1, 2. Mukonda diahi o makutu ni ku nganala a di bandekesa lelu, ni izuelu iahi ia makutu iene mu tanga lelu? (Tala o foto ia dianga.)

O MAKUTU, ni ku nganala, ima ki iene mu kamba ku mundu iú ua Satanaji. Ki tu tokala ku diuana, kioso ki tu mona o ima íii. O Bibidia i longa kuila, Satanaji o Diabhu, mesene ia ku nganala, muene ué ua mu tumina o mundu iú. (1 Tim. 2:14; 1 Nzu. 5:19) Kioso ki tua mu bhixila ku dizubhilu dia mundu iú ua iibha, Satanaji ua mu bandekesa o njinda iê mukonda uejiia kuila, “o thembu iê ia butu kia.” (Dij. 12:12) Mukonda dia kiki, etu tu tena ku kingila kuila o makamba a Diabhu a tanga makutu avulu, benge-benge phala ku nganala ió a mu bheza Jihova.

² O izuelu ia makutu ia lungu ni Jimbangi ja Jihova, ni ilongesu iâ, ene mu i zuela mu jingolokela. Ene a muanganesa o makutu enhá mu ji jurnale, ni mu mitelembe ia izunzumbia, ni mu Internete. Mukonda dia kiki, o athu a xikina mu makutu enhá, ka sota kuijiia o kidi, a kala ni njinda ia Jimbangi ja Jihova.

3. Ihi i tena ku tu kuatekesa ku tolola o makutu a nguma ietu?

³ Phala ku tolola o makutu a nguma ietu, tu sakidila kiavulu mukonda tuala ni Mak’â Nzambi, a tu ‘kuatekesa . . . ku iukisa ia bhengalala.’ (2 Tim. 3:16) Kima kiambote ku di longa o izuelu ia poxolo Phaulu, ia sonekene ku Jikidistá mu Tesalonika ku hama ia dianga, akexile mu ku a nganala, mukonda a xikinine o milongi ia makutu. Muéne ua a tendelesa, phala ‘ene ka kuate kulungujuka mu ixinganeku iâ.’ (2 Tes. 2:1, 2) Disá diahi di tu di longa mu itendelesu ia henda ia bhana Phaulu, ni kiebhi ki tu tena ku belesela o itendelesu íii ku muenhu uetu?

4. Kiebhi kia tendelesa o Jikidistá mu Tesalonika ia lungu ni uejilu ua ‘kizuua kia Jihova,’ ni kiebhi kia mu tu dimuna ué lelu?

⁴ Mu mukanda ué ua dianga ua sonekena o kilunga kia Tesalonika, Phaulu ua zuela ia lungu ni uejilu ua ‘kizuua kia Jihova.’ Muéne ka mesenene kuila o jiphange jê ji kala mua vundu, mba a landuka. Mu veji dia kiki, muéne ua a dimuna kala ‘an’a a mukengeji,’ phala ku ‘tona ni ku kala ku mesu azele.’ (Tanga 1 Tesalonika 5:1-6.) Lelu tua kingila o kibuikilu kia Babilonha ia Dikota, o kisangela kia jingeleja ja makutu. Kiki kia-nda londekesa o dimatekenu dia kizuua kionene kia Jihova. Tu sakidila kiavulu, mukonda tuejiia kiambote kiebhi Jihova kia-nda kumbidila o kikanenu kiê. Etu ué tu tambula itendelesu iavulu mu kilunga, i tu kuatekesa o ku kala ku mesu a zele. O ku ta ku muxima o itendelesu íii, ku suínisa o vondadi ietu ia ku bhanga o sidivisu ia Nzambi ni ‘kilunji kia fuama.’—Loma 12:1.

5, 6. (a) Mu mukanda ua kaiadi ua Tesalonika, ihi ia tendelesa Phaulu? (b) Ihi ia-nda bhanga Nzambi bhu kaxi ka Jezú, ni ihi i tua tokala ku di ibhuidisa?

