តើការប្រោសឲ្យរស់ឡើងវិញមានន័យយ៉ាងណា?
ចម្លើយពីគម្ពីរ
ក្នុងគម្ពីរ ពាក្យដែលបានត្រូវបកប្រែថា«ការប្រោសឲ្យរស់ឡើងវិញ»គឺមកពីពាក្យភាសាក្រិចអេណាស្តាស៊ីស ដែលមានន័យថា«ការលើកឡើង»ឬ«ការក្រោកឈរ»។ ពេលមនុស្សម្នាក់បានត្រូវប្រោសឲ្យរស់ឡើងវិញ នោះមានន័យថាគាត់បានក្រោកឡើងពីស្លាប់វិញ ហើយមានជីវិតជាបុគ្គលដដែលដូចមុនពេលគាត់ស្លាប់។—កូរិនថូសទី១ ១៥:១២, ១៣
ទោះជាពាក្យ«ការប្រោសឲ្យរស់ឡើងវិញ»មិនមានក្នុងបទគម្ពីរភាសាហេប្រឺដែលច្រើនតែហៅថាសញ្ញាចាស់ក៏ដោយ តែព័ត៌មានអំពីការប្រោសឲ្យរស់ឡើងវិញគឺមាននៅក្នុងនោះ។ ជាឧទាហរណ៍ តាមរយៈហូសេដែលជាអ្នកប្រកាសទំនាយ ព្រះបានសន្យាថា៖«ខ្ញុំនឹងលោះពួកគេពីអំណាចនៃផ្នូរ ខ្ញុំនឹងរំដោះពួកគេពីសេចក្ដីស្លាប់»។—ហូសេ ១៣:១៤; យ៉ូប ១៤:១៣-១៥; អេសាយ ២៦:១៩; ដានីយ៉ែល ១២:២, ១៣
តើមនុស្សស្លាប់នឹងត្រូវប្រោសឲ្យរស់ឡើងវិញនៅឯណា? មនុស្សមួយចំនួននឹងត្រូវប្រោសឲ្យរស់ឡើងវិញនៅស្ថានសួគ៌ ដើម្បីគ្រប់គ្រងជាមួយនឹងគ្រិស្ត។ (កូរិនថូសទី២ ៥:១; ការបើកបង្ហាញ ៥:៩, ១០) គម្ពីរហៅការប្រោសឲ្យរស់ឡើងវិញនៅស្ថានសួគ៌ថា «ការប្រោសឲ្យរស់ឡើងវិញមុនដំបូង» ឬ«ការប្រោសឲ្យរស់ពីស្លាប់ឡើងវិញមុនគេ» ហើយនេះបង្កប់អត្ថន័យថានឹងមានការប្រោសឲ្យរស់ឡើងវិញមួយទៀត។ (ការបើកបង្ហាញ ២០:៦; ភីលីព ៣:១១) ការប្រោសឲ្យរស់ឡើងវិញមួយទៀតនេះ គឺជាការប្រោសមនុស្សមួយចំនួនធំដែលបានស្លាប់ឲ្យរស់ឡើងវិញនៅផែនដី។—ចម្រៀងសរសើរព្រះ ៣៧:២៩
តើមនុស្សស្លាប់នឹងត្រូវប្រោសឲ្យរស់ឡើងវិញតាមរបៀបណា? ព្រះផ្ដល់ឫទ្ធានុភាពដល់លោកយេស៊ូដើម្បីប្រោសមនុស្សស្លាប់ឲ្យរស់ឡើងវិញ។ (យ៉ូហាន ១១:២៥) លោកយេស៊ូនឹងប្រោស«អស់អ្នកនៅក្នុងផ្នូរសម្រាប់ជាទីរំលឹក»ឲ្យរស់ឡើងវិញ ហើយពួកគេនឹងស្គាល់ថាខ្លួនឯងជាអ្នកណា មានបុគ្គលិកលក្ខណៈបែបណា និងចងចាំអំពីអតីតកាល។ (យ៉ូហាន ៥:២៨, ២៩) អស់អ្នកដែលបានត្រូវប្រោសឲ្យរស់ឡើងវិញនៅស្ថានសួគ៌នឹងមានរូបកាយជាវិញ្ញាណ តែអស់អ្នកដែលបានត្រូវប្រោសឲ្យរស់ឡើងវិញនៅផែនដីនឹងមានរូបកាយជាសាច់ឈាម ហើយមានសុខភាពល្អ។—អេសាយ ៣៣:២៤; ៣៥:៥, ៦; កូរិនថូសទី១ ១៥:៤២-៤៤, ៥០
