1, 2. (a) Jimbulula o njila ia kexile mu kuenda Lute ni Nouemi ni kiebhi kiexile mu divua. (b) Kiebhi o njila ia kexile mu kuenda Lute, ki i di fuile ni ia Nouemi?

 LUTE ua mu kuenda kumoxi ni Nouemi mu njila ia Mouabhe iezala ni milundu. Ene ngó ala mu njila ienii. Kua vundu kiá, mukonda dia kiki, Lute u tala ukouê, Nouemi, ni kuibhuidisa se ki kima kiambote ku sota kididi kia ku zeka. Muéne ua zola kiavulu Nouemi, mu kiki-phe muéne ua-nda bhanga ioso phala ku mu langa.

² Kiiadi kiâ akexile ni kikote ku muxima. Nouemi uexile kiá mutudi mu mivu iavulu, maji ua kexile mu dila an’ê a iiadi a fuile​—Kidiione ni Mahalone. Lute ua kexile ué ni ndolo ku muxima mukonda Mahalone uexile muadi uê. Muéne ni Nouemi akexile múia mu kididi kimoxi, ku mbanza ia Beleme, mu ixi ia Izalaiele. Maji o njila ki iexile imoxi. Nouemi ua kexile mu vutuka kubhata, maji Lute kejidile kuebhi kua kexile múia, ua xile ku dima o muiji uê, o ixi ni ijila iê​—katé muene ni jinzambi jê.​—Tanga Lute 1:3-6.

3. Itambuijilu ia ibhuidisu iebhi, ia-nda tu kuatekesa ku kaiela o kixikanu kia Lute?

³ Mukonda diahi Lute ua bhange kiki? Kiebhi Lute kieji tena ku di dikila ni ku langa Nouemi? O itambuijilu ia ibhuidisu íii, ia-nda tu londekesa kiebhi ki tu tena ku kaiela o kixikanu kia Lute. (Tala ué o kaxa, “ Kadivulu Kala ni Valolo ia Dikota.”) Kia dianga, tu mone ihi ia bhangesa o ahatu a iiadi enhá kuenda o njila ia lebha iia ku Beleme.

4, 5. (a) Mukonda diahi o muiji ua Nouemi ai ku ixi ia Mouabhe? (b) Ibhidi iebhi ia bhiti na-iu Nouemi mu ixi ia Mouabhe?

⁴ Lute ua kudila ku Mouabhe, ixi ia zukama ku Mar Morto. O ixi iezalele ni milundu maji ki i kexile ni mixi mba iangu iavulu. ‘O mábhia a Mouabhe’ akexile mu bhana idima iavulu, né  muene mu kithangana kioso mu ixi ia Izalaiele muexile nzala ia dikota. Kiki kiene kia bhangesa Lute kuijiia Mahalone ni muiji uê.​—Lute 1:1.

⁵ Mukonda dia nzala ia dikota mu ixi ia Izalaiele, o muadi ua Nouemi, Elimeleke, ua xisa o ixi iê anga uia kumoxi ni muiji uê ku tunga mu ixi ia Mouabhe kala asonhi. Kiki kiexile kibhidi kia dikota phala o kixikanu kiâ, mukonda akua Izalaiele a tokalele ku bheza mu kididi ki kola, kia solele Jihova. (Mate. 16:16, 17) Nouemi ua kolesa o kixikanu kiê, maji ua tale hadi iavulu kioso muadi uê kiafu.​—Lute 1:2, 3.

6, 7. (a) Mukonda diahi Nouemi nange ua thandanganhele kiavulu kioso an’ê, kia kazala ni ahatu akua Mouabhe? (b) Mukonda diahi Nouemi ua londekesa henda ku ahatu a an’ê?

⁶ Nouemi nange ua tale ué hadi iavulu, kioso an’ê kia kazala ni ahatu akua Mouabhe. (Lute 1:4) Muéne uejidile kiambote o musoso ua Mbalahamu, ua sotele ku jindandu jê, muhatu u bheza Jihova, phala ku kazala ni mon’ê, Izake. (Dim. 24:3, 4) Mu ku bhita ithangana, o Kitumu kia bhanene Nzambi kua Mozé, kia tendelesele kuila, o jitata akua Izalaiele, ka tokalele kuehela an’â a mala ni ahatu ku kazala ni asonhi, phala ka a bhangese ku bheza jinzambi jengi.​—Mate. 7:3, 4.

