Kala Kyasoneka Matesu 6:1-34
6 “Dilangyenu-phe, phala ki mu bhange ima yayuka bhu pholo ya athu n’a mi mone, mukonda se mu bhanga kiki, Tat’enu wene ku dyulu kanda mi bhana dibesá.
2 Mu kiki, kyoso ki ubhana ujitu* ku ngadyama, kana kuxika koloneta bhu pholo yé, kala kibhanga o akwa mangonya mu malombe* ni mu ikoka, phala kwa ximana ku athu. Ngi mi ambela ni kidi kyoso kwila, ene atambula kyá o futu yâ.
3 Maji eye-phe, ki ubhana ujitu ku ngadyama, kana kwehela o lukwaku lwé lwa kyasu kwijiya o ima ya mu bhanga o lukwaku lwé lwa kadilu,
4 phala o maujitu mé akale mu kaswekele. O Tat’enu umona o ima yosweke, wanda kubesowala.
5 “Mu kusamba we, kana kubhanga kala kyene mu bhanga akwa mangonya, ene awabhela kwimana mu malombe* ni mu jiphambu, phala kwa mona ku athu. Ngi mi ambela ni kidi kyoso kwila, ene atambula kyá o futu yâ.
6 Eye-phe kyoso ki u samba bokona mu xilu dyé, ki u jika o dibhitu, samba kwa Tat’enu ya dyulu. Mu kiki, o Tat’enu umona o ima yoso yosweke, wanda kubesowala.
7 Mu kusamba, kana kutumbula o izwelu imoxi mu ithangana yoso, kala kyene mu bhanga o athu kejiya Nzambi, mukonda ene abanza kwila, mu kuzwela kyavulu, anda kwa évwa.
8 Enu-phe ki mu kale kála ene, mukonda Tat’enu wejiya kyá o ima i mwa bhindamena ande mwene dya ku mu bhinga.
9 “Mu kiki, mu kusamba, mu zwela kiki:
“‘Tat’etu wene mu dyulu dijina dyé adizelese.*
10 O Utuminu wé wize. Vondadi yé a ibhange we mu ixi kala kyene mu ibhanga ku dyulu.
11 O mbolo yetu ya kizuwa kya lelu, tu bhane-yu.
12 Tu loloke o ituxi* yetu, kala ki twene mu loloka we oso atuta ituxi.
13 Ku twehele kudibhala mu jitendasá, maji tu bhulule* kwa kadya-phemba.’*
14 “Mukonda se mu loloka o ituxi ya athu, Tat’enu wene ku dyulu wanda mi loloka we,
15 maji se mu kamba kuloloka o ituxi ya athu, Tat’enu kanda mi loloka o ituxi yenu.
16 “Kyoso ki mu jejuwala,* ki mu londekese ku pholo kwila mwa luwala, kála kyene mu bhanga akwa mangonya, mukonda ene a di ibhisa o jipholo,* phala ku a mona ku athu kwila, a mu jejuwala. Ngi mi ambela o kidi kwila, ene atambula kyá o futu yâ.
17 Eye-phe kyoso ki u jejuwala, di waye máji ku mútwe, sukula o pholo yé,
18 phala o athu ka kumone kwila wa mu jejuwala, maji Tat’enu ngó. Mu kiki o Tat’enu umona o ima yosweke, wanda kubesowala.
19 “Kanenu ku dilundila jimbote mu ngongo, mwala o tubamba ni fuluja itena ku ji jikinisa, o miyi abula anga a ji nyana.
20 Muveji dya kiki, lundenu jimbote ku dyulu, ki kumoneka tubamba né fuluja itena ku ji jikinisa, né mwene miyi abula anga a ji nyana.
21 Mukonda bhwoso bhu kala o jimbote jé, bhene we bhu kala o muxima wé.
22 “O kandeya ka mukutu o dyesu, mu kiki se o dyesu dyé dikala dya yuka,* o mukutu wé woso wanda kala mwazele.
23 Maji se dyesu dyé dikala dya yibha,* o mukutu wé woso wanda kala mwa vundu. Se o mukengeji wala moxi dyé, mu kidi kitombe, o kuvunda kwenyóko kwa dikota!
24 “Sé-ku muthu utena kusidivila ngana jiyadi, mukonda sayi yú u mu zola, o mukwá u mu zemba, mba yú u mu kala fiyele, o mukwá u mu bhukumukina. Enu wenu ki mu tena kusidivila Nzambi ni Jimbongo.
25 “Mukonda dya kiki, ngi mi tangela kwila: Ki mu tandanganye kyavulu ni mwenyu wenu, yalungu ni kúdya mba kunwa, ni mukutu wenu se mu zwata ihi. Kifwa ni mwenyu ni kúdya, o mwenyu ki kota? Ni mukutu ni izwatu, o mukutu ki kota?
26 Talesenu kyambote o jinjila ji bhita bhulu, ki jene mu kuna jimbutu, ki jene mu bhongolola, mba ku ji tula mu ididi ya kubhaka o idima, maji Tat’enu-phe wene ku dyulu u ji dikila. Kifwa enu ki mwa betakota, o jinjila ndenge?
27 Nanyi mudyenu mu kukala ni hele, utena kubandekesa ka kithangana ku mwenyu wê?
28 Ya lungu we ni izwatu, mukonda dyahi mu kala ni hele, dilongyenu ku itulu ya mukáwu kyoso ki ikula, ki i kalakala, ki i tungu izwatu,
29 maji ngi mi tangela kwila, né mwene Solomá mu unéne wê woso, ka zwatele kála kakitulu kamoxi.
30 Kyenyiki, se Nzambi uzwika kiki o itulu ya mukáwu, yene mu kwila lelu ya bwingita, mungu yalela anga a itakula mu túbhya, mwene kanda betakota ku mi zwika enu, mu athu mwa tolo o kixikanu?
31 Mu kiki, ki mu kale ni hele, mwixi: ‘Twanda dya ihi?’ mba, ‘Twanda nwa ihi?’ mba, ‘Twanda zwata ihi?’
32 Mukonda o ima yoso yiyi, yene isota ni hânji yoso o athu kejiya Nzambi. Tat’enu ya dyulu wejiya kwila, mwa bhindamena o ima yoso yiyi.
33 “Mu kiki-phe, dyangenu kusota o Utuminu wa Nzambi ni kuyuka* kwê, anga o ima yoso yiyi anda mi bandekesa-yu.
34 Kyenyiki, ki mu kale ni hele ya kizuwa kya mungu, mukonda o kizuwa kya mungu kyala ni jihele jê. Kala kizuwa kyala ni ibhidi yê.
Footnotes
^ Mba, “ujitu wa henda.” Tala o Dilombolwelu.
^ Tala o nota ya Matesu 4:23.
^ Tala o nota ya Matesu 4:23.
^ Mba, “adixile kála dijina dikôla.”
^ Mu Ngel.: “makongo.”
^ Mba, “tu kudile.”
^ Mba, “Satanaji.”
^ Mba, “kujila.”
^ Mba, “ka sukula o jipholo.”
^ Mba, “dyazele.”
^ Mba, “ni lwimbi.”
^ Tala o Dilombolwelu.