តើអ្នកណានឹងត្រូវប្រោសឲ្យរស់ឡើងវិញ? គម្ពីរចែងថា៖«មនុស្សសុចរិតនិងមនុស្សមិនសុចរិតនឹងត្រូវប្រោសឲ្យរស់ឡើងវិញ»។ (សកម្មភាព ២៤:១៥) មនុស្សសុចរិតគឺជាមនុស្សដែលមានជំនឿលើព្រះ ដូចជាណូអេ សារ៉ា និងអាប្រាហាំជាដើម។ (ដើមកំណើត ៦:៩; ហេប្រឺ ១១:១១; យ៉ាកុប ២:២១) មនុស្សមិនសុចរិតរួមមានអស់អ្នកដែលមានរបៀបរស់នៅខុសពីខ្នាតតម្រារបស់ព្រះ ហើយពួកគេគ្មានឱកាសរៀនខ្នាតតម្រាទាំងនោះនិងធ្វើតាមទេ។
ក៏ប៉ុន្តែ អស់អ្នកដែលជាមនុស្សអាក្រក់ដល់ម្ល៉េះ រហូតដល់មិនអាចអប់រំបាន នឹងមិនត្រូវប្រោសឲ្យរស់ឡើងវិញឡើយ។ ពេលពួកគេស្លាប់ ពួកគេត្រូវវិនាសទៅជារៀងរហូត ហើយគ្មានសង្ឃឹមរស់ឡើងវិញទាល់តែសោះ។—ម៉ាថាយ ២៣:៣៣; ហេប្រឺ ១០:២៦, ២៧
តើនឹងមានការប្រោសឲ្យរស់ឡើងវិញនៅពេលណា? គម្ពីរបានប្រកាសទុកជាមុនថា ការប្រោសឲ្យរស់ឡើងវិញនៅស្ថានសួគ៌ចាប់ផ្ដើមក្នុងអំឡុងវត្តមានរបស់គ្រិស្ត ដែលមានតាំងពីឆ្នាំ១៩១៤។ (កូរិនថូសទី១ ១៥:២១-២៣) ការប្រោសឲ្យរស់ឡើងវិញនៅផែនដីនឹងមានក្នុងអំឡុងការគ្រប់គ្រងមួយពាន់ឆ្នាំរបស់លោកយេស៊ូគ្រិស្ត គឺពេលដែលផែនដីនឹងក្លាយទៅជាសួនឧទ្យាន។—លូកា ២៣:៤៣; ការបើកបង្ហាញ ២០:៦, ១២, ១៣
ហេតុអ្វីសមហេតុសមផលឲ្យជឿលើការប្រោសឲ្យរស់ឡើងវិញ? គម្ពីររៀបរាប់យ៉ាងល្អិតល្អន់នូវកំណត់ហេតុចំនួន៩អំពីការប្រោសឲ្យរស់ឡើងវិញ ហើយក្នុងហេតុការណ៍ទាំងនោះសុទ្ធតែមានសាក្សីបានឃើញ។ (បណ្ដាស្ដេចទី១ ១៧:១៧-២៤; បណ្ដាស្ដេចទី២ ៤:៣២-៣៧; ១៣:២០, ២១; លូកា ៧:១១-១៧; ៨:៤០-៥៦; យ៉ូហាន ១១:៣៨-៤៤; សកម្មភាព ៩:៣៦-៤២; ២០:៧-១២; កូរិនថូសទី១ ១៥:៣-៦) កំណត់ហេតុអំពីការប្រោសឡាសាឲ្យរស់ឡើងវិញ គឺគួរឲ្យកត់សម្គាល់ជាងគេ ដោយសារពេលដែលលោកយេស៊ូប្រោសឡាសាឲ្យរស់ឡើងវិញ នោះឡាសាបានស្លាប់អស់បួនថ្ងៃហើយ។ លោកបានធ្វើអព្ភូតហេតុនេះនៅមុខបណ្ដាជនជាច្រើន។ (យ៉ូហាន ១១:៣៩, ៤២) សូម្បីតែអស់អ្នកដែលប្រឆាំងលោកយេស៊ូ ក៏មិនអាចបដិសេធការពិតនេះដែរ។ ដូច្នេះ ពួកគេបានរៀបគម្រោងដើម្បីសម្លាប់លោកយេស៊ូនិងឡាសា។—យ៉ូហាន ១១:៤៧, ៥៣; ១២:៩-១១
