NOUÉ uimana, u sununa o lukuaku luê. Xinganeka muéne ua xikama ku dibaia, mu ku nhoha bhofele mu kikalakalu kia bhange ni ku tala o álaka ionene. O dizumba dia betume dia tema, dia mu tunda moxi dia álaka; uivua o jibuia ja jifalamenda ja mu kalakala. Tundé bhu kididi kua xikamene Noué, ua tenene ku mona o an’ê ku kalakala ni nguzu ioso ku álaka. O an’ê ni jimbalakaji jê, ni muhatu uê muene, ene oso akexile kumoxi mu kikalakalu kiki mivu iavulu. Ene a zubhile kiá mbandu ia álaka, maji kua kexile hanji kikalakalu kiavulu phala ku ki bhanga!

O jivizinhu ja Noué, akexile mu banza kuila ene exile ioua. Kioso Noué ni an’ê kia kexile mu tunga o álaka, o athu akexile mu ku a elela, mukonda dia ene kuzuela kuila kueji kuíza dilúvio dieji zalesa o ixi ioso ni menha. O divuua dieji kuíza dia kexile mu zuela Noué ku athu, ki diexile kidi phala ene! Ene ka kexile mu ki tendela se mukonda diahi Noué ua kexile mu zanga o nguzu iê—ni ia muiji uê—mu kima kiki sé valolo. Maji o Nzambi ia Noué, Jihova, ka kexile ku mu mona kala muthu ua tobho.

O Mak’â Nzambi exi: ‘Noué uende ni Nzambi.’ (Dimatekenu 6:9) Ihi ilombolola o izuelu íii? Kiki ki kilombolola kuila Nzambi ua kexile mu kuenda mu ixi, ki ki lombolola ué kuila Noué ua ile ku diulu. Mu veji dia kiki, Noué ua belesela o Nzambi iê, iu ua mu zolele kiavulu, kiki kia kexile kala, Noué ni Jihova akexile mu kuenda kumoxi kala makamba. Mu ku bhita mivu, o Bibidia ia zuela ia lungu ni Noué: “Mu kuxikana [kuê ua fundisa] o mundu uoso.” (Jihebeleu 11:7) Mu ukexilu uebhi? Kiebhi ki tu tena ku kaiela o kixikanu kiê lelu?

Noué ua kudila bhu kaxi ka athu a iibha. O athu a iibhile kiá tundé mu izuua ia kukululu uê, Enoko, diiala diambote uendele ué ni Nzambi. Enoko ua zuelele kuila o kizuua kia ku fundisa, kieji kuíza ku athu oso a iibha. Mu izuua ia Noué-phe, o ixi iezalele dingi ni usuéia. Phala Jihova, o ixi ioso a i zangele ni kuiibha. (Dimatekenu 5:22; 6:11; Juda 14, 15) Ihi ia bhangesa o ixi kuizala ni kuiibha kuavulu?

O maka a mateka ni an’â Nzambi ku diulu, o ji-anju. Umoxi-mu ua bhukumukine kiá Jihova, iu ua di bhange Satanaji, o Diabhu, mu ku tanga makutu a lungu ni Nzambi ni ku bhangesa Adá ni Eva ku ta kituxi. Mu izuua ia Noué, ji-anju ja mukuá a solo ku kala ku mbandu ia Satanaji mu ku bhukumukina ué Nzambi. Kioso o ji-anju kia xisa o kikalakalu kiâ ku diulu, ene eza mu ixi, ni ku kala athu mu xitu, ia a kazala ni ahatu a iuka. O ji-anju jiji akua luímbi, exile phangu ia iibha phala o athu mu ixi.—Dimatekenu 3:1-5; 6:1, 2; Juda 6, 7.

Maji o ukaza ua ji-anju ni ahatu mu ixi, ua bhangesa o ahatu ku vuala an’a nguzu, mazonda. O Bibidia iamba kuila exile “makixi”—akua ku lundumuna akuâ. O makixi ene a bheka o ukexilu ua undanda ku mundu. Saí athu akexile mu dibhudisa se o Mubhangi ka kexile mu mona ‘o ku bhuma ni ku bhukumuka kua muthu kua di vuala mu ngongo, o ilunji ioso ia ku xinganeka ia mixima iâ,  ia iibha ithangana ioso.’ Jihova uambe kuila muéne ueji buika o athu oso a iibha mu 120 a mivu.—Dimatekenu 6:3-5.

