1, 2. (a) Ihi ilombolola o kizuelu ‘ujitu’ mu dimi dia Hebalaiku? (b) Ihi i tua-nda di longa mu milongi íii?

KIOSO ki uivua o kizuelu “ujitu,” ihi i u banza? O ku uabha kua ibhangelu ia Nzambi? (Jisá. 19:1) Anga o fuma ia bhana ku athu ala ni sauidi, unjimu, anga o ku zediua kuâ? Mu dimi dia Hebalaiku o kizuelu “ujitu” kilombolola kima kia neme. Mu ukulu kioso kia kexile mu bhanga o kitadi ni phalata mba ulu—se o kitadi kia nemene, kia betele kota mu valolo. O izuelu phala kulondekesa kima kia neme a ki tendela mu ukexilu ua kifika kuila, kima kiala ni valolo mba ki diuanesa.

² O athu a diuana ni fuma ia muthu, maji ihi i sota Nzambi ku athu? O Bibidia izuela o ujitu u bhana Nzambi ku athu. Mu kifika o divulu dia Jisabhu 22:4 dizuela: “O ku di tolesa ni ku xila Jihova, futu iâ jimbongo, ni kijingu, ni muenhu.” O dixibulu Tiiaku ua soneka: “Di tolesienu bhu pholo ia Ngana, muène anga u mi zangeleka.” (Tiia. 4:10) Ujitu uahi u bhana Jihova ku athu? Ihi i tena ku tu fidisa ku tambula o ujitu iú? Kiebhi ki tu tena ku kuatekesa akuetu ku tambula o ujitu iú?

3-5. Ujitu uahi ua-nda tu bhana Jihova?

³ O mukua jisalamu ua dielele kuila, Jihova ueji mu kuata bhu lukuaku lua kadilu phala ku mu ambata ku fuma ia kidi. (Tanga Jisálamu 73:23, 24.) Kiebhi Jihova kia bhanga kiki? Jihova uambata o jiselevende jê ku fuma, mu ku a bhana ujitu mu maukexilu avulu. Muéne u a besoala ni kuijiia o ikanenu iê. (1 Kol. 2:7) Muéne u bhana o fuma kua ió evua o mak’a mê, ni ku a belesela, ni ujitu ua ku kala makamba mê.—Tiia. 4:8.

 ⁴ Jihova u bhana ué ku jiselevende jê o ujitu ua ku bhanga o ukunji. (2 Kol. 4:1, 7) O ukunji iú, u bheka fuma. Oso a katula mbote mu ujitu iú phala ku mu bhana fuma ni ku kuatekesa akuâ, Jihova u a kanena: “Kuma oso a ngi xila eme, ene uâ eme ng’a a xila.” (1 Sam. 2:30) Jihova u xila o athu enhá mu ku a bhana o dijina diê, o jiselevende ja mukua ja Nzambi a a ximana.—Jisa. 11:16; 22:1.

⁵ Ihi ia-nda tambula ió ‘a kingila kua Jihova a belesela o itumu iê?’ A a kanena: “Muene u ku zangeleka ku lundula ixi; kizuua ki batuka ió a bhukumuka, eie u ki mona mesu.” (Jisá. 37:34) Ene a kingila ku kala ku muenhu ua kalelaku.—Jisá. 37:29.

6, 7. Mukonda diahi saí athu ka xikanene kuila Jezú muéne uexile o Mexiia?

⁶ Ihi i tena ku tu fidisa ku tambula o fuma ia-ndala ku tu bhana Jihova? O kima ki tena ku tu fidisa o kuívua kiavulu o ima izuela o athu kalá ni ukamba ni Nzambi. Xinganeka ia soneka poxolo Phaulu ia lungu ni athu akexile ni ungana mu izuua ia Jezú: “Katé-phe ni mu makota a Jijudé amukuá a mu xikana uâ. Maji mukonda-phe dia uôma ua jifalizeu, ka di tange, kuma a lengesa ku a tubhula ni ku a kaiesa mu dilombe. Mbata [o] ujitu u tunda ku athu ua a kalela kota, o ujitu u tunda kua Nzambi, ndenge.” (Nzu. 12:42, 43) Kieji beta-kota se o atuameni enhó k’evuidile o ilongesu ia Jifalezeu.