⁷ Maji né kiki, Mahalone ni Kidiione a kazala ni ahatu akua Mouabhe. Né muene se Nouemi ua thandanganhele mba ua luualele kiavulu, muéne ua bhange ioso phala ku bhanga mbote ni kulondekesa henda ku ahatu a an’ê, Lute ni Olofa. Nange muéne ua kexile ni kidielelu kia kuila, ku hádia ene eji kituka uá abhezi a Jihova. Maji Lute ni Olofa, a zolele kiavulu Nouemi. O ukamba iú uambote, ua a suínisa kiavulu kioso ene kia bhiti ni mavuua. O ilumba iiadi íii, a kituka atudi se muene ku kala ni ana.​—Lute 1:5.

8. Ihi ia bhangesa Lute ku bheza Jihova?

⁸ O kuila o ima ia di longo Lute mu ubhezelu uê, ia mu kuatekesa ku dibhana ni divuua didi? Kana. Akua Mouabhe akexile mu bheza jinzambi javulu, imoxi, Kemoxi. (Dia. 21:29) Nange mu ubhezelu ua akua Mouabhe, a kexile mu bhanga ima ia iibha, kala o ujibhangânga ni ku satela o ana. Maji Lute akexile ku mu longa ima iéngi kua Mahalone ni Nouemi, ia lungu ni Jihova, o Nzambi ia henda ia akua Izalaiele. Jihova u tumina ni henda, kana ni phulu! (Tanga Matendelelu 6:5.) Mu ku bhita ni mavuua, Lute ua kolesa dingi o ukamba uê ni Nouemi, iu ua kexile mu kuívua kiambote o ima ia kexile ku mu zuela Nouemi  ia lungu ni Jihova Nzambi, o Muteni-ia-ioso, mukua kulondekesa henda ku jiselevende jê.

9-11. (a) Ihi ia bhange Nouemi, Lute ni Olofa? (b) Ihi i tu tena o ku di longa kua Nouemi, Lute ni Olofa mu ku bhita ni mavuua?

⁹ Nouemi ua mesenene kuijiia kiebhi kiexile o ixi iê. Saí kizuua, muéne uevu bhu kaxi ka ngenji kuila, ki kuexile dingi nzala mu ixi ia Izalaiele. Jihova ua kexile mu besoala o mundu uê. Ku Beleme kua kexile dingi ni kudia kuavulu, kala ki jimbulula o dijina diê kuila “Dibhata dia mbolo.” Nouemi ua banze o ku vutuka ku ixi iê.​—Lute 1:6.

¹⁰ Ihi ieji bhanga Lute ni Olofa? (Lute 1:7) Ene a di zolele kiavulu, mu kithangana kiki kia bhonzo. Lute nange ua zolo dingi Nouemi, mukonda dia kixikanu ni henda ia Nouemi kua Jihova. O atudi atatu, a tundu kumoxi phala kuia mu mbanza ia Juda.

¹¹ O musoso ua Lute, u tu londekesa kuila, ki kale athu ambote mba a iibha, a bhita ni mavuua mba a funda ndandu. (Ndo. 9:2, 11) U musoso iú ulondekesa ué kuila, mu ku bhita ni jiphaxi, kima kiambote ku sota kikuatekesu kua akuetu​—bhenge-bhenge kua ió a lengela kua Jihova, o Nzambi ia Nouemi.​—Jisa. 17:17.

12, 13. Mukonda diahi Nouemi ua bhingi Lute ni Olofa ku vutuka ku ixi iâ ni kiebhi kia tambuijila o ilumba?

¹² Mu kuenda kilómetulu javulu, Nouemi ua kexile mu xinganeka kima. Ua kexile mu xinganeka mu ilumba iiadi, ni mu henda ia mu londekesele ku ilumba íii ni henda ia londekesa ku an’ê kioso kia kexile hanji ku muenhu. Muéne ka mesenene dingi kuila, ene a mu tambula konda. Se a xile o ixi iâ, ihi ieji bhanga Nouemi phala ku a kuatekesa mu mbanza ia Beleme?

¹³ Nouemi ua a tangela: ‘Ndenu kiá, mu vutuke kala muthu kubhata dia manh’â; o Jihova a mi bhange o mbote, kala enu ki mua i bhange o madifundu, kala ué ki mua ngi bhange-iu eme.’  Muéne ua a tangela ué kuila, Jihova ueji ku a besoala ni anumi ni muenhu uambote. O musoso u zuela kuila, Nouemi “u a bhana jinzóbole, anga a zangula mázui mâ, ni kudila.” Kiki, ki tu londekesa kuila Lute ni Olofa a zolele kiavulu o muahatu iú ua henda, Nouemi. Kiiadi kiâ a kolokotele ni kuzuela: “Kana, etu uetu tuandala tuia kumoxi ni eie, ua-lu vutuka ku kifuxi kienu.”​—Lute 1:8-10.

