ហេតុអ្វីសាក្សីព្រះយេហូវ៉ារក្សាអព្យាក្រឹតភាពក្នុងរឿងនយោបាយ?
សាក្សីព្រះយេហូវ៉ារក្សាអព្យាក្រឹតភាពក្នុងរឿងនយោបាយ គឺមានមូលដ្ឋានលើសេចក្ដីបង្រៀនក្នុងគម្ពីរ។ យើងមិនព្យាយាមមានឥទ្ធិពលលើអ្នកនយោបាយ ឬក្លាយទៅជាអ្នកនយោបាយឡើយ។ យើងក៏មិនបោះឆ្នោតឲ្យគណបក្សនយោបាយ ឬបេក្ខជនណាមួយដែរ។ ម្យ៉ាងទៀត យើងមិនចូលរួមក្នុងសកម្មភាពណាមួយដើម្បីផ្លាស់ប្ដូររដ្ឋាភិបាលនោះទេ។ ការដែលយើងធ្វើដូច្នេះ ក៏ព្រោះតែយើងដឹងថាគម្ពីរមានមូលហេតុច្បាស់លាស់ដូចបញ្ជាក់នៅខាងក្រោមនេះ៖
យើងធ្វើតាមគំរូរបស់លោកយេស៊ូដែលបានបដិសេធទទួលយកមុខតំណែងក្នុងរដ្ឋាភិបាល។ (យ៉ូហាន ៦:១៥) លោកបានបង្រៀនសាវ័ករបស់លោកថា ពួកគេ«មិនរួមចំណែកក្នុងពិភពលោកទេ» ហើយលោកបានបញ្ជាក់យ៉ាងច្បាស់ថា ពួកគេមិនគួរគាំទ្រក្នុងរឿងនយោបាយឡើយ។—យ៉ូហាន ១៧:១៤, ១៦; ១៨:៣៦; ម៉ាកុស ១២:១៣-១៧
យើងមានភក្ដីភាពចំពោះរាជាណាចក្ររបស់ព្រះ ដូចដែលលោកយេស៊ូមានប្រសាសន៍ថា៖«ដំណឹងល្អនេះអំពីរាជាណាចក្រនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី»។ (ម៉ាថាយ ២៤:១៤) ក្នុងនាមជាអ្នកតំណាងរាជាណាចក្ររបស់ព្រះ យើងបានត្រូវចាត់ឲ្យប្រកាសអំពីការមកដល់នៃរាជាណាចក្រនោះ ហើយយើងរក្សាអព្យាក្រឹតភាពក្នុងរឿងនយោបាយគ្រប់ប្រទេសទាំងអស់ រួមបញ្ចូលប្រទេសដែលយើងរស់នៅផងដែរ។—កូរិនថូសទី២ ៥:២០; អេភេសូរ ៦:២០
ដោយរក្សាអព្យាក្រឹតភាព យើងអាចនិយាយដោយសេរីអំពីដំណឹងល្អនៃរាជាណាចក្រព្រះទៅកាន់មនុស្សទាំងអស់ ទោះជាពួកគេគាំទ្រគណបក្សនយោបាយណាក៏ដោយ។ តាមរយ:ពាក្យសម្ដីនិងការប្រព្រឹត្តរបស់យើង យើងព្យាយាមបង្ហាញថាយើងពឹងផ្អែកទៅលើរាជាណាចក្រព្រះដែលនឹងដោះស្រាយបញ្ហាទាំងអស់របស់ពិភពលោកនេះ។—ទំនុកតម្កើង ៥៦:១១
ដោយសារយើងជៀសវាងពីការគាំទ្រម្ខាងៗក្នុងរឿងនយោបាយ យើងមានសាមគ្គីភាពជាបងប្អូនរួមជំនឿនៅទូទាំងពិភពលោក។ (កូឡុស ៣:១៤; ពេត្រុសទី១ ២:១៧) ផ្ទុយទៅវិញ សាសនាដែលគាំទ្រម្ខាងៗក្នុងរឿងនយោបាយ នាំឲ្យមានការបែកបាក់គ្នាក្នុងចំណោមសមាជិករបស់ពួកគេ។—កូរិនថូសទី១ ១:១០
ការគោរពរដ្ឋាភិបាល។ ទោះបីជាយើងមិនរួមចំណែកក្នុងរឿងនយោបាយក៏ដោយ យើងចុះចូលចំពោះអំណាចរបស់រដ្ឋាភិបាលនៅប្រទេសដែលយើងរស់នៅ។ នេះគឺស្របតាមបង្គាប់ក្នុងគម្ពីរដែលចែងថា៖«ចូរឲ្យមនុស្សទាំងអស់ចុះចូលនឹងពួកអាជ្ញាធរ»។ (រ៉ូម ១៣:១) យើងគោរពច្បាប់ យើងបង់ពន្ធ ហើយយើងចុះចូលនឹងរដ្ឋាភិបាល ព្រោះរដ្ឋាភិបាលព្យាយាមថែរក្សាសុខមាលភាពរបស់ប្រជាពលរដ្ឋ។ ជាជាងព្យាយាមប្រឆាំងនឹងរដ្ឋាភិបាល យើងធ្វើតាមឱវាទនៅក្នុងគម្ពីរដោយអធិដ្ឋានឲ្យ«ស្តេចនានា និងអស់អ្នកដែលមានឋានៈខ្ពង់ខ្ពស់» ជាពិសេសពេលដែលពួកគេធ្វើការសម្រេចចិត្តដែលអាចប៉ះពាល់ដល់សេរីភាពនៃការគោរពប្រណិប័តន៍របស់យើង។—ធីម៉ូថេទី១ ២:១, ២
