Se athu a nhana, kiki ki kilombolola kuila, o jinguvulu ué ja-nda nhana? Se kiene, tu tena kuzuela-phe kuila mua’xaxi ka athu ki tu tena ku sanga-mu unguvulu ua kambe o kuiibha, tu u sanga ngó ku diulu. O Bibidia ilondekesa kuila o unguvulu iú, o Utuminu ua Nzambi, o unguvulu ua tendelesa Jezú o akaiedi iê o ku u bhinga mu ku samba.—Matesu 6:9, 10.

O Utuminu ua Nzambi, unguvulu ua kidi ua mu tumina ku diulu. Uene ua-nda tumina mu kididi kia mautuminu oso a athu. (Jisálamu 2:8, 9; Dijingunuinu 16:14; 19:19-21) Ku ima ioso ia-nda bhuisa o Utuminu ua Nzambi, kima kimoxi o ku kamba o ku iuka mua’xaxi ka jinguvulu. Tala samanu dia ima i tu dielelesa kuila, o Utuminu ua Nzambi ua-nda bhanga muene kiki.

MAKA: O kitadi kia jinguvulu ki tunda ku athu, kia futa o madijimu ni lubhaku. Kiki ki bhangesa o jinguvulu ku nhana, a mukuá a bhinga kitadi ku athu phala ku a sosolola o kitadi kia dijimu mba kitadi kia mukua kia tokala o ku futa ku jinguvulu. Kienhiki, o jinguvulu ji bandekesa o kitadi kia dijimu ku athu phala ku tenesa o kitadi kio nhane, maji o ku bhanga kiki ki suínisa dingi o ku kamba o ku iuka mu ngongo. Mukonda dia kiki, o athu ambote, ene a beta o ku tala o hadi.

 KU ZUBHA O MAKA: O Utuminu ua Nzambi u tambula o kutena kuê kua Nzambi Muteni-a-Ioso, Jihova. * (Dijingunuinu 11:15) O Utuminu ua Nzambi ka bhingi ku bhinga kitadi ku athu phala ku tena ku bhanga o ikalakalu iê. Mu veji dia kiki, Nzambi uala ni “kutena ni kusuina” ni ku kala uê mukua ku bhana, kiki ki tu dielelesa kuila o Utuminu uê ua-nda bhana ioso ia bhindamena o mundu uê.—Izaia 40:26; Jisálamu 145:16.

MAKA: O mesene ngana Susan Rose-Ackerman, tua mu tange kiá ku milongi ia bhiti, uambe dingi kuila, phala ku tena ku zubha o ku kamba o ku iuka mu ngongo, “a tokala ku mateka ni athu ala ku pholo.” O jinguvulu kene dingi ni kutena kua ku zubha o kuiibha mu kaxi ka a xiku dia ngoji mba athu a mukuá, mukonda o athu ala ku pholo ene mu bhanga uá ima ia iibha. Katé muene ni nguvulu ua beta mu ku kala nguvulu iambote, mukua ituxi ué, saí ithangana u lueza. Kiene ki zuela o Bibidia kuila, “mu ngongo kana-mu muthu ua iuka, u bhanga ngó mbote mu mbote.”—Ndongixi 7:20.

KU ZUBHA O MAKA: Jezú Kristu, a mu solo kuala Nzambi phala ku kala Nguvulu ia Utuminu ua Nzambi, ka difu ni athu akua ituxi, mukonda Jezú ka tena ku bhanga ima ia iibha. Jezú ua londekesa kiki, kioso kia ditunu o ujitu ua dikota ua mesenene ku mu bhana Satanaji—o “maungana moso mu ngongo ni kufumana kuâ.” Satanaji, nguvulu ia mundu iú, ua mesenene ngó kuila Jezú u mu bheza mu kithangana kieniókio. (Matesu 4:8-10; Nzuá 14:30) Katé muene kioso Jezú kia kexile ku mu phaphela ku taka, muéne ua kolokotele, ka mesenene ku ta kituxi. Muéne ua ditunu kúnua vinhu io lunge ni ndululu, mukonda o vinhu ieji mu sosolola kana ngó o ndolo, maji ieji mu katula ué o kilunji. (Matesu 27:34) Tundé kia mu fukununa iu ua vutuka ku diulu, Jezú uene mu londekesa kuila muéne ua tokala ku kala Sobha ia Utuminu ua Nzambi.—Filipe 2:8-11.

