Mukanda wa Dyanga ku Akwa Kolindu 15:1-58
15 Phange jami, nga mesena ku mi lembalesa o njimbu yambote i nga mitudila. Kuma mwaxikina o njimbu yiyi, enu mwa mu kolokota.
2 Se mu suluka mu ku dikwatenena ku njimbu yambote i nga mitudila, mwanda bhuluka. Se kana, o kixikanu kyenu kya kingoho.
3 Mu maka oso u nga dyangele kumitangela, nga mi tangelele we o maka u ngaxikina, kwila: “Kidistu wafu mukonda dya ituxi yetu, kala kizwela o Mikanda Ikôla.
4 Mwene a mu fundile anga mu kizuwa kya katatu a mu fukununa, kala kyosoneke mu Mikanda Ikôla.
5 Mwene wa tukulukila kwa Sefa,* mu kusuluka, ku dikwinyi ni kiyadi dya jipoxolo.
6 Anga u tukulukila ku hama jitanu ja jiphange mu kithangana kimoxi, avulu mudyâ ala hanji n’etu, sumbala amoxi afu kyá.
7 Mu kusuluka wa tukulukila we kwa Tiyaku, anga u tukulukila we ku jipoxolo joso.
8 Maji mu kusuka-ku wa ngi tukulukila we eme, kala ngi mona a muvwala ande dya kubhixila o kithangana kyatokala.
9 Ku jipoxolo joso, eme ngala ngi ndenge, ki ngi fwama ku ngixana ngi poxolo, mukonda nga zukutisa o kilunga kya Nzambi.
10 Maji mukonda dya ngalasa ya Nzambi, ngala ngi poxolo. O ngalasa ya ngi londekesa ki ya kingoho. Eme nga kalakala dingi, o jipoxolo ja mukwá ndenge, ki nga kibhange mu nguzu yami, maji mu ngalasa ya ngi londekesa Nzambi.
11 Kikale eme mba o jipoxolo ja mukwá, twa mi bokela o njimbu yambote, enu-phe mwaxikana Ngana.
12 Se twa muboka kwila Kidistu a mu fukununa mwaxaxi ka madifundu, kyebhi amoxi mudyenu amba kwila sé-ku difukunukinu dya madifundu?
13 Maji se ki kwala difukunukinu dya madifundu, Kidistu-phe ka mu fukununa.
14 Se Kidistu ka mu fukununa mw’alunga, o kuboka kwetu kwa kingoho, o kixikanu kyenu we kya kingoho.
15 Se o madifundu kanda kwa fukununa, Nzambi ka fukununa we Kidistu mw’alunga, etu we twa mubhana umbangi wa makutu walungu ni Nzambi, mu kuzwela kwila mwene wa fukununa Kidistu.
16 Kuma se o madifundu kanda kwa fukununa, Kidistu we ka mu fukununa.
17 Se Kidistu ka mu fukununa, o kixikanu kyenu kikyala ni valolo, enu mwatexika hanji mu ituxi yenu.
18 Kyene we kimoxi, o yó afu kala maxibulu a Kidistu, atexika kyá.
19 Se twala ngó ni kidyelelu kwa Kidistu ku mwenyu yú kindala, twa betakota mu kuxixima, athu amukwá ndenge.
20 Mu kidi, Kidistu a mu fukununa mw’alunga, mwéne o muthu adyangele ku mu fukununa mw’alunga.
21 Mukonda o kufwa kwejila bhukaxi ka muthu umoxi, o difukunukinu dya madifundu, dijila we bhukaxi ka muthu umoxi.
22 Kala enyoso kya fwila mwa Adá, kyene we kimoxi, mwa Kidistu enyoso anda tambula o mwenyu.
23 Maji kala muthu mu kithangana kyê kyatokala: Kya dyanga Kidistu, anga kukayela yó atokala kwa Kidistu, ene anda kwa fukununa mu kithangana kya kutukuluka kwê.
24 Mu kusuluka, kwanda kwiza o dizubhilu, kyoso mwene kyanda zubha kubhwisa o jinguvulu joso, maungana moso ni kutena kwoso, kyene kiwa kyanda bhana o Utuminu kwa Nzambi, Tat’ê.
25 Mukonda mwene watokala kutumina katé Nzambi kyanda tula o jinguma jê bhoxi dya inama yê.
26 O nguma isukidilaku o ku ibhwisa, o kufwa.
27 Mukonda Nzambi “ima yoso wa mu tudilayu bhoxi dya inama yê.” Mu kuzwela kwila Nzambi ‘ima yoso wa itula bhoxi dya inama ya Kidistu,’ ki kilombolola kwila Nzambi, Yó wa mu tudila o ima yoso, wala we bhoxi dya inama yê, kana.
28 Kyoso Nzambi kyanda zubha kutula o ima yoso bhoxi dya ungana wa mona, o mona wanda ditula we bhoxi dya ungana wa Yó wa mutudila o ima yoso, phala Nzambi akale Ngana ya athu oso.
29 Se o madifundu kanda kwa fukununa, ihi yanda bhita ni yó a mwa batizala phala kufwa? Se o madifundu kanda kwa fukununa, mukonda dyahi o athu a mwa batizala phala kufwa?
30 Mukonda dyahi ithangana yoso* tuta o myenyu yetu mu kilwezu kya kufwa?
31 Phange jami, eme izuwa yoso o kalunga ka ngi zukama. Kima kiki kya kidi mwene, kala o kusanguluka kungala naku mukonda dyenu mwa Kidistu Jezú, Ngana yetu.
