O Kuila Nzambi u Suua Muene o Ahatu?

“O kituxi kia mateka ni muhatu, etu oso tuene mufuá mukonda dia muéne.” —NDONGIXI, KU HAMA IA KAIIADI, A. K. K.

“Eie u dibhitu dia diabhu: eie ua di o kibundu a ki fidisile: eie ua dianga ku bhukumukina o kitumu kia Nzambi . . . Eie ua buika o kidifuanganu kia Nzambi, o diiala.”—TERTULIANO, O TRAGE DAS MULHERES, KU HAMA IA KAIIADI, K. K.

O IZUELU íii ki i tundu mu Bibidia. Maji tundé ukulu ene mu i tumbula phala kulondekesa kuila o ahatu kala ni valolo. Né muene lelu, saí athu a iibha ene hanji mu tumbula o izuelu íii phala ku talesa hadi ku ahatu, a zuela kuila o ahatu ene ala ni kikuma kia hadi ioso iene mu ngongo. O kuila Nzambi ua xindi o ahatu phala ku tala hadi, ni ku kamba ku a bhana valolo ku mala? Ihi i longa o Bibidia? Tua-nda di longa.

▪ O kuila Nzambi ua loko o ahatu?

Kana. Nzambi ua ‘loko’ ngó o “Kinhoka Kiokulu, a mu ila Diabhu.” (Dijingunuinu 12:9; Dimatekenu 3:14) Kioso Nzambi kiambe kuila Adá ueji “tumina” o muhatu uê, Nzambi ka kexile mu londekesa kuila o muhatu kala ni valolo bhu pholo ia diiala. (Dimatekenu 3:16) Muéne ua kexile mu zuela ngó o ibhidi ieji bheka o kituxi kia te o dikaza dia dianga.

Mu kidi, o ku kamba o ku bhana valolo ku ahatu, kuejila mukonda dia ku lundula o kituxi, ki vondadi ia Nzambi kana. O Bibidia ki i longo kuila o muhatu ka tokala ku mu bhana valolo kuala o diiala, mukonda dia ku bheka o kituxi.—Loma 5:12.

▪ O kuila Nzambi mu bhanga o athu, o diiala ua beta-kota mu valolo o muhatu ndenge?

Kana. O divulu dia Dimatekenu 1:27, dizuela: “Nzambi anga u bhanga muthu mu kidifuanganu kiê, mu kidifuanganu kiê muene mua mu iudika; iú u kala diiala, iú u kala muhatu kia a bhanga.” Kiki kilondekesa kuila, tundé ku dimatekenu—o diiala ni muhatu—a a bhange ni ujitu ua kulondekesa o ídifua ia Nzambi. Sumbala Adá ni Eva akexile ni ibanzelu iâ, ene a tambula kikalakalu kimoxi, akexile ni ujitu umoxi bhu pholo ia Mubhangi uâ.—Dimatekenu 1:28-31.

Ande dia ku bhanga Eva, Nzambi uambe: “Ngi mu bhangela mukuá a di fuangana-nê uia ni ku mu kuatekesa [Adá].” (Dimatekenu 2:18) O kuila o kizuelu ku “kuatekesa” kilombolola kuila o diiala ua beta-kota, o muhatu ndenge? Kana, mukonda o kizuelu kiki mu Hebalaiku kilombolola kima kia “sokela” mba “kikuatekesu” phala o diiala. Xinganeka o kikalakalu kia dotolo u bhanga pelasá, ni musaki u bhana milongo phala ku sosola o ndolo, mu ku bhanga o pelasá. O kuila muthu umoxi u tena ku kalakala ubheka  uê sé mukuá? Kana, ki bhonza! Sumbala o dotolo u bhanga pelasá, o kuila muéne ua beta o kota? Kana. Kiene kimoxi ué, Nzambi ua bhange o diiala ni muhatu phala ku kalakala kumoxi, ka a bhange phala ku zoka mudiâ.—Dimatekenu 2:24.

▪ Ihi ilondekesa kuila Nzambi u bhana valolo kua ahatu?

Mu ku xinganeka mu ima ieji bhanga o diiala mukua ituxi, Nzambi ua londekesa o vondadi iê ia ku langa o ahatu. Mu kuzuela o Kitumu kia bhanene Nzambi kua Mozé, ku hama 16 A.K.K, saí muhatu a mu ixana Laure Aynard, mu divulu diê, La Bible au Féminin (A Bíblia no Feminino), ua soneka: “Kioso o Kitumu kia kikutu, kia kexile mu tumbula o ahatu, akexile mu ki tumbula phala ku zokela o ahatu.”

Mu kifika, o Kitumu kia jijile kuila o tata ni mama, a tokalele kua bhana kijingu ni ku a xila. (Makatukilu 20:12; 21:15, 17) O kitumu kiki kia tokalele ué ku a ahatu emita. (Makatukilu 21:22) Né muene lelu, o kilangidilu kia bhanene o itumu ioio ia Nzambi, ki i sokela ni itumu ia bhanga o athu mu jixi javulu ku mundu, ia lungu ni ahatu. Maji saí dingi.

