Ejidala 4:1-24
4 Kyoso o jinguma ja Judá ni Bejamí kyevu kuma, o yó a akwikile akexile mutunga tembulu phala Jihova, Nzambi ya Izalayele,
2 mu kithangana kyenyokyo abhixila kwa Nzolobabele ni ku atwameni a miji, ya a ambela, exi: “Twehelyenu tumikwatekese kutunga, mukonda kala enu, etu we tu abhezi a Nzambi yenu, twene mu mubhakwila kya jisata, tunde mu izuwa ya Asale-Hadone, Sobha ya Asídya, wa tubheka bhabha.”
3 Maji Nzolobabele ni Jesuwa ni atwameni amukwa a miji ya Izalayele, a atambwijila: “Enu kimwanda tukwatekesa kutunga o inzo ya Nzambi yetu, kana. Étu mwene ubheka wetu, twanda tunga o inzo phala Jihova, Nzambi ya Izalayele, kala kya tutumu Silu, Sobha ya Pélesa.”
4 Mukiki, o akwa jixi ja akondolokele, aya ni kubhangesa* o Jijudé kuluwala mu kusota ku afidisa kuzubha o kikalakalu kya kutunga.
5 Ene afutu o atwameni a jinguvulu phala kufidisa o kikalakalu kya Jijudé mu izuwa yoso ya Silu, Sobha ya Pélesa, kate ku utuminu wa Dályu Sobha ya Pélesa.
6 Ku dimatekenu dya utuminu wa Sobha Asuwelu, ene asoneka mukanda wakutatela akwa Judá ni akwa Jeluzaleme.
7 Mu Izuwa ya Artaxerxe Sobha ya Pélesa, Pijilame ni Miteledaki ni Tabeyele ni jikoleka jê, asoneka mukanda phala Sobha Artaxerxe. Ene alungulula o mukanda mu dimi dya Alamayiku ni isoneku ya dimi dya Alamayiku.*
8 * Lehu, o mutwameni wa nguvulu, ni Sisayi, o musoneki, ene asoneka o mukanda wa kutatela akwa Jeluzaleme kwa Sobha Artaxerxe. O mukanda wambele kiki:
9 O mukanda wexile wa Lehu, o mutwameni wa nguvulu ni Sisayi o musoneki, ni jikoleka jê jamukwa, o afundixi, o akwatekexi a jinguvulu, o jiseketa ni akwa Eleke, ni akwa Babilonya ni akwa Suzane, kifwa, akwa Elane,
10 ni ifuxi yamukwa yakwikile Azenapale yu wa yambatele mu jimbanza ja Samadiya ni ididi yamukwa ku mbandu kufwila o dikumbi ya ngiji ya Ewufalate.
11 O mukanda watumikisa, wambele kiki:
“Sobha Artaxerxe, yá o abhik’é atungu ku mbandu kufwila o dikumbi ya ngiji ya Ewufalate.
12 Sobha, ejiya-nakyu kwila, o Jijudé jatundu ku wala koko jatusange bhabha, abhixila mu Jeluzaleme. Ene a mutunga dingi o mbanza yayibha, yabhukumuka, ni kuzubha o ilumbu, o madisesa mê a mu ayudika dingi.
13 Sobha, ejiya-nakyu dingi kwila, se ene atunga dingi o mbanza ni ilumbu, kandafuta dingi o malubhaku. O kiki kyanda sosolola ku jimbongo ja jisobha.
14 Kuma twene mutambula we o futu yetu ku inzo ya Sobha, kitutokalele kudixibha mukumona kuma, kamukubhana o ima yoso yakutokala. Kiki kyene kyatubhangesa kutumikisa o njimbu yiyi kwa Sobha,
15 phala atokwese mu madivulu okulu* axisa o jitata jé. Bhukaxi ka madivulu, wanda mona kwila, o mbanza yiyi mbanza yabhukumuka, yene mubheka wíndwa ku jisobha ni ku ibatu, ni kwila, tunde ukulu mwene mukala akwa kavwanza. Kiki kyene kyabhangesa kubwikisa o mbanza yiyi.
16 Twamesena ku kutangela kwila, se o mbanza yóyo ni ilumbu yê a itunga dingi, eye Sobha, kiwandatena dingi kutumina o jimbandu joso jala ku mbandu kufwila o dikumbi ya ngiji ya Ewufalate.”
17 O Sobha watambwijila Lehu, o mutwameni wa nguvulu ni Sisayi, o musoneki ni jikoleka jê atungile ku Samadiya ni ku mbandu jamukwa jala ku mbandu kufwila o dikumbi ya ngiji ya Ewufalate mu ukexilu yú:
“Nga mimenekena!
18 O mukanda u mwa tutumikisa, a utange kyambote bhu pholo yami.
19 Ngatumu kutokwesa mu madivulu o kulu ya amono kwila, o mbanza yiyi yene mu bhukumukina ni kubalukila o jisobha tunde mu ukulu. Ene mubhanga-mu we usweya.
20 Kwexile jisobha jexile ni kutena mu Jeluzaleme, jexile mutumina o mbandu yoso kufwila o dikumbi ya ngiji ya Ewufalate, éne akexile mutambula o malubhaku.
21 Kyenyiki, bhanenu ngonge phala o mayala yá emanese o kikalakalu, phala kasuluke ni kutungulula o mbanza kate ki ngibhana ngonge yengi.
22 Enu-phe dilangyenu, maka yá ki mu akwatele usudi, phala o sobha atambule o ima yoso ya mutokala.”
23 Kyenyiki, kyazubha kutanga o mukanda watumikisa sobha Artaxerxe bhu pholo ya Lehu ni ya Sisayi, o musoneki ni ya jikoleka jê, mu kithangana kyenyokyo ene ayi mudisanga ni Jijudé mu Jeluzaleme ya afidisa o kikalakalu kya kutunga ni undanda woso.
24 Mukiki, o kikalakalu kya kutunga o inzo ya Nzambi mu Jeluzaleme, kyemana. Anga kikala kyenyiki kate ku muvu wa kayadi wa utuminu wa Dályu sobha ya Pélesa.
Footnotes
^ Mu Heba.: “Abotomokesa o maku.”
^ Mba nange, “o mukanda adyanga ku usoneka mu dimi dya Alamayiku, mukusuluka a ulungulula.”
^ Ejidala 4:8 ndu 6:18, adyanga ku isoneka mu dimi dya Alamayiku.
^ Mba, “madivulu a malunda.”