⁷ Kioso kia mateka o ukunji uê, Jezú ua jimbulula kiambote se mukonda diahi saí athu keji mu tambulula kiambote mba ku mu xikana. (Tanga Nzuá 5:39-44.) O akua Izalaiele akexile kiá mu kingila o Mexiia mu jihama ja mivu. Kioso kia mateka Jezú ku longa, saí athu a mono kuila bhu kaxi ka ikanenu ia Daniiele, o kithangana kieji bhixila Kristu kia zukamene kiá. Kioso kia kexile mu boka Nzuá dia batizu, saí athu akexile mu banza kuila: “Muène Kristu.” (Luk. 3:15) Maji o Mexiia ua kexile kiá bhu kaxi kâ mu ku a bokela. Maji o ji mesene ja ku longa o Kitumu, ki ja mu xikanene. Jezú ua a tangela se mukonda diahi kioso kia ebhula: “Mu tena kiebhi o kuxikana, se enu mu di bhana fuma mu dienu, o fuma-phe i tunda ngó kua Nzambi nguenu ku i sota?”

8, 9. Bhana kifika kia lungu ni mukengeji ulondekesa kiebhi o fuma ia athu i tena ku fidisa o ujitu u tu bhana Jihova.

⁸ Tu tena kuijiia kiebhi o fuma ia athu i tena ku jima o fuma ia Nzambi mu ku sokesa o fuma ni mukengeji. O ngongo iezala ni mukengeji. Xinganeka ngó o kizuua ki ua talele ku diulu eie ua mono nzungule dia jithéthembua! O “kubhenha kua jithethembua,” madiuanu. (1 Kol. 15:40, 41) Se u kala mu mbanza iezala ni mukengeji, o kuila u mona o mukengeji ua diulu? Mukonda diahi o mbanza iezala ni mukengeji i fidisa ku mona o mukengeji ua jithéthembua? O kuila kiki ki bhita mukonda dia kuila o mukengeji ua jisabhalalu ua beta o ku uabha? Kana! Kiki ki bhita mukonda tua zukama ku mukengeji ua jimbanza, kiki ki tu fidisa ku mona o mukengeji ua diulu. Phala ku mona o kuiuka kua jithéthembua, tua tokala tuia mu mu muxitu.

⁹ Kiene kimoxi ué ni fuma ia athu i tena ku tu fidisa ku mona o mukengeji ua Jihova. Athu avulu ka xikina o njimbu iambote mukonda, ala ni uôma ua ima ia-nda zuela o athu a a zolo.  O kuila o jiselevende ja Jihova ja di bhakula, a kala ué ni uôma ua ima ia-nda zuela o jindandu jâ? Xinganeka munzangala uai mu boka mu sanzala kua muijiia kiambote, maji ka muijidile luua kuila muéne Mbangi ia Jihova. O kuila muéne ua-nda kala ni uôma? Abha se phange a mu xonguena mukonda dia ikalakalu ia mesena ku bhanga mu kilunga? O kuila muéne ua-nda kuívua o athu enhá? Mba phange ua te kituxi kia dikota. O kuila muéne ua-nda sueka o kituxi kiê mukonda dia uôma ua ku texi o maujitu mê mba ku luualesa o athu a mu zolo? O kima kia tokala ku bhanga o phange íii se ua mesena ku kala kamba dia Jihova, ua tokala o ku ‘tuma adiakimi a kilunga’ phala ku mu kuatekesa.—Tanga Tiiaku 5:14-16.

10. (a) Ihi ia-nda bhita se tu thandanganha kiavulu ni ima izuela o athu ia lungu n’etu? (b) Kidielelu kiahi ki tu tena ku kala na-kiu se tu kala tu athu a lenduka?

¹⁰ Nange tua mu di suínisa phala ku kula mu nzumbi, maji saí phange u kala mu tu bhana milongi ithangana ioso. O milongi ia tu bhana i tena ku tu kuatekesa, se ki tu kala ni ukumbu, mba ku dituna o ima ia iibha i tua mu bhanga. Mba ua mu kalakala kumoxi ni jiphange. O kuila u thandanganha se nanhi ua-nda tambula o kijingu mukonda dia uhete uê? Se ua mu bhita ni maka enhá, ejiia kuila, uoso “o mukua muxima ua batama u bonga ujitu.”— Jisa. 29:23.

