1. (a) Ídifua iebhi ia Jihova ia tokala ku xinganeka o Kidistá? (b) Kiebhi ki tu tena ku katula mbote mu ku di longa o ídifua ia Nzambi?

KIOSO ki u xinganeka mu ídifua ia Jihova, ihi i u banza? Nange tu banza o ídifua kála o henda, o kuiuka, o unjimu ni ku tena. Sé phata tuijiia kuila Jihova uene ni ídifua iavulu iambote. Mu kidi, Jihova uene ni ídifua iavulu, 40 ndenge, o ídifua ioso íii tuene mu di longa-io kiá mu madivulu metu. Se u di longa-io kimoxi-kimoxi, ni muiji uê, ua-nda kuijiia kiambote Jihova! Kiebhi ki tu tena ku katula mbote mu ku di longa o ídifua íii? Etu tua-nda bhana dingi valolo ku ídifua ia Tata ietu ia diulu. Tua-nda mesena kiavulu ku kaiela o phangu iê, ni ku kala kamba diê.—Josu. 23:8; Jisá. 73:28.

2. (a) Bhana phangu i londekesa kiebhi ki tu tena ku bhana valolo ku ídifua ia Jihova? (b) Ihi i tua-nda di longa mu milongi íii, ni mu milongi ia-nda kaiela?

² Ihi ilombolola ku “bhana valolo” ku kima? Mu milongi íii, ku lombolola kuijiia o valolo ia kima. O muthu u bhana valolo ku kima, kioso ki bhita o kithangana. Mu kifika, tu uabhela dingi o kudia kioso ki tuívua o dizumba mba kioso ki tu lola o kudia, mu kusuka-ku, etu ué tu lamba o kudia kuku. Kiene kimoxi ué, tu bandekesa o valolo ietu ku ídifua ia Jihova kioso ki tu di longa ni ku xinganeka mu ídifua íii, ni ku kala ué ni ukexilu iú ku muenhu uetu. (Efe. 5:1) O milongi íii, ni milongi iiadi i tua-nda di longa, ia-nda tu kuatekesa ku bandekesa dingi o valolo ku ídifua ia Nzambi, i tua kambe o ku bhana o valolo iavulu. Mu ídifua íii, tua-nda di longa: Ihi ilombolola o kídifua? Kiebhi Jihova kia londekesa kídifua kiki? Ni kiebhi ki tu tena ku kaiela o phangu ia Jihova mu kulondekesa o kídifua kiki?

3, 4. (a) Kiebhi ki ueji mona kuila o muthu iú ua uabhela o ku mu zukama? (b) Kiebhi Jihova kia tu bhana kidielelu kuila muéne ua uabhela o ku mu zukama?

³ Kia dianga tua-nda di longa ihi i lombolola ku uabhela ku mu zukama. Kiebhi ki ueji mona kuila o muthu iú ua uabhela o ku mu zukama? Nange uzuela kuila, ‘o muthu iú mukua henda, uivua akuâ mu ithangana ioso, ka bhonzo kuzuela nê.’ Eie u tena ku mona se o muthu ua uabhela o ku mu zukama mba kana, mu kuívua kioso kia zuela, mba ku mona kiebhi kia zuela—o pholo iê, mba o ukexilu uê.

⁴ Kiebhi kiene mu londekesa Jihova kuila muéne ua uabhela o ku mu zukama? Sumbala muéne o Muteni-a-Ioso ua bhange o ngongo, maji Jihova ulondekesa kuila ua uabhela kuívua ni ku tambuijila o misambu ietu. (Tanga Jisálamu 145:18; Izaia 30:18, 19.) Etu tu tena ku zuela ni Nzambi ola ioso-ioso i tua mesena, kididi kioso-kioso ku tuala. Tu tena ku mu zukama sé hele, mu kuijiia kuila muéne nuka ua-nda tema se tu bhanga kiki. (Jisá. 65:2; Tiia. 1:5) O Mak’â Nzambi a tumbula Jihova, kála o ukexilu ua muthu mu xitu, phala kulondekesa kuila muéne ua mesena o athu a zuela nê. Mu kifika, o mukuá jisalamu Davidi ua soneka kuila: “Mesu ma Jihova ma lûngu” ko kuetu, o ‘lukuaku lué lua kadilu, luene lua tu fikidila.’ (Jisá. 34:15; 63:8) O polofeta Izaia ua sokesa Jihova ni mubhidi, kioso kiambe: “O tu mbudi ua kà tu ongeka bhu maku, hé u tu akata bhu jihata jê.” (Iza. 40:11) Xinganeka! Jihova ua mesena tu mu zukama, kála o tumbudi bhu jihata ja kafunga ka henda. Tata ietu ua uabhela o ku mu zukama! Kiebhi ki tu tena ku kaiela o phangu ia Jihova mu ukexilu iú?

