រាជាណាចក្រព្រះ តើនឹងផ្ដល់ប្រយោជន៍អ្វីខ្លះដល់លោកអ្នក?
អត្ថបទអំពីក្របទស្សនាវដ្ដី | ការគ្រប់គ្រងរបស់ព្រះ តើផ្ដល់ប្រយោជន៍អ្វីខ្លះដល់លោកអ្នក?
រាជាណាចក្រព្រះ តើនឹងផ្ដល់ប្រយោជន៍អ្វីខ្លះដល់លោកអ្នក?
តាមរយៈអត្ថបទមុន លោកអ្នកទំនងជាបានយល់ថារាជាណាចក្រព្រះគឺសំខាន់ខ្លាំងណាស់ចំពោះសាក្សីព្រះយេហូវ៉ា។ ម្យ៉ាងទៀត ប្រហែលជាមានពរខ្លះដែលរាជាណាចក្រនឹងផ្ដល់ឲ្យនៅថ្ងៃអនាគត បានទាក់ទាញចិត្តលោកអ្នក។ ប៉ុន្តែ ទន្ទឹមនឹងនោះលោកអ្នកប្រហែលជាឆ្ងល់ថា សេចក្ដីសន្យាទាំងនោះមើលទៅដូចជាល្អពេក ពិបាកនឹងជឿណាស់។
ពេលលោកអ្នកចេះប្រុងប្រយ័ត្ន មុននឹងជឿអ្វីៗទាំងអស់ដែលលោកអ្នកបានឮ នេះបង្ហាញថាលោកអ្នកជាមនុស្សឆ្លាត។ (សុភាសិត ១៤:១៥) ក្នុងន័យម្យ៉ាង ការចេះប្រុងប្រយ័ត្នរបស់លោកអ្នកគឺស្រដៀងនឹងពួកអ្នកនៅក្រុងបេរៀនៅសម័យបុរាណដែរ។ * ដំបូង ពេលពួកអ្នកនៅក្រុងបេរៀបានឮដំណឹងល្អអំពីរាជាណាចក្រព្រះ ពួកគេបានទទួលដំណឹងល្អនោះ។ នេះមិនគ្រាន់តែដោយសារពួកគេចង់ឲ្យអ្វីដែលពួកគេឮក្លាយទៅជាការពិតប៉ុណ្ណោះទេ តែគឺដោយសារពួកគេបានពិនិត្យមើលបទគម្ពីរយ៉ាងយកចិត្តទុកដាក់«ដើម្បីឲ្យដឹងថាការទាំងនោះជាការពិតឬមិនពិត»។ (សកម្មភាព ១៧:១១) ក្នុងន័យម្យ៉ាងទៀត ពួកអ្នកនៅក្រុងបេរៀបានប្រៀបធៀបដំណឹងល្អដែលពួកគេបានឮ ជាមួយនឹងអ្វីដែលបទគម្ពីរប្រាប់។ ក្រោយមក ពួកគេបានជឿជាក់ថាដំណឹងល្អនោះគឺមានមូលដ្ឋានច្បាស់លាស់ទៅលើបណ្ដាំរបស់ព្រះមែន។
សាក្សីព្រះយេហូវ៉ាសូមអញ្ជើញលោកអ្នកយ៉ាងកក់ក្ដៅឲ្យធ្វើដូច្នោះដែរ។ យើងមានកម្មវិធីបង្រៀនគម្ពីរដោយឥតគិតថ្លៃ។ យើងស្នើសុំឲ្យលោកអ្នកប្រើឱកាសនោះដើម្បីប្រៀបមើលអ្វីដែលសាក្សីព្រះយេហូវ៉ាជឿអំពីរាជាណាចក្រព្រះ ជាមួយនឹងអ្វីដែលគម្ពីរបរិសុទ្ធបង្រៀន។
តាមរយៈកម្មវិធីរៀនគម្ពីរនេះលោកអ្នកអាចរៀនអំពីរាជាណាចក្រព្រះ ហើយបន្ថែមទៅទៀតការរៀនគម្ពីរនេះក៏អាចជួយលោកអ្នករកឃើញចម្លើយដែលទាក់ទងនឹងចម្ងល់អំពីជីវិតដែរ។
• តើជីវិតមនុស្សយើងមកពីណា?
