O Divulu XX, Antiguidades Judaicas dia soneka Flávio Josefo ku hama ia dianga, dia zuela ia lungu ni kufuá kua “Tiiaku, phange a Jezú a mu ixanene Kristu.” Jingijiie javulu a xikina kuila o izuelu íii ia kidi. Maji saí athu ka xikina mu izuelu ia mukuá ia lungu ni Jezú, i tu sanga ué mu divulu didi. O izuelu íii, a ixana Testimonium Flavianum (Umbangi ua Flávio) iamba:

“Mu kithangana kieniókio mua kexile diiala a mu ixanene Jezú, ua kexile mu bhanga ikalakalu ia madiuanu—mesene ia athu akexile mu xikina o kidi ni kisangusangu kioso. Muéne ua tambuluile athu avulu ki kale akua Jijudé ni akua Ifuxi iéngi. Muéne uexile Kristu; kioso Pilatu, kia mu funhisa ku makota phala ku mu phaphela ku [taka], o ió a mu zolele tundé ku dimatekenu ka muehela ubheka uê, ua a monekena mu kizuua kia katatu kioso kia mu fukununa, kala kia zuelele o jipolofeta, ia lungu ni maka enhá ni kuinhi dia midi dia ima ia mukua ia madiuanu ia lungu ni muéne; ni kuila o muiji ua Jikidistá, dijina dia tundu kua muéne, tu u sanga hanji lelu.”—Josephus—The Complete Works, a i lungulula kua William Whiston.

Tundé ku disukilu dia hama 16, o athu a xikina mu izuelu íii ia kidi ni ió ene ni phata kuila Josefo ka soneka o izuelu íii, ene mu zoka. Serge Bardet, diiala mukua musoso mu ixi ia França, ua xinganeka ku batula o maka enhá ene mu a zokela kiá ku hama ji uana ja mivu. Muéne ua soneka o divulu Le Testimonium Flavianum—Examen historique considérations historiographiques (The Testimonium Flavianum—Musoso ua Bhiti.)

Josefo kexile Kidistá. Muéne uexile mukua Judé, mutangi a misoso. Mu kiki, o maka enhá a moneka kioso Jezú kia tambula o dijina dia “Kristu.” Mu ibanzelu ia Bardet “o dijina dia Kristu dia difua ni majina akua Ngeleku.” Bardet uambe ué kuila, o Jijudé ni Jikidistá a banza kuila “o dijina Christos dia tumbula Josefo, ki kima kia ku kala ni phata,” maji kima kia kidi, “o ibanzelu ia athu iene mu bheka jiphata javulu, mukonda dia kiki, ku bhinga ku lombolola kiambote o maka enhá.”

O kuila saí muthu ua lungulula o musoso iú, phala u difu ni musoso ua Josefo? Kioso kia di longo o misoso ioso ia lungu ni maka enhá, Bardet uambe kuila, kiki kieji bhita ngó mu madiuanu. O kiki kieji bhinga muthu uala ni “uhete ua ku lungulula o ima ia soneka akuâ mu ukexilu ua iuka, ka tena ku uijiia,” mu kiki, o muthu iú-phe ueji tambula o dijina dia “Josefa phala n’a di difu ni Josefo.”

Mukonda diahi o jingijiie ja kexile ni phata ia izuelu íii? Mu ku tongolola kuebhi kua kexile mu tunda o maka, Bardet uambe kuila, “kuene jiphata javulu ja lungu ni Testimonium—maji o izuelu ia mukua iokulu, kana—mukonda, a bhange ibhuidisu iavulu ia lungu ni Testimonium.” Muéne uambe dingi kuila, o athu akexile ni jiphata jiji mu ji hama ja mivu mukonda dia “ima ka ejidile kiambote,” mu veji dia ku tongolola o musoso iú ua kidi.

Ki tuejiia se o ima ia soneka Bardet ia-nda lungulula o ibanzelu ia jingijiie, ia lungu ni Testimonium Flavianum. Maji o isoneku íii ia lungulula o ibanzelu ia Pierre Geoltrain, uexile ngijiie mu Judaísmo helenístico ni ia Jikidistá ja Dianga. Mu mivu iavulu muéne ka xikinine mu Testimonium, katé muene ni ku xonguena oso akexile mu xikana o musoso iú ua kidi. Maji muéne ua lungulula o ibanzelu iê. Muéne uambe kuila, o ima ia soneka Bardet, iene ia bhangesa ku lungulula o ibanzelu iê. Mu kiki, Geoltrain uambe kuila, “tundé lelu se-ku muthu ua tokala ku kala ni phata kuila, Josefo muéne ua soneka o musoso iú.”

Mu kidi, o Jimbangi ja Jihova ala ni kima kia beta-kota kia bhangesa ku xikina Jezú, kala Kristu—o kima kiki, o Bibidia.—2 Tim. 3:16.