Xinganeka tata ua mu zuela ni mon’ê uala ni sambuadi dia mivu. Muéne u zuela: “M’ukulu kulu, Nzambi ua bhange o ixi ni ima ioso iala-mu, ua bhange ué o muanha, o dieji ni jithéthembua.” O mona u xinganeka bhofele ku maka enhá anga uibhula o tata: “Papa, nanhi ua bhange Nzambi?”

O tata u mu vutuila: “Se-ku muthu ua bhange Nzambi. Muéne Nzambi tundé xahulu.” O kitambuijilu kiki kia tata ki sangulukisa o mona mu kithangana kieniókio. Maji kioso kiaia ni ku kula, muéne u suluka ni ku dibhuidisa se nanhi ua bhange Nzambi. Ki mu bhonza o ku xikina kuila Nzambi kene ni dimatekenu. Maji kate muene ni ngongo iene ni dimatekenu. Kienhiki, muéne u dibhuidisa: ‘Kuebhi kua tundu Nzambi?’

Kiebhi ki tambuijila o Bibidia o kibhuidisu kiki? O Bibidia i tambuijila kala kia tambuijila o tata mu kifika kietu. Mozé ua soneka: “[Jihova] . . . kioso milundu kiluua a i vuala ni mavu ni ixi kiluua u i umba, tundé xahulu katé ku hádia eie Nzambi u nangenena.” (Jisálamu 90:1, 2) O polofeta Izaia uambe ué: “Manhi kua k’ijiia? Kua k’ivua kuila o Nzambi ió uà kalela-ku, muene Jihova, o Mubhangi a ixi ioso Katé ni jihota jê?” (Izaia 40:28) O mukanda ua Juda u zuela ué kuila, Jihova, Nzambi “tundé kuema dia kukala.”—Juda 25.

O ibatulu íii, i tu londekesa kuila Nzambi muéne “o muenexi ió, kene kùfua,” kala kia londekesa poxolo Phaulu. (1 Timote 1:17) Kiki kilondekesa kuila, Nzambi uene-ko tundé xahulu. Muéne u kalelaku ku hádia ni hádia. (Dijingunuinu 1:8) Kienhiki, mukonda dia kuila muéne kene kufua, kiki kilondekesa kuila muéne uene ni Kutena kuavulu.

Mukonda diahi ku bhonza kiavulu ku xikina o kidi kiki? Mukonda dia kuila etu tu fua, o ibanzelu ietu ia lungu ni thembu ki i difu ni ibanzelu ia Jihova. Kuma Nzambi kene kufua, phala muéne o midi ia mivu, kizuua kimoxi ngó. (2 Phetele 3:8) Mu kifika: O kuila o mahoho a kala ngó ku muenhu mu 50 a izuua anga a fua, a tena ku tendela o muenhu uetu kuila tu kala ku muenhu katé ku 70 mba 80 a mivu? Kana! Maji o Bibidia i tu jimbuila kuila etu tuedi kala tu mahoho bhu pholo ia Mubhangi uetu ua Dikota. Katé muene ni ukexilu uetu ua ku banza, ndenge, o ua Jihova kota. (Izaia 40:22; 55:8, 9) Kienhiki, ki tu tokala ku diuana mu kuila saí ima ia lungu ni Nzambi, etu ki tu tena ku i tendela kiambote.

Sumbala o kibanzelu kia kuila Nzambi kene kufua, ki bhonza o ku ki tendela, tua tokala kuijiia kuila o kibanzelu kiki kia tokala muene. Se kuexile muthu ua bhangele Nzambi, o muthu muenhó muéne ueji kala o Mubhangi. Maji kala kilondekesa o Bibidia, Jihova muéne ua ‘bhange ioso.’ (Dijingunuinu 4:11) Tuejiia kuila, kuexile kithangana m’ukulu o ngongo ki i xile-ku luua. (Dimatekenu 1:1, 2) Kuebhi kua tundu o ixi? O Muthu ua i bhange, muéne ua tokalele ku dianga o ku kala ku muenhu. Muéne uexile ué ku muenhu ande dia athu a mukua ku kala-ku, kala Mon’ê umoxi-élele ni ji anju. (Jobe 38:4, 7; Kolose 1:15) Kiki-phe kilondekesa kuila, muéne ua diangele o ku kala ku muenhu ni kuila kana-ku muthu ua mu bhange. Ki kuexile kima mu ngongo kieji tena ku mu bhanga.

O muenhu uetu ni ngongo ioso, ilondekesa kuila kuene Nzambi u kalelaku. Ió ua bhangesa o ngongo ku kala kála ki tuene mu i mona, Ió ua bhange o itumu phala ku i langa, uene-ku tundé xahulu. Kiene ngó kia te o munza ua muenhu ku ima ia mukuá dingi.—Jobe 33:4.