Xinganeka ku sasa muiji ku mundu uezala ni usuéia! Maji Noué ua tena. Muéne ua kexile ni muhatu uambote. Kioso Noué kia tenesa 500 ja mivu, o muhatu’ê ua vuala an’a kitatu—Seme, Hamane, ni Jafete. * Kumoxi, o jitata akexile mu langa o tuana tuâ ku ima ia iibha. O tuana tua mala ala ni ukexilu ua ku diuana ni ku mona o athu a ‘nguzu ni athu a fuma’—kiki kiene kia kexile o Makixi. Noué ni muhatu’ê, akexile mu bhanga nguzu iavulu phala ku langa o tuana tuâ ku misoso ia lungile ni ima ioso ia kexile mu bhanga o makixi enhá, maji ene akexile mu longa ku tuana tuâ o kidi kia lungu ni Jihova Nzambi, ió u zemba o kuiibha kuoso. Ene akexile mu kuatekesa o tuana tuâ kuijiia kuila Jihova ua kexile mu divua kia iibha mu ku mona o ku bhukumuka, ni usuéia uoso ia kexile mu bhita mu ngongo.—Dimatekenu 6:6.

Lelu o jitata a tena uâ ku di longa kiavulu ku phangu ia Noué ni muhatu’ê. Ku mundu ku tuala, kuezala ué ni usuéia ni ku bhukumuka. Né muene o itonokenu phala o tuana, a tena ku kala ué ni usuéia, ni ukexilu ua ku bhukumuka. Jitata ja unjimu, a bhanga ioso ia tena phala ku kuatekesa tuana tuâ kueha o ukexilu iú ua iibha, mu ku a longa kuila o Nzambi ia ku tululuka, ua-nda zubha o usuéia uoso ku mundu. (Jisálamu 11:5; 37:10, 11) Ene a tena ku di tunda kiambote né muene ku mundu iú ua iibha! Noué ni muhatu’ê a di tundu kiambote mu ku longa o tuana tuâ. O tuana tuâ a kulu ni ifua iambote, ia a kazala ni ahatu a mesenene uâ ku ta o Nzambi ia kidi, Jihova, ku pholo dia mienhu iâ.

Saí kizuua o muenhu ua Noué ua lunguluka. Jihova ua zuela kua selevende iê, o vondadi Iê ia ku buika o athu mu izuua iê. Nzambi ua tumina Noué: ‘Iudika álaka phala eie ni muxi ua ngofele.’—Dimatekenu 6:14.

O álaka íii, ki iexile naviiu kala kiene mu zuela o athu. O álaka ka i bhangele mu ukexilu ua baluku. A i bhange kala kaxa ia dikota. Jihova ua bhana kua Noué o ukexilu ua ku bhanga o álaka, ni itendelesu ia lungu ni kiebhi kieji ta o betume moxi ni bhu kanga dia álaka. Iu ua zuela dingi kua Noué se mukonda diahi ua tokalele ku bhanga kiki, kioso kiambe: “Mukonda ijiia na-kiu kuma eme nga-nda ku lundulula dilúvio dia menha mu ngongo . . . ima ioso mu ngongo ia ka buika.” Maji Jihova ua bhana o kitendelesu kiki kua Noué: ‘Ua ka bokona mu álaka, eie, ni an’ê a mala, ni [muhatu’ê] ni [ahatu] a an’ê kumoxi.’ Noué ua tokalele ku bokuesa mu álaka ídifua ioso ia iama, ndumbe ni mukaji ua iama. Eji bhuluka ngó oso eji kala mu álaka!—Dimatekenu 6:17-20.

Noué ua kexile ni kikalakalu kia dikota. O álaka íii ia tokalele ku kala ionene—ieji kala ni 133 ia ji metulu ia ku lebha ni 22 ia ku kula ni 44 ia kitala. Iexile kaxa ionene, o ji naviiu ja mabaia mu izuua ietu, ndenge. O kuila Noué ua lenge o kikalakalu kiki, iu ua zuela kuila keji tena, ni ku lungulula o ukexilu ua ku tunga o álaka? O Bibidia,  itambuijila: “Noué anga u bhanga kieniókio kala kioso kia mu tumu Nzambi, kiene muene kia kumbidila.”—Dimatekenu 6:22.

