“O MAXIMBA aié, maji o diiala mukua China, a xale!” Kiki kiene o kizuelu kievu Alexandra kiexile mu maximba, phala kuia ku sambua dia ixi iengi mu kibatu kia America ia Sulu. Muene ua tuluka, phala kuijiia se ihi ia kexile mu bhita, iu ua sange munzangala mukua China, kejidile kuzuela kiambote o Espanhole, ua kexile mu tangela o maka mê, ku mulangidi ua kexile mu langa o mbambe ia ixi. Kuma Alexandra ua tokalele mu kilunga kia Jimbangi ja Jihova, mu dizui dia Chineji, muene ua dibheka phala kulungulula o izuelu ia mukua China.

O mukua China uambe kuila, ua kexile muene ni madukumendu a kidi, maji a mu nhanene na-u ni kitadi. Ku dimatekenu, o mulangidi, ka xikinine mu maka ma kexile mu kuívua, muene ua banzele kuila Alexandra ua kexile mu bokuesa athu akua ixi iengi mu ixi iâ. Mu kusuka-ku o mulangidi ua xikina, maji o mukua China ua futu kitadi, mukonda dia kukamba o madukumendu. Kuma muene kexile ni kitadi, Alexandra ua mu sobhesa 20 a jidolale. O diiala ua sakidila kiavulu, mu kiki muene ua kanena kuila ueji mu vutuila 20 a jidolale ndenge. Alexandra ua mu tangela kuila, ka kexile mu sota ku mu futa; Muene ua sangulukile kiavulu, mu kuila ua bhangele o kima kia tokala. Muene ua bhana ku diiala, madivulu a Bibidia iu ua mu suínisa kudilonga o Bibidia ni Jimbangi ja Jihova.

Kisangusangu kia dikota, kuívua misoso ia athu a kuatekesa athu akua jixi jengi, sé phata o ukexilu kala iú, ene mu ulondekesa ue ku athu a jingeleja javulu, ni ió ki jikidistá. O kuila sai kizuua ua kuatekesele kiá muthu ua bhindamene kima? O kibhuidisu kiki kia katunda, mukonda Jezú uambe: “O kubhana kota mu kuzediuisa, o kutambula ndenge.” (Ikalakalu 20:35) O kibhuidisu kiki kia katunda ue phala o jingijiié, mukonda ene a tokuesa kuila kubhana kubheka sauidi iambote ku muthu. Tu mone se kiki ki bhita kiebhi.

O misoso ia athu ilondekesa kuila, o kubhana ni kusanguluka endela bhuamoxi. O poxolo Phaulu ua soneka kuila, “Nzambi ua zola mukua kubhana ni ngalasa ioso.” Muene ua kexile mu zuela ia lungu ni Jikidistá ja sangele kitadi ni vondadi ioso phala kukuatekesa o jiphange jâ ja bhindamene. (2 Kolindo 8:4; 9:7) Phaulu ka kexile mu zuela kuila, ene a bhele kitadi mukonda a sangulukile kana. Maji ene a sangulukile mukonda a bhanene kikuatekesu.

Kala kia tange akua kutokuesa, o ukexilu ua kubhana “u jikula o jimbandu ja uongo ja lungu ni kusanguluka, kukala ni ukamba ni akuenu, kudielela ni kudivua kiambote mu kuijiia kuila, ua bhana kima ku akuenu.” O musoso ua mukuá ua londekesa kuila, “kubhana kitadi ku muthu ua bhindama, kubhangesa o muthu ua bhana o kitadi kusanguluka kiavulu, maji se muene o kitadi u ki ngástala ubheka uê, ka-nda sanguluka kiavulu.”

Mukonda dia ibhindamu ku muenhu, o kuila ua divuile kiá kuila kuala ni kima kia soko phala kubhana? Mu kidi, athu oso a tena kukala akua “kubhana ni  ngalasa ioso.” O kubhana ni ngalasa ioso, ki kulombolola kubhana kima kia dikota. Sai Mbangi ia Jihova, ua tumikisa njimbu ni kitadi ku asoneki a divulu didi, muene ua soneka: “Mivu ioso íii kiene mu ngi bhonza kiavulu kusangela kitadi mu Kididi kia Ubhezelu. Maji Jihova Nzambi uene mu ngi kuatekesa ni ima iavulu, o kitadi ki ngene mu bhana ndenge. . . . Nga mi sakidila kiavulu mu ku ngi bhana o kithangana kia kubhana ioso i ngi tena, kiki ki ngi sangulukisa kiavulu.”

Mu kidi, ki tu bhana ngó kitadi. Kuene maukexilu avulu a kubhana.

O Bibidia iambe: “Muthu uambote, u bhanga mbota ku muenhu uê; Maji o kingumba kia diiala katé ni mukutu uê u u talesa hadi.” (Jisabhu 11:17) O athu ambote ala ni ukexilu ua kubhana ioso iala na-iu, kala o nguzu iâ, o kithangana kiâ, ni ima ia mukuá dingi. O ukexilu iú uambote, u a kuatekesa mu muakexilu avulu ku muenhu uâ, mu kienhiki u a bhekela sauidi iambote.

O misoso ilondekesa kuila, o athu ene mu kuatekesa akuâ, kia a bhonza kiavulu kukala ni kikote ku muxima. Mu veji dia kiki, ene a kala ni sauidi iambote. Kubhana ni ngalasa ioso, kukuatekesa kukala ni sauidi iambote, katé muene ni ió ala ni uhaxi ki u xikina ku u saka, kala uhaxi u zozesa o jisélula, ni SIDA. O misoso iamba ue kuila, o ukexilu ua kubhana u kuatekesa o muthu ua mu bhânga ni kueha o uhôlua, phala ka kale ni kikote ku muxima, kiki ki tena kua a kuatekesa phala ka vutuke dingi mu ukexilu uokulu.