យើងក៏គោរពសិទ្ធិអ្នកឯទៀតចំពោះការសម្រេចចិត្តរបស់ពួកគេក្នុងរឿងនយោបាយដែរ។ ជាឧទាហរណ៍ យើងមិនបង្កបញ្ហាក្នុងការបោះឆ្នោត ឬពាក់ព័ន្ធជាមួយអ្នកឯទៀតក្នុងរឿងបោះឆ្នោតឡើយ។
តើការកាន់ជំហរអព្យាក្រឹតរបស់យើងនៅសព្វថ្ងៃនេះជាអ្វីដែលថ្មីឬទេ? មិនមែនទេ។ សាវ័កប៉ូលនិងគ្រិស្តសាសនិកឯទៀតនៅសតវត្សរ៍ទី១បានរក្សាជំហរអព្យាក្រឹតភាព ដោយមិនរួមចំណែកក្នុងរឿងនយោបាយ។ សៀវភៅមួយបានរៀបរាប់ថា៖«ទោះជាគ្រិស្តសាសនិកនៅសតវត្សរ៍ទី១ដឹងថាពួកគាត់មានកាតព្វកិច្ចគោរពអំណាចរដ្ឋាភិបាលក៏ដោយ ពួកគាត់មិនបានរួមចំណែកក្នុងរឿងនយោបាយឡើយ» (Beyond Good Intentions)។ ស្រដៀងគ្នាដែរ សៀវភៅមួយទៀតរៀបរាប់ថាគ្រិស្តសាសនិកនៅសម័យដើម«មិនព្រមកាន់មុខតំណែងណាមួយក្នុងជួររដ្ឋាភិបាលទេ» (On the Road to Civilization)។
តើការកាន់ជំហរអព្យាក្រឹតរបស់យើងក្នុងរឿងនយោបាយប៉ះពាល់ដល់សន្ដិសុខជាតិឬទេ? មិនប៉ះពាល់ទេ។ យើងជាពលរដ្ឋដែលស្រឡាញ់សន្ដិភាព ដូច្នេះគ្មានហេតុឲ្យរដ្ឋាភិបាលភ័យខ្លាចឡើយ។ សូមពិចារណាអំពីសេចក្ដីរាយការណ៍មួយនៅឆ្នាំ២០០១ ដែលបានត្រូវរៀបចំឡើងដោយបណ្ឌិតសភាជាតិខាងវិទ្យាសាស្ត្រនៅប្រទេសអ៊ុយក្រែន។ ក្នុងសេចក្ដីរាយការណ៍នោះបាននិយាយអំពីការកាន់ជំហរអព្យាក្រឹតរបស់យើងក្នុងរឿងនយោបាយថា៖«សព្វថ្ងៃនេះមនុស្សមួយចំនួនប្រហែលជាមិនចូលចិត្តការកាន់ជំហរអព្យាក្រឹតរបស់សាក្សីព្រះយេហូវ៉ាទេ ដោយសារនៅអតីតកាលក្រោមរបបផ្ដាច់ការណាត្ស៊ីនិងរបបកុម្មុយនីស្ត ពួកគេបានចោទប្រកាន់ចំពោះសាក្សីព្រះយេហូវ៉ា»។ ប៉ុន្តែ ទោះជានៅក្រោមអំណាចរបស់សហភាពសូវៀតក្ដី សាក្សីព្រះយេហូវ៉ា«បានរក្សាខ្លួនជាពលរដ្ឋដែលគោរពច្បាប់។ ពួកគេធ្វើកិច្ចការខាងកសិកម្ម និងឧស្សាហ៍កម្មយ៉ាងស្មោះត្រង់ដោយមិនគិតពីប្រយោជន៍ខ្លួន ហើយនេះមិនមានការប៉ះពាល់ដល់របបកុម្មុយនីស្តឡើយ»។ សេចក្ដីរាយការណ៍ដដែលនោះបានសរុបសេចក្ដីថា ជំនឿនិងការប្រព្រឹត្តរបស់សាក្សីព្រះយេហូវ៉ានៅសព្វថ្ងៃនេះមិនបាន«ធ្វើឲ្យប៉ះពាល់ដល់សាមគ្គីភាពនិងសុវត្ថិភាពរបស់ប្រទេសណាមួយឡើយ»។
លោកអ្នកក៏ប្រហែលជាចូលចិត្តដែរ
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
ហេតុអ្វីសាក្សីព្រះយេហូវ៉ាមិនចូលរួមពិធីបុណ្យជាតិ?
តើសាក្សីព្រះយេហូវ៉ាគាំទ្ររឿងសង្គមឬរឿងនយោបាយទេ?
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
ហេតុអ្វីសាក្សីព្រះយេហូវ៉ាមិនធ្វើសង្គ្រាម?
សាក្សីព្រះយេហូវ៉ាត្រូវគេស្គាល់នៅទូទាំងពិភពលោកថាមិនធ្វើសង្គ្រាម។ សូមស្វែងយល់អំពីមូលហេតុដែលយើងរក្សាជំហរនេះ។
