O Bibidya ki divulu dyalungu ni usakelu mu xitu, maji yala ni itendelesu itena kukwatekesa o athu amudibhana ni uhaxi wa kikote ku muxima. Tala o jivelusu jiji.

“O athu adisanze ka bhindamena musaki, maji yó akate.”—MATESU 9:12.

O Bibidya itulondekesa kwila, nange twandabhindamena kikwatekesu kya asaki. Avulu amateka kudivwa kyambote kyoso kyatokwesa yalungu ni uhaxi wâ ni kyatambula o kikwatekesu kya jidotolo jambote.

“O kutungutisa o mukutu kubhanga kyambote.”—1 TIMOTE 4:8.

Kukala ni kithangana phala kutungutisa o mukutu kutena ku kukwatekesa kudibhana kyambote ni uhaxi wa kikote ku muxima. Watokala we kudya kyambote ni kuzeka mu kithangana kyasoko.

“Muxima wa sanguluka, u di bhanga milongo ya mbote mu mukutu wa muthu; maji o muxima-phe wa budika ni dilamba, u kukutisa ifuba.”—JISABHU 17:22.

Kubhanga ima yala mu kutena kwé ni kutanga jivelusu ja Bibidya, yanda kukwatekesa  kusanguluka ku mwenyu. Se udikwatenena ku ima yambote ni kuxikina kwila o ima yayibha yandabhita, wandatena kudibhana kyambote ni ibhidi ijila ku uhaxi wé wa kikote ku muxima.

“Oso a di tululula, ene adimuka.”—JISABHU 11:2.

Nange umona kwila, kiwandatena kubhanga ubheka wé yoso iwamesena, mu kyenyiki xikina o kikwatekesu kya akwenu. Nange o jindandu jé ni makamba mé amesena ku kukwatekesa maji kejiya se kyebhi kyandabhanga kiki. U atangela se kyebhi kyatena ku kukwatekesa. Kana kukingila kwila, andabhanga ima yavulu phal’eye, maji kabasa kima kyabhanga, u asakidila.

“Ngamono kwila sayi kima ki kyexile kyambote n’eme, mukonda dya kiki ngayi musota musaki. Mwene wangitangela o uhaxi ungexile nawu. Kiki kyangikwatekesa kwijiya kyambote o maka mami ni kusota jidotolo jambote ni milongo yambote.”—Nicole, a wala ni uhaxi umubhangesa kuluwala ni kusanguluka mu kithangana kimoxi.

“Ngamono kwila kutanga o Bibidya kumoxi ni muhatu wami izuwa yoso, kungikwatekesa kumateka o izuwa ni ibanzelu yambote. Yene mubhita kiki: Kyoso o ibanzelu yayibha ingivula, ngisanga jivelusu jingikwatekesa kudibhana ni maka ungala nawu mu kizuwa kyenyokyo.”—Phetele, wala ni uhaxi wa kikote ku muxima.

“Kyangibhonzele kyavulu kuzwela ni akwetu yalungu ni uhaxi wami, mukonda ngexile ni jisonyi javulu. Maji sayi kamba dyami dya muhatu wangivu ni muxima woso, anga wasoto kutendela kyebhi kingexile mu divwa. Mwene wangikwatekesa kudivwa kyambote ni kumona kwila kingexile ubheka.”—Nzwana, wala ni uhaxi umubhangesa kudya kyavulu.

“Mu Bibidya mwala itendelesu ingikwatekesa kudimuka, mu kukamba kukalakala kyavulu ni kunyoha mu kithangana kyasoko. O unjimu wa Bibidya wene mungikwatekesa kudibhana ni ibhidi ijila ku uhaxi wami.”—Timote, wala ni uhaxi umubhangesa kukala ni wôma wavulu ni kutandanganya mu ithangana yoso.