របៀបដែលវិភាគទានរបស់អ្នកបានត្រូវប្រើ
កិច្ចការផ្សេងៗដែលគាំទ្រការផលិតភាពយន្តដំណឹងល្អរៀបរាប់ដោយលោកយេស៊ូ
ថ្ងៃទី១ ខែតុលា ឆ្នាំ២០២៤
ក្នុងចំណោមព្រឹត្តិការណ៍ផ្សេងៗដែលសាក្សីព្រះយេហូវ៉ាទន្ទឹងរង់ចាំជាងគេក្នុងឆ្នាំនេះ គឺការចេញភាពយន្តដំណឹងល្អរៀបរាប់ដោយលោកយេស៊ូ ភាគទី១។ តាមពិត ភាពយន្តទាំងមូលមាន១៨ភាគ ហើយនេះគ្រាន់តែភាគទី១ប៉ុណ្ណោះ! មនុស្សរាប់លាននាក់បានទស្សនាភាគនេះរួចហើយ។ តើមានកិច្ចការអ្វីខ្លះដែលយើងមិនបានដឹងស្ដីអំពីការផលិតភាពយន្តនេះ។ តើអ្នកបានគាំទ្រកិច្ចការនេះយ៉ាងដូចម្ដេច?
ការផ្គត់ផ្គង់តួសម្ដែងនិងអ្នកថត
ឈុតជាច្រើននៃភាពយន្តដំណឹងល្អបានត្រូវថតនៅការិយាល័យសាខាអូស្ត្រាឡាស៊ី ក្នុងការថតឈុតនីមួយៗត្រូវការបងប្អូនប្រហែល៥០ទៅ៨០នាក់។ a ដូច្នេះហើយ ពួកគាត់ត្រូវការអាហារសម្រន់ អាហារពេលថ្ងៃ និងពេលល្ងាច។ ហើយអាហារទាំងនោះត្រូវរៀបចំទុកជាមុន។ បងអេសធើរដែលបម្រើនៅផ្នែកផ្គត់ផ្គង់អាហារបានរៀបរាប់ថា៖«ដើម្បីបានអាហារដែលមានគុណភាពល្អនិងតម្លៃសមរម្យ យើងត្រូវទៅទិញពីផ្សារផ្សេងៗ ហើយយើងឧស្សាហ៍ដូរមុខម្ហូបដើម្បីកុំឲ្យបងប្អូនធុញ»។ ដូច្នេះ ជារៀងរាល់ថ្ងៃយើងចំណាយប្រហែលបួនដុល្លារអាម៉េរិកទៅលើអាហារសម្រាប់បងប្អូនម្នាក់ៗ។
តួសម្ដែងនិងអ្នកថតមិនគ្រាន់តែត្រូវការអាហារប៉ុណ្ណោះទេ តែពួកគាត់ក៏ត្រូវការការពារដែរ។ តើការពារពីអ្វី? ធម្មតា នៅប្រទេសអូស្ត្រាលីមានកម្ដៅថ្ងៃនិងពន្លឺច្រើន។ ប៉ុន្តែក៏មានគ្រោះថ្នាក់ដែរ ព្រោះមានពន្លឺកាំរស្មីស្វ័យអ៊ុយត្រាខ្ពស់។ ដើម្បីកាត់បន្ថយគ្រោះថ្នាក់និងដើម្បីការពារពីពន្លឺថ្ងៃ បងប្អូនដែលជាជំនួយការខាងការផលិតភាពយន្ត បានរៀបចំតង់និងកន្លែងផ្សេងៗដែលមានសីតុណ្ហភាពត្រជាក់ ហើយពួកគាត់ក៏បានរៀបចំឲ្យមានឆ័ត្រ ឡេការពារកម្ដៅថ្ងៃ និងទឹកឲ្យបានគ្រប់គ្រាន់ដែរ។ បងខេវិនដែលបម្រើនៅផ្នែកថតសំឡេងនិងវីដេអូ បានរៀបរាប់ថា៖«បងប្អូនដែលជាអ្នកជំនួយទាំងនោះគឺជាអ្នកបម្រើនៅបេតអែលមិនពេញពេល ពួកគាត់ធ្វើកិច្ចការទាំងនេះនិងកិច្ចការជាច្រើនទៀត ដោយអំណរនិងចិត្តរាបទាប។ បើគ្មានជំនួយពីពួកគាត់ យើងមិនអាចសម្រេចគម្រោងនេះបានទេ»។
ការថតនៅឆ្ងាយពីការិយាល័យសាខា