32 Mbote yahi i ngi katula mu kubhânga ni athu edile kala yama ya muxitu mu Efezu, se kyene we kyakexile mu bhanga athu amukwá?* Se o madifundu kanda kwa fukununa,“tudyetu, tunwetu, mukonda mungu twanda fwetu.”
33 Kanenu kudinganala. O kudilunga ni athu ayibha, kubolesa o ifwa yambote.*
34 Kalenu ni kilunji kyambote, mu kubhanga ima yayuka, kanenu kuta kituxi, mukonda sayi athu mudyenu k’ejiya Nzambi. Nga mu mi tangela o ima yiyi phala ku mi kwatesa jisonyi.
35 Kyenyiki, sayi muthu wanda kwibhwidisa, wixi: “Kyebhi o madifundu kyanda kwa fukununa? Ene anda fukunuka ni mukutu wa kidifwa kyahi?”
36 U kyôwa kya hatu! O mbutu i ukuna, kya dyanga ifwa, kyene ngó ki isabhuka.
37 Eye ki ukunu o kixina kyanda sabhuka kana, maji ukuna ngó lumbundu, kikale lumbundu lwa tiliku, mba lumbundu lwa mbutu yoso-yoso.
38 Maji Nzambi usabhukisa o mbutu kala kya mesena mwene, kala mbutu u ibhana o ukexilu wê.
39 Xitu yoso ki idifwangana. Sayi xitu ya athu, sayi xitu ya yama, sayi xitu ya jinjila ni xitu ya jimbiji.
40 Kwene we mikutu ya dyulu ni mikutu ya bhoxi. O kufwama kwa mikutu ya dyulu kwengi, o kufwama kwa mikutu ya bhoxi we kwengi.
41 O kubhenya kwa dikumbi kwengi, o kubhenya kwa mbeji we kwengi, o kubhenya kwa jithéthembwa kwengi. Mu kidi, o théthembwa imoxi o kubhenya kwê ki kwa difwangana ni kubhenya kwa théthembwa ya mukwá.
42 Kyene we kibhita ni difukunukinu dya madifundu. O mukutu ubola, a ufunda, maji o mukutu wakambe o kubola, a ufukununa.
43 O mukutu a ufunda sé kijingu, maji a ufukununa ni kijingu. O mukutu a ufunda sé kutena, maji a ufukununa kyá ni kutena.
44 O mukutu a ufunda mu xitu, a ufukununa mu nzumbi. Se kwene mukutu mu xitu, kwene we mukutu mu nzumbi.
45 Kala kyosoneke mu Mikanda Ikôla, exi: “O diyala dya dyanga, Adá, wexile muthu wa mwenyu.” O Adá ya sukidilaku, wakituka muthu mu nzumbi ubhana mwenyu.
46 Kyenyiki, o wa dyanga k’o mukutu mu nzumbi, kana, maji o mukutu mu xitu, anga kukayela o mukutu mu nzumbi.
47 O diyala dya dyanga watundu bhoxi, a mubhange ni mavu. Maji o diyala dya kayadi watundu ku dyulu.
48 Kala yó a mubhange ni mavu, kyene we kyala o athu mu ngongo mumu. Kala yó watundu ku dyulu, kyene we kyala yó ala ku dyulu.
49 Kala ki twa difwangana ni yó a mubhange ni mavu, hádya twanda difwangana we ni yó wa tundu ku dyulu.
50 Phange jami, ngi mi tangela kwila, o mukutu wa xitu ni manyinga ki utena kulundula o Utuminu wa Nzambi. O mukutu ubola, ki utena kulundula o mwenyu unangenena.
51 Ivwenu! Nganda mi tangela kikutu kikôla: Etu enyoso kitwanda nangenena mw’alunga, anda tukitula kyengi,
52 mu kithangana kya kwila, o dyesu phote, kyoso kyanda xika o koloneta ya sukinaku. Mukonda o koloneta yanda xika, o madifundu anda fukunuka ni mikutu yakambe o kubola, etu-phe anda tukitula kyengi.
53 Mukonda o mukutu ubola, ukituka mukutu wakambe o kubola. O mukutu ufwa, ukituka mukutu ukamba kufwa.
54 Kyoso o mukutu ubola ki wanda kituka mukutu wakambe kubola, ni kwila, o mukutu ufwa wanda kituka mukutu ukamba kufwa, kyene kyanda dikumbidila o izwelu ya Mikanda Ikôla, yexi: “O kalunga a ka bhwisaku katé ku hádya ni hádya.”
55 “Eye u kalunga, o kutena kwé kwala kwebhi? Eye u kalunga, o nguzu yé ya kujibha yala kwebhi?”
56 O nguzu ibhekela o kufwa, o kituxi. O nguzu ya kituxi, o Kijila.
57 Maji tu sakidila Nzambi, mukonda wa tubhana o kutena bhukaxi ka Ngana yetu Jezú Kidistu!
58 Kyenyiki phange jami ja kazola, swinenu, mu kolokote, mukale jinga ni ima yavulu phala kubhanga mu kikalakalu kya Ngana, mukonda enu mwejiya kwila o kikalakalu kyenu kyadikota mwa Ngana, ki kya kingoho.
Footnotes
^ Didi dijina dya mukwá dya poxolo Phetele.
^ Mba, “ola joso.”
^ Mba nange, “kala ki banza o athu.”
^ Mba, “kuzanga o wendelu wambote.”
