O BIBIDIA I TAMBUIJILA: “Kuma kumbi dí diza, dia oso ala mu jimbila kuívua o dízui, [dia Jezú] ni kutunda-mu.”—Nzuá 5:28, 29.

Kioso kia zuela kiki, Jezú ua kexile mu zuela o kizulukutu kieji bhita ku hádia, mu Utuminu uê, kioso kia-nda fukununa oso ala mu Jimbila. Fernando tua mu tange kiá mu milongi ia dianga uambe: “Nga diuanene kiavulu kioso ki nga tange mu veji ia dianga o divulu dia Nzuá 5:28, 29. Dia ngi bhana kidielelu kia kidi, tundé o kithangana kieniókio ngala ni kidielelu ku hádia.”

Jobe selevende ia Nzambi m’ukulu, ua dielele kuila kioso kieji fua Nzambi ueji mu fukununa dingi ku hádia. Jobe uebhuidisa: “Muthu n’a fu, mbé ua kà kala dingi ni muenhu?” Ni kidielelu kioso muéne ua tambuijila: “Izuua ioso i nga mu lua ita [o izuua mu Mbila] ngeje ku kinga, katé kia ngi lungulula dingi lua mukuá. Eie-phe ueje ku ng’ixana, eme hé ngi ku’itaia.”—Jobe 14:14, 15.

O Marta phang’â Lázalu uejidile kuila kuexile difukunukinu. Lázalu kioso kiafu, Jezú uambela Marta: “Phang’é ua-ndu fukunuka.” Marta ua tambuijila: “Ng’ejiia kuma u fukunuka mu difukunukinu dia kizuua kia kà suka-ku.” Jezú-phe ua mu ambela: “Eme ngi difukunukinu ni muenhu. Uoso u ngi xikana eme, né uafu, u kala dingi ni muenhu.” (Nzuá 11:23-25) Jezú ua fukununa Lázalu iu ua vutukile dingi ku muenhu! O madiuanu a difukunukinu a tu londekesa o difukunukinu dia dikota dia-nda bhita ku hádia. Xinganeka o difukunukinu ku bhita ku mundu uoso!

O BIBIDIA ITAMBUIJILA: O Bibidia ilondekesa kuila o difukunukinu dia Jezú ki dia difu ni difukunukinu dia dinake dia athu a a tange mu Bibidia. Mukonda o dinake dia athu a tambula o muenhu mu ixi. Maji o Bibidia i zuela ia lungu ni difukunukinu dia Jezú: “Jezú Kristu . . . uaii ku diulu, iú uala ku madilu ma Nzambi.” (1 Phetele 3:21, 22) O kuila Jezú muéne ngó eji mu fukununa phala kuia ku diulu? Jezú uambela o jipoxolo jê kuila: “Se ngai, anga ngi mi iudikila kiá kididi, hádia ngiza, ngi mi tambulula ko kuami; o kuoso ku ngala eme, enu uenu kuene ku muà kala.”—Nzuá 14:3.

Kristu uai ku diulu iu ua iudika o kididi phala o maxibulu mê eji ia ku diulu. Oso a-nda tambula muenhu ku diulu a-nda tenesa 144.000. (Dijingunuinu 14:1, 3) Maji ihi ia-nda bhanga o kaiedi’â Jezú ku diulu?

 Ene a-nda kala ni kikalakalu kiavulu! O Bibidia i tu tangela kuila: “A zediua, ia a lunguâ kiavulu muene, ió oso a mona mbandu iâ mu difukunukinu didi dia dianga. Enhó, o kalunga ka kaiadi, ki ka atena dingi. A kà kala jinganga ja Nzambi ni ja Kristu, a kala nê ku ungana midi ia mivu.” (Dijingunuinu 20:6) Oso a-nda fukunuka phala kuia ku diulu a-nda kala jisobha ni akunji, mu ku tumina o ixi kumoxi ni Kristu

O BIBIDIA I TAMBUIJILA: O Mikanda Ikola i tanga o diskursu dia bhange poxolo Phaulu: “Ngala ue ni kudielela kua Nzambi, ni ene iá na-ku, kuma hádia ku kala difukunukinu dia athu aiuka ni athu abhukumuka.”—Ikalakalu 24:15.

A nanhi a-nda bhanga mbandu ku kibuka kia tange Phaulu kuila, “athu aiuka?” Xinganeka kifika. Daniiele uexile selevende ia fiiele ia Nzambi, a mu ambela ku izuua ia sukidile-ku ia muenhu uê: “Ua-ndu nhoka-ku, maji mu kizuua kia ka suka-ku ua kà fundumuka anga u tambula o undundu ue ua ku xikamena.” (Daniiele 12:13) Kuebhi kua-nda fundumuka Daniiele ku kilu kia kufua? “Ixi-phe i xalela ku athu iá a iuka, ene a i lundula, muene mua tunga, o tembu iâ ki ibhu.” (Jisálamu 37:29) Jezú ua kanena: “A zediua alenduka, ene a lundula o ixi.” (Matesu 5:5) Daniiele ni athu amukuá exile fiiele a-nda fukunuka phala ku kala mu ixi katé ku hádia ni hádia.

A nanhi a-nda tokala ku kibuka kia tange Phaulu kuila “athu abhukumuka?” O athu avulu afu se kuijiia o kidi kia Bibidia mba ku belesela Nzambi. Kioso kia-nda fukunuka ene a-nda kuijiia ni ku zola Jihova * ni Jezú. (Nzuá 17:3) Oso a sola ku bheza Nzambi a-nda kala ni muenhu ua kalelaku kála Jihova.

O BIBIDIA I TAMBUIJILA: Nzambi“Muène u a kondona o masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata. Mukonda ima ia diangèle-ku, ia bhiti.” (Dijingunuinu 21:4) “Ene-phe a kà tunga jinzo, anga a kala-mu; a kà dima milenga ia mividi, anga a kà dia idima iê.”—Izaia 65:21.

Xinganeka ku kala mu ixi ni ukexilu iú kumoxi ni jindandu jê ja fukunuka! Maji, Kiebhi ki u tena ku xikina kuila kua-nda bhita muene difukunukinu?