5. Mukonda diahi o tufunga a tokala ku kala ni kídifua kia ku uabhela ku a zukama?

⁵ Mu izuua íii, ebhuidisa Jimbangi ja Jihova mu jixi javulu, “kídifua kiebhi ki ua beta ku uabhela ku kafunga?” Avulu a tambuijila, “muthu ua uabhela o ku mu zukama.” O Jikidistá joso a bhingi ku kala ni kídifua kiki, maji bhenge-bhenge o tufunga ene a tokala kulondekesa o kídifua kiki. (Iza. 32:1, 2) Saí phange ua londekesa o valolo ia kídifua kiki kioso kiambe: “Tu tena ngó ku katula mbote ku ídifua  ia mukua ia kafunga, se muéne u kala ni kídifua kia ku uabhela o ku mu zukama.” Uejiia ihi ia mesenene kuzuela o phange? Kiebhi ki u tena ku bhangesa akuenu ku zuela n’eie sé hele?

6. Iebhi o ndunge phala o muthu ku kala ni kídifua kia ku uabhela o ku mu zukama?

⁶ O ndunge phala kulondekesa o kídifua kia muthu ua uabhela o ku mu zukama, o ku suua o ibhindamu ia akuenu. Se kafunga u suua o ibhindamu ia jiphange, u mesena ku di bhakula phala ku a kuatekesa, ki kala o ahatu mba o mala, ni ana-ndenge a-nda mona o ukexilu iú. (Mar. 10:13-16) Carlos uala ni 12 a mivu uambe: “Kioso ki ngi mona o tufunga mu kilunga a mu kuolela, ki ngi uabhela kiavulu.” O kafunga ka tokala ngó ku zuela kuila muthu ua uabhela o ku mu zukama, maji ua tokala kulondekesa ku athu o ukexilu iú. (1 Nzu. 3:18) Kiebhi kia tena ku bhanga kiki?

7. Mukonda diahi o athu ka kala ni hele ia kuzuela n’etu, kioso kia tu mona ni kalatá ka kiônge? Ihi i tu di longa mu phangu íii?

⁷ Xinganeka mu kifika kiki. “Mu izuua íii sai phange uendele mu Kiônge kia Dikota mu ixi iéngi. Kioso kia kexile mu vutuka ku bhata mu kiphululu, muéne ua téle o kalata kê ka kiônge kia kexile ni kisoneku kiambe: “Utuminu ua Nzambi Uize!” O diiala u kalakala mu kiphululu ua momo o kalatá, iu uambe kua phange ietu, o Utuminu ua tokala kuíza muene—eme nga mesena kuzuela dingi n’eie ia lungu ni maka enhá.” Mu kiki, ene a zuela kiavulu, mu ku suka-ku o diiala ua xikina o madivulu metu. Kiki kia bhiti kia ni ji phange javulu. Mukonda diahi o athu ka kala ni hele ia kuzuela n’etu kioso kia tu mona ni kalatá ka Kiônge? Mukonda o kalatá ka zuelela o athu: “Ku kale ni hele ia ku ngi zukama. Ngi ebhuidise kuebhi ku nga múia.” O kalatá kijimbuete kilondekesa ku athu kuila tua mesena ku a tangela o njimbu iambote. Kiene kimoxi ué, o tufunga mu kilunga a tokala kulondekesa ku jiphange mu ukexilu uâ, kuila: “Ku kale ni hele ia ku ngi zukama.” Iebhi o ijimbuete?

8. Kiebhi kilondekesa o tufunga kuila a suua o jiphange, ni kiebhi ki divua o jiphange?

⁸ O ijila ia jixi ki iene imoxi ni ijila ia jixi ja mukuá, maji kioso ki tuolela ni jiphange jetu ni ku a menekena kiambote, tua mu londekesa kuila tua mesena o mbote iâ. Nanhi ua tokala ku dianga ku bhanga kiki? Xinganeka mu phangu ia xisa Jezú. Matesu ua soneka kuila mu kiônge kia bhangele ni maxibulu mê, “Jezú anga uiza, u a ambela.” (Mat. 28:18) Kiene kimoxi ué lelu, o tufunga ene a tokala ku dianga ku zukama ku jiphange phala kuzuela nau. Kiebhi kia-nda divua o jiphange mu kilunga? Saí phange muboki ua thembu ioso, uala ni 88 dia mivu uambe: “Kioso ki ngi bokona mu Kilunga o tufunga a ngi menekena, a ngi ximana mba a ng’elelesa, ngi mona kuila ngala ni valolo.” O phange ia mukua uambe ué: “Nange ki moneka kala ki kiala ni valolo, maji phala eme, se kafunga u ngi tanesa ni ngalasa, ngi sanguluka kiavulu.”