11. Ihi i tua tokala ku bhanga kioso kia tu ximana, ni mukonda diahi?

¹¹ O tufunga ni jiphange ja mukua, a mu di suínisa phala ku ‘sota’ kididi mu kilunga, a tokala a dilanga phala ka kale mu sota ku tambula fuma ia athu. (1 Tim. 3:1; 1 Tes. 2:6) Ihi ia tokala ku bhanga o phange kioso kia mu ximana mukonda dia kubhanga kikalakalu kiambote? Muéne ka-nda iudika kiteka kála kia bhangele Sobha Saúlu. (1 Sam. 15:12) O kuila muéne uejiia kuila u tena ngó ku bhanga o kikalakalu ni kikuatekesu kia Jihova, ni kuila ua-nda di tunda ngó kiambote ku hádia, se Jihova u kolokota ku mu kuatekesa? (1 Phe. 4:11) Kiebhi ki tu divua kioso kia tu ximana, kilondekesa se tua mesena fuma ia Jihova mba ia athu.—Jisa. 27:21.

12. Ihi ia fidisile o Jijudé kuívua Jezú?

¹² O kima kia mukua ki tena ku tu fidisa ku tambula o fuma ia Nzambi o jihanji jetu ja ituxi. O jihanji jiji, ji tena ku tu fidisa kuívua o kidi. (Tanga Nzuá 8:43-47.) Jezú uambe kuila saí Jijudé ka mesenene ku muivua, mukonda ‘a mesenene ku bhanga o jihanji ja tat’â Diabhu.’

13, 14. (a) Ihi iamba o jingijiie ia lungu ni uongo uetu ni dízui dietu? b) Kiebhi ki tu tena ku sola o muthu u tua mesena ku muívua?

¹³ Saí ithangana tu ivua ngó i tua mesena kuívua. (2 Phe. 3:5) Jihova ua bhange o uongo uetu ni ukexilu ua ku kamba kuívua o jibuia ki tu ji mesena. Mu kiki, ívua kiambote o jibuia ja mu bhita kindala. Nange ku kexile mu jivua, mukonda o uongo uê ua mesenene ngó kuívua kima kimoxi. Maji o jingijiie a di longo kuila, ki bhonza o uongo kuívua athu avulu a mu zuela mu kithangana kimoxi. Kiki kilombolola kuila, kioso ki uivua mazui avulu, eie ua tokala ku sola o dízui di ua-nda kuívua.  Eie ua-nda sola o dízui di ua mesena o kuívua. O Jijudé ja mesenene ku bhanga o jihanji ja tat’â Diabhu, kévu Jezú.

¹⁴ O Bibidia ilondekesa kuila, tu tena ku di longa o “unjimu” mba o “uôua.” (Jisa. 9:1-5, 13-17) Etu tua tokala ku sola se tua-nda di longa ihi? Tua-nda sola ió tua mesena ku mu sangulukisa. O jimbudi ja Jezú evua o dízui diê anga a mu kaiela. (Nzu. 10:16, 27) Ene a ‘xikina o kidi.’ (Nzu. 18:37) “Mukonda ki jejiia dízui dia athu engi.” (Nzu. 10:5) O athu enhá a lenduka, a tambula o fuma ia Nzambi.—Jisa. 3:13, 16; 8:1, 18.

15. Mukonda diahi Phaulu uambe kuila o jihadi jê jexile ‘fuma,’ phala o jiphange mu Efezo?

¹⁵ O ku suína mu ku bhanga o vondadi ia Jihova ku kuatekesa akuetu ku tambula fuma. Phaulu ua sonekena o kilunga kia Efezo kuila: “Nga mi bhingi kuila kana kukala ni usudi mukonda dia jihadi ji ngala ku mi talela, inda ji kale jenu ja kutambula fuma.” (Efe. 3:13) Mukonda diahi Phaulu uambe kuila o jihadi jê jexile ‘fuma’ phala o jiphange mu Efezo? O vondadi ia Phaulu ia ku suínisa o jiphange sumbala ni jitendasá, ia londekesa kuila o ku sidivila Jihova kiene o kima kia beta-kota kia tokala ku bhanga o Kidistá. Xinganeka, se Phaulu ka kolokotele mu jiphaxi, o jiphange keji banza kuila o ukamba uâ ni Jihova ni ukunji uâ, ki uexile ni valolo? Mukonda dia Phaulu ku kolokota, ua londekesa ku jiphange kuila phala ku kala dixibulu dia Jezú ku bhinga ku suína.

