O poxolo Phawulu wasoneka ku jikidista akwa Tesalónika, mwene wambe: “Se bhu kala muthu udituna kubelesela o njimbu yala mu mukanda yu, dilangyenu ni muthu yu.” (2 Te. 3:14) Mu ukulu twakexile mu banza kwila o kitendelesu kiki phala o tufunga ngó. Se muthu ukamba kukayela o itendelesu ya Bibidya ne mwene kyoso kya mubhana kya itendelesu yavulu, o tufunga atokala kubhanga diskulusu phala kudimuna o kilunga. Mu kiki, o aboki atokala ngó kudilunga ni muthu yú mu yonge ni mu kuboka.

Mu kiki twalungulula o kibanzelu kyalungu ni maka enya. Mu kidi o kitendelesu kya bhana Phawulu kyalungu ni ima yeji bhanga kidistá umoxi mu kubatula o maka weji moneka. Mu kiki o tufunga kabhinge kubhanga diskulusu mu kilunga. Mukonda dyahi twalungulula? Tu mone o kitendelesu kya bhana Phawulu kudima.

Phawulu wamono kwila sayi athu mu kilunga kexile ni “wendelu wambote.” Ene kexile mubhana valolo mu itendelesu ya Bibidya. Kyoso kya akundu mu veji yadyanga, mwene wa abhana o kitendelesu kiki: “Se muthu kamesena kukalakala, katokala we kudya.” Maji ne kiki sayi ya kamesenene kukalakala phala kudidikila sumbala akexile ni kithangana. Akexile wê mudita mu maka a ngene ka atokala. Kyebhi o jikidista atokalele kutalatala o athu enya?—2 Te. 3:​6, 10-12.

Phawulu wambe, “dilangyenu ni muthu yu”. O kizwelu kiki mu Ngeleku kilombola kutonginina kyambote o muthu yu. Phawulu wabhana o kitendelesu kiki phala o kilunga kyoso ki phala o tufunga ngó kana. (2 Te. 1:1; 3:6) Kyenyiki se o Kidista wamono phange ni mukwa kukamba kukayela o itendelesu ya Bibidya, mwene watokala kusola “kukamba kudilunga nê”.

O kwila o muthu yu atokala kumutalatala kala muthu amukatula mu kilunga? Kana ngana, Phawulu wambe dingi: “Sulukenu mu ku mudimuna kala phangyenu.” Kyenyiki o jiphange atena hanji kudilunga nê mu yonge ni kuboka nê, maji ene atena kusola kukamba kudilunga nê mu itonokenu. Mukonda dyahi? Phawulu wambe “phala jisonyi ji mu kwate”. Phala o muthu yu ukamba kukayela o itendelesu ya Bibidya ulungulula o ukexilu wê.—2 Te. 3:​14, 15.

Kyebhi o jikidista mu izuwa ya lelu atena kukayela o kitendelesu kiki? Kya dyanga twatokala kuxikina kwila o ima yasoneka Phawulu yalungu ni yo kala ni “wendelu wambote.” Mwene kexile muzwela yalungu ni yo kadifu netu mu kitongolwelu ni mu ukexilu wa kubatula o maka. Mwene kexile we muzwela yalungu ni yo atuluwalesa. Maji, Phawulu wakexile mu zwela yalungu ni yo mu vondadi ya asolo kukamba kubelesela o itumu ya Nzambi.

Lelu se tumona kidistá wala ni ukexilu wakukamba kubelesela o itendelesu ya Bibidya, etu tutena kusola kukamba kudilunga nê mu itonokenu yetu. a Kiki kima ki tusola ubheka wetu, ki twatokala kuzwela ni athu katokala ku mwiji wetu. Maji tutena hanji kudilunga nê mu yonge ni kuboka nê. Mu kiki kyoso mwene kya lungulula o ukexilu wa mwenyu wê, tutena kya kudilunga nê mu ithangana yoso.