9, 10. (a) Phangu iahi i tu bhana Jihova? (b) Kiebhi o tufunga kia tena ku kaiela o phangu ia Jihova?

 ⁹ Mu kidi, ki tu tena ku kala tu athu a uabhela ku tu zukama, se ki tu kala ni kithangana. Jihova ua tu bhana phangu ia lungu ni ukexilu iú. “Muène kana muthu ua mu kala dikanga.” (Ika. 17:27) Mu kifika, o tufunga a tena ku suua o jiphange se a katula kithangana kia kuzuela nau ande dia ku mateka o iônge mba kioso kia zumbuka—o minzangala mba o adiakimi. Sai phange muboki ua thembu ioso uambe: “Se kafunga u ngi menekena, anga uimana phala kuívua kioso ki ngi mu tambuijila, eme ngi mona kuila ngala  ni valolo.” Saí phange ua mu sidivila Jihova mu 50 a mivu uambe: “Kioso o tufunga kia katula kithangana phala kuzuela n’eme kioso ki tu zumbuka mu kiônge, ngi mona kuila ngala ni valolo.”

¹⁰ Mu kidi, o tufunga a bhingi ué ku bhanga o ima iâ, maji mu kiônge ene a tokala ku kala ni kithangana phala kuzuela ni jimbudi.

11, 12. (a) Ihi ilombolola ku kamba katombo? (b) Phangu iebhi i tu bhana Jihova ia lungu ni ku kamba o katombo?

¹¹ O ku kamba o katombo kídifua kia mukua kia Jihova. Ihi ilombolola ku kamba o katombo? Kilombolola ku bhanga mbote ku athu a ukexilu uoso. O ku kamba o katombo ku bhingi ima iiadi: O vondadi ni ima i tu bhanga. Mukonda diahi ku bhinga o ima iiadi íii? Mukonda o muthu kene ni katombo, muéne ngó u tena ku talatala akuâ sé katombo. Mu Mikanda Ikola ia Ngeleku, o kizuelu “ku kamba, kathombo” kilombolola ué muthu “ka solo o jipholo,” mba ku bhana valolo ku muthu umoxi, o ua mukua kana. (Ika. 10:34) O muthu kene ni katombo ka bhana valolo ku muthu mukonda dia ukexilu uê, mba mukonda dia kitadi kiavulu, o akuâ kana. Muéne u talatala kiambote o athu a ukexilu uoso.

¹² Jihova muene o phangu ia beta-o-kota ia ku kamba o katombo. O Maka mê amba kuila, muéne “kene ni kathombo ka athu,” ni kuila, “ka moneka kathômbo k’athu.” (Tanga Ikalakalu 10:34, 35; Matendelelu 10:17.) O maka a moneka mu izuua ia Mozé, a londekesa o kidi kiki.

13, 14. (a) O maka ahi a di bhanene nau o kitanu kia an’a Zelofeade? (b) Kiebhi kia londekesa Jihova kuila kene ni katombo?

 ¹³ Kioso akua Izalaiele kia kexile mu bokona mu Ixi ia Kanena, kitanu kia ahatu exile jiphange, exile ué akudi, a di bhanene ni maka a bhonzele. Maka ahi a di bhanene nau? Ene ejidile kuila o muiji uâ ueji tambula kibhela kála kia kexile mu tambula o miji ia mukuá mu Izalaiele, ia tokalele kua tat’â. (Dia. 26:52-55) Maji o tat’â, Zelofade ua tokalele ku muiji ua Manasa ua fuile kiá. Maji mu ijila iâ, o an’ê a mala ene eji lundula o kibhela, maji Zelofade uexile ngó ni an’a ahatu. (Dia. 26:33) Sé o an’a mala ku muiji, phala ku lundula o ixi, o kuila o kibhela kia muiji eji ki bhana ku jindandu, phala o an’a ahatu a kamba ku lundula o kibhela kia tokalele ku muiji?