14, 15. (a) Olofa ua vutukile kua nanhi? (b) Ihi ia zuela Nouemi phala Lute ku vutuka ué?

¹⁴ Maji Nouemi ka xikina. Muéne ua zuela kuila, keji tena ku a kuatekesa ku ixi ia Izalaiele, mukonda ka kexile ni diiala phala ku a langa, ka kexile ué ni kidielelu kia ku vuala ana phala ku kazala nâ. Mukonda dia kiki, muéne ua kexile mu luuala kiavulu. Olofa ua mono kuila Nouemi ua kexile mu zuela kima kiambote. O muiji uê, ni jitata ni dibhata, dia kexile ku Mouabhe. Phala muéne, kia betele kota ku kala ku Mouabhe. Kienhiki, Olofa ua bhana nzobole ku ukouê anga u di lekela-nê.​—Lute 1:11-14.

¹⁵ Ihi ia bhange Lute? Muéne ua mono ué kuila, Nouemi ua kexile mu zuela ima iambote. Maji o musoso u zuela: “Lute-phe ua mu naminina muene.” Nouemi nange ua suluka mu kuenda, maji ua mono kuila Lute, ua kexile ku mu kaiela. Muéne uambe: ‘Talesa, huedi’ê iú-uió, ua mu vutuka ku kifuxi kiê ni ku nzambi jê; eie ué vutuka, kaiela-ze mukuenu.’ (Lute 1:15) O izuelu ia Nouemi, i tu londekesa pondo imoxi ia beta kota. Olofa ua vutukile kana ngó ku mundu uê, maji ua vutukile ué ku “nzambi jê.” Muéne ua sangulukile mu ku bheza o nzambi Kemoxi ni  jinzambi ja mukuá ja makutu. O kuila kiene kia kexile mu banza Lute?

16-18. (a) Kiebhi Lute kia londekesa o henda ia kidi? (b) Ihi i tu tena o ku di longa ku henda ia kidi ia Lute? (Tala ué o foto ia ahatu kiiadi.)

¹⁶ Mu ku mona Nouemi ubheka uê mu kikoka, Lute ua mono kuila, ka tokala ku vutuka. Muéne ua zolele kiavulu Nouemi​—ni Nzambi ia Nouemi. Kienhiki, Lute uambe: ‘Kana ku ngi bhomba ni ngi ku xie, anga ngi ku sondoloka ni ku fula ku ku kaiela; mukonda kuoso ku uia, eme ué kuene ku ngiia; bhuoso bhu ua ka tudila o usuku, eme ué bhuene bhu ngi tula; o mundu ué u kala mundu uami, Nzambi iê, Nzambi iami. O ixi ioso i ua ka fuila, kididi bhuoso bhu u fuila, eme ué bhuene bhu ngi fuila, o bhua ku funda, bhuene bhua ngi funda uami. Jihova a ngi bhange-kiu, a ngi tele-kiu dingi, se ngi xikina ku uanuna n’eie, mukonda ki kale ki tu uanuna o kufuá.’​—Lute 1:16, 17.

¹⁷ O izuelu ia Lute, izuelu iambote​—mukonda dia kiki, a i soneka mu Bibidia sumbala kua bhiti kiá 3.000 ja mivu. O izuelu íii ilondekesa o henda ia kidi. O henda ia kexile mu londekesa Lute, iexile ia kidi, ni ku mesena kuia bhuoso-bhuoso bhua ile Nouemi, katé ku ufuilu uê. O mundu ua Nouemi, ueji kala mundu uê, mukonda Lute ua kexile polondo phala ku xisa ioso ia kexile mu ixi iê, Mouabhe​—katé muene ni jinzambi ja akua Mouabhe. Lute ka kexile kála Olofa, mukonda muéne ua mesenene kuila o Nzambi ia Nouemi, Jihova, u kala ué Nzambi iê. a

¹⁸ Mu kiki-phe, kiiadi kiâ a suluka mu ku kaiela o njila iia ku Beleme. Nange ene a bhange semana imoxi mu njila. Maji kiiadi kiâ a di suínisa kiavulu.

