Mbalahamu Diiala Dia Henda

Nange Mbalahamu keji tena ku dibhana ni kikote kiê. Mukonda o muhatu uê ua kazola ua fuile kiá. Mu kithangana kia ku funda muhatu’ê, o diiala didi dia kuka kiá, u lembalala o ima ioso iambote ia kexile mu bhanga muhatu’ê. Kioso kia kexile mu xinganeka, ua kexile mu dila. (Dimatekenu 23:1, 2) Sé jisonhi ja ku dila, Mbalahamu ua londekesa o kídifua kiê kia beta-kota—o henda.

O HENDA IHI? O henda ilombolola o ukexilu ua ku kuata o ukamba ua kidi ni muthu. O muthu ua henda, ulondekesa o henda iê mu ima ia bhanga, né muéne se o ku bhanga kiki, ku bhinga ku bhanga kima.

KIEBHI MBALAHAMU KIA LONDEKESA O HENDA? Mbalahamu ua londekesele kuila ua zolele o muiji uê. Mbalahamu ua kalakalele kiavulu. Maji né kiki, muéne ua dikile o ibhindamu ia muiji uê mu ukexilu uoso. Jihova ua monene kuila Mbalahamu ua tele ku pholo o ubhezelu ku muiji. (Dimatekenu 18:19) Jihova ua tumbula o henda ia Mbalahamu. Mu kuzuela ni Mbalahamu, Nzambi uambe kuila Izake “mon’é ua kazola.”—Dimatekenu 22:2.

Tu tena ku mona o henda ia Mbalahamu kioso kiafu o muhatu uê ua kazola, Sala. Mbalahamu ua mu didi kiavulu. Sumbala muéne uexile diiala dia suína, muéne ka kexile ni jisonhi ja ku dila. Mbalahamu ua londekesa o ku suína, ni henda.

Mbalahamu ua londekesele kuila ua zolele o Nzambi iê. Muéne ua londekesa o henda íii, ku muenhu uê uoso. Kiebhi? Tua tokala ku lembalala ihi izuela o Bibidia mu divulu dia 1 Nzuá 5:3: “Kuma o henda ia kuzola Nzambi ienhi’íi, o kualuka o ijila iê.” Mu ukexilu iú  Mbalahamu uexile phangu ia dikota mu ku zola Nzambi.

Mu ku bhita kithangana, kioso Jihova kia bhana kitumu kua Mbalahamu, muéne ua belesela mu kithangana kieniókio. (Dimatekenu 12:4; 17:22, 23; 21:12-14; 22:1-3) Muéne ua belesela sé kuijiia se o kitumu kia-nda bhonza ku ki belesela mba kana; Mbalahamu kiebhula kua Jihova se mukonda diahi ua tokalele ku mu belesela. Mbalahamu uejidile kuila o ima ioso íii ki ia kexile ni valolo. Se Nzambi ua mu bhingile ku bhanga kima, muéne uexile polondo phala ku ki bhanga. Mbalahamu ua monene kuila o itumu ioso, ia mu bhanene kithangana kia kulondekesa o henda iê kua Jihova.

PHANGU IAHI I TU KATULA KUA MUÉNE? Tu tena ku kaiela o phangu ia Mbalahamu mu kulondekesa o henda ietu ku akuetu, bhenge-bhenge o jindandu jetu. Ki tu tokala kuehela kuila o ibhindamu ia muenhu, i tu fidisa ku kala ni kithangana kia ku kala ni athu u tua zolo.

Tua tokala ué kulondekesa o henda ietu kua Jihova. O henda íii i tena ku tu kuatekesa kiavulu ku mienhu ietu. Mu kifika, o henda i tena ku tu kuatekesa ku lungulula o ukexilu ua muenhu uetu, o uzuelelu uetu, ni ukexilu uetu, phala ku sangulukisa o muxima ua Nzambi.—1 Phetele 1:14-16.

Mu kidi, o ku belesela o itumu ia Jihova nange i bhonza. Maji né kiki, tu tena ku dielela kuila o Muthu ua kuatekesele Mbalahamu—Ió ua mu ixana “kamba diami”—ua-nda tu kuatekesa ué. (Izaia 41:8) O Maka mê o Bibidia a kanena, muéne: “U mi kuatekesa, u mi suínisa.” (1 Phetele 5:10) Kiki kikanenu kiambote phala ió a dielela ku Dikamba dia Mbalahamu!

[Kilombuelelu ku mbandu 10]

O Kuila o Maiala ka Tokala ku Dila?

Athu avulu eji tambuijila kuila, ka tokala ku dila. Nange eji diuana mu ku tanga kuila Mbalahamu, sumbala uexile muthu ua suína, mukua kixikanu, o Bibidia izuela kuila, muéne ua didile mu kithangana kia jiphaxi. Saí a mukuá ué a didi, kála Zuze, Davidi, poxolo Phetele, o tufunga mu kilunga kia Efezo, ni Jezú. (Dimatekenu 50:1; 2 Samuuele 18:33; Luka 22:61, 62; Nzuá 11:35; Ikalakalu 20:36-38) O Bibidia ki iene mu longa kuila o maiala ka tokala ku dila.