MIDI jitatu ja mivu kudima, Jobe uejiidile kiá kuila o jinjila ja diulu jala ni ima iavulu phala ku tu longa ia lungu ni ibhangelu ia Nzambi. O ukexilu ua jinjila u bhangesa ué kumoneka ifika iambote. Mu veji javulu kioso o Bibidia ki zuela ia lungu ni jinjila ja diulu, iene i tu longa madisá a valolo a lungu ni kuendesa o muenhu ni ukamba uetu ni Nzambi. Tu dilonge ifika imoxi.

O athu a tungile mu Izalaiele ejiidile kiambote o ukexilu ua jiphiáphia, o jiphiáphia ja kexile mu tunga o ikalanga iâ bhu thala dia jinzo. Saí jiji ja tungile o ikalanga iâ mu tembulu ia Salomá. O jiphiáphia ja kexile mu tunga o ikalanga iâ mu tembulu ku muvu ni muvu, ja kexile mu sanga kididi kia kondama, mua tenene ku sasa o tuana tuâ.

O musoneki ua Sálamu 84, mon’â Kola, mu mbeji jisamanu ua kexile mu kalakala semana imoxi mu tembulu, muenhomo ua kexile mu mona o ikalanga íii. Mu kukala kála phiáphia iala ni kikalanga m’onzo ia Jihova. Muéne uambe: “Balaka ié ngana kuuabha kuahi, u Jihova dia ilômbo! Muenhu uami moxi uala ni hânji, ua-lu sota muene kusénduka, mu kuinda kukala mu lumbu lua Jihova; Katé ni ka njila ka sanga kididi kiê kia ku kala, o phiáphia ua tungu kikalanga kiê bhua totuela an’ê, eme-phe, bhene bhu kalakatódio ké u Jihova dia ilômbo, Sobha iami, Nzambi iami!” (Jisálamu 84:1-3) O kuila etu ni minzangala ietu, tua mesena kukala kumoxi mu kilunga kia mundu ua Nzambi?​—Jisálamu 26:8, 12.

O polofeta Jelemiia ua soneka: ‘O nhange iejiia o ithangana iê.’ Sé phata muéne uejiidile kiambote o uendelu ua jinhange mu Ixi ia Kanene. Mu kixibhu 300.000 ndenge ja jinhange, jene mu tunda mu África phala kuia ku Europa bhu kaxi ka honga ia Njolodá. Moxi dia jinhange muala ukexilu u a bhangesa kuvutuka mu thembu ia nvula phala kudivualula. Kála o jinjila ja kamukuá, o jinhange “a tongolola kiambote o kithangana kiâ kia kuvutukila kua tundu.”​—Jelemiia 8:7.

Saí divulu dia lungu ni jinjila, diambe kiki: “O i tu diuanesa mu jinjila o kuijiia kuila jene jiia mu ididi iengi mu kithangana kia tokala sé kuxinganeka.” Jihova Nzambi ua bhana unjimu ku jinjila ua kuijiia o ithangana né muene sé kuxinganeka, maji muéne ua bhana ku athu o kuijiia kua kutongolola kiambote o ithangana. (Luka 12:54-56) O unjimu ua nhange ki ua difu ni kuijiia kua muthu kua lungu ni Nzambi, kuene mua bhangesa kutongolola o ima ia mu bhita. O akua Izalaiele mu izuua ia Jelemiia kexile mu bhana mátui ku ima íii. Mu kiki, Nzambi ua londekesa o maka iá kioso kiambe:  ‘Oso a tende o kizuelu kia Jihova, o unjimu uahi-phe ua kala na-u?’​—Jelemiia 8:9.

Lelu, etu tuala ni ijimbuete iavulu i londokesa kuila tuala mu kithangana kiamba o Bibidia “izuua isukidila-ku.” (2 Tim. 3:1-5) O kuila eie ua-nda kaiela o phangu ia nhange ia kuijiia o ‘kithangana?’