⁵ Mu ku bhita kithangana, kioso kia tumikisine o mukanda ua dianga ku Jikidistá mu Tesalonika, Phaulu ua soneka o mukanda ua kaiiadi. Mu mukanda iú, muéne ua zuela ia lungu ni kithangana kia-nda kuíza o hadi ia dikota, kioso kia-nda kuíza Ngana Jezú mu fundisa “oso kejiia Nzambi, ni ió nguauâ kutumaka o Njimbu Iambote.” (2 Tes. 1:6-8) O kibatulu kia 2 kia mukanda iú, kilondekesa kuila, saí jiphange mu kilunga a ‘thandanganhele’ kiavulu ni kizuua kia Jihova, katé kia suku mu ku xinganeka kuila o kizuua kia zukamene. (Tanga 2 Tesalonika 2:1, 2.) O Jikidistá jiji, kejidile kiambote kiebhi kieji dikumbidila o kikanenu kia Jihova, kála ki tua mono mu mukanda ua Phaulu, ua lungu ni kikanenu kiki: ‘Kiki tuejiia ngó mbandu, ku upolofeta tuijidisa ngó mbandu. Kioso-phe kia kéza kia tenena, o kiala ngó mbandu ki bhua-ku.’ (1 Kol. 13:9, 10) Maji o isoneku ia Phaulu ni poxolo Phetele, ni jiphange ja mukuá a a undu mu izuua ienioió, ieji tena ku a kuatekesa ku kolokota mu kixikinu kiâ.

⁶ Phala ku iukisa o ima bhu kaxi ka nzumbi ikôla, Phaulu ua soneka kuila, o akua ku lungulula o kidi, ni “muthu ua Kisueia,” eji moneka ande dia ku bhixila o kizuua  kia Jihova. * Mu kiki, mu kithangana kia tokala, o Ngana Jezú ueji “jibha” o athu oso a a nganele. O poxolo ua londekesa ima iiadi ia-nda bhangesa ku a jibha, ‘mukonda nguâ kutambula o henda ia kidi.’ (2 Tes. 2:3, 8-10) Kima kiambote se tu di ibhuidisa: ‘O kuila nga zolo muene o kidi? O kuila nga mu di longa o mulangidi iú, ni madivulu amukuá a Bibidia, a a bhange phala o kilunga kia mundu ua Nzambi ku mundu uoso, phala ngijiie o milongi ia ubhe lelu?’

7, 8. (a) Kiluezu kiahi kia di bhanene na-kiu o Jikidistá ku hama ia dianga? (b) Kiebhi o kiluezu ki tena ku nganala o Jikidistá ja kidi lelu?

⁷ O milongi ia akua ku lungulula o kidi, ki iene ngó ieji kala o kiluezu phala o Jikidistá. Phaulu ua sonekena Timote kuila: “O luimbi lua kitadi, luene lundânji lu bhana o ima ioso iaiibha.” O poxolo Phaulu uambe dingi: ‘Mukonda dia ku di sunga mu ku ki kuata, a jimbila o ku xikana, ia a di toma mu mavuua mavulu ni misongo.’ (1 Tim. 6:10) O “imbamba ioio i bhanga o xitu,” ieji kala ué kiluezu kia dikota.—Nga. 5:19-21.

⁸ Eie u tena ku mona kiá se mukonda diahi Phaulu ua tendelesa o Jikidistá mu Tesalonika, o kiluezu kiexile o akua ku lungulula o kidi, a exana “jipoxolo ja makutu?” Bhu kaxi ka athu enhó, bhua kexile o maiala a tanga o “ima ia makutu, ia kutondalesa, hé a sunga jixibulu ku mbandu iâ.” (2 Kol. 11:4, 13; Ika. 20:30) Jezú ua ximana o kilunga kia Efezo, mukonda ene ka xikina ‘o maiala akua phulu mu kilunga.’ O Jikidistá mu Efezo akexile mu “lola” o athu enhó, ni ku mona kuila exile jipoxolo ja makutu. (Dij. 2:2) Mu mukanda ué ua kaiiadi ua sonekena dingi o akua Tesalonika, Phaulu ua bhana itendelesu: “Kiki-phe tua mi tendelela, enu jiphange, mu dijina dia Ngana ietu Jezú Kristu, kuma mu di kalela ku uphange ni muthu uoso u enda ngó ni ulalu.” Muéne ua tumbula ué o Jikidistá ka ‘mesenene ku kalakala.’ (2 Tes. 3:6, 10) Se ió ka mesenene ku kalakala, exile ilalu, ihi i tuamba ia lungu ni ió akexile ni ukexilu ua ku lungulula o kidi! Mu kidi, o ukamba ni athu enhó kiexile kiluezu, ka tokalele ku di lunga nau—kiene kia tokala ué ku bhanga lelu.—Jisa. 13:20.

9. Mukonda diahi tua tokala ku di langa ku muthu u kuata ku zuela ima ki iala mu Bibidia, mba ku longolola o tufunga ni jiphange ja mukuá a sidivila Nzambi?

