Ejidala 6:1-22
6 Kyenyiki, Sobha Dályu watumina o kutokwesa bhu kididi kya kubhaka o madivulu o kulu* a Babilonya, mwexile mubhaka o ima ya valolo.
2 Asange mukanda mu mbonge* ya Akebatana, mu kibatu kya Medya. Mu mukanda yú asonekene-mu kiki:
3 “Ku muvu wa dyanga wa Sobha Silu, Silu wabhana o ngonge yiyi yalungu ni inzo ya Nzambi yala mu Jeluzaleme: ‘O inzo a itunge dingi phala ikale kididi kya kubhakula jisata, o madisesa mê a akolese; o kulebha kwê kukale kwa makwinyi asamanu a kovadu, o kuzanza kwê kwa makwinyi asamanu a kovadu.*
4 Ikale we ni mbandu jitatu ja matadi onene ni mbandu imoxi ya mabaya. O kitadi kya kufuta o kikalakalu, kyanda tunda mu inzo ya sobha.
5 Kikyene ngó, o itutu ya ulu ni ya phalata, yatokala mu inzo ya Nzambi, ya katwile Nabukodonozolo mu tembulu ya Jeluzaleme, yu wa yambatele mu Babilonya, anda ivutula phala ikale bhu kididi kyê mu tembulu ya Jeluzaleme, ni ku ibhaka mu inzo ya Nzambi.’
6 “Mukyenyiki, eye Tatenayi nguvulu ya mbandu kufwila o dikumbi ya ngiji ya Ewufalate, ni Setabozenayi ni jikoleka jê ni akwatekexi a jinguvulu ja mbandu kufwila o dikumbi ya ngiji ya Ewufalate, kimuzukame-ku.
7 Kanenu kufidisa o kikalakalu kya inzo ya Nzambi. O nguvulu ya Jijudé ni tufunga twa Jijudé, anda tunga mwene o inzo yiyi ya Nzambi, bhu kididi kyê kyokulu.
8 Ku mbandu yami we, ngabhana ngonge yalungu ni ihi i mwatokala o kubhanga, phala o tufunga twa Jijudé atene kutunga dingi o inzo yiyi ya Nzambi. Ku jimbongo ja sobha jatundu ku malubhaku ku mbandu kufwila o dikumbi ya ngiji ya Ewufalate, kwene kwanda tunda o kitadi phala kufuta o ima yoso yanda bhindamena o mayala yá, phala o kikalakalu kikimane.
9 Kimufule jinga kwa abhana o ima yoso yabhindamena mu kizuwa ni kizuwa, tungombe, jimbudi ja ndumbe ni tumbudi, phala kubhana jisata jakwoha kwa Nzambi ya dyulu, ni tiliku ni môngwa ni vinyu ni máji, kala kyamesena o akunji ala mu Jeluzaleme,
10 phala abhakule jinga jisata jisangulukisa o Nzambi ya dyulu, asambe we phala o sobha ni twana twê akale ku mwenyu mu mivu yavulu.
11 Se kukala muthu uxibhaka o kitumu kiki, ngibhana dingi ngonge yengi kwila, mukatula mukambu wa mabaya ku inzo yê, phala ku munyenga-ku. O inzo yê a ibhange dixita mukonda dya kikuma kiki.
12 O Nzambi, yó wabhangesa o dijina dyê kukala mu Jeluzaleme, abwikise o sobha mba kifuxi kyoso-kyoso kibhukumukina o ngonge yiyi, phala kumesena kubwikisa o inzo ya Nzambi yala mu Jeluzaleme. Eme Dályu ngabhana o ngonge yiyi. Yene a ikumbidile ni lusolo.”
13 Kyenyiki-phe, Tatenayi, nguvulu ya mbandu kufwila o dikumbi ya ngiji ya Ewufalate, ni Setabozenayi ni jikoleka jê abhange mwene ni lusolo, yoso ya atendelesele Sobha Dályu.
14 O tufunga twa Jijudé ni kiswinisu kyatambula bhukaxi ka jinjimbu ja atudila polofeta Ajewu ni Zakadiya mulawula a Idu, asuluka ni kutunga, o kikalakalu anga kiya ku pholo. Ene azubha o kikalakalu kya kutunga kala kya atumina o Nzambi ya Izalayele, ni kyatumine Silu, Dályu ni Artaxerxe Sobha ya Pélesa.
15 Ene azubha o kutunga o inzo, mu kizuwa kya katatu kya mbeji ya Adale,* mu muvu wa kasamanu wa utuminu wa Sobha Dályu.
16 Mukyenyiki, akwa Izalayele, o akunji ni jilevita, ni oso a akwikile ya avutuka, abhange fesa ni kusanguluka kwoso, mu kubhakula o inzo yiyi kwa Nzambi.
17 Phala kubhanga o fesa ya kubhakula o inzo ya Nzambi, abhana hama ya jingombe, hama jiyadi ja jimbudi, hama jiwana ja tumbudi. Phala o muloloki wa ituxi ya Izalayele yoso, abhana dikwinyi ni kiyadi kya isutu ya jihombo kala kyasoko o miji ya Izalayele.
18 Anga asola o akunji mu ibuka yâ, ni jilevita, mu ibuka yâ, phala o sidivisu ya Nzambi mu Jeluzaleme, kala kyosoneke mu divulu dya Mozé.
19 O yó a akwikile ya avutuka, abhange o fesa ya Phasu mu kizuwa kya dikwinyi ni kiwana mu mbeji ya dyanga.
20 O akunji ni jilevita azelele, mukonda enyoso adizelesele. Ene anga ajibha o kambudi ka Phasu, phala yó a akwikile ya avutuka, phala o akunji ni akwa, phala we ene mudyâ.
21 Kyenyiki, akwa Izalayele a akwikile ya avutuka, adi ku sata kumoxi ni yó oso adibundile ni ene, adisandwile mu ima yaxidi ya akwa jixi ja akondolokele phala kubheza Jihova, o Nzambi ya Izalayele.
22 Ene abhange o Fesa ya Jimbolo jakambe o Felemendu, mu sambwadi dya izuwa ni kusanguluka kwoso, mukonda Jihova wa asangulukisa, yú wabhangesa o sobha ya Asídya ku atala ni muxima wambote, mu ku akwatekesa mu kikalakalu kya kutunga o inzo ya Nzambi yakidi, o Nzambi ya Izalayele.
Footnotes
^ Mu Heba.: “mu inzo ya kubhaka o madivulu o kulu.”
^ Mba, “inzo ya Sobha.”
^ Nange 26,7 a jimetulu. Tala o Kiba. B14.
^ Tala o Kiba. B15.
