisusip angajoq­qaani ‘naalak­kai’. Aam­ma al­las­simavoq ‘Jiisusi  al­liar­tor­toq ilisimas­suseqar­nerujar­torlunilu, nuan­naarutaasorlu Guutimut inun­nul­lu’. (Lukasi 2:51, 52 atuakkit). Oqaatsit taak­ku Josefi pil­lugu sunik ersersitsip­pat? Siul­ler­tut, er­nera naam­mal­luin­nar­toq ataatami oqar­tus­saas­susianik ataq­qin­nim­mat naalatsigitim­mal­lu paasivar­put Josefi inoqutiminik siulersuiuar­toq.

²⁹ Aam­ma paasivar­put Jiisusi ilisimas­suseqar­nik­kut ineriar­tor­toq. Qular­nan­ngitsumik Josefip Jiisusi ilisimas­suseqaleq­qul­lugu ilin­niar­tip­paa. Taamanik­kut juutit akor­nan­ni us­sateqar­poq qangaaneersumik ataq­qisaasumil­lu. Ul­lumik­kut suli ator­neqar­tarlunilu atuar­neqarsin­naavoq. Us­sat naaper­torlugu angutit sulisariaqan­ngitsut kisimik ilisimas­suseqalersin­naap­put. As­satik atorlugit sulisar­tut – soorlu sanasut, naasoris­saasut saf­fior­tul­lu – “ilin­niar­titsisin­naanatil­lu eq­qar­tuus­sum­mik nalunaaruteqarsin­naanatil­lu silatuutut oqaaseqarsin­naan­ngil­lat”. Jiisusip inersimasun­ngorami us­satip ilumuun­ngin­nera ersersip­paa. Nukap­piaraal­luni ataatarsiani, sanasoq piitsoq, Jehovap isaani eq­qor­tut eq­qun­ngitsul­lu pil­lugit sun­niuteqarluar­tumik ilin­niar­titsisoq tusar­naakulasar­paa.

30. Josefi ul­lumik­kut ilaqutariin­ni it­tuusunut qanoq maligas­saal­luar­pa?

³⁰ Jiisusip al­liar­tor­neranut Josefi sun­niuteqarluarunar­poq. Jiisusi nukap­piaraal­luni isumas­sor­neqarluarami inersimasun­ngorami nukit­tuun­ngor­poq peq­qis­soq. Tamatuma saniatigut Josefip er­nini ilin­niar­tip­paa sul­laris­sun­ngor­til­lugu. Jiisusi sanasup er­neratut ilisimaneqaan­nar­nani aam­ma ‘sanasutut’ ilisimaneqar­poq. (Mark 6:3) Josefi iluatsit­tumik ilin­niar­titsivoq. Ilaqutariin­ni it­tuusut Josefi ilaarlugu qitor­natik timik­kut pisariaqar­titaan­nik isumagisarlugil­lu im­minut pilersorsin­naaleq­qul­lugit ikior­tarunik­kit silatusaas­sap­put.

31. (a) Biibili naaper­torlugu Josefi qanga toqusimagunar­pa? (Ungalusaq takuuk). (b) Josefi tamat­ta qanoq ilin­niarfigisin­naavar­put?

³¹ Jiisusi 30-t mis­siliorlugit ukioqarluni kuisim­mat Josefi Biibilimi eq­qaaneqan­ngilaq. Taamaat­tumik isum­mersin­naavugut Jiisusip kif­far­tor­nini aal­lar­tim­magu Maria uil­lar­nerusoq. (Takuuk ungalusaq “ Josefi qanga toqua?”) Josefili ataataasutut ilaqut­taminik il­lersuinermigut, pilersuinermigut aalajaal­lunilu piner­tusaar­nermigut maligas­saal­luar­poq. Ataataasut, ilaqutariin­ni it­tuusut, aap, kristumiut tamarmik Josefimik up­per­nik­kut ilaarsinis­samut pis­sutis­saqarluar­put.