Nzambi u Suua o Ahatu ni Kua a Bhana Kijingu

KIOSO kia kexile mu ixi, Jezú ua londekesele kiambote o ídifua ia Tat’ê ia diulu, ni ukexilu ua ku bhanga kiambote o ima. Muéne uambe: “Eme ki ngi bhange kima k’ubheka uami ngó, maji nga zuela kala kia ngi longo Tata . . . Eme ngi bhanga jinga ioso ia mu uabhela muène.” (Nzuá 8:28, 29; Kolose 1:15) Kienhiki, o ku di longa o ukexilu ua Jezú ua ku dibhana ni ahatu ni kibanzelu kiê kia lungu ni ahatu, ki tu kuatekesa ku tendela kiambote kiebhi Nzambi kia mona o ahatu ni ihi ia mesena phala ene.

Mu ku di longa o Njimbu Iambote ia tange Jezú, o jingijie a mono kuila o ukexilu ua Jezú ua ku dibhana ni ahatu ki u difuangane ni ukexilu ua athu ua ku dibhana ni ahatu mu thembu ia soneka o njimbu iambote. Kiebhi-phe? Mu kiki, o kuila o milongi ia Jezú i bhana hanji ufôlo ku ahatu lelu?

Kiebhi Jezú kia Kexile mu Dibhana ni Ahatu

▪ Jezú ua kexile mu xila o ahatu ni kua bhana valolo. Mu ibanzelu ia atuameni a jingeleja ja Jijudé, o ku kala ni muhatu, ku bhangesa o muthu ku kala ni hanji ia ku zeka nê. Mukonda exile tendasá phala o mala, kiexile kituxi se o muhatu u zuela ni diiala mba uenda njila sé ku ta divunga ku mútue. Jezú ua tendelesa o mala ku langa o jihanji jâ ja xitu, ni ku xila o ahatu mu veji dia ku a fidisa ku kala kumoxi ni mala.—Matesu 5:28.

Jezú uambe ué: ‘Diiala dioso di senga [muhatu’ê n’a kazala ni] uengi, ua te phànda.” (Marku 10:11, 12) Kienhiki, muéne ua ditunu o milongi ia ji rabínico ia londekesele kuila o diiala u tena ku senga muhatu uê “mukonda dia kikuma kioso-kioso.’ (Matesu 19:3, 9) O muhatu u ta phánda, a mu senga mukonda kiexile kituxi phala o Jijudé. O akua rabínico akexile mu longa kuila se o diiala dita phanda, ki kituxi—o muhatu ngó, se ua te phánda, kituxi! Saí velusu ia Bibidia iambe: “Mukonda dia Jezú kuzuela kuila o diiala ua sokela ni muhatu, ua bhana valolo ni kijingu ku ahatu.”

O valolo ia ulongelu uê lelu: Mu kilunga kia Kididistá kia Jimbangi ja Jihova, o ahatu a dibhana kiambote ni mala mu iônge. Kienhiki, ahatu ka tokala ku kala ni uôma ua ku a mona kia iibha mba ku a bhanga poko mu kilunga, mukonda o diiala Kidistá u mona o ‘ahatu kála mam’a jâ, o an’a ilumba kála jiphange jâ, mu kuzela kuoso.’—1 Timote 5:2.

▪ Jezú ua kexile ni kithangana phala ku longa o ahatu. Sumbala mu ijila ia ji rabinico ka kexile mu longa o ahatu, Jezú ua a longo, iu ua a suínisa o kuzuela ia mu banza. Mu kuzuela kuila Madiia ua tokalele kuívua, Jezú ua londekesa kuila o kididi kia muhatu ki mu kuzinha ngó, kana. (Luka 10:38-42) O phange ia Madiia, Malata, ua katula ué mbote mu milongi ia Jezú, kala kia londekesa kioso kia tambuijila Jezú, kioso kiafú Lázalu.—Nzuá 11:21-27.

Jezú ua kexile mu xila kiavulu o ibanzelu ia ahatu. Mu thembu iná, ahatu avulu a Jijudé  a banzele kuila o ku zediua kuijila ngó mu ku kala ni mona ua diiala, bhenge-bhenge se uexile polofeta. Kioso muhatu umoxi kia dikola: “Dia zediua o divumu dia ku ambatele!” Mu kithangana kieniokio Jezú ua mu tangela o kima kia beta-kota. (Luka 11:27, 28) Mu kulondekesa kuila o ku kula mu nzumbi kuene kua betele o kota, Jezú ua mu longo o kima kia beta o kota, o ia kexile mu ku a longa ndenge.—Nzuá 8:32.

