តើសាសនាទាំងអស់ពិតជាល្អទេ?
តើសាសនាទាំងអស់ពិតជាល្អទេ?
យើងរស់នៅក្នុងពិភពលោកដែលមានសាសនានិងនិកាយច្រើនរាប់មិនអស់។ នៅពេលថ្មីៗនេះ ការស្ទង់មតិមួយបានបញ្ជាក់ថា នៅទូទាំងពិភពលោកមានសាសនាធំៗ១៩ ហើយសាសនាតូចៗមានជាង១០.០០០។ ដោយហេតុនេះ មនុស្សមានជម្រើសច្រើនជាងមុនស្តីអំពីសាសនា។ បើដូច្នេះ តើជម្រើសសាសនាជារឿងសំខាន់ទេ?
មនុស្សខ្លះនិយាយថាសាសនាផ្សេងៗគឺប្រៀបដូចជាផ្លូវផ្សេងៗដែលនាំយើងទៅលើភ្នំតែមួយ។ សម្រាប់ពួកគេ រើសផ្លូវមួយណាក៏បានដែរ ព្រោះផ្លូវទាំងអស់នាំទៅកន្លែងតែមួយ។ ពួកគេវែកញែកថា មានព្រះតែមួយគត់ដែលមានអំណាចខ្លាំងក្លាបំផុត ដូច្នេះនៅទីបំផុត សាសនាទាំងអស់នាំទៅដល់ព្រះ។
តើសាសនាទាំងអស់នាំទៅរកកន្លែងតែមួយទេ?
ក្នុងប្រវត្ដិសាស្ត្រ លោកយេស៊ូជាអ្នកបង្រៀនសាសនាដែលគេគោរព តើលោកមានប្រសាសន៍យ៉ាងណាស្តីអំពីរឿងនេះ? លោកបានប្រាប់អ្នកកាន់តាមលោកថា៖ «ចូរចូលតាមខ្លោងទ្វារតូច»។ ហេតុអ្វី? «ពីព្រោះផ្លូវដែលនាំទៅដល់ការវិនាសជីវិត គឺធំហើយទូលាយផង ក៏មានមនុស្សច្រើនចូលតាមផ្លូវនោះ។ រីឯផ្លូវដែលទៅឯជីវិត នោះចង្អៀត ក៏មានខ្លោងទ្វារតូចផង ហើយមានមនុស្សតិចណាស់ដែលរកផ្លូវនោះឃើញ»។—ម៉ាថាយ ៧:១៣, ១៤
តើលោកយេស៊ូពិតជាចង់មានប្រសាសន៍ថាសាសនាខ្លះនឹងនាំឲ្យ«វិនាសជីវិត»មែនទេ? ឬតើលោកចង់បង្រៀនថា មានតែអ្នកដែលមិនជឿព្រះប៉ុណ្ណោះដែលនៅផ្លូវទូលាយ រីឯអ្នកដែលជឿព្រះវិញ មិនថាកាន់សាសនាណាក៏ដោយ ពួកគេនៅផ្លូវចង្អៀតដែលនាំទៅឯជីវិតដែលគ្មានទីបញ្ចប់?
ក្រោយពីលោកយេស៊ូបានរៀបរាប់ថាមានតែផ្លូវពីរ នោះភ្លាមៗលោកមានប្រសាសន៍ថា៖ «ចូរប្រយ័ត្ននឹងពួកព្យាការីក្លែងក្លាយ គេក្លែងខ្លួនមករកអ្នករាល់គ្នា ដោយពាក់ស្បែកចៀម តែគេមានចិត្តសាហាវដូចចចក»។ (ម៉ាថាយ ៧:១៥, ខ.ស.) ក្រោយមកលោកមានប្រសាសន៍ថា៖ «មិនមែនអស់អ្នកណាដែលគ្រាន់តែនិយាយមកខ្ញុំថា‹ឱព្រះអម្ចាស់ៗអើយ!› ដែលនឹងចូលទៅក្នុងនគរស្ថានសួគ៌នោះទេ គឺជាអស់អ្នកដែលធ្វើតាមព្រះហឫទ័យនៃព្រះវរបិតា ដែលគង់នៅស្ថានសួគ៌វិញទេតើ!»។ (ម៉ាថាយ ៧:២១, សមាគមខ្មែរនៃព្រះគម្ពីរបរិសុទ្ធ) ប្រសិនបើបុគ្គលម្នាក់ជាព្យាការីឬអះអាងថាលោកយេស៊ូជា«ព្រះអម្ចាស់»របស់គាត់ នោះគឺសមហេតុសមផលឲ្យយើងសន្និដ្ឋានថា គាត់ជាអ្នកដែលជឿព្រះ មិនមែនជាបុគ្គលដែលមិនជឿព្រះទេ។ ច្បាស់ហើយ លោកយេស៊ូបានព្រមានថា មិនមែនសាសនាទាំងអស់សុទ្ធតែល្អ ហើយយើងមិនគួរទុកចិត្តអ្នកបង្រៀនសាសនាទាំងអស់ដែរ។
តើផ្លូវមួយណាជាផ្លូវចង្អៀត?
