Kala Kyasoneka Nzwá 17:1-26
17 Kyoso Jezú kyazubha kuzwela o ima yiyi, wabhetula o mesu ku dyulu, wasambe, wixi: “Tata, o kithangana kyabhixila. Jingisa mon’é, phala mon’é a kujingise we,
2 kala ki wamubhana ungana ku athu oso.* Phala mwene abhane mwenyu wakalelaku, kwa yó oso wa abhana kwa mwene.
3 Kiki kilombolola mwenyu wakalelaku: Kwila athu akwijiye* eye u Nzambi yakidi imoxi-élele, ni kwijiya we Jezú Kidistu, yó wa mutumikisa eye.
4 Eme nga kujingisa mu ngongo, ngazubha o kikalakalu ki wa ngibhana phala ku kibhanga.
5 Kyenyiki Tata, ngijingise bhu mbandu yé ni kijingu ki ngakexile nakyu kyoso ki ngakexile bhu mbandu yé, ande dya kubhanga o ngongo.
6 “Eme ngejidisa o dijina dyé ku athu u wa ngibhana mu ngongo. Ene a kutokalele, eye wa ngibhana-wu, ene abelesela o maka mé.
7 Ene ejiya kwila ima yoso i wa ngibhana yatundu kokwé,
8 mukonda eme nga atangela o maka u wa ngibhana. Ene ejiya kwila, eme ngeza kala ngi mukunji wé, axikina we kwila éye wa ngi tumikisa.
9 Eme nga mu abhingila ene, ki nga mu bhingila o mundu, maji nga mu bhingila ngó yó wa ngibhana nawu, mukonda ene akutokala.
10 O ima yami yoso, ya kutokala, o ima yé yoso, ya ngi tokala we, eme a ngi jingise bhukaxi ka ene.
11 “Eme kingala dingi mu ngongo, maji ene ala hanji mu ngongo, eme nga mu kwiza kokwé. Tata Ukôla, langa-wu mukonda dya dijina dyé, phala ene akale kumoxi,* kála etu kitwala kumoxi.*
12 Kyoso ki ngakexile nawu, ngexile mwalanga mukonda dya dijina dyé, o dijina di wa ngibhana. Eme nga alange, sé-ku muthu mudyâ watexika kikale ngó yó anda mu bwikisa.* Kiki kyabhiti phala kudikumbidila o ima yosoneke mu Mikanda Ikôla.
13 Maji eme nga mu kwiza kokwé. Kuma ngala hanji mu ngongo, ngizwela o ima yiyi, phala ene ezale ni kusanguluka kwami.
14 Nga atangela o maka mé, maji o mundu wa azembe, mukonda ene katokala ku mundu, kala eme ki ngi tokala ku mundu.
15 “Ki nga mu kubhinga phala kwakatula mu ngongo, maji phala kwalanga mukonda dya kadya-phemba.*
16 Kala eme ki ngatokala ku mundu, ene we katokala ku mundu.
17 Azelese* bhukaxi ka maka mé, mukonda o maka mé, éne o kidi.
18 Kala ki wa ngi tumikisa mu ngongo, eme wami nga atumikisa mu ngongo.
19 Eme ngi dizelesa phala o mbote yâ, phala bhukaxi ka maka mé, ene akale athu azele.
20 “Ki nga mu abhingila ngó ene, maji ngi bhingila we yó a ngixikana bhukaxi ka maka ma ene,
21 phala ene oso akale kumoxi, kála éye u Tata ki wala kumoxi n’eme, eme ngala kumoxi n’eye. Phala ene we akale kumoxi n’etu, o mundu ni uxikine kwila éye wa ngi tumikisa.
22 Nga abhana o kijingu ki wa ngibhana, phala ene akale kumoxi, kala etu kitwala kumoxi.
23 Eme ngala kumoxi ni ene, eye wala kumoxi n’eme, phala ene akale mwene kumoxi. Mu kiki o mundu wanda kwijiya kwila éye wa ngi tumikisa ni kwila, eye wa azolo, kala ki wa ngizolo eme.
24 Tata, nga mesena kwila oso u wa ngibhana, akale n’eme kwoso ku nganda kala, phala amone o kijingu ki wa ngibhana, mukonda ande dya kubhanga o ngongo, eye wa ngizolele kyá.
25 Tata Ukôla, o mundu ki wa kwijiya, maji eme nga kwijiya, o yá u wa ngibhana, ejiya kwila éye wa ngi tumikisa.
26 Eme nga ejidisa o dijina dyé, nganda dijidisa dingi, phala o henda i wa ngi londekesa ikale we ni ene, eme ni ngikale kumoxi ni ene.”
Footnotes
^ Mu Ngel.: “xitu yoso.”
^ Mba, “a suluke mu kukala ni kwijiya kwa lungu n’eye.” O kizwelu kiki mu Ngeleku, kilombolola kusuluka mu kubhanga kima.
^ Mba, “umoxi.”
^ Mba, “etu’ene umoxi.”
^ Mu Ngel.: “mon’a kibwika.”
^ Mba, “Satanaji.”
^ Mba, “U a tula bhu mbandu; Kôlesa-wu.”