O kikalakalu kiki kia nangenena mivu iavulu, nange 40 mba 50 a mivu. Kua bhingile ku batula mixi ionene ni ku iambata katé bhu kididi kia ku tunga. O álaka ia tokalele ku kala ni matala atatu, maxilu ni dibhitu dimoxi ku mbandu. Kua kexile ji njanela, ku thandu a álaka kua kexile jixapa phala ku katula o menha bhu kanga.—Dimatekenu 6:14-16.

Mu ku bhita mivu, o álaka ia kexile mu moneka, Noué nange ua sangulukile kiavulu mu ku mona o kikuatekesu kia muiji uê! Kua kexile kima kia mukua kieji bhonza kiavulu, o ku tunga o álaka ndenge. O Bibidia izuela kuila Noué uexile “mujimbuidi ua maka maiuka.” (2 Phetele 2:5) Mukonda dia kiki, muéne ni ku suína kuoso ka fulu mu ku tangela o athu ia lungu ni kibuikilu kia zukamene. Kiebhi kia tambuijila o athu? Jezú Kristu ua zuela ia lungu ni thembu iná, mu kuzuela kuila o athu ‘ka xikina o ngolokela’ ia Noué. Muéne uambe kuila ene akexile ngó mu bhanga o ima ia mienhu iâ—kudia, kunua, ni ku kazala—kienhiki ene ka bhana mátui kua Noué. (Matesu 24:37-39) Sé phata, athu avulu a mu xonguena, muéne ni muiji uê; a mukuá nange a mu zukutisa, a mesenene ku mu jibha.

Maji Noué ni muiji uê ka bhuile kana. Sumbala ene akexile ku mundu kua kexile o athu akexile mu di bhakula ngó mu ku bhanga ima ia iibha, o ku tunga o álaka, nange kuexile kála uôua, maji né kiki, ene a kolokota mu ku tunga. Lelu o miji ia Jikidistá a tena ku di longa phangu ia dikota kua Noué ni muiji uê. Mukonda tuala mu thembu izuela o Bibidia kuila “izuua isukidila-ku” ia mundu iú ua iibha. (2 Timote 3:1) Jezú uambe kuila o thembu ietu ieji kala kála o thembu kioso Noué kia tungu o álaka. Se o athu ka xikina o njimbu iambote ia Utuminu ua Nzambi, o Jikidistá a tokala ku di lembalala ia bhiti ni Noué. K’etu tua dianga o ku dibhana ni ibhidi íii.

Mu ku bhita mivu, o álaka ia kexile kiá polondo. Noué kia tenesa 600 ja mivu, ua dibhana ni kibhidi kia dikota. O kufuá kua tat’ê, Lameke. * Mu ku bhita mivu itanu, o tata ia Lameke, o kuku ia Noué, Metúzala, uafú mu kitala kiá 969—o diiala ua betele ku kola muenhu mu ixi, kala ki zuela o Bibidia. (Dimatekenu 5:27) Ki kale Metúzala ni Lameke, akexile mu thembu ia Adá.

Ku muvu uenhó, Noué ua tambula njimbu ia ubhe kua Jihova Nzambi, kuila: “Iza eie ni dibhata dié mu bokone mu álaka.” Mu kithangana kieniókio Jihova uambela Noué kuambata mu álaka idifua ioso ia iama—ku iama ioso ia zele u kuata-ku sambuadi dia ndumbe, ni sambuadi dia akaji ia uabha ku ji satela, ku iama ia kambe o ku zela, kiiadi-kiiadi, ndumbe ni mukaji.—Dimatekenu 7:1-3.

Kiexile kima kiambote ku mona o iama, akexile mu kuíza. Iama iavulu ia kexile mu bokona mu álaka—saí iá akexile mu kuendela bhoxi, a mukuá bhulu, a mukuá a kexile mu tuka-tuka, a mukuá ni ku babajala—ene oso ni idifua iâ. Ki tu bhingi ku xinganeka Noué ku bokuesa o iama ioso ia muxitu mu álaka. O musoso u zuela kuila o iama ia “bokona ni Noué mu álaka.”—Dimatekenu 7:9.