MAKA: Mu jixi javulu, ene mu sola jinguvulu ithangana ioso phala ku tumina o ixi, a katula ió a mu bhanga kia iibha ni ku fika kuila o ua-nda kuíza-ku ua-nda tumina kiambote, mbé makutu. Maji mu kidi, o ukexilu ua ku sola nguvulu iéngi phala ku tumina, u suínisa dingi o kuiibha katé muene ni mu jixi ja katunda. Mu kithangana kia ku sola uoso u tumina o ixi, o jimvuama a tena ku bhana kitadi kua ió a mu tanga o athu a solo.

O Mufundixi ngana John Paul Stevens ua tokala ku Inzo ia Dikota ia ku Fundisa mu ixi ia Estados Unidos, ua soneka kuila, o ukexilu iú u zozesa “kana ngó o ungana ua jinguvulu maji u zozesa ué o kixikanu kia athu.” Mukonda dia kiki, athu avulu ku mundu uoso amba kuila, o ibuka ia jinguvulu iene ia beta kota mu kuiibha, isangela ia mukuá ndenge.

 KU ZUBHA O MAKA: O Utuminu ua Nzambi ua-nda zubha o ukexilu ua ku sola jinguvulu phala ku tumina o ixi, mukonda uene ua-nda tumina ku hádia ni hádia sé dizubhilu. (Daniiele 7:13, 14) Kuma Nzambi muéne ua solo o Sobha, tu tena kuzuela kuila, o Utuminu iú ka bhingi athu ku u sola. Kuma o Utuminu ua Nzambi ua-nda kalelaku ku hádia ni hádia, tu tena ué kuzuela kuila o ia-nda bhanga o Utuminu iú, ia-nda kala ima iambote phala o athu.

MAKA: Nange u banza kuila, o ku bhana ijila ia ubhe, ku tena ku bheka ku zediua ku athu. Maji o jingijiie a mono kuila o ku vudisa o ijila, i bhangesa dingi o athu ku bhanga ima ia iibha. O athu a bhana ijila ia ubhe phala ku sosolola o kuiibha maji mu veji dia ku sosolola, o kuiibha kuvula dingi.

KU ZUBHA O MAKA: O ijila ia Utuminu ua Nzambi ia beta o kota o ia athu ndenge. Mu kifika, mu veji dia ku bhana ijila iavulu, Jezú ua bhana o kijila a beta ku kijiia kála Kijila kia Ulu. Muéne uambe: “Ima ioso-phe i mua mesena kuila athu a mi bhanga-iu enu, iene ue muene i mua bhanga ene.” (Matesu 7:12) O ijila ia Utuminu ua Nzambi, i suínisa o ibanzelu ni ibhangelu iambote. Jezú uambe: “Zola mukuetu kala ki ua di zola eie-muène.” (Matesu 22:39) Mu kidi, Nzambi ngó u tena ku tanga o muxima ua muthu, muéne ngó u tena ku bhana ijila kala íii.—1 Samuuele 16:7.

MAKA: O luímbi lua muxima luene lu suínisa o athu ku bhanga ima ia iibha. O madimixi ni athu a mukuá, akua luímbi ué. O diloja dia lundumuka mu mbanza ia Seoul i tua tange kiá mu milongi ia bhiti, o madimixi a xikina o kitadi kia bhana o atungi né muene ni kuijiia kuila o atungi keji tunga kiambote o diloja.

