Izake ua kexile ni 40 a mivu, dijina dia muhatu’ê Bebeka. Izake ua mu zolele kiavulu. Mu kubhita thembu, a vuala tuana tuiadi ene exile jingongo.

O mona ua dianga dijina diê Izau, o ua kaiadi dijina diê Jakobo. Izau ka zolele kukala kubhata, muene uexile dinhanga. Maji Jakobo uexile mona uambote, ua kexile mu kuatekesa o ikalakalu ku bhata.

Izau muene uexile o dikota, mu kiki muene ua tokalele kutambula o undundu ua beta-o-kota, o Jakobo ndenge. Uejiia ihi i lombolola o undundu? O undundu u lombolola o ima ioso ixa o jitata kioso kia fua, kala o kitadi ni mábhia ni ima ia ka mukuá. Ku muiji ua Izake, o kikanenu kia bhangele Jihova kua Mbalahamu, kia bhangele mbandu ia undundu. Izau ka kexile mu bhana valolo ku jipolomesa jiji, maji phala Jakobo jene jexile ni valolo ia dikota.

Sai kizuua, Izau uaile mu ta unhanga, o kia vutuka ku bhata ua bhuila. Kioso muene kia bhixila, uévu o dizumba dia kúdia kua kexile mu lamba Jakobo, muene ua muambela uixi: ‘Nga mu fua ni nzala! Ngi bhane tu makunde phala ngi dié!’ Jakobo uambe: ‘Nga-nda ku bhana o kudia, maji kala u ngi sumbisa o undundu ué.’ Izau ua zuela: ‘Sé-ku maka! Ngi ku bhana o undundu uami. Nga mesena ngó o kudia.’ Mudié, o kuila kima kia unjimu kia  solo Izau? Kana, ki kima kia unjimu. Izau ua sumbisa kima kia betele-o-kota, o undundu uê, mu dilonga dia makunde.

Kioso Izake kia kukile kiá, ua mono kuila kiexile o kithangana kia kubesoala mon’ê ua dianga. Maji Bebeka ua kuatekesa Jakobo o kasule, kutambula o dibesá. Kioso Izau kia kivu, njinda ia mu kuata, iu ua mesenene kujibha phang’ê Jakobo. Kioso Bebeka kia kivu, ua bhingile kulanga Jakobo, muene uambe: ‘Lenga bhabha, nde mu tunga ni phang’iami Labanu, katé o njinda ia Izau ki ia-nda bhita.’ Jakobo uevu o kitendelesu kia mu bhele manh’â, phala kubhulula o muenhu uê, uai mu tunga ni sekulu’ê Labanu.