O valolo ia ulongelu uê lelu: O alongexi mu kilunga kia Kidistá, a ximana kiavulu o itambuijilu ia ahatu mu iônge. Ene a xila o ahatu a kulu mu nzumbi mukonda a “longa jinga ima ia mbote,” ki kale mu ubheka uâ mba mu phangu ia bhana. (Tito 2:3) Ene uâ a dielela ku ahatu mu ku boka o njimbu iambote ia Utuminu ua Nzambi.—Jisálamu 68:11; tanga o kaxa iambe: “O Kuila o Poxolo Phaulu ua Fidisa o Ahatu o Kuzuela?” mu mbandu 9

▪ Jezú ua mesenene o mbote ia ahatu. M’ukulu, o ana ahatu ka kexile ni valolo iavulu kála o an’a mala. O Talmude ua londekesa o kibanzelu kiki, mu kuzuela: “Ua zediua ió ua vuala an’a mala, kokolo diâ ió ua vuala an’a ahatu.” Saí jitata a mono kuila o ku kala ni ana ahatu kikakakalu kia dikota—ene a tokalele ku sota diiala phala o mon’a muhatu, ni ku bhana imbamba phala kuambata kua muadi uê, ni kuila o mon’a muhatu ka tokala ku mu dielela kuila ua-nda langa o jitata jâ kioso kia kuka.

Jezú ua londekesa kuila o muenhu ua mon’a muhatu, uala ué ni valolo ia dikota, kála o muenhu ua mon’a diiala—muéne ua fukununa o mon’a muhatu ua Jailu, kála kia fukunuine o mon’a diiala ua muhatu mukua Naíne uexile mutudi. (Marku 5:35, 41, 42; Luka 7:11-15) Kioso kia sake o muhatu ua kexile ‘ni dimonho mu kuinhi dia muvu ni nake’ Jezú ua mu ixana “mon’angene a Mbalahamu,” o kizuelu kiki ka ki soneka mu madivulu a Jijudé. (Luka 13:10-16) Mu ku tumbula o kizuelu kiki kia ku xila, muéne ka kexile ngó mu londekesa kuila o muhatu iú uala ni valalo, maji ua londekesa o kixikanu kiê kia dikota.—Luka 19:9; Ngalásia 3:7.

O valolo ia ulongelu uê lelu: Saí musabhu mu ixi ia Ásia uamba: “O ku sasa mon’a muhatu, kua difu ni ku thabhela o jaludim ia vizinhu.” Mu veji dia ku kala ni kibanzelu kiki, o jitata ja Jikidistá a langa kiambote o tuana tuâ, ki kale ahatu mba mala. O jitata ja Jikidistá a longa kiambote o tuana tuâ tua ahatu ni tua mala ni ku langa o sauidi iâ.

▪ Jezú ua dielele o ahatu. Mu inzo ia ku fundisa mu Judá, o izuelu ia muhatu ia sokele ni izuelu ia mubhika. O mukua musoso, Josefo, mu hama ia dianga, ua tendelesa: “O ahatu ka tokala ku a xikina mukonda dia ukexilu uâ.”

Maji kiki, ki kiene kia banzele Jezú, mukonda muéne ua solele o ahatu phala ku bhana  umbangi ua difukunukinu diê. (Matesu 28:1, 8-10) Sumbala o ahatu enhá a monene kioso kia jibha Ngana iâ ni kioso kia mu fundu, o jipoxolo kia a bhonzele o ku xikina mu izuelu ia ahatu. (Matesu 27:55, 56, 61; Luka 24:10, 11) Mukonda dia ku dianga ku monekena kua ahatu, kuma Kristu a mu fukununa, ene a tambula o ujitu ua ku bhana umbangi kála kia bhangele o maxibulu a mukuá.—Ikalakalu 1:8, 14.

O valolo ia ulongelu uê lelu: Mu ilunga ia Jimbangi ja Jihova, o mala ala ku pholo a xila o ahatu mu ku a evua kioso kia zuela. Kienhiki, o anumi a Jikidistá ‘a xila’ ahatu’â mu ku a evua kiambote kioso kia zuela.—1 Phetele 3:7; Dimatekenu 21:12.