¹⁴ O kitanu kia jiphange endele mu kuibhuidisa Mozé: ‘Dijina dia tat’etu-phe dijimukina-hi bhu kaxi ka muiji uê, mukonda dia ku kamba mon’a diiala?’ Ene a mu dionda: “Etu uetu tu bhane ue undundu uetu, kumoxi ni jiphange ja tat’etu ja mala.” O kuila Mozé kioso kiévu kiki uambe kuila, o ‘Kitumu ka tena ku ki lungulula?’ Kana, muéne ua “bheka maka  mâ bhu pholo ia Jihova.” (Dia. 27:2-5) Kiebhi kia mu tambuijila Jihova? Jihova uambela Mozé: “Ana a Zelofade, a ahatu, a zuela kiambote; u a bhana muene kulundula kumoxi ni jiphange ja tat’â; undundu uoso ua xi tat’â, u bhite kua ene.” Jihova ua bandekesa-ku dingi. Ua londekesa kuila o kitumu a tena ku ki lungulula, ua tendelesa Mozé: “Hé bhu kala muthu uafu, ka xi mon’a diiala, undundu uê mon’ê ua muhatu u u lundula.” (Dia. 27:6-8; Josu. 17:1-6) Tundé o kithangana kieniókio o ahatu oso akua Izalaiele akexile ni maka enhó, a tokalele ku lundula o undundu ua a tokalele.

15. (a) Kiebhi Jihova kene mu talatala o jiselevende jê, bhenge-bhenge ió kala ni muthu u a kuatekesa? (b) Musoso iebhi ia mukua ia Bibidia ilondekesa kuila Jihova kene ni katombo?

¹⁵ O ukexilu ua ku batula o maka enhó, Jihova ua londekesa kuila kene ni katombo! Jihova ua talatala o ahatu enhó ka kexile ni muthu u a bhângela ni ku xila, kála kia talatala akua Izalaiele. (Jisá. 68:5) Mu Bibidia muala misoso iavulu ilondekesa o kidi kiki, kuila: Jihova kene ni katombo ku jiselevende jê.—1 Sam. 16:1-13; Ika. 10:30-35, 44-48.

16. Kiebhi ki tu tena kulondekesa kuila ki tuene ni katombo ni kiebhi ki tu tena ku suínisa o kídifua kiki?

¹⁶ Kiebhi ki tu tena ku kaiela o phangu ia Jihova ia ku kamba o katombo? Lembalala kuila o katombo kala ni maukexilu aiadi. Tu tena ngó ku talatala akuetu sé katombo, se tu kamba o katombo. Mu kidi, etu enioso tua uabhela ku banza kuila tu athu tua uabhela o ku tu zukama. Maji uejiia ué kuila, ki tu bhonza kuijiia kiebhi ki tu mona akuetu. Mu kiki-phe kiebhi ki tu tena kuijiia se akuetu a tu mona kuila ki tu akua katombo? Kioso Jezú kia mesenene kuijiia ihi ia kexile mu zuela o athu ia lungu ni muéne, uebhula ku makamba mê a dielele: “Athu ala ku ng’ila kuma eme nanhi?” (Mat. 16:13, 14) Mukonda diahi ki tu kaiela o phangu ia Jezú? Nange u tena ku bhinga ku kamba diê ua mu ijiia kuila u zuela o kidi, phala kuijiia se u mukuá kathombo. Se kamba diê dia muhatu mba dia diiala uamba kuila eie uala ni katombo kofele, ihi i ua tokala ku bhanga? Samba kua Jihova n’a ku kuatekese ku lungulula o ibanzelu iê ia lungu ni akuenu, phala u kaiele o phangu iê, ni ku talatala akuenu sé katombo.—Mat. 7:7; Kol. 3:10, 11.

17. Mu maukexilu ahi mu tu tena kulondekesa kuila ki tuene ni katombo?

 ¹⁷ Mu kilunga kia Nzambi, tua tokala kulondekesa o vondadi ietu ia ku kaiela o phangu ia Jihova, ia ku kamba o katombo mu ku talatala o jiphange jetu ni ku a xila, ni henda. Mu kifika, kioso ki tu zalela o jiphange ku bhata, tu tena ku bhanga kiki ni jiphange ja tokala mu jixi jengi, mba o athu a bhindama, o atudi mba o minzangala kala ni jitata mu kilunga. (Tanga Ngalásia 2:10; Tiiaku 1:27.) Mu sidivisu ia kuboka, tua bokele o athu a ukexilu uoso sé katombo, katé muene ni athu akua jixi jengi. Tua sanguluka kiavulu mu ku kala ni madivulu a longa o Bibidia mu 600 ja madimi. Kiki kiene o kithangana ki tua tokala kulondekesa kuila, ki tuene ni katombo!

18. Kioso ki u xinganeka kuila Jihova kene ni katombo, ni kuila muéne ua uabhela o ku mu zukama ihi i ua tokala ku bhanga?

¹⁸ Kioso ki tu xinganeka kuila Jihova ua uabhela o ku mu zukama, ni kuila muéne ki mukua katombo, tua-nda beta-kota ku mu bhana valolo. Mukonda dia kiki, tua-nda mesena ku kaiela o phangu ia Jihova ni kulondekesa o ídifua íii, kioso ki tu di bhana ni jiphange jetu, ni athu u tu sanga kioso ki tuia mu boka.