KUA bhitile kiá dikuinhi dia mivu, Gregorio ni Marilou, dikaza ala mu 30 a mivu ndenge a kitala, akexile aboki a thembu ioso, mu mbanza ia Manila, maji akexile ni salu ia ku kalakala kizuua kia muvimba mu semana joso. Kia a bhonzele kiavulu, maji ene a di tundu kiambote. Marilou a mu habesa phala ku tumina o ikalakalu ioso mu bango mua kexile mu kalakala. Muéne uambe: “O salu ietu ia tu kuatekesa mu ima iavulu se ku bhindama mu kima.” Mukonda dia kitadi kia kexile mu nganhala, a banze ku tunga inzo ia mesenene, ku luiji lua mbanza ia Manila, dikanga diexile 19 ji kilometulu. Ene a soto ditenda phala ku a tungila o inzo, phala ku futa ku mbeji, katé kia tenesa dikuinhi dia mivu.

Marilou uambe: “O salu iami ia ubhe, ia bhingile kuila ngi kalakala kiavulu, kiki kia ngi bhangesa ku kamba o vondadi ia ku bhanga o ima mu nzumbi. Eme nga divuile kála nga mu nhana Jihova.” Muéne ua lombolola dingi uixi: “Ki ngi tenene dingi ku bhana kua Jihova o ima mu nzumbi i nga mu kanene ku bhanga mu sidivisu iê.” Mukonda dia maka enhá, Gregorio ni Marilou a xikama phala ku xinganeka o ima ia  kexile mu bhita ku muenhu uâ. Gregorio uambe: “Tua xinganeka kuila tua tokalele ku bhanga kima, maji ki tuijidile ihi i tua tokalele o ku bhanga. Tua xinganeka kuila, tua tokalele ku di bhakula mu sidivisu ia Jihova, bhenge-bhenge, mukonda ki tu kexile luua ni mona. Kienhiki tua sambe kua Jihova, phala tuijiie ihi i tua tokalele o ku bhanga.”

Mu kithangana kieniokio, tuevu milongi iavulu ia lungu ni ididi ia bhindamena aboki a Utuminu. Gregorio uambe: “Tua mono kuila Jihova ua kexile mu tambuijila o misambu ietu bhu kaxi ka madiskursu iá.” O dikaza dia sambe mu ku bhinga dingi kixikanu phala n’a tena o ku sola ni unjimu. Maji o kima kieji ku a fidisa, o inzo ionene ia kexile mu tunga. Mukonda ene a futile kiá mivu itatu ku ditenda. Ihi ia bhange? Marilou uambe: “Se tua sukamene o ku tunga o inzo, tueji texi o kitadi ki tua futile kiá​—kitadi kiavulu kiá. Maji tua mono kuila, kua bhingile ku sola, se tu bhanga o vondadi ietu mba tu bhanga o vondadi ia Jihova.” Mu ku xinganeka mu izuelu ia poxolo Phaulu, ua monene kuila o ima ioso íii iexile ‘ixete,’ ene ka zubha dingi o ku tunga o inzo iâ, a tundu ku salu, a sumbisa o ima ioso ia kexile na-iu, ai mu tunga mu sanzala iokulu mu Palawan, o dikanga dia sanzala katé ku sulu ia mbanza ia Manila enda 480 kilometulu—Fil. 3:8.

Ande dia ku tunda, Gregorio ni Marilou, akexile polondo phala ku sanguluka ni ima iofele, maji ene kejidile kuila eji sosolola ima iavulu, a kijidile ngó kioso kia bhixila bhu kididi. Marilou uambe: “Ki tu ki kingile,” ki ku kexile mukengeji, ne inzo ia dixidixilu. Mu veji dia ku lambela ku foká, tua xanga jihuinhi, tua uika o túbhia, kuene ku tua lambela. Ki tua kexile dingi ni ukexilu ua kuia mu sumba mu maloja, mba kudia mu bale, ni ima ia mukuá dingi, kála ki tu kexile mu mbanza.” Maji o dikaza dia xinganeka mu kima kia a bhangesa kuia bhu kididi kieniókio, kiki kia a kuatekesa ku lungulula o ukexilu uâ. Marilou uambe: “Mu kiki, nga uabhela ku tala o ibhangelu ia Nzambi, kála o jithéthembua ji bhenha ku diulu. Maji o kima kia beta-o-kota ki nga uabhela, o ku mona o kisangusangu kia athu, kioso ki tu a bokela o njimbu iambote. Mu ku boka bhu kididi kiki, tua ‘di longo o kikutu’ kia ku sanguluka ni ku kala ni nzungule, mba o ku kala ni kia tolo.—Fil. 4:12.

