ប្រាជ្ញាពីបុរាណមានប្រយោជន៍សម្រាប់សម័យយើង
កុំខ្វល់ខ្វាយអ្វីឡើយ
គោលការណ៍គម្ពីរ: «ឈប់ខ្វល់ខ្វាយអំពីជីវិតខ្លួន»។—ម៉ាថាយ ៦:២៥
តើនេះមានន័យយ៉ាងណា? លោកយេស៊ូបានមានប្រសាសន៍ពាក្យទាំងនេះ ពេលលោកថ្លែងសុន្ទរកថានៅលើភ្នំ។ យោងតាមវចនានុក្រមគម្ពីរមួយ កិរិយាស័ព្ទក្រិចដែលបានត្រូវបកប្រែថា«ខ្វល់ខ្វាយ» សំដៅលើ«ប្រតិកម្មដែលមនុស្សមានជាធម្មតា ពេលពួកគេជួបនឹងភាពក្រីក្រ ការអត់ឃ្លាន និងបញ្ហាផ្សេងទៀតដែលពួកគេមានក្នុងជីវិតប្រចាំថ្ងៃ»។ ការខ្វល់ខ្វាយច្រើនតែទាក់ទងនឹងការព្រួយបារម្ភអំពីអ្វីនៅថ្ងៃខាងមុខ។ គឺជាការត្រឹមត្រូវនិងជាការធម្មតាទេ ដែលយើងគិតអំពីសេចក្ដីត្រូវការរបស់ខ្លួន និងការទំនុកបម្រុងអ្នកដែលយើងស្រឡាញ់។ (ភីលីព ២:២០) ប៉ុន្ដែ ពេលលោកយេស៊ូមានប្រសាសន៍ថា៖ «កុំខ្វល់ខ្វាយឲ្យសោះ» លោកចង់ឲ្យដំបូន្មានពួកអ្នកកាន់តាមលោកកុំឲ្យមានការខ្វល់ខ្វាយណាដែលមិនចាំបាច់ ពោលគឺការខ្លាចហួសហេតុពេកថាអាចបំពេញសេចក្ដីត្រូវការសម្រាប់ថ្ងៃស្អែកឬយ៉ាងណា។ ការបារម្ភខ្លាចបែបនោះអាចធ្វើឲ្យយើងលែងមានអំណរចំពោះការរស់នៅថ្ងៃនេះ។—ម៉ាថាយ ៦:៣១, ៣៤
តើមានប្រយោជន៍នៅសព្វថ្ងៃនេះឬទេ? ជាការល្អឲ្យយើងស្តាប់តាមដំបូន្មានរបស់លោកយេស៊ូ។ ហេតុអ្វី? ឯកសារយោងខ្លះជូនយោបល់ថា ពេលមនុស្សព្រួយបារម្ភខ្លាំងពេក ប្រព័ន្ធសរសៃប្រសាទរបស់ពួកគេមានដំណើរការឥតឈប់ ហើយនោះបណ្ដាលឲ្យពួកគេ«មានបញ្ហាសុខភាព រួមមានដំបៅក្រពះ ជំងឺបេះដូង និងជំងឺហឺតជាដើម»។
លោកយេស៊ូបានផ្ដល់មូលហេតុមួយដែលជំរុញចិត្ដយើងកុំឲ្យមានកង្វល់ដែលមិនចាំបាច់ ព្រោះនោះអត់ប្រយោជន៍ទេ។ លោកយេស៊ូបានសួរថា៖ «បើអ្នកខ្វល់ខ្វាយ តើអ្នកអាចធ្វើឲ្យអាយុជីវិតខ្លួនវែងជាង សូម្បីតែបន្ដិចបានឬទេ?»។ (ម៉ាថាយ ៦:២៧) ការចេះតែព្រួយបារម្ភគឺមិនអាចពន្យារអាយុជីវិតរបស់យើងឲ្យបានវែងជាង សូម្បីតែមួយវិនាទីបានឡើយ ហើយក៏មិនអាចធ្វើឲ្យជីវិតរបស់យើងប្រសើរជាងបានដែរ។ ម្យ៉ាងវិញទៀត អ្វីៗច្រើនតែមិនកើតឡើងដូចដែលយើងបារម្ភខ្លាចនោះទេ។ បណ្ឌិតម្នាក់បាននិយាយថា៖ «ការបារម្ភអំពីថ្ងៃខាងមុខគឺនាំឲ្យតែខាតប៉ុណ្ណោះ ហើយអ្វីដែលកើតឡើងនៅថ្ងៃខាងមុខគឺកម្រដូចអ្វីដែលយើងបារម្ភនោះណាស់»។
តើធ្វើដូចម្ដេចកុំឲ្យយើងខ្វល់ខ្វាយ? ទី១ ទុកចិត្ដទៅលើព្រះ។ បើព្រះផ្ដល់ចំណីឲ្យសត្វស្លាបនិងតុបតែងផ្កាយ៉ាងស្អាត លោកច្បាស់ជាផ្ដល់អ្វីដែលចាំបាច់ជាមិនខានដល់មនុស្សដែលចាត់ទុកការគោរពប្រណិប័តន៍លោកជាអ្វីដែលសំខាន់បំផុតក្នុងជីវិត។ (ម៉ាថាយ ៦:២៥, ២៦, ២៨-៣០) ទី២ គិតមួយថ្ងៃៗ។ លោកយេស៊ូមានប្រសាសន៍ថា៖ «កុំខ្វល់ខ្វាយអំពីថ្ងៃស្អែកឲ្យសោះ ពីព្រោះថ្ងៃស្អែកនឹងមានកង្វល់សម្រាប់ថ្ងៃស្អែក»។ ម្យ៉ាងទៀត «សេចក្ដីអាក្រក់នៅថ្ងៃនីមួយៗ គឺល្មមសម្រាប់ថ្ងៃនោះ» មែនទេ?—ម៉ាថាយ ៦:៣៤
បើយើងធ្វើតាមដំបូន្មានដែលប្រកបដោយប្រាជ្ញារបស់លោកយេស៊ូ យើងអាចរួចពីបញ្ហាសុខភាពមួយចំនួន។ លើសពីនោះទៅទៀត យើងនឹងមានចិត្ដស្ងប់ដែលគម្ពីរហៅថា«សេចក្ដីសុខសាន្ដរបស់ព្រះ»។—ភីលីព ៤:៦, ៧
លោកអ្នកក៏ប្រហែលជាចូលចិត្តដែរ
សំណួរនិងចម្លើយពីគម្ពីរ
តើខ្ញុំអាចរកពាក្យដែលសម្រាលទុក្ខខ្ញុំក្នុងគម្ពីរបានទេ?
គម្ពីរអាចសម្រាលទុក្ខមនុស្សជាច្រើនដែលកំពុងជួបនឹងវិបត្តិផ្លូវចិត្តនិងស្ថានភាពពិបាក។
សេចក្ដីបង្រៀនសំខាន់ៗពីគម្ពីរ
តើយើងអាចរកឃើញចម្លើយអំពីចម្ងល់នៃជីវិតនៅឯណា?
តើអ្នកធ្លាប់សួរសំណួរដែលទាក់ទងនឹងជីវិត សេចក្ដីស្លាប់ ឬអនាគតទេ? យើងអាចរកឃើញចម្លើយចំពោះសំណួរទាំងនេះនិងសំណួរជាច្រើនទៀត! ប៉ុន្តែ តើអាចរកនៅឯណា?
