MU THEMBU ya soneka o Bibidya, o kimbadi kyexile mu langa o dibhata mba kibhela kya tokala ku muthu wengi. O kizwelu mu Hebalayiku ni mu Ngeleku kyo lungulule “kimbadi” mba “mwingi-wa-dibhata,” sayi bhabha kilombolola we lunda-mbongo, muthu wa mu langa dibhata mba kikalakala kyoso.

O mon’â Jakobo, Zuze, wexile mubhika ku Ijitu. Maji wa kituka mwingi-wa-dibhata dyoso dya Ngana yê, Potifale. Kala kizwela o Bibidya, Potifale “Anga wehela ima yoso bhu maku a Zuze.” (Dim. 39:2-6) Kyoso Zuze kya kituka mutumini mu Ijitu, wa solo we “mwingi-a-dibhata” phala kulanga o dibhata dyê.—Dim. 44:4.

Mu izuwa ya Jezú, avulu exile ni ibhela, a tungile dikanga, kyexile bhwa zukama o ibhela yâ. Kyenyiki, exile mu sola imbadi phala kwendesa o ikalakalu mu mábhya-mâ.

Nanyi exile ku mu sola phala kukala kimbadi? Kolumela, musoneki wa Loma wa tungile ku hama ya dyanga, wambe kwila, o mubhika a mu sola phala kukala kimbadi mba mwingi-a-dibhata, wa tokalele “kwijiya kubhanga kyambote o salu ya mu bhana.” Mwene wa tokalele we kukala ni uhete wa “kwendesa o ima kubhata sé kulelumuna, maji ka tokalele ku ki bhanga ni undanda.” Kolumela wambe dingi: “O kya beta-kota, mwene ka tokalele kubanza kwila, wejiya kyá yoso. Wa tokalele kukala polondo phala kudilonga ima ya ubhe.”

O Mak’â Nzambi a sokesa o kikalakalu kibhita mu kilunga kya Jikidistá ni kikalakalu kya kimbadi. Mu kifika, poxolo Phetele wa swinisa o Jikidistá joso phala kubhanga o ‘mbote ku akwâ,’ ni uhete wa tambula kwa Nzambi, ‘kala ufunu wa mbote wa kyadi kya Nzambi.’—1 Phe. 4:10.

Mu kifika kya Luka 16:1-8, Jezú wa tumbula we o kikalakalu kya kimbadi. Mu veji ya mukwá dingi, kyoso kya jimbulula o kijimbwete kya wijilu wê kala Sobha, Jezú wa kanena ku maxibhulu-mê kwila, weji sola “Kimbadi Kya Fiyele Kya Dimuka”, mba “kimbadi kya fiyele.” O kikalakalu kya beta-kota kya kimbadi kiki, kyeji kala o kubhana kudya mu nzumbi ku akayedi a Kidistu mu kithangana kya izuwa ya sukidila-ku. (Mat. 24:45-47; Luka 12:42) Tu sakidila kyavulu, mukonda twene mu tambula o madivulu a bhanga o Kimbadi Kya Fiyele. O madivulu yâ ene mu a tumikisa ku mundu woso.