Phala ku zubha o kuiibha, o athu a tokala ku di longa kiebhi kia tena o ku katula o luímbi ku muxima uâ. Maji o jinguvulu kene ni nguzu mba ka mesena ku kuatekesa o athu n’a kale ni ibanzelu iambote ku muxima.

 KU ZUBHA O MAKA: O Utuminu ua Nzambi ua-nda zubha o kuiibha mu ngongo, mu ku longa o athu kiebhi kia tena o ku katula o ibanzelu ia iibha i bhekesa o kuiibha ku muxima. * O ulongelu iú u kuatekesa o athu ku ‘bhiluka kiéngi mu ilunji iâ ni mu mixima iâ moxi.’ (Efezo 4:23) Mu veji dia ku kala athu a luímbi, ene a kituka athu a sanguluka ni ima iala na-iu, athu a suua akuâ.—Filipe 2:4; 1 Timote 6:6.

MAKA: Né muene ni ku kala mu kididi kiambote ni ku tambula ulongelu ua tokala ua ku kala ni ukexilu uambote, saí athu a-nda sola hanji ku kala athu a iibha, a nhana akuâ. O jingijiie amba kuila, kiki kiene ki bhonzesa o jinguvulu ku zubha o kuiibha mu ngongo. O jinguvulu a mu sota ku sosolola ngó o kuiibha ni ima i bheka o kuiibha.

KU ZUBHA O MAKA: O Kiônge kia bhange o ji Nações Unidas phala ku zubha o Kuiibha mu ngongo, kia londekesa kuila phala ku zubha o kuiibha, o jinguvulu a tokala ku suínisa o athu ku kala athu “a kidi, ji fiiele.” Sumbala kiki kibanzelu kiambote, o Utuminu ua Nzambi ka-nda suínisa ngó o athu ku kala ni ifua iambote, maji ua-nda bhinga kuila o mundu uê a kala ni ifua íii. O Bibidia i zuela kuila, “akua luimbi” ni “akua makutu” ka-nda tena ku tambula o mabesá a-nda bheka o Utuminu ua Nzambi.—1 Kolindo 6:9-11; Dijingunuinu 21:8.

O athu a tena ku belesela o ijila íii kala kia londekesa o Jikidistá ja dianga. Mu kifika, kioso o dixibulu, a mu ixana Ximá ua mesenene ku bhana kitadi ku jipoxolo phala n’a mu bhane o nzumbi ikôla, o jipoxolo a ditunu-kiu, a mu tangela: “Diela kindala o kubhuma kué kuku.” Ximá ua mono o kuiibha kua hanji iê ia iibha, kienhiki, muéne ua bhingi o jipoxolo n’a mu sambele kua Nzambi n’a tene ku katula o ibanzelu ienioió ku muxima uê.—Ikalakalu 8:18-24.

Ki kale se u mundele mba u mbundu, eie u tena ku kala ku mbandu ia Utuminu ua Nzambi. (Ikalakalu 10:34, 35) O ulongelu uene mu bhana o Utuminu ua Nzambi ku mundu uoso—ua-nda ku kuatekesa kiebhi ki u tena ku kala ku mbandu ia Utuminu ua Nzambi. O Jimbangi ja Jihova a-nda sanguluka kiavulu ku ku longa o Bibidia kubhata diê sé ku bhinga kitadi. O ulongelu iú u tena ku bhanga ngó dikuinhi dia ithangana. Ua-nda di longa ima iavulu, kala “o njimbu iambote ia Utuminu ua Nzambi,” ni ku di longa ué kiebhi o Utuminu iú kia-nda zubha o kuiibha mu kaxi ka jinguvulu mu ngongo. (Luka 4:43) Tua mu ku suínisa ku sota o Jimbangi ja Jihova ku diembu diê mba ku jikula o Kijimbuete kietu, jw.org.