Saí athu akua jiphata, nange a dibhudisa: ‘Kiebhi kiki kieji bhita?’ Ni kiebhi o iama ioso kieji kala kumoxi mu kididi kia tolo?’ Xinganeka: O  kuila ku bhonza o Mubhangi ua ima ioso ku bhangesa o iama ku kala ni ukexilu ua tululuka? Lembalala kuila, Jihova, o Nzambi ua jikuile o kalunga ka kusuka iu ua bhangesa o muanha kuimana kizuua kia muvimba. O kuila muéne keji tena ku bhanga o ima i tu sanga mu musoso ua Noué? Muéne u tena, iu ua bhange!

Mu kidi Nzambi ueji tena ku bhulula o iama mu ukexilu uéngi. Maji muéne ni unjimu uoso ua solo ukexilu uambote, u tu lembalala o kidielelu kiê kia bhana ku athu kia ku langa o ima ioso mu ixi. (Dimatekenu 1:28) Lelu jitata javulu ene mu tanga o musoso ua Noué phala ku longa o tuana kuijiia kuila Jihova, u bhana valolo ku athu ni ku iama.

Jihova uambela Noué kuila, kua kambele semana imoxi phala o Dilúvio ku bhixila. O muiji ua Noué nange akexile ni kikalakalu kiavulu. Xinganeka o kikalakalu kia ku bokuesa o iama ioso ni kudia kuâ, ni ima ioso ia muiji mu álaka. O muhatu ua Noué ni muhatu ua Seme ni Hamene ni Jafete, akexile ni kikalakalu kiavulu mu ku iudika kiambote o kididi.

Ihi i tuamba ia lungu ni jivizinhu jê? Né kiki, ene ‘ka xikina o ngolokela’—né muene ni ku mona kuila Jihova ua kexile mu besoala Noué mu nguzu ioso ia kexile mu bhanga. Ene ka kuatekesa Noué, maji a mono o iama ku bokona mu álaka. Maji etu, ki tu tokala ku diuana mu ku mona o ukexilu ua athu. O athu lelu, ka xikina o ima ilondekesa kuila tuala mu izuua isukidila-ku ia mundu iú. Kala kia kanena poxolo Phetele, akua ku lungulula o kidi, ene mu xonguena ió a belesela o itendelesu ia Nzambi. (2 Phetele 3:3-6) Kiene kimoxi ué, o athu a xonguena Noué ni muiji uê.

O ku sebhulula kua bhu thembu kuxi? O musoso u tu tangela kuila kioso Noué kia bokuesa o muiji uê ni iama mu álaka, ‘Jihova ua a jikila m’onzo.’ Se muthu ua kexile mu xonguena, ua kexile mu tala, o ia bhitile ia mu katula o phata. Se kana, o mvula iene ia mu katula o jiphata—o mvula ia mateka o ku sonoka! Anga i suluka mu ku sonoka, ni ku sonoka, ni ku izalesa o ngongo kala kiambele Jihova.—Dimatekenu 7:16-21.

O kuila Jihova ua sangulukile ni kufuá kua athu ió a bhukumukine? Kana! (Izekiiele 33:11) Jihova ua a bhanene kithangana phala ku lungulula o jinjila jâ ni ku bhanga o kima kia tokala. O kuila ene eji tena ku belesela? O ukexilu ua muenhu ua Noué, ua tambuijila o kibhuidisu kiki. Mu kuenda ni Jihova, mu ku belesela o Nzambi iê mu ima ioso, Noué ua londekesa kuila o athu a tena ku bhuluka se a belesela. Mu ukexilu iú, mu kixikanu kiê Noué ua fundisa o mundu ua izuua iê; kienhiki, muéne ua londekesa o kuiibha kua mundu ua izuua iê. O kixikanu kiê, kia bhulula muéne ni muiji uê. Kiene kimoxi ué, se u kaiela o kixikanu kia Noué, ua-nda bhuluka ni ku bhulula ué ió u ua zolo. Kala kia bhange Noué, eie u tena kuenda ni Jihova Nzambi kala kamba diê. O ukamba iú u tena ku nangenena ku hádia ni hádia!