O Milongi ia Bibidia i Kuatekesa o Ahatu o ku Zediua

Kioso o mala kia kaiela o phangu ia Kristu, o ahatu a a xila a tambula o ufôlo ua a bhana Nzambi tundé ku dimatekenu. (Dimatekenu 1:27, 28) Mu veji dia mala ku kala indanda, o anumi a Jikidistá a kaiela o itumu ia Bibidia, i kuatekesa o ahatu’â ku zediua.—Efezo 5:28, 29.

Kioso Yelena kia mateka o ku di longa o Bibidia, muadi uê ua kexile ku mu zukutisa kiavulu. Muéne ua tungile bhu kididi kua kexile athu ni kifua kia ku nhana mabhanga ni kifua kia ku dibeta, ni kuila o ku bhanga kiki, ki kituxi kana. Yelena uambe: “O ima i nga di longo mu Bibidia ia ngi bhana nguzu. Nga di longo kuila kuene muthu ua ngi zolo kiavulu u ngi bhana valolo, ua mesena o mbote iami. Nga di longo ué kuila se muadi uami ua di longele o Bibidia, ueji ngi xila kiavulu.” O vondadi iê ia di kumbidila kioso o muadi uê kia xikina o ku di longa o Bibidia, ua kituka Mbangi ia Jihova. Yelena uambe: “Muéne ua kexile mu bhana phangu iambote ia ku tululuka. Etu tua di longo o ku di loloka mudietu.” Ihi iambe dingi? Muéne uambe: “O itumu ia Bibidia iene mu ngi kuatekesa ku sanguluka ni ku kala kiambote mu ukaza.”—Kolose 3:13, 18, 19.

O musoso ua Yelena ki uene ngó kana. Mazunda ni mazunda a ahatu a Jikidistá, a zediua mukonda anumi’â a kumbidila o itumu ia Bibidia mu ukaza uâ. Ene a a xila, a a suínisa ni ufôlo ua kuzuela mu ku bheza kumoxi ni phange jâ mu kilunga.—Nzuá 13:34, 35.

O mala ni ahatu a Jikidistá, ejiia kuila mukonda dia ku kamba o ku iuka, ene a bhanga mbandu ku ibhangelu ia Nzambi a ‘a sumbisa mu ubhika ua kituxi.’ Maji mukonda dia ku zukama kua Nzambi iâ ia henda, o Tata, Jihova, ene ala ni kidielelu kia kuila hádia a ‘ka jituka ku ubhika ua kituxi’ ni ku “bokona mu ufôlo ua fuma, ua an’ a Nzambi.” Enhá mabesá a dikota a-nda tambula o mala ni ahatu mu utuminu ua Nzambi!—Loma 8:20, 21.

[Kdikisu ku mbandu 9]

O Kuila o Poxolo Phaulu ua Fidisa o Ahatu Kuzuela?

O poxolo Phaulu ua soneka: ‘O ahatu a tokala a di xibha mu kilunga.’ (1 Kolindo 14:34) Ihi ia kexile mu zuela poxolo Phaulu? O kuila ua kexile mu zuela kuila o athu kala ni uhete ua ku zuela? Kana. Mu kidi, muéne ua kexile mu zuela ia lungu ni ulongelu ua ahatu. (2 Timote 1:5; Tito 2:3-5) Mu mukanda ua sonekena akua Kolindo, Phaulu ka tendelesa ngó o ahatu, ua tendelesa ué o mala akexile ni ujitu ua kuzuela ni ua ku tanga o ima i bhita ku pholo phala ‘ku di xibha’ kioso o phange ia mukuá kiaia ni kuzuela. * (1 Kolindo 14:26-30, 33) Kiene kimoxi ué, saí ahatu a Jikidistá a sangulukile kiavulu mukonda dia ku di longa o kidi, ia a fidisa o muthu ua kexile mu bhanga diskursu phala ku bhanga ibhuidisu kála kiexile o kifua kiá mu thembu iá. Phala kiki ki kibhite dingi, Phaulu ua suínisa o ahatu ‘kuibhula anumi’â, kubhata.’—1 Kolindo 14:35.

[Tanga mu luji]

[Foto ku mbandu 10]

Jezú ua bhana kua Madiia dia Manda, o ujitu ua ku bhana umbangi ua lungu ni difukunukinu diê ku jipoxolo