⁹ Tua mu bhixila ku kizuua kia hadi ia dikota, ni ku dizubhilu dia mundu iú, mukonda dia kiki, o itendelesu ia bhanene ku hama ia dianga, ia beta-kota mu valolo lelu. Etu ki tu mesena kuehela o ‘mbote ia Nzambi ki i tu tokala ku dibota,’ ni ku texi o kikanenu kia ku tambula o muenhu ua kalelaku, ki kale ku diulu mba mu ixi. (2 Kol. 6:1) Tua tokala ku di langa, se muthu ua múia mu iônge ietu, u mateka ku tu xikinisa mu ima ki iala mu Bibidia, mba ku longolola o tufunga mu kilunga, ni jiphange ja mukuá a sidivila Nzambi.—2 Tes. 3:13-15.

10. Ijila iahi ia tendelesa phala o Jikidistá mu Tesalonika ku i belesela?

¹⁰ Phaulu ua tendelesa o jiphange jê mu Tesalonika ku ‘kolokota’ ni ku kuata o ijila ia a longele. (Tanga 2 Tesalonika 2:15.) Iebhi iexile o ‘ijila’ ia a longele? O ijila íii,  iexile o milongi ia Jezú ia tumina Nzambi kua Phaulu, ni jipoxolo ja mukuá ku soneka. Muéne ka kexile mu zuela ia lungu ni ijila ia kexile mu longa o jingeleja ja makutu. Phaulu ua ximana o jiphange jê mu kilunga kia Kolindo, kála kia soneka: “Mu ima ioso, mua jijila ue o ilekelelu iami i nga mi xila.” (1 Kol. 11:2) O milongi íii, ia tundu ku muthu ua kidi, mu kiki-phe, tu tena ku i dielela.

11. Kiebhi o athu kia tena ku a nganala?

¹¹ Kioso kia sonekena o Jihebeleu, muéne ua tumbula maukexilu aiadi, a tena ku bhangesa o Kidistá ku texi o kixikinu kiê ni ku kamba ufiiele kua Jihova. (Tanga Jihebeleu 2:1; 3:12.) Muéne ua zuela ia lungu ni ku “kunguluka” ni “kuxia.” Kioso kia mu kunguluka o ulungu, nange ku dimatekenu, ku tena ku u mona. Maji bhofele-bhofele, uene u sondoloka. Ku mbandu ia mukuá, o muthu u xinjika o ulungu, muéne u sondolola o ulungu mu ngiji, mu ima ia bhanga. O ifika iiadi íii, ilondekesa o ukexilu ua muthu a mu nganala, uehela o kidielelu kiê kuzoza.

12. Ima iahi i tena ku zanga o ukamba uetu ni Jihova?

¹² Saí jiphange mu Tesalonika, nange a diehele mu ku a nganala. O kuila kiki ki tena ku bhita ué n’etu lelu? Tu tena ku zanga o kithangana kietu mu íii i tu bhanga. Xinganeka ngó o ji ola ji tena ku zanga o muthu mu ku tumikisa njimbu mba ku tanga njimbu mu Internete, mba ku tanga njimbu ia malunda a fiti mu jurnale. O ima íii, i tena ku landukisa o Kidistá ni ku mu zozesa. Ihi i tena o ku bhita? O muthu u tena kueha o kusamba ni muxima uoso, muéne ué ka di longo dingi kiavulu o Bibidia, u fonga mu iônge, ni kuia mu boka. Ihi i tu tena o ku bhanga, phala ki tu lungujuke mu ixinganeku ietu?

13. Kála kia ki kanena mu Bibidia, ukexilu uahi uala nau o athu lelu, ni ihi i tena ku langa o kixikanu kietu?

¹³ Tua tokala ku di lembalala kuila, o dizubhilu dia mundu ua Satanaji dia zukama, ni kuila, o ku zanga o kithangana kiavulu ni athu ka xikina kuila tuala mu “izuua i sukidila-ku,” kiluezu kia dikota. O poxolo Phaulu ua soneka ia lungu ni kithangana kiki: “Kua kà kala athu enda kioso kia a tumu jihânji jâ. Enhá a kà mi bhanga kasekelu ni kuila: Muène ua mi tangela kuila hadia uiza, kuambe? Kizuelu kiê kuila hinu uiza, ki kuebhi? Hanji ki’aia jitata jetu ku kilu, ima ioso ia xalela mu ukalelu uê kala ki ieni’ê kiá tunde bhua matekena ku i bhanga!” (2 Phe. 3:3, 4) Se tu tanga ni ku di longa o Bibidia izuua ioso, kua-nda tu kuatekesa kuijiia kuila tuala mu “izuua i sukidila-ku.” O akua ku lungulula o kidi, a a tange mu Bibidia, a mateka ukulu, katé ni lelu. O “muthu ua Kisueia” uene-ko hanji, muéne uene hanji mu zukutisa o jiselevende ja Nzambi. Mukonda dia kiki, ki tu tokala ku di jimba kuila o kizuua kia Jihova kia zukama.—Sof. 1:7.