19. Kiebhi ki tu tena kulondekesa o henda ia kidi, kala Lute, ku muiji, ni makamba ni mu kilunga?

¹⁹ O mundu uezala ni jiphaxi ni malamba. Mu izuua íii “isukidila-ku,” tuene mu dibhana ni ndolo iavulu. (2 Tim. 3:1) Kienhiki, o kídifua kia londekesa Lute, kiala ni valolo ia dikota lelu m’ukulu, ndenge. O henda ia kidi​—ilombolola ku zola jinga kima ni muxima uetu uoso ni ufiiele​—o henda ia kidi, ngunji ia di fikidila i tu kuatekesa ku bhanga o ima iambote ku mundu iú ua iibha kinene. Tua tokala kulondekesa o henda mu ukaza, mu ukamba uetu ni jindandu ni mu kilunga. (Tanga 1 Nzuá 4:7, 8, 20.) Tu kaiela o phangu ia Lute mu kulondekesa o henda ia kidi.

20-22. (a) Kiebhi kia kexile o muenhu ua Nouemi, ku ixi ia Mouabhe? (b) Ihi ia kexile mu banza Nouemi, ku hadi ioso ia kexile mu tala? (Tala ué Tiiaku 1:13.)

²⁰ O kuzuela kuila uala ni henda ia kidi, ki kiene kimoxi ni ku ilondekesa mu ima i tu bhanga. Lute ua kexile ni kithangana kia kulondekesa o henda iê ia kidi, kana ngó kua Nouemi maji ué kua Nzambi ia solele ku mu bheza, Jihova.

²¹ Lute ni Nouemi, a bhixila mu Beleme, mbanza iofele, phala ku bhixila-mu tuenda 10 dia kilómetulu ku mbandu ia sulu ia Jeluzaleme. Nouemi ni muiji uê, nange akexile ni fuma m’ukulu, mukonda kioso kia bhixila, athu avulu akexile mu zuela ia lungu ni muéne. O ahatu akexile ku mu tala ni kuzuela: “Manhi ki muen’iú Nouemi?” Nange o pholo iê ki ia kexile kála kiexile m’ukulu; o mivu ia bhonzo, ia hadi ia bhiti na-iu mu ixi ia Mouabhe, ia bhangesa o pholo ia Nouemi ku kala kiéngi.​—Lute 1:19.

²² Nouemi ua zuela ku ahatu enhá ni ku jivizinhu, o malamba a muenhu uê. Ua mesenene kuila o dijina diê Nouemi, dilombolola “ku uabha,” a di lungulule mu dijina dia Mala, dilombolola “ku lula.” Muhatu a ngene! Kála kia banzele Jobe m’ukulu, Nouemi ua kexile mu banza ué kuila, Jihova Nzambi muéne ua kexile ku mu talesa hadi.​—Lute 1:20, 21; Jobe 2:10; 13:24-26.

23. Mu ihi mua kexile mu banza Lute, ni ihi ia tendelesele o Kitumu kia bhanene Nzambi kua Mozé ia lungu ni ku kuatekesa o jingadiama? (Tala ué ku luiji.)

²³ Mu Beleme, Lute ua kuata mu ku banza kiebhi kieji tambula konda ia Nouemi. Muéne uejidile kuila o Kitumu kia bhanene Jihova ku akua Izalaiele, kia tendelesele ku kuatekesa o jingadiama. O Kitumu kia tendelesele kuila, o jingadiama a tokalele kuia ku mábhia mu kithangana kia ku bhongolola ni ku kaiela o abhongolodi ni ku bonga o ji sevada ja kexile mu bua bhoxi. b​—Iji. 19:9, 10; Mate. 24:19-21.

24, 25. Ihi ia bhange Lute kioso kia kexile ni kithangana kia ku bhongolola mu díbhia dia Bouaji ni kiebhi kia kexile o kikalakalu kia ku bhongolola?

²⁴  Kiexile kithangana kia ku bhongolola o ji sevada, mu kalendalu ketu, nange mu mbeji ia Kasamanu, Lute uai ku mábhia phala ku mona se nanhi ueji muehela ku bhongolola kudia. Muéne uai ku díbhia dia Bouaji, diiala mvuama, ua kexile ni mábhia avulu. Muéne uexile ndandu ia Elimeleke, o munumi ua Nouemi ua fuile. Sumbala o Kitumu kia zuelele kuila o jingadiama a tokalele o ku bhongolola, Lute ua bhingi ku munzangala ua kexile mu langa o díbhia ni abhongolodi. Kienhiki, Lute ua mateka o ku kalakala mu kithangana kieniókio.​—Lute 1:22–2:3, 7.