គម្ពីរបង្ហាញថាព្រះមានសមត្ថភាព ហើយចង់ប្រោសមនុស្សស្លាប់ឲ្យរស់ឡើងវិញ។ ព្រះមានការចងចាំដែលគ្មានកម្រិត ដូច្នេះលោកចាំអ្វីទាំងអស់អំពីបុគ្គលម្នាក់ៗដែលលោកនឹងប្រោសឲ្យរស់ឡើងវិញ ដោយប្រើឫទ្ធានុភាពខ្លាំងក្លាបំផុតរបស់លោក។ (យ៉ូប ៣៧:២៣; ម៉ាថាយ ១០:៣០; លូកា ២០:៣៧, ៣៨) ព្រះមានសមត្ថភាពប្រោសមនុស្សស្លាប់ឲ្យមានជីវិតម្ដងទៀត ហើយលោកពិតជាចង់ធ្វើដូច្នោះមែន! ស្ដីអំពីការប្រោសឲ្យរស់ឡើងវិញដែលនឹងមាននៅឆាប់ៗខាងមុខនេះ គម្ពីរបានចែងអំពីព្រះថា៖«លោកនឹងនឹកអាល័យខ្ញុំខ្លាំងណាស់ ព្រោះលោកបានបង្កើតខ្ញុំមក»។—យ៉ូប ១៤:១៥
ការយល់ខុសអំពីការប្រោសឲ្យរស់ឡើងវិញ
ការយល់ខុស: ការប្រោសឲ្យរស់ឡើងវិញ គឺជាការរួបរួមព្រលឹងនិងរូបកាយ។
ការពិត: គម្ពីរបង្រៀនថាព្រលឹងគឺជាមនុស្សនោះឯង មិនមែនជាអ្វីដែលចេញពីរូបកាយក្រោយពីស្លាប់នោះទេ។ (ដើមកំណើត ២:៧, កំណត់សម្គាល់; អេសេគាល ១៨:៤) បុគ្គលម្នាក់ដែលបានត្រូវប្រោសឲ្យរស់ឡើងវិញ គឺមានន័យថាព្រះបង្កើតរូបគាត់ម្ដងទៀតឲ្យមានជីវិតរស់ឡើងវិញ មិនមែនឲ្យគាត់រួបរួមជាមួយព្រលឹងគាត់ទេ។
ការយល់ខុស: មនុស្សខ្លះនឹងត្រូវប្រោសឲ្យរស់ឡើងវិញ រួចភ្លាមៗនឹងត្រូវបំផ្លាញចោល។
ការពិត: គម្ពីរចែងថា«អស់អ្នកណាដែលបានប្រព្រឹត្តការអាក្រក់ជាទម្លាប់ អ្នកទាំងនោះនឹងរស់ឡើងវិញ ហើយទទួលការវិនិច្ឆ័យ»។ (យ៉ូហាន ៥:២៩) ប៉ុន្តែ នេះជាការវិនិច្ឆ័យចំពោះអ្វីដែលគាត់បានធ្វើក្រោយពីគាត់បានត្រូវប្រោសឲ្យរស់ឡើងវិញ មិនមែនវិនិច្ឆ័យចំពោះអ្វីដែលគាត់បានធ្វើមុនគាត់ស្លាប់នោះទេ។ លោកយេស៊ូបានមានប្រសាសន៍ថា៖«មនុស្សស្លាប់នឹងឮសំឡេងបុត្ររបស់ព្រះ ហើយអស់អ្នកដែលបានស្ដាប់តាមនឹងមានជីវិត»។ (យ៉ូហាន ៥:២៥) ចំពោះអស់អ្នកដែល«ស្ដាប់តាម»ឬធ្វើតាមអ្វីដែលពួកគេរៀនក្រោយពីបានត្រូវប្រោសឲ្យរស់ឡើងវិញ ពួកគេនឹងមានឈ្មោះក្នុង«រមូរ[ឬបញ្ជី]ជីវិត»។—ការបើកបង្ហាញ ២០:១២, ១៣
ការយល់ខុស: ពេលបុគ្គលម្នាក់បានត្រូវប្រោសឲ្យរស់ឡើងវិញ គាត់នឹងមានរូបកាយដូចគ្នាបេះបិទនឹងរូបកាយដែលគាត់ធ្លាប់មានពេលនៅរស់។
ការពិត: ក្រោយស្លាប់ រូបកាយរបស់មនុស្សនឹងរលួយបន្តិចម្ដងៗរហូតទៅជាដី។—អ្នកទូន្មាន ៣:១៩, ២០
លោកអ្នកក៏ប្រហែលជាចូលចិត្តដែរ
សេចក្ដីបង្រៀនសំខាន់ៗក្នុងគម្ពីរ
តើអ្វីកើតឡើងពេលដែលយើងស្លាប់?
គម្ពីរសន្យាថានឹងមានគ្រាមួយដែលមនុស្សជាច្រើនដែលបានស្លាប់ នឹងត្រូវប្រោសឲ្យរស់ឡើងវិញដូចឡាសាដែរ។
ទស្សនាវដ្ដី
មនុស្សស្លាប់នឹងរស់ឡើងវិញ!
តើសេចក្ដីសង្ឃឹមពីគម្ពីរអាចក្លាយទៅជាការពិតឬទេ?