O Kitumu Kilondekesa o Kibanzelu kia Nzambi kia Lungu ni Ahatu

O Kitumu kia bhanene Jihova Nzambi ku kifuxi kia Izalaiele, kiexile phala o mbote ia mundu uoso—mala ni ahatu—mu ukexilu ua xitu ni mu nzumbi. Maji se ene evuile ni ku belesela, o kifuxi kioso kieji ku “ku zangeleka, anga ifuxi ioso mu ngongo i kala ndenge.” (Matendelelu 28:1, 2) Kiebhi kiexile o kikalakalu kia muhatu mu Kitumu? Di longe o milongi íii:

1. Ufôlo ua ahatu. O ahatu m’ukulu ka kexile ni ufôlo, maji o ahatu akua Izalaiele akexile ni ufôlo. Sumbala o diiala muéne ua tambuile o ujitu ua ku kala ku pholo dia muiji, o muhatu a mu dielela ku diiala u tena ‘ku sumba kibhela,’ anga ‘u phapha-mu mulenga ua mubhidi.’ Se o muhatu u kala ni uhete ua ku bhanga o ima ni ku bhanga izuatu, muéne u tena ku bhanga o uenji uê. (Jisabhu 31:11, 16-19) O ahatu mu Kitumu kia bhanene Nzambi kua Mozé, a a monene kála kia kexile mu mona athu oso, ka kexile mu a mona ngó kala kikuatekesu kia diiala.

 Mu Izalaiele, o ahatu akexile ué ni ujitu ua ku kala ni ukamba ni Nzambi. O Bibidia i tumbula o phangu ia Hana, ua sambe kua Nzambi kioso kia kexile mu bhita ni maka a bhonzele o ku a batula, iu ua bhange kikutu kua Nzambi. (1 Samuuele 1:11, 24-28) O muhatu mukua Suneme ua kexile mu kunda o polofeta Ilizeu mu Sábhalu joso. (2 Jisobha 4:22-25) O ahatu kala, Debola ni Hulda a tambuile kikalakalu kua Nzambi, kia ku kala ku pholo phala ku kuatekesa kioso ki moneka maka. Kienhiki, o mala a fuma ni jisobha akexile mu ku a sota phala ku tambula kikuatekesa.—Afundixi 4:4-8; 2 Jisobha 22:14-16, 20.

2. Ku longa o ahatu. Mu Kitumu kia Kikutu, o ahatu akexile mu a exana phala kuívua o Kitumu, kia a bhanene kithangana phala ku di longa. (Matendelelu 31:12; Nehemiia 8:2, 8) Ene akexile mu ku a longa phala n’a tene ku bhanga o ikalakalu mu ubhezelu. Mu kifika, saí ahatu akexile mu ‘sidivila bhu muelu’ ua balaka, a mukuá akexile mu kuimbila ni akuâ.—Makatukilu 38:8; 1 Malunda 25:5, 6.

Ahatu avulu ene ni kuijiia ni uhete ua ku bhanga uenji. (Jisabhu 31:24) Mu veji dia ku bhanga kalá kia kexile mu bhanga o athu mu izuua ienioió—o jitata ngó akexile mu longa o tuana tuâ tua mala—maji o ji mama akua Izalaiele akexile mu longa uá o tuana tua mala katé mu unzangala. (Jisabhu 31:1) Mu kidi, o ahatu mu Izalaiele akexile mua longa.

3. A a bhanene kijingu ni kua xila. O Dikuinhi dia Ijila dia tendelesele: “Bhana ujitu kua tat’enu ni mam’enu.” (Makatukilu 20:12) Mu divulu dia Jisabhu, tu sanga-mu o kitendelesu kia Sobha Salomá, kiambe: “Eie, mon’ami, ivua ulongelu ua tat’enu, kana kueha o ijila ia mam’enu.”—Jisabhu 1:8.

O Kitumu kia bhanene ué ijila ia lungu ni ukexilu ua ku dibhana ni athu ka kazala luua, mu kulondekesa o ujitu ku ahatu. (Ijila 18:6, 9; Matendelelu 22:25, 26) O diiala diambote ua tokalele ku xila o muhatu uê mu ukexilu uoso.—Ijila 18:19.

4. Itumu phala ku a langa. Mu Maka mê, Jihova uambe kuila muéne ‘o tata ia an’a itungu, o dilemba dia ahatu a xala atudi.’ Mu  itumu íii muéne ua kexile mu Langa ió, ka kexile mu a langa kuala o tata mba ku diiala. (Jisálamu 68:5; Matendelelu 10:17, 18) Mu kiki, se mutudi ua polofeta a kamba ku mu xila, ku muthu ua iibha, Jihova ua kexile ku mu langa mu ku bhanga madiuanu, phala ku mu bhulula, ni ku langa o ufiiele uê.—2 Jisobha 4:1-7.