²⁵ Xinganeka Lute ku kaiela o abhongolodi. Kioso ene kia kexile mu batula o ji sevada, Lute ua kexile mu bonga o ji sevada ja buile bhoxi mba ia kexile mu xisa ku dima, ni ku ji jikita ni ku ji bhongolola mu kididi kimoxi phala ku ji zuka. Kiki, kiexile kikalakalu kia dikota, ki bhuidisa kiavulu o muthu. Maji Lute ua sulukile ni ku kalakala ni kuimana ngó phala ku katula o kalolo ku pholo mba phala kúdia kama “kubhata”​—nange mu kilembeketa mua kexile mu nhonhena o akalakadi.

26, 27. Kídifua kiahi kia kexile na-kiu Bouaji ni kiebhi kia dibhana ni Lute?

²⁶ Lute ka mesenene kuila o athu a mu mone, maji né kiki a mu mono muene. Bouaji ua mu mono iu uebhula selevende iê ua kexile mu langa o díbhia, se nanhi uexile Lute. Bouaji diiala dia kixikanu, ua kexile mu menekena o akalakadi’ê oso​—ni akalakadi exile asonhi. Muéne ua kexile ku a menekena: ‘Jihova u mi kuatekese.’ Ene uá akexile ku mu kumbulula, exi: ‘Eie ué Jihova u ku bhane dibesá.’ O diiala didi muadiakimi, ua kudile mu nzumbi, ua londekesa henda ia dikota kua Lute.​—Lute 2:4-7.

²⁷  Mu ku ixana Lute “mon’ami,” Bouaji ua mu tangela phala ku suluka ni ku bhongola mu díbhia diê ni ku kala kumoxi ni ilumba ia dibhata diê phala ka mu tangese ku akalakadi a maiala. Muéne ua bhange ioso phala Lute ku dimosala ué ni ene. (Tanga Lute 2:8, 9, 14.) Muéne ua ximana iu ua kolokotesa Lute. Maji kiebhi kia bhange kiki?

28, 29. (a) Ukexilu uebhi ua kexile nau Lute? (b) Kála kia bhangele Lute kiebhi ki u tena ku lengela kua Jihova?

²⁸ Kioso Lute kiebhudisa Bouaji ihi ia bhangele muéne phala ku mu bhanga mbote sumbala uexile musonhi, muéne ua tambuijila kuila uevuile ioso ia bhangele Lute phala ku kuatekesa ukouê, Nouemi. Nange Nouemi ua tumbuile kiambote o dijina dia mbalakaji iê ku ahatu akua Beleme, o fuma íii ia bhixile ku mátui a Bouaji. Muéne uejidile ué kuila Lute ua xikinine o ubhezelu ua Jihova, mu kuzuela: ‘Jihova a ku fute-kiu kioso ki ua bhange; o kisakidilu kiê ki kale kia dikota ki ku bha Jihova, Nzambi ia Izalaiele, ua bhingi moxi a mabhabha-mê muene mu uéza ku sota kididi kia ku kala.’​—Lute 2:12.

²⁹ O izuelu íii, ia suínisa kiavulu Lute! Muéne ua solele ku lengela ku mabhabha a Jihova Nzambi kala ki bhanga o njila ku suama ku kikalanga. Muéne ua sakidila Bouaji mu ku zuela ni henda ioso. Lute ua suluka ni ku kalakala katé mu usuku.​—Lute 2:13, 17.

30, 31. Ihi i tu tena o ku di longa ku ukexilu ua Lute ua ku kalakala, ua ku sakidila ni ua kulondekesa o henda ia kidi?

³⁰ O kixikanu kia Lute, phangu iambote phala ku i kaiela kua ió ene mu tala hadi mu ku kenga o mbolo ia kizuua. Muéne ka kexile mu jijidika o athu phala ku mu bhana kudia, maji ua kexile mu sakidila mu mbote ioso ia kexile ku mu bhanga. Muéne ka kexile ni jisonhi ja ku kalakala kiavulu phala ku dikila ukouê, né muene se kua bhingile ku bhanga salu sé valolo. Muéne ni muxima uoso ua xikina iu ua kumbidila o itendelesu ia mu bhanene ia lungu ni ku dilanga mu ku kalakala ni ilumba. Kienhiki, muéne ka di jimbi o dilengelu diê dia kidi—Tat’ê, Jihova Nzambi.

³¹ Se tu londekesa o henda ia kidi kala Lute ni ku kaiela o phangu iê ia kulenduka, ku kalakala kiavulu ni ku sakidila, tua-nda mona ué kuila o kixikanu kietu, kia-nda suínisa akuetu. Maji kiebhi Jihova kia lange Lute ni Nouemi? O maka enhá, tua-nda di longa mu kibatulu kia kaiela-ku.