ឈុតខ្លះមិនអាចឃើញដូចទិដ្ឋភាពពិតៗទេ បើថតនៅការិយាល័យសាខាឬស្ទូឌីយ៉ូសម្រាប់ថតភាពយន្ត។ ក្នុងករណីនេះ គឺតម្រូវឲ្យថតនៅទីតាំងផ្សេង។ ដូច្នេះ ដើម្បីឲ្យមើលទៅដូចទិដ្ឋភាពនៅសម័យបុរាណ ដែលគ្មានខ្សែភ្លើង គ្មានផ្លូវជាតិ និងអគារទំនើបៗ ជាញឹកញយតួសម្ដែងនិងអ្នកថតត្រូវធ្វើដំណើរទៅកន្លែងឆ្ងាយៗ។ ពេលនោះ ត្រូវដឹកជញ្ជូនសម្លៀកបំពាក់សម្រាប់តួសម្ដែងនិងឧបករណ៍ផ្សេងៗសម្រាប់ថត ហើយក៏ត្រូវសង់កន្លែងមួយសម្រាប់ដាក់ឥវ៉ាន់សម្រាប់ថតដែរ។ មុននឹងចាប់ផ្ដើមថត ជំនួយការខាងការចាត់ចែង រៀបចំឲ្យមានម៉ាស៊ីនភ្លើង ទឹកស្អាតសម្រាប់ពិសា និងបន្ទប់ទឹកគ្រប់គ្រាន់។ តួសម្ដែងនិងអ្នកថតត្រូវការកន្លែងស្នាក់នៅ ដូច្នេះ ពួកគាត់ស្នាក់នៅផ្ទះបងប្អូនរួមជំនឿដែលនៅតំបន់នោះ ក្នុងឡានសណ្ដោង ក្នុងសណ្ឋាគារ ឬកាប៊ីនជាដើម។
ជួនកាល ការថតភាពយន្តអាចមានការពិបាកផ្សេងៗ
ការទៅថតនៅទីតាំងផ្សេងៗ ត្រូវការចំណាយខ្ពស់ ស៊ីពេលវេលានិងកម្លាំងជាច្រើន។ ដូច្នេះ នៅឆ្នាំ២០២៣ គណៈអភិបាលបានអនុញ្ញាតឲ្យទិញផ្ទាំងវីដេអូខ្នាតធំ ដែលមានតម្លៃពីរលានប្រាំសែនដុល្លារអាម៉េរិកសម្រាប់ថតទិដ្ឋភាពផ្សេងៗ។ ពេលតួសម្ដែងឈរនៅមុខផ្ទាំងវីដេអូនោះ វីដេអូនោះចេញមកដូចជាតួសម្ដែងបានថតនៅក្នុងទិដ្ឋភាពនោះផ្ទាល់ ហើយមានភ្លើងដែលប្រែប្រួលតាមពន្លឺស្របទៅតាមទិដ្ឋភាពក្នុងផ្ទាំងវីដេអូនោះដែរ។ ជាលទ្ធផល យើងមិនចាំបាច់ត្រូវទៅថតកន្លែងឆ្ងាយៗរាល់ដងនោះទេ។ បងដារិនដែលជាសមាជិកគណៈកម្មាធិការការិយាល័យសាខាអូស្ត្រាឡាស៊ី បានរៀបរាប់ថា៖«ការថតដោយប្រើផ្ទាំងវីដេអូនោះ ជួយឲ្យតួសម្ដែងមិនអស់កម្លាំងពេក និងជួយអ្នកថតអាចថតម្ដងហើយម្ដងទៀតបាន។ ជាឧទាហរណ៍ បើយើងថតនៅខាងក្រៅ យើងអាចថតទិដ្ឋភាពថ្ងៃលិចបានតែប៉ុន្មាននាទីប៉ុណ្ណោះមុនវាលិចបាត់ទៅ។ ប៉ុន្តែ បើយើងថតដោយប្រើផ្ទាំងវីដេអូ យើងអាចបង្កើតទិដ្ឋភាពថ្ងៃលិចប៉ុន្មានដងក៏បានរហូតដល់យើងថតត្រូវ»។
ការដំឡើងផ្ទាំងវីដេអូខ្នាតធំមុនថត
«ខ្ញុំមានអារម្មណ៍ថាការមកទីនេះមិនមែនជាការលះបង់ទេ»
ដើម្បីថតភាពយន្តដំណឹងល្អមួយភាគៗ គឺត្រូវការតួសម្ដែងរាប់រយនាក់និងអ្នកថតជាច្រើននាក់។ តើពួកគេមានអារម្មណ៍យ៉ាងចំពោះអ្វីដែលបងប្អូនធ្វើដើម្បីថែរក្សាពួកគេ?
