Mukanda wa Kayadi ku Akwa Kolindu 11:1-33
11 Sumbala ngedi kala ngi kyôwa, maji nga mesena kwila mu ngi lendukila. Mu kidi, enu mwa mu ngi lendukila mwene!
2 Eme nga mi kanena ku mi kazalesa ku diyala dimoxi ngó, phala ku mi londekesa kwa Kidistu kala mu mizeletete. Mukonda dya kiki, nga mite muxima kala kya mite Nzambi.
3 Ngala ni wôma wa kwila, enu we a mi nganala kala Eva kya mu nganalele kwala o nyoka bhukaxi ka makutu mê. Anga mu disandula ku kidi ni kuzela kwatokala kwa Kidistu.
4 Se kwiza muthu u mi bokela maka engi alungu ni Jezú, o maka u twa mi bokela ki ene, mba se mu tambula nzumbi yengi, o i mwa tambula ki yene, mba njimbu yengi yambote, o i mwa xikina ki yene, enu mweji xikina o ima yazwela o muthu mwenyú.
5 Ngi mona kwila, o jipoxolo jenu ja katunda ki ja betakota, eme ndenge.
6 Né mwene kingala ni uhete wa kuzwela, maji ngala ni kwijiya kwavulu, twa m’ijidisa kyambote o ima yiyi mu maukexilu oso.
7 Eme nga ditolesa phala a mi zangeleke, mu ku mi bokela o njimbu yambote ya Nzambi ni muxima woso sé ku ngi futa kima. Mu kubhanga kiki, o kwila ngate kituxi?
8 Eme nga tambula ima ku ilunga yengi phala ku mi kwatekesa.
9 Kyoso ki nga kexile kumoxi ni enu, kyoso ki nga bhindamene kima, ki nga ki bhingile ku muthu, mukonda o jiphange a tundile ku Masedonya adikila o ibhindamu yami. Mu ithangana yoso, nga bhange yoso phala ki ngi mi bhinge kima, kyene ki nganda bhanga jinga.
10 Kuma ngi mukayedi wa Kidistu, sé-ku kima kyanda ngi fidisa kudinanza yalungu ni maka enyá ku jimbandu joso ja Akaya.
11 Mukonda dyahi ki nga mi bhingi kima? O kwila ki nga mi zolo? Nzambi wejiya kwila nga mi zolo.
12 Maji nganda suluka kubhanga o ima i ngene mu bhanga kyá, phala o yó ene mu dizangeleka ni kuzwela kwila ala jipoxolo kala etu, kakale ni kima kya ku dizangeleka.
13 Mukonda o mayala yá, jipoxolo ja makutu, ene a nganala akwá, a dilondekesa kala jipoxolo ja Kidistu.
14 Ki kima kya kudiwana, mukonda katé mwéne ni Satanaji u dilondekesa kala anju yambote.*
15 Kyenyiki ki tudiwana, mu kumona kwila o jiselevende jê ji dilondekesa we kala athu ayuka. Maji o disukilu dyâ, o kutambula kaxtiku kasokela ni ibhangelu yâ.
16 Ngi myambela dingi: Ki bhukale muthu ubanza kwila ngi kyôwa. Maji se kyene ki mubanza, mu ngi xikina kala ngi kyôwa, phala ngitene kudinanza bhofele.
17 Mu maka alungu ni kudizangeleka, o ima i ngi zwela, ki ngi izwela mu kukayela o phangu ya Ngana. Maji ngi izwela kala kyene muzwela o yôwa.
18 Kuma athu avulu ene mu dinanza mu ima ya mundu yú, eme we nganda dinanza.
19 Kuma enu mwa mu dimona kyá kala mu jinjimu, lendukilenu phe o yôwa!
20 Enu mu kwatela mwanyu kwa yó u mi bhikisa, yó u mi katula ni ku mi nyana o jimbote jenu, yó u dizangeleka mwaxaxi k’enu, ni yó u mibhana jihuxi ku pholo.
21 Kuzwela o ima yiyi ku tukwatesa jisonyi, tulondekesa kwila twala ni wôma.
Se athu abhanga o ima ni kuswina, ngi zwela kala ngi kyôwa, eme wami nganda swina.
22 O kwila ene Jihebelewu? Eme wami ngi Hebelewu. Ene akwa Izalayele? Eme wami ngi mukwa Izalayele. A tokala ku mwiji* wa Mbalahamu? Eme wami nga tokala ku mwiji wa Mbalahamu.
23 O kwila ene akunji a Kidistu? Ni dízwi dya swina ngi tambwijila kala ngi dilaji: Eme nga betakota, nga kalakala dingi, a ngi tele dingi mu kaleya, a ngibeta lwavulu, nga bhitile mu kilwezu kya kufwa muveji javulu.
24 Lutanu o Jijudé a ngibhana makwinyi atatu ni divwa dya jixikote,
25 lutatu a ngibeta ni jimbangala, lumoxi a ngibuba ni matadi, muveji jitatu o naviyu ya tu budikila ku musanza, ngabhiti kizuwa ni usuku umoxi mu musanza.
26 Ngende jinjila javulu, ngabhiti mu ilwezu ya jingiji, mu ilwezu ya miyi, mu ilwezu ya athu akwa ixi yami, mu ilwezu ya athu akwa jixi jengi, mu ilwezu mu jimbanza, mu ilwezu mu kikangalakata, mu musanza wa kalunga, ni mu ilwezu ya jiphange ja makutu.
27 Ni nguzu yoso nga kalakala kyavulu, ngabhiti mausuku avulu sé kuzeka, ngabhiti nzala ni dinyota, ithangana yavulu sé kima kya kudya, mu kwenda ni mbambi ni mu ithangana yavulu sé izwatu.*
28 O kima kyene mu ngi thandanganyesa we izuwa yoso o kulanga o jiphange mu ilunga yoso.
29 Se muthu uzoza, eme ngi kala ni kikote ku muxima, ngi luwala se ngi mona muthu utexi o kixikanu kyê.
30 Se nga mesena kudinanza, nganda dinanza mu ima ilondekesa o kubhwila kwami.
31 O Nzambi, Tata ya Ngana Jezú, Yó atokala ku mu ximana katé ku hádya ni hádya, wejiya kwila ki nga mutanga makutu.
32 Mu mbanza ya Damasku, o nguvulu akexile mu mu tumina kwala sobha Aleta, watele alangidi mu mbanza ya Damasku phala ku ngi kuta.
33 Maji o jiphange a ngi kulumukisa mu kinda kyonene bhu njanena ya kexile mu kilumbu kya mbanza, bhenyobho nga bhuluka bhu maku mâ.
