របៀបស៊ូទ្រាំនឹងបញ្ហាសុខភាពដែលមិននឹកស្មាន
តើអ្នកធ្លាក់ខ្លួនឈឺធ្ងន់ដែលនឹកស្មានមិនដល់ទេ? បើដូច្នេះមែន នោះច្បាស់ជាមានឥទ្ធិពលមកលើផ្លូវកាយនិងផ្លូវចិត្តរបស់អ្នក ហើយអ្នកក៏ត្រូវចំណាយប្រាក់ជាច្រើនដែរ។ តើអ្នកអាចប្រឈមមុខនឹងស្ថានភាពនោះតាមរបៀបណា? តើអ្នកអាចជួយមិត្តភក្តិឬសមាជិកគ្រួសារដែលកំពុងមានបញ្ហាសុខភាពយ៉ាងដូចម្ដេច? ទោះជាគម្ពីរមិនមែនជាសៀវភៅខាងពេទ្យក្ដី តែគម្ពីរមានគោលការណ៍ជាច្រើនដែលអាចជួយអ្នកឲ្យស៊ូទ្រាំតាមដែលអាចធ្វើទៅបាន។
យោបល់ដែលជួយអ្នកឲ្យស៊ូទ្រាំនឹងបញ្ហាសុខភាព
ស្វែងរកការព្យាបាល
អ្វីដែលគម្ពីរចែង៖«មនុស្សដែលមានសុខភាពល្អមិនត្រូវការគ្រូពេទ្យទេ តែអ្នកដែលឈឺទើបត្រូវការគ្រូពេទ្យ»។—ម៉ាថាយ ៩:១២
របៀបអនុវត្ត៖ សូមស្វែងរកការព្យាបាលពីគ្រូពេទ្យជំនាញ។
សូមសាកធ្វើដូច្នេះ៖ សូមស្វែងរកការព្យាបាលដែលល្អបំផុតសម្រាប់អ្នក។ ពេលខ្លះប្រហែលជាល្អជាងឲ្យយើងសុំយោបល់ពីគ្រូពេទ្យផ្សេងទៀត។ (សុភាសិត ១៤:១៥) សូមពិភាក្សាជាមួយនឹងគ្រូពេទ្យជំនាញ ដើម្បីយល់អ្វីដែលគាត់ពន្យល់ និងដើម្បីគាត់អាចយល់ស្ថានភាពទាំងអស់នៃជំងឺរបស់អ្នក។ (សុភាសិត ១៥:២២) សូមស្វែងយល់ពីជំងឺរបស់អ្នក រួមទាំងវិធីព្យាបាលផងដែរ។ ពេលអ្នកដឹងច្បាស់អំពីស្ថានភាពជំងឺរបស់អ្នក នោះនឹងស្រួលឲ្យអ្នកទទួលយកស្ថានភាពនោះជាង ហើយក៏ជួយអ្នកឲ្យធ្វើការសម្រេចចិត្តល្អស្ដីអំពីវិធីព្យាបាលដែរ។
មានទម្លាប់ល្អក្នុងការថែរក្សាសុខភាព
អ្វីដែលគម្ពីរចែង៖«ការហ្វឹកហាត់ខ្លួនប្រាណមានប្រយោជន៍»ដល់រាងកាយ។—ធីម៉ូថេទី១ ៤:៨
របៀបអនុវត្ត៖ អ្នកអាចទទួលប្រយោជន៍ជាច្រើនពីការមានទម្លាប់ល្អក្នុងការថែទាំសុខភាព ដូចជាហាត់ប្រាណជាទៀងទាត់ជាដើម។
សូមសាកធ្វើដូច្នេះ៖ សូមហាត់ប្រាណជាទៀងទាត់ បរិភោគអាហារដែលមានជីវជាតិ និងគេងឲ្យបានគ្រប់គ្រាន់។ អ្នកប្រហែលជាត្រូវសម្របខ្លួនទៅតាមស្ថានភាពជំងឺរបស់ខ្លួន ហើយអ្នកជំនាញខាងសុខភាពបានយល់ស្របថាបើយើងខំព្យាយាមមានទម្លាប់ល្អក្នុងការថែទាំសុខភាព យើងនឹងទទួលប្រយោជន៍ជាច្រើន។ ប៉ុន្តែ សូមធ្វើឲ្យប្រាកដថានោះមិនធ្វើឲ្យសុខភាពរបស់អ្នកកាន់តែដុនដាប និងខុសការណែនាំពីគ្រូពេទ្យឡើយ។