Gregorio uambe: “Kioso ki tueza kuku, tua sange ngó jimbangi jiuana ja Jihova. Ene a sangulukile kiavulu kioso ki nga kexile mu bhanga o madiskursu semana joso, ni kioso ki nga kexile mu xika o viola mu kithangana kia kuimba o mimbu ietu ia Utuminu.” O umbangi ua bhana o dikaza didi, ni kibuka kia jiphange, ku muvu umoxi, a tena ku u sokesa ni kilunga kimoxi kia 24 aboki. Gregorio uambe: “O henda ia tu londekesa mu kilunga kiki, ia tu tula ku muxima.” Lelu mu ku bhita kiá mivu isamanu, mu sanzala íii, ene ambe: “Se-ku kima ki sokela ni kisangusangu kijila mu ku mona o athu a mu kuiza mu bheza Jihova.  Lelu tuejiia kuila o muenhu uetu uala ni valolo ia dikota.”

Ku ixi ia ji Filipina, 3.000 ja jiphange ja maiala ni ja ahatu ndenge, ai mu boka mu ididi mua bhindamena aboki a Utuminu. O 500 ja jiphange ja mala ni ahatu, akudi hanji. Mu kifika xinganeka mu phangu ia, phange Karen.

Karen, uala mu 20 a mivu, a mu sase mu sanzala ia Baggao, mu mbanza ia Cagayan. Kioso kia kexile hanji mu kitala kia kikumbi, muéne ua mesenene kiá ku bhanga dingi mu sidivisu ia ukunji. Muéne uambe: “Mu kuijiia kuila o thembu ia butu kiá, ni ku mona kuila o athu a bhindamena o kuívua o njimbu iambote ia Utuminu, eme nga mesenene ku kalakala bhu kididi kua bhindamene aboki.” Sumbala saí jindandu ku muiji uê, akexile ku mu suínisa ku di longa mu xikola ia katunda, mu veji dia kuia mu ididi mua bhindamene aboki, maji Karen ua sambe kua Jihova mu ku bhinga kikuatekesu. Muéne ua zuela ué ni jiphange ja mukuá akexile mu sidivila kiá mu ji sanzala ku maxokololo. Kioso kia tenesa 18 dia mivu, muéne uai ku sanzala ku maxokololo dikanga dia sanzala kua mu vualela, o dikanga dia 64 a ji kilómetulu.

O kilunga kiofele kuai mu kuatekesa Karen, kia kexile bhu kaxi ka milundu ia zukama ku mbandu ia kalunga ka Pacifico. Karen u lembalala: “Phala ku bhixila ku kilunga kia ubhe kia Baggao, tua kexile mu bhanga izuua itatu, tua kexile mu banda ni ku selela o milundu, ni ku zaúka o ngiji mu 30 a ji veji.” Muéne uambe dingi: “Phala ku sanga maxibulu a Bibidia, nga kexile mu kuenda ola jisamanu, anga ngi zeka ku bhata dia dixibulu, mu ku vutuka, nga kexile mu kuenda dingi ola jisamanu.” Phala’hi o ku di suínisa kiki? Karen uambe dingi ni kisangusangu kioso: “Saí ithangana o inama ia kexile mu kata, eme nga kexile mu longa 18 dia maxibulu. ‘Eme nga fikisa, eme nga mono kuila Jihova mukua mbote!’—Jisá. 34:8.

Ihi ia suinisa phang’etu Sukhi dikudi, uala mu 40 a mivu, ua tungile ku Estados Unidos, kuia ku ixi ia ji Filipina? Ku muvu ua 2011, muéne uendele mu kiônge kia ilunga, mua monene o dikaza a a bhangele ibhuidisu. Ene a tange kuila a sumbisa o ima ia kexile naiu phala kuia ku ixi ia Mexico mu kuatekesa o sidivisu ia ku boka. Sukhi, uambe: “O ibhuidisu ióio ia ngi kuatekesa ku suua mbambe nuka nga i banzele mukulu.” Sukhi ua tokala ku muiji ua India, kioso kia mono kuila ku ji Filipina kua bhingile aboki phala ku kuatekesa o athu akua Punjabi a tungile-ko, muéne ua solo kuia phala ku a kuatekesa. O kuila ua sange ibhidi?