O Holokoko a i tumbula veji javulu mu Bibidia, o ku kondoloka kuê ku diuanesa, mu Ixi ia Kanene Nzambi tu mona-mu kiavulu o jinjila jiji. O Bibidia iamba kuila, tundé bhu ditala dia lebha mu kikalanga kiê, o holokoko i ‘sota o kudia. . . o mesu mê a tena ku mona dikanga.’(Jobe 39:27-29) O mesu mê ala ni kutena kua kumona o dibhulu diala dikanga dia kilometulu kimoxi.

Kála o holokoko i tena ‘kumona dikanga,’ Jihova ué u tena kumona o ima ia-nda bhita ku hádia. Mu kiki, Jihova uambe: ‘Ngi mukuá kutanga o dizubhilu tundé kiá bhu dimatekenu, tundé mu xiahulu muná ngi tanga ima kiluua iiza-ku.’ (Izaia 46:10) Se tu belesela o milongi ia Jihova, tua-nda katula mbote iavulu mu unjimu ni kuijiia kuê kua katunda.​—Izaia 48:17, 18.

O Bibidia i sokesa ió a dielela kua Nzambi, ni jiholokoko, iexi: ‘Oso a kinga kua Jihova a tambula nguzu iobhe, a di leka ku mabhabha kala jiholokoko.’ (Izaia 40:31) O holokoko i tuka kiambote ni kikuatekesu kia kitembu kia tema. Kioso o holokoko ki i sanga o kitembu kia tema, iene i sanzumuna o mabhabha mê i jingujuka o kitembu anga i kuata kubanda dingi. Phala kutuka dikanga, o holokoko ia bhingi o kikuatekesu kia kitembu kia tema. Kiene kimoxi ué ni athu a dielela kua Jihova, a tena ku mu mona kala ió u a kanena kua bhana “o nguzu i lenda ioso.”​—2 Kolindo 4:7, 8.

Ande dia kúfua, Jezú uemanene phala kutala o mbanza ia Jeluzaleme. Muéne uambe: “Jeluzaleme, Jeluzaleme tata! Ua bhingi jipolofeta u ji jibha, akunji a tuma Nzambi ko-kué, e’ u a bûba ni matadi! Lukuxi luos’ulu lu ngandalele kubongolola an’é kumoxi, kala sanji ki i bhongolola tuana tuê moxi a mabhabha, enu-phe, nguenu!”​—Matesu 23:37.

O ukexilu ua beta-o-kota ua jinjila, o vondadi iâ ia kulanga o tuana tuâ. O jinjila jene mu ta o ikalanga iâ bhoxi, kala ki bhanga o jisanji, jene mu langa kiambote o ikalanga iâ. Se o sanji i mona mbanze ia mu nhunga bhulu, iene i dikola ni dizui dia suina, mu kuivua kiki o tuana tuê tu lengela ni lusolo-luoso moxi’a mabhabha mê. Né muene kuiza muanha mba mvula iavulu, moxi’a mabhabha a sanga kididi kia kondama. Kiene kimoxi ué, Jezú ua mesenene kulanga mu nzumbi o athu a tungile mu mbanza ia Jeluzaleme. Lelu, Jezú u tuixana phala kuia kua muene n’a tu bhane o kutululuka, sé hele ia ibhindamu ia kizuua ni kizuua.​—Matesu 11:28, 29.

Mu kidi, tu tena kudilonga ima iavulu ku jinjila. Mu kumona o ukexilu uâ, lembalala o ifika i tu sanga mu Mikanda Ikôla ia lungu ni jinjila. O phiáphia i ku kuatekese kuximana o inzo ia ubhezelu ua Jihova. Lengela kua Nzambi n’a ku bhane o kidielelu ki tena ku kukuatekesa kutuka kála ki bhanga o holokoko. Lengela kua Jezú n’a ku lange mu nzumbi kála ki langa o sanji o tuana tuê. Kála ki bhanga o nhange, tonginina kiambote o izulukutu iene mu bhita ku mundu ilondekesa kuila tuala mu izuua isukidila-ku.