ស្វែងរកជំនួយពីអ្នកឯទៀត
អ្វីដែលគម្ពីរចែង៖«មិត្តពិតបង្ហាញសេចក្ដីស្រឡាញ់គ្រប់ពេលវេលា ហើយគាត់ប្រៀបដូចជាបងប្អូនដែលកើតមក ដើម្បីជួយគ្នានៅពេលមានទុក្ខលំបាក»។—សុភាសិត ១៧:១៧
របៀបអនុវត្ត៖ មិត្តភក្តិរបស់អ្នកអាចជួយអ្នកឲ្យស៊ូទ្រាំនឹងការពិបាក។
សូមសាកធ្វើដូច្នេះ៖ សូមប្រាប់អស់ពីចិត្តនូវអារម្មណ៍របស់អ្នកដល់មិត្តភក្តិដែលអ្នកទុកចិត្ត។ នេះអាចជួយអ្នកឲ្យធូរស្រាលពីការតានតឹងចិត្ត ហើយមានអារម្មណ៍ល្អជាង។ មិត្តភក្តិនិងក្រុមគ្រួសារទំនងជាចង់ជួយអ្នកតាមរបៀបផ្សេងៗ។ ប៉ុន្តែ ពួកគេប្រហែលជាមិនដឹងថាត្រូវធ្វើយ៉ាងណាទេ។ ដូច្នេះ សូមប្រាប់ពួកគេចំៗថាអ្នកត្រូវការជំនួយអ្វីខ្លះ។ សូមកុំរំពឹងពីពួកគេច្រើនពេក ហើយសូមមានអំណរគុណជានិច្ច។ ម្យ៉ាងទៀត សូមចាំថាសូម្បីតែមិត្តភក្តិចង់ជួយអ្នកក៏ដោយ ពេលខ្លះពួកគេប្រហែលជាធ្វើច្រើនពេកដល់អ្នក។ ដូច្នេះ អ្នកប្រហែលជាត្រូវដាក់កម្រិត ដូចជាពួកគេអាចមកសួរសុខទុក្ខប៉ុន្មានដង និងអាចនៅយូរប៉ុនណា។
រក្សាចិត្តគំនិតវិជ្ជមាន
អ្វីដែលគម្ពីរចែង៖«ចិត្តរីករាយជាថ្នាំវិសេស តែចិត្តខ្ទេចខ្ទាំធ្វើឲ្យអស់កម្លាំងរលីង»។—សុភាសិត ១៧:២២
របៀបអនុវត្ត៖ ការមានគំនិតវិជ្ជមាននិងមិនអស់សង្ឃឹម អាចជួយអ្នករក្សាចិត្តស្ងប់ដើម្បីអ្នកអាចស៊ូទ្រាំបញ្ហាសុខភាពនោះ។
សូមសាកធ្វើដូច្នេះ៖ ពេលអ្នកសម្របខ្លួនទៅនឹងស្ថានភាពថ្មី សូមផ្ដោតអារម្មណ៍ទៅលើអ្វីដែលអ្នកអាចធ្វើបាន មិនមែនទៅលើអ្វីដែលអ្នកមិនអាចធ្វើបាននោះទេ។ សូមកុំប្រៀបធៀបខ្លួនជាមួយនឹងអ្នកឯទៀត ឬប្រៀបធៀបជាមួយអ្វីដែលអ្នកធ្លាប់ធ្វើពេលអ្នកមានសុខភាពល្អនោះឡើយ។ (កាឡាទី ៦:៤) សូមកំណត់គោលដៅដែលអ្នកអាចសម្រេចបាន ព្រោះនោះជួយអ្នកឲ្យមានចិត្តគំនិតវិជ្ជមានជានិច្ច។ (សុភាសិត ២៤:១០) បើកាលៈទេសៈអំណោយផល សូមរកឱកាសធ្វើល្អដល់អ្នកឯទៀត ព្រោះការឲ្យគេនឹងធ្វើឲ្យអ្នកមានសុភមង្គល ហើយនោះក៏អាចជួយអ្នកកុំឲ្យផ្ដោតអារម្មណ៍ទៅលើបញ្ហារបស់ខ្លួនដែរ។—សកម្មភាព ២០:៣៥
តើព្រះនឹងជួយអ្នកឲ្យស៊ូទ្រាំនឹងបញ្ហាសុខភាពឬទេ?