ដោយសារសាសនាទាំងអស់មិននាំទៅព្រះ តើលោកអ្នកអាចរកឃើញសាសនាត្រឹមត្រូវក្នុងចំណោមសាសនារាប់ពាន់យ៉ាងដូចម្ដេចបាន? សូមពិចារណាអំពីឧទាហរណ៍នេះ។ លោកអ្នកវង្វេងក្នុងទីក្រុងធំមួយ ហើយបានសម្រេចចិត្តសុំជំនួយពីអ្នកដទៃ។ បុគ្គលម្នាក់បាននិយាយដោយជឿជាក់ថា លោកអ្នកត្រូវធ្វើដំណើរឆ្ពោះទៅទិសខាងកើត។ បុគ្គលម្នាក់ទៀតថា ត្រូវទៅទិសខាងលិចវិញ។ តែម្នាក់ទៀតឲ្យយោបល់ថា លោកអ្នកអាចរើសផ្លូវណាក៏បានដែលស្រួលសម្រាប់លោកអ្នក។ នៅចុងបំផុត បុគ្គលមួយទៀតបានយកផែនទីដែលអាចទុកចិត្តបាន ហើយបង្ហាញលោកអ្នកផ្លូវត្រឹមត្រូវ។ ក្រោយមក គាត់ឲ្យផែនទីនោះដើម្បីលោកអ្នកអាចមើលផ្លូវពេលធ្វើដំណើរ។ លោកអ្នកពិតជាមានទំនុកចិត្តថានឹងអាចទៅដល់កន្លែងដែលលោកអ្នកចង់ទៅ មែនទេ?
ដូចគ្នាដែរ ពេលពិចារណាថាយើងនឹងកាន់សាសនាមួយណា យើងត្រូវការការណែនាំដែលអាចទុកចិត្តបាន ប្រៀបដូចជាផែនទីដែលបង្ហាញផ្លូវ។ តើមានផែនទីបែបនេះទេ? ពិតជាមានមែន។ ផែនទីនោះគឺគម្ពីរបរិសុទ្ធ ហើយគម្ពីរនោះចែងថា៖ «គ្រប់ទាំងបទគម្ពីរបានត្រូវសរសេរក្រោមការដឹកនាំរបស់ព្រះ ហើយមានប្រយោជន៍សម្រាប់បង្រៀន កែតម្រង់ ធ្វើឲ្យត្រឹមត្រូវឡើងវិញ និងប្រដៅក្នុងផ្លូវសុចរិត»។—ធីម៉ូថេទី២ ៣:១៦
លោកអ្នកប្រហែលជាមានគម្ពីរបរិសុទ្ធក្នុងភាសាកំណើតរបស់ខ្លួន ដែលលោកអ្នកអាចប្រើដើម្បីទទួលការណែនាំស្តីអំពីការគោរពប្រណិប័តន៍ព្រះយ៉ាងត្រឹមត្រូវ។ សាក្សីព្រះយេហូវ៉ាដែលជាអ្នកបោះពុម្ពទស្សនាវដ្ដីនេះ បានបោះពុម្ពគម្ពីរបរិសុទ្ធមួយដែលអាចទុកចិត្តបានដែលហៅថា សេចក្ដីបកប្រែពិភពលោកថ្មីពីបទគម្ពីរគ្រិស្តសាសនិកជាភាសាក្រិច។ ក៏ប៉ុន្តែ បើលោកអ្នកមិនមែនជាសាក្សីព្រះយេហូវ៉ា លោកអ្នកប្រហែលជាចូលចិត្តប្រើសេចក្ដីបកប្រែគម្ពីរឯទៀត ពេលពិចារណាអំពីវិធីសម្គាល់សាសនាល្អនិងសាសនាមិនល្អ។ ហេតុនេះហើយបានជាអត្ថបទបន្តបន្ទាប់នេះ ដកស្រង់ពាក្យពីសេចក្ដីបកប្រែគម្ពីរមួយចំនួនដែលសាសនាឯទៀតគោរពជាទូទៅ។
កាលដែលលោកអ្នកអានអត្ថបទបន្តបន្ទាប់ សូមប្រៀបធៀបអ្វីដែលលោកអ្នកដឹងនឹងអ្វីដែលគម្ពីរបានរៀបរាប់។ សូមកុំភ្លេចប្រសាសន៍របស់លោកយេស៊ូស្តីអំពីវិធីដែលយើងអាចសម្គាល់សាសនាល្អក្នុងចំណោមសាសនាមិនល្អ។ លោកបានមានប្រសាសន៍ថា៖ «ដើមឈើល្អតែងផ្ដល់ផ្លែល្អ រីឯដើមឈើអាក្រក់តែងផ្ដល់ផ្លែអាក្រក់។ ដើមឈើល្អមិនអាចផ្ដល់ផ្លែអាក្រក់ទេ រីឯដើមឈើអាក្រក់ក៏មិនអាចផ្ដល់ផ្លែល្អបានដែរ»។ (ម៉ាថាយ ៧:១៧, ១៨, ព្រះគម្ពីរដ៏វិសុទ្ធជាភាសាខ្មែរបច្ចុប្បន្ន) សូមពិចារណាផ្លែល្អបីដែលគម្ពីរចែងថានឹងសម្គាល់«ដើមឈើល្អ»។
[ឃ្លាអក្សរធំនៅទំព័រ៣]
គម្ពីរបរិសុទ្ធប្រៀបដូចជាផែនទី ដែលអាចទុកចិត្ត ដែលបង្ហាញផ្លូវនាំទៅរកសាសនាត្រឹមត្រូវ