Sukhi uambe: “O kima kia bhonzele phala eme, o ku sola o ima i nga tokalele ku sumbisa ni ima i nga tokalele kuambata. Nga kexile mu inzo iami iambote mu 13 ia mivu, maji mu kusuka-ku nga tundu ni muiji uami, etu tua kexile mu kala lelu kididi, mungu kididi, ni ku tuta o imbamba.” Kia bhonzele maji kia tu  kuatekesa o ku kamba ku bhindamena ima iavulu. Ibhidi iahi ia di bhanana naiu kioso kiai mu tunga ku ixi ia ji Filipina? Ni kisangusangu kioso Sukhi uambe: “Nga kexile mu teketa ni uôma ua ibamba, nga kexile mu kala ni henda ia dibhata diami, íii iexile o ima ia ngi bhonzele. Nga di longo ku dielela kua Jihova, mukulu ndenge!” O kuila ua diela? Sukhi uambe ni kisangusangu kioso; “Jihova u tua ambela, ngi ‘fikisienu se ngi kamba ku mi bhana mabesá.” O izuelu íii, ia kituka ia kidi kioso o mukua dibhata, kia ngi bhuidisa se kizuua kuxi ki nga-nda vutuka? Muéne uambe dingi: ‘Eme ngala hanji ni ibhuidisu iavulu.’ Kiki ki ngi bhana kisangusangu kiavulu, mu kuijiia kuila nga mu kuatekesa o athu ala ni nzala mu nzumbi!” (Mal. 3:10) Sukhi uambe dingi: “O kima kia mukua kia ngi bhonzele, kiexile o ku tunda bhu kididi kiki phala kuia kididi kiéngi. Kioso ki ngi sola o ku tunda, nga kexile mu mona kiebhi Jihova kia kexile mu langa o ima ioso phala eme.”

O phang’etu Sime, dikaza uala mu 30 a mivu, ku mbanza ia ji Filipina, ua kexile ni salu ia kexile mu futa kiambote ku ixi ia Oriente Médio. Kioso kia kexile kuenhoko, ua tambula kikuatekesu ku kafunga ka ilunga ni ku diskursu dia bhangele o phange ua tokala ku Kibuka kia Utuminu, kia suínisa Sime ku ta Jihova ku pholo dia ima ioso ku muenhu uê. Sime uambe: “Maji ku xinganeka o ku xa o salu iami kia ngi nemesa o muxima.” Né kiki muéne ua xi o salu iê, iu ua vutuka ku ji Filipina. Lelu Sime ni muhatu’ê, Haidee, a mu sidivila ku Davao del Sur ku sulu ia ixi , kua bhindamena aboki a Utuminu. Sime uambe: “Kioso ki ngi xinganeka ku dima, ngi sakidila kuila ki ngala dingi ni uôma u nga kexile nau ua ku xa o salu iami. Lelu ngejiia kuila se-ku kima ku muenhu, kia beta-o-kota mu ku bhana kisangusangu kála o ku sidivila Jihova ni muxima uoso!”

Kioso Ramilo ni Juliet, dikaza ala mu 30 a mivu, ene evu kuila saí kilunga kia kexile 30 a ji kilómetulu , tundé ku bhata diâ, kia bhindamene kikuatekesu, ene a di bhakula phala ku kuatekesa. Kieniókio, semana joso ku kale nvula mba muanha, Ramilo ni Juliet, akexile mu kuendela ku mota, phala kuia mu kilunga, ni kuia mu boka. Sumbala akexile mu kuendela mu ikoka ki i uabhele, mba milonde ki i kexile kiambote, kia a bhonzele, maji ene a sangulukile, mukonda akexile mu kalakala kiavulu mu ukunji. Ramilo uambe: “Eme ni muhatu’ami tua mu longa 11 dia maxibulu! O ku sidivila bhu kididi kua kambe aboki, kuala ni ibhidi, maji ki tu bhekela kisangusangu kia dikota!”—1 Kol. 15:58.

Ua mesena kuijiia dingi ia lungu ni ku sidivila ku ididi kua kambe aboki ki kale ku ixi iê mba ku jixi jengi? Se kiene, zuela ni kafunga kê ka ilunga, ni ku tanga o milongi i tu sanga mu Kikalakalu Kietu Kia Utuminu kia mbeji ia Kakuinhi ka muvu ua 2011, kiambe: “O Kuila u Tena ‘Kuia ku Masedonha’?”