• តើអ្វីជាគោលបំណងនៃជីវិត?
• ហេតុអ្វីព្រះអនុញ្ញាតឲ្យមនុស្សរងទុក្ខវេទនា?
• តើអ្វីកើតឡើងនៅពេលយើងស្លាប់?
• តើផែនដីនឹងត្រូវបំផ្លាញឬ?
• តើអ្វីជាកត្ដាសំខាន់ដើម្បីមានសុភមង្គលក្នុងគ្រួសារ?
សំខាន់បំផុត ការរៀនគម្ពីរនឹងជួយលោកអ្នកឲ្យ«ចូលទៅជិតព្រះ»។ (យ៉ាកុប ៤:៨) ពេលដែលលោកអ្នកចូលទៅកាន់តែជិតព្រះ នោះលោកអ្នកនឹងឃើញកាន់តែច្បាស់នូវរបៀបដែលរាជាណាចក្រព្រះអាចផ្ដល់ប្រយោជន៍ដល់លោកអ្នក គឺមិនគ្រាន់តែនៅឥឡូវនេះទេ តែជារៀងរហូត។ លោកយេស៊ូបានអធិដ្ឋានទៅបិតារបស់លោកថា៖ «ដើម្បីបានជីវិតដែលគ្មានទីបញ្ចប់ ពួកគាត់ត្រូវស្គាល់លោកដែលជាព្រះពិតតែមួយឲ្យបានច្បាស់ ព្រមទាំងយេស៊ូគ្រិស្ត ដែលលោកបានចាត់ឲ្យមក»។—យ៉ូហាន ១៧:៣
សាក្សីព្រះយេហូវ៉ាអាចប្រើសៀវភៅនេះដើម្បីបង្រៀនគម្ពីរលោកអ្នក។
ដើម្បីស្នើសុំរៀនគម្ពីរដោយឥតគិតថ្លៃ សូមសួរសាក្សីព្រះយេហូវ៉ាណាម្នាក់ ឬបំពេញព័ត៌មានក្នុងwww.mt1130.com/km។ (នៅទំព័រដើម សូមចុចស្នើសុំរៀនគម្ពីរ)
[កំណត់សម្គាល់]
^ វគ្គ 4 ក្រុងបេរៀជាក្រុងមួយនៅតំបន់ម៉ាសេដូននៅសម័យបុរាណ។
[ប្រអប់នៅទំព័រ៩]
ហេតុអ្វីរាជាណាចក្រព្រះសំខាន់ចំពោះនាង?