16. Ibhidi ia ihi ia bhiti na-iu Phaulu mu ixi ia Listra?

¹⁶ Xinganeka kiebhi o ku suína kua Phaulu kua kuatekesa o jiphange. Mu divulu dia Ikalakalu 14:19, 20, tu tanga-mu: “Kueniuku-phe ue kueza Jijudé ji tunda ku Andiioka ni ku Ikônio. Anga a bhomba mundu, hé a bûba Phaulu ni matadi, a mu koka katé ku mukau, kuma a fika uafu. Maji kioso-phe dia mu imanena o jixibulu, a mu te bhu kaxi, muene u balumuka, hé u bokona dingi mu mbonge. O ki kuakie ni kimene, Phaulu anga u katuka ni Barnabé, aia ku Derbe.” Xinganeka muthu a mu beta katé kia ambuka, o kizuua kia mukua uendela bhoxi mu hama ia kilometulu (100 km)!

17, 18. (a) Kiebhi kiejidile Timote o jiphaxi ja kexile mu bhita naju Phaulu mu Listra? (b) Phangu iahi ia katula Timote kua Phaulu?

¹⁷ O kuila Timote muene uexile o ‘dixibulu’ dia kuatekesele Phaulu? O divulu dia Ikalakalu ki di tumbula se muéne, nange uexile muéne. Xinganeka o mukanda ua sonekene Phaulu kua Timote, muéne uambe: “Eie-phe ua kaiela jinga ulongelu uami, ni uendelu, ni ukanenu ua muenhu uami. . . . Eie uejiia kiambote ioso ia ngi bhitile mu Andiokia, ni mu Ikonio, ni ku Listra; jihadi jahi ngó ji nga talele! Maji mu ima ioso-phe Ngana ua ngi kudila-mu.”—2 Tim. 3:10, 11; Ika. 13:50; 14:5, 19.

¹⁸ Timote “ua kaiela” o ulongelu, iu ua mono o ku suína kua Phaulu. Muéne ua katula mbote mu phangu íii. Kioso Phaulu kia vutuka mu mbanza ia Listra, muéne ua mono kuila Timote uexile Phangu iambote, “muene a mu tumbula kiambote kuala o Jiphange joso jala mu Listra ni mu Ikônio.” (Ika. 16:1, 2) Mu ku bhita kithangana, Timote ua kexile polondo phala ku tambula ikalakalu mu kilunga.—Fil. 2:19, 20; 1 Tim. 1:3.

19. Phangu iahi i katula akuetu kioso ki tu suína?

¹⁹ Se tu kolokota ku bhanga o vondadi ia Nzambi, o phangu ietu ia-nda kuatekesa o minzangala ku kala dingi jiselevende jambote ja Nzambi. O maxibulu a ubhe ka di longo ngó, kioso ki tu zuela mu sidivisu ia kuboka, maji a di longa ué kiebhi ki tu dibhana ni ibhidi i tu bhita na-iu ku muenhu. Phaulu ua suínine mu jiphaxi javulu, ‘phala oso akexile mu kixikanu a bhuluka ni ku tambula o muenhu ua kalelaku.—2 Tim. 2:10.

20. Mukonda diahi kima kiambote ku kolokota ku sota o ujitu ua Nzambi?

²⁰ Ki kima kiambote ku suluka ku sota ‘o fuma i tunda ngó kua Nzambi?’ (Nzu. 5:44; 7:18) Tua tokala tu suína mu ku bhanga kiki! (Tanga Loma 2:6, 7.) Jihova “ua kà bhana muenhu ki uabhua kua oso a kuata kinhenge mu kubhanga o mbote, a bhindamena o fuma.” Se tu kala ni ‘kinhenge mu kubhanga o mbote,’ tua-nda kuatekesa akuetu ku kolokota mu ufiiele ni ku tambula muenhu ua kalelaku. Kana kuehela kima kioso-kioso ku ku fidisa ku tambula o ujitu ua Nzambi.