Ande dia akua Izalaiele ku bokona mu Ixi ia a Kanene, o mutuameni ua muiji Zelofadi, uafú sé ku xisa mon’a diiala. O kitanu kia an’ê ahatu, a bhingi “undundu,” kua Mozé mu Ixi ia a Kanene. Jihova ka ditunu. Muéne uambela Mozé: “U a bhana muene kulundula kumoxi ni jiphange ja tat’â; undundu uoso ua xi tat’â, u bhite kua ene.” Tundé o kizuu’okio, o ahatu mu Izalaiele akexile mu lundula o undundu ua jitata jâ, ni ku u bhana ku tuana tuâ.—Dialuilu 27:1-8.

O Kibanzelu kia Nzambi kia Lungu ni Hadi ia Ahatu

Mu Kitumu kia bhanene Nzambi kua Mozé, o ahatu akexile mu kua xila, ni ku xila o itumu ia lungu ene. Maji tundé mu hama ia kauana A.K.K., o ijila ia Jijudé, ia mateka ku kaiela o ijila ia Ngeleku, ka kexile mu bhana valolo ku ahatu.—Tanga o kaxa iambe: “ Milongi Iokulu ki i Bhanene Valolo ku Ahatu.”

Mu kifika, o musoneki mukuá Ngeleku a mu ixana Hesíodo (ku dinake dia hama, A.K.K.) ua tatela o ahatu mukonda dia kuiibha kuoso kuene mu ngongo. Mu divulu diê Teogonia, muéne ua zuela “o ukexilu ua ji joko ja ku lenga ja ku di jibha ni diembu dia ahatu mua kexile o mala enhá akexile mu bheka ibhidi iavulu.” O ukexilu iú ua iibha, ua di sanzumuna mu Judá, mu hama ia kaiiadi A.K.K. O milongi ia Talmude, a i soneka mu hama ia kaiiadi mu K.K., ia tendelesa o mala: “Kanenu kuzuela kiavulu ni ahatu, mukonda kiki ki tena ku mi xidisa.”

Kiki kia bhangesa o mala ku kamba ku dielela ku ahatu mu mbanza ia Judá, mu mivu iavulu. Mu izuua ia Jezú, o Mbonge ia Ahatu, ki i tokalele ku kala ku mbandu ia tembulu. O ulongelu ua jingeleja uexile ngó phala o mala, kienhiki o ahatu ka tokelele ku kala kumoxi ni mala mu malombe. O Talmude ia tumbula o izuelu ia Rabinico, mu kuzuela: “Se muthu u longa o mon’ê a muhatu, Torah [o Kitumu], u mu longa ufusa.” O Jijudé atuameni a jingeleja, akexile mu longa o mala ku kamba ku xila o ahatu.

Kioso kia kexile mu ixi, Jezú ua mono o ukexilu iú ua iibha, ua kexile mu londekesa mu ijila iâ. (Matesu 15:6, 9; 26:7-11) O kuila o milongi íii ia suínisa ué o ukexilu ua Jezú ua ku dibhana ni ahatu? Ihi i tu tena ku di longa mu phangu ia xisa? O kuila o milongi ia Jikidistá ia sosola o hadi ia ahatu? Mu milongi ia-nda kaiela tua-nda kuijiia o itambuijilu ia ibhuidisu íii.

[Kidikisu ku mbandu 7]

Milongi Iokulu ki i Bhanene Valolo ku Ahatu

Tundé ku hama ia dianga mu K.K. o asoneki, Filo ni Alexandria, a mateka ku tumbula o milongi ia akua Ngeleku phala ku lombolola o musoso ua divulu dia Dimatekenu. Mu ibanzelu ia Filo, Eva muene ua kexile ni kikuma kia ku bhanga undumbu, ia mu xindi ku kala ni muenhu “a mu katula o ufôlo, iu ua tokalele ku belesela ngó o diiala diê.” O ukexilu iú ua ku kamba ku xila o ahatu ua bokona mu Juda, ni mu milongi ia Jipadele mu Jingeleja.

Mu Midrash Rabba, ku hama ia kaiiadi, mu kibatulu kia Jijudé, o rabinico ua jimbulula se mukonda diahi o ahatu a tokala ku ta divunga mu kuzuela: “Muéne ua difu ni muthu ua bhange kima kia iibha, uala ni jisonhi j’athu.” O isoneku ia Tertuliano mukua ku sota ima koxi a mavu, ku hama ia kaiiadi mu K.K. ia longele kuila o ahatu a tokalele ku kala ni “malamba ni ku diela kála Eva.” O milongi íii ia makutu, akexile mu i mona kála milongi ia Bibidia, iene ia bhangesa o mala ku kamba ku bhana valolo ku ahatu.

[Foto ku mbandu 5]

Eva a mu bhange phala ku kuatekesa Adá

[Foto ku mbandu 6]

O ahatu mu Izalaiele akexile mu kalakala