ពេលថ្មីៗនេះ ក្មេងស្រីអាយុ១០ឆ្នាំម្នាក់ ឈ្មោះហ្វូឡាកេ បានធ្វើលំហាត់តែងសេចក្ដីមួយដែលមានប្រធានថា«អ្វីដែលខ្ញុំចូលចិត្តជាងគេបំផុតក្នុងពិភពលោកនេះ»។ ហ្វូឡាកេបានសម្រេចសរសេរតែងសេចក្ដីអំពីមូលហេតុដែលនាងចូលចិត្តយ៉ាងខ្លាំងក្នុងការប្រាប់អ្នកឯទៀតអំពីរាជាណាចក្រព្រះ។
ហ្វូឡាកេបានពន្យល់ថា៖ «រាជាណាចក្រព្រះគឺជារដ្ឋាភិបាលពិតប្រាកដ ប៉ុន្តែអ្នកមិនអាចមើលឃើញទេ ទោះបីអ្នកពាក់វ៉ែនតាក៏ដោយ!»។
ហ្វូឡាកេបានបន្តសរសេរអំពីពរដែលមកពីរាជាណាចក្រព្រះ ជាពិសេសអំពីពរដែលនាងកំពុងរង់ចាំដោយចិត្តរំភើប។ ពេលនាងរៀបរាប់អំពីបញ្ហាខ្លះៗដែលរាជាណាចក្រព្រះនឹងដោះស្រាយ នាងបានសរសេរថា៖ «ខ្ញុំពិបាកចិត្តពេលខ្ញុំឃើញមនុស្សរស់នៅតាមផ្លូវដោយគ្មានផ្ទះសម្បែង ហើយក្មេងជាច្រើននៅប្រទេសផ្សេងៗបានស្លាប់ដោយគ្មានអាហារគ្រប់គ្រាន់»។ នាងបានបន្ថែមទៀតថា៖ «ប៉ុន្តែ ខ្ញុំសប្បាយចិត្តឡើងវិញពេលខ្ញុំអាន អេសាយ ៦៥:២១»។ ស្តីអំពីមនុស្សដែលនឹងរស់នៅក្រោមការគ្រប់គ្រងរបស់រាជាណាចក្រព្រះ ខគម្ពីរនេះសន្យាថា៖ «មនុស្សនឹងសង់ផ្ទះ ហើយនឹងអាស្រ័យនៅផង ក៏នឹងដាំចំការទំពាំងបាយជូរ ហើយនឹងបរិភោគផលដែរ»។
ហ្វូឡាកេក៏បាននិយាយទៀតថា នាងកំពុងរង់ចាំដោយចិត្តរំភើបនូវគ្រាដែលព្រះនឹងបំបាត់ជំងឺទាំងអស់តាមរយៈរាជាណាចក្ររបស់លោក។ ក្នុងតែងសេចក្ដីនោះ នាងបានដកស្រង់បទគម្ពីរ ការបើកបង្ហាញ ២១:៤ ដែលចែងថា ព្រះ«នឹងជូតអស់ទាំងទឹកភ្នែកចេញពីភ្នែករបស់ពួកគេ ហើយសេចក្ដីស្លាប់នឹងលែងមានទៀត ទុក្ខព្រួយ ការស្រែកយំ និងការឈឺចាប់ក៏នឹងលែងមានទៀតដែរ។ អ្វីៗដែលធ្លាប់កើតឡើងពីមុន នោះបានកន្លងបាត់អស់ហើយ»។ នាងបានបញ្ចប់តែងសេចក្ដីនោះដោយរៀបរាប់ម្ដងទៀតថា ការនិយាយអំពីព្រះយេហូវ៉ានិងរាជាណាចក្ររបស់លោកគឺជាអ្វីដែលនាងចូលចិត្តជាងគេបំផុតក្នុងពិភពលោកនេះ។ ដូច្នេះ នេះបញ្ជាក់យ៉ាងច្បាស់ថា រាជាណាចក្រព្រះពិតជាសំខាន់ណាស់ចំពោះក្មេងស្រីនេះ!
លោកអ្នកក៏ប្រហែលជាចូលចិត្តដែរ
សៀវភៅផ្សេងៗ
តើអាចរកបានវិធីមានជីវិតល្អនៅឯណា?
តើលោកអ្នកគិតថាក្នុងសៀវភៅវិទ្យាសាស្ត្រ ទស្សនវិជ្ជា ឬគម្ពីរបរិសុទ្ធ?
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើការរៀនគម្ពីរជាមួយសាក្សីព្រះយេហូវ៉ាគឺយ៉ាងណា?
ការរៀនគម្ពីរជាមួយសាក្សីព្រះយេហូវ៉ាគឺឥតគិតថ្លៃ។ លោកអ្នកអាចប្រើសេចក្ដីបកប្រែណាក៏បាន។ លោកអ្នកអាចអញ្ជើញមិត្តភក្ដិ ឬក្រុមគ្រួសារឲ្យចូលរួមរៀនជាមួយគ្នា។