14. Kiebhi o ku suína mu sidivisu ia Nzambi, ku tu langa?

¹⁴ O kima kia mukuá ki tu kuatekesa ku dilanga ni ku tu fidisa ku lungujuka mu ixinganeku ietu, o kuboka o njimbu iambote ia Utuminu. Mu kiki, kioso o Mutuameni ua Kilunga, Jezú Kristu, kia tumina o akaiedi’ê ku bhanga maxibulu a jixi joso, mu ku a longa ku belesela o ima ioso ia a longo, muéne ua kexile mu bhana milongi ieji langa o akaiedi’ê. (Mat. 28:19, 20) Phala ku belesela o kitumu kiê, tua tokala tu suína mu sidivisu ia kuboka. Ihi i u banza, o kuila o jiphange mu Tesalonika a sangulukile ni kuboka mba ku longa, mukonda diahi ene a tokalele ku bhanga kiki? Lembalala  ia a sonekene Phaulu: ‘Kana ku jima o kikalakalu kia nzumbi ikôla. Kana ku tenda o ikanenu ia jipolofeta.’ (1 Tes. 5:19, 20) Mu kidi, o ikanenu i tu di longa, ni ku bokela akuetu, o njimbu iambote!

15. Ima iahi i tua tokala ku di longa ku ubhezelu ku muiji?

¹⁵ Tua mesena ku kuatekesa o miji ietu ku di tunda kiambote mu sidivisu ia kuboka o njimbu iambote. Jiphange javulu a mono kuila o kima kia a kuatekesa ku bhanga kiki, o ku katula kithangana ku ubhezelu ua muiji, phala kulondekesa kiebhi kia tokala ku bhanga o ukunji. Nange mu di longa kiebhi o muiji u tena ku kunda dingi o athu a kundile kiá. Ihi ia-nda zuela kioso kia-nda vutuka-ko? Maka ahi a-nda uabhela o mukua dibhata? Kithangana kiahi kia tokala ku kunda o athu? Saí jiphange ué mu ubhezelu uâ ku muiji, a katula kithangana phala ku di longa o milongi ia-nda di longa mu iônge. O kuila saí kima ki u tena ku bhanga dingi phala ku tambuijila ué mu iônge? Se u tambuijila mu iônge, o kixikanu kiê kia-nda kola dingi, kiki kia-nda ku kuatekesa phala ku lungujuke mu ixinganeku iê. (Jisá. 35:18) O ubhezelu ku muiji ua-nda tu fidisa ku zuela ima ki iala mu Bibidia, ni ku tu langa ku jiphata.

16. Ihi i fidisa o Jikidistá a a undu, ku lungujuka mu ixinganeku iâ?

¹⁶ Kioso ki tu xinganeka mu mabesá ene mu bhana Jihova ku mundu uê, bhu kaxi ka ilomboluelu ia Bibidia, tu dielela kuila, tua-nda tambula mabesá a beta-kota ku hádia. O Jikidistá a a undu a dielela ku tumina ni Kristu ku diulu. Sé phata, o kidielelu kiki, kia a fidisa ku lungujuka mu ixinganeku iâ! O itendelesu ia bhanene Phaulu ku jiphange mu Tesalonika, ia tokala ué ku Jikidistá a a undu lelu: “Tua tokala-phe tu sakidila njinga Nzambi, mukonda dia enu, mu jiphange jozole mua Ngana. Kuma Nzambi ua mi sola . . . mu ku mi kôlesa nzumbi moxi mu kuxikana o kidi.”— 2 Tes. 2:13.

17. Milongi iahi, i u sanga mu divulu dia 2 Tesalonika 3:1-5, i ku suínisa?

¹⁷ O athu a kingila o muenhu ua kalelaku mu ixi, a bhanga ioso phala ka lungujuke mu ixinganeku iâ, kála kiene mu bhanga o Jikidistá a a undu. Se ua dielela ku tambula o muenhu mu ixi, belesela o itendelesu ia bhana Phaulu ku Jikidistá a a undu. (Tanga 2 Tesalonika 3:1-5.) Tua tokala ku sakidila ku izuelu íii. Sé phata, o mikanda ia soneka Phaulu phala akua Tesalonika, i tu dimuna phala ki tu zuele ima ki iala mu Bibidia, ni ku xikina milongi ki ia kidi. Mukonda tua zukama kiá ku dizubhilu dia mundu, tu sakidila kiavulu o itendelesu íii.