គម្ពីរបង្ហាញថាព្រះយេហូវ៉ា aអាចជួយអ្នកជំងឺឲ្យស៊ូទ្រាំនឹងបញ្ហាសុខភាព។ យើងមិនអាចរំពឹងថាព្រះយេហូវ៉ានឹងព្យាបាលយើងដោយអព្ភូតហេតុទេ តែអ្នកដែលគោរពប្រណិប័តន៍លោកអាចទទួលជំនួយពីលោកតាមរបៀបដូចខាងក្រោម៖
សេចក្ដីសុខសាន្ត។ ព្រះយេហូវ៉ាអាចផ្ដល់«សេចក្ដីសុខសាន្តរបស់ព្រះដែលហួសពីការនឹកស្មាន»។ (ភីលីព ៤:៦, ៧) សេចក្ដីសុខសាន្តឬចិត្តស្ងប់នេះ អាចជួយបុគ្គលម្នាក់កុំឲ្យខ្វល់ខ្វាយហួសហេតុពេក ហើយព្រះផ្ដល់សេចក្ដីសុខសាន្តនេះទៅអ្នកដែលអធិដ្ឋានទៅលោក និងអ្នកដែលប្រាប់ពីទុក្ខកង្វល់ដល់លោក។—ពេត្រុសទី១ ៥:៧
ប្រាជ្ញា។ ព្រះយេហូវ៉ាអាចផ្ដល់ប្រាជ្ញាដល់យើងបានដើម្បីធ្វើការសម្រេចចិត្តឈ្លាសវៃ។ (យ៉ាកុប ១:៥) បុគ្គលម្នាក់អាចទទួលប្រាជ្ញានេះបាន លុះត្រាតែគាត់រៀននិងអនុវត្តតាមគោលការណ៍គម្ពីរ។
សេចក្ដីសង្ឃឹមនៅថ្ងៃអនាគត។ ព្រះយេហូវ៉ាសន្យាថានៅថ្ងៃអនាគត«បណ្ដាជនដែលរស់នៅក្នុងស្រុក ពួកគេនឹងមិននិយាយថា៖‹ខ្ញុំឈឺ›ទៀតឡើយ»។ (អេសាយ ៣៣:២៤) សេចក្ដីសង្ឃឹមនេះនឹងជួយមនុស្សជាច្រើនឲ្យរក្សាចិត្តគំនិតវិជ្ជមាន សូម្បីតែពួកគេមានបញ្ហាសុខភាពធ្ងន់ធ្ងរក៏ដោយ។—យេរេមា ២៩:១១, ១២
a យេហូវ៉ាគឺជានាមរបស់ព្រះដែលមាននៅក្នុងគម្ពីរ។—ចម្រៀងសរសើរព្រះ ៨៣:១៨
លោកអ្នកក៏ប្រហែលជាចូលចិត្តដែរ
ទស្សនាវដ្ដី
មានមូលហេតុផ្សេងៗដែលធ្វើឲ្យអ្នកចង់បន្តរស់នៅ ទោះជាពេលអ្នកមានជំងឺធ្ងន់ធ្ងរក៏ដោយ។
សូមរៀនពីរបៀបដែលមនុស្សខ្លះបានស៊ូទ្រាំពេលមានជំងឺធ្ងន់ធ្ងរ។
ភ្ញាក់
របៀបរកផ្លូវដែលនាំឲ្យមានសុភមង្គល សុខភាពល្អនិងការចេះស៊ូទ្រាំ
តើបញ្ហាសុខភាពមានន័យថាមិនអាចមានសុភមង្គលឬ?