បងអាំប៊ឺដែលរស់នៅក្រុងមែលប៊ន បានធ្វើដំណើរជាង៧០០គីឡូម៉ែត្រ ដើម្បីចូលរួមក្នុងកិច្ចការនេះ។ គាត់បានសរសេរថា៖«គ្រាន់តែមកដល់ព្រលានយន្តហោះភ្លាម បងប្អូនបេតអែលបានទទួលរាក់ទាក់ខ្ញុំយ៉ាងកក់ក្ដៅ។ បងប្អូនបេតអែលជាច្រើនបានអញ្ជើញខ្ញុំពិសាអាហារនិងផឹកតែជាមួយគ្នា។ ពួកគាត់ធ្វើឲ្យខ្ញុំមានអារម្មណ៍ស្រួល ហើយខ្ញុំទទួលអារម្មណ៍ថាពួកគាត់ស្រឡាញ់ខ្ញុំខ្លាំងណាស់។ ខ្ញុំមានអារម្មណ៍ថាការមកទីនេះមិនមែនជាការលះបង់ទេ តែខ្ញុំទទួលពរជាច្រើនវិញ»។
បងឌឺរីកដែលបម្រើនៅក្រុមចាត់ចែងការថតវីដេអូ បានរៀបរាប់ថា៖«តាំងពីគម្រោងនេះចាប់ផ្ដើម ផ្នែកជាច្រើនបានជួយគាំទ្រយើងយ៉ាងពេញទំហឹង។ ខ្ញុំពិតជាមានចិត្តដឹងគុណណាស់ចំពោះបងប្អូនដែលបានលះបង់ពេលវេលា កម្លាំង និងធនធានរបស់ខ្លួនដើម្បីគម្រោងនេះ។ ពួកគាត់ស្ម័គ្រចិត្តជួយនិងមានចិត្តសប្បុរស។ ព្រះយេហូវ៉ាបានឲ្យពរយើងនិងពួកគាត់។ ខ្ញុំជឿជាក់ថាព្រះយេហូវ៉ាមិនគ្រាន់តែចាប់អារម្មណ៍ចំពោះលទ្ធផលពីកិច្ចការរបស់យើងប៉ុណ្ណោះទេ តែលោកក៏ចាប់អារម្មណ៍ចំពោះរបៀបដែលយើងសម្រេចកិច្ចការទាំងនោះដែរ»។
ការផលិតភាពយន្តនេះអាចដំណើរការទៅបាន គឺដោយមានវិភាគទានរបស់បងប្អូន រួមទាំងវិភាគទានដែលបងប្អូនបានជូនតាមគេហទំព័រdonate.mt1130.com។ យើងពិតជាអរគុណបងប្អូនខ្លាំងណាស់ដែលបានគាំទ្រកិច្ចការនេះ។
a ការិយាល័យសាខាអូស្ត្រាឡាស៊ី ត្រួតពិនិត្យកិច្ចការរបស់យើងនៅប្រទេសជាច្រើន រួមបញ្ចូលប្រទេសអូស្ត្រាលីនិងប្រទេសមួយចំនួនដែលនៅប៉ាស៊ីហ្វិកខាងត្បូង។ ហើយការិយាល័យសាខានេះមានទីតាំងនៅជាយក្រុងស៊ីដនីនៃប្រទេសអូស្ត្រាលី។
លោកអ្នកក៏ប្រហែលជាចូលចិត្តដែរ
វីដេអូ
ដំណឹងល្អរៀបរាប់ដោយលោកយេស៊ូ
នៅក្នុងវីដេអូតភាគដ៏គួរឲ្យរំភើបចិត្តនេះ សូមរៀនថែមទៀតអំពីលោកយេស៊ូគ្រិស្តដែលជាបុត្ររបស់ព្រះ និងជាអ្នកសង្គ្រោះមនុស្សជាតិ។
របៀបដែលវិភាគទានរបស់អ្នកបានត្រូវប្រើ
កម្មវិធីមហាសន្និបាតដែលពួកគេ«បានឮនិងបានឃើញ»
សូមស្វែងយល់ថាតើមានកិច្ចការអ្វីខ្លះដើម្បីឲ្យយើងអាចឃើញនិងឮកម្មវិធីមហាសន្និបាតរបស់យើង។
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើកិច្ចការរបស់សាក្សីព្រះយេហូវ៉ាទទួលប្រាក់ឧបត្ថម្ភយ៉ាងដូចម្ដេច?
យើងជៀសវាងមិនប្រើវិធីដូចដែលវិហារជាច្រើនប្រើទេ។