Kuma o kubhana kukuatekesa muene o sauidi, o misoso i londekesa ue kuila “o henda ni kubhanga o mbote, maukexilu a tu kuatekesa phala ki tu kale ni ibanzelu iaiibha ku muxima.” O kubhana ku tu kuatekesa ue kusosolola o kuthandanganha, ni kulenga kua manhinga mu mixibha ietu. O athu a funda anumi’â a disanza ni lusolo ku kikote, kioso kia kuatekesa akuá.

Kiki kidi muene. Kubhana kukuatekesa kukala ni sauidi iambote.

Jezú ua tendelesa o maxibulu mê: “Bhanenu akuenu, enu uenu Nzambi a mi bhane. Kienhiki-phe Nzambi ua-nda ku mi bhana kizongelu kiambote, kiòbate, kiòsakese, kia xamuka, a mi bhana bhu homba ienu. Mukonda ioso o nzôngo i mua zongela akuenu, iene Nzambi ia mi zongela enu’enu.” (Luka 6:38) Kioso ki u bhana, o athu a sanguluka ue mu ukexilu iú, kiki ki suínisa o athu kubhana ue. Mu kiki, o kubhana kusuínisa o ukamba ni ku di kuatekesa.

Sai jingijiié ene mu di longa ia lungu ni ukamba ua athu ambe kuila “o athu ala ni ukexilu ua kubhana, ene mu suínisa ue akuá kubhana.” Mu kidi, “kutanga o misoso ia lungu ni mbote iene mu bhanga o athu, i suínisa ue athu a mukuá kubhana.” Mu kiki, kala kia tange o musoso ua mukuá, “kala muthu mudietu u tena kuxa phangu iambote, phala o minzangala, adiakime, katé muene ni ió tua kambe kua ejiia.” Mu izuelu ia mukuá, né muene se muthu u bhana kima kiofele, o phangu íii i tena kukuatekesa  athu oso mu sanzala kukala uá ni ukexilu ua kubhana. O kuila ku mesena kutunga mu kididi kala kiki? Kiene, o athu a-nda tambula mabesá avulu mu kulondekesa o ukexilu ua kubhana.

Sai musoso ua tundu mu mbanza ia Florida mu ixi ia Estados Unidos ia América, u londekesa o mbote ijila mu kukala ni ukexilu iú. Sai kibuka kia Jimbangi ja Jihova, a dibhakula phala kukuatekesa o athu kioso kia bhiti o kitembu kia dikota. Kioso ene kia kexile mu kingila o ima, phala kuiudika o inzo, o kibuka kiki a mono kithádi kia inzo ia muthu kia zanganha, ene a dibhakula phala ku mu kuatekesa. Mu kubhita thembu, o ngana ia inzo íii ua soneka mukanda, ku mbonge ia Jimbangi ja Jihova. “Nga-nda mi sakidila izuua ioso. Nga mono kuila, enu ki mu difu ni athu a mukuá.” O ukexilu ua kusakidila, ua mu bhangesa kutumikisa kitadi, phala ku ki ngástala mu kikalakalu kia beta-o-kota kia mu bhanga o Jimbangi ja Jihova.

O jingijiié a tungununa kuila “o athu a a bhange ni ukexilu ua kukuatekesa akuá.” O jingijiie mu kutokuesa ambe kuila o ana-ndenge “ala ni ukexilu ua kukuatekesa akuá, sé kukingila kua vutuila kima, né muene ande dia kumateka o kuzuela.” Mukonda diahi? O Bibidia i tambuijila kuila ‘Nzambi ua bhange o muthu mu kidifuanganu kiê,’ mukonda dia kiki, tuala ue ni idifua, kala ia Nzambi.—Dimatekenu 1:27.

Mu idifua ioso iala na-iu o Mubhangi uetu, Jihova Nzambi, kuala o ukexilu ua kubhana. Muene ua tu bhana o muenhu, ni ioso i tua mesena, phala ku zediua ku muenhu. (Ikalakalu 14:17; 17:26-28) Tu tena kukala ni ukamba uambote ni tata ietu ia diulu, ni kuijiia o vondadi iê, mu ku dilonga o Maka mê o Bibidia. O Bibidia iamba kuila, Nzambi ua jikula o njila, phala tu tene kuzediua ku hádia. * (1 Nzuá 4:9, 10) Kuma Jihova Nzambi muéne o mubhangi ua beta-o-kota, eie a ku bhange mu kidifuanganu kia Nzambi. Ki tu tokala kudiuana kioso ki tu bhana kima, mukonda tua mu kaiela o phangu ia Nzambi, mu kubhanga kiki, muene u tu xikina.—Jihebeleu 13:16.

Ua lembalala Alexandra, tua mu tange kiá ku dimatekenu dia milongi íii? Kiebhi kiabhu o musoso uê? Sumbala o muthu ua kexile mu kuenda né, ua mu tangele kuila muene ua kexile mu zanga o kitadi kiê, o diiala a mu kuatekesa, ua disange ni makamba mê, mu sanzala muemanene o maximba, iú ua vutuila o 20 a jidolale kua Alexandra. Mu kienhiki, o diiala ua kumbidila kala kia mu tangele Alexandra, iú ua mateka ku dilonga o Bibidia. Alexandra ua sangulukile kiavulu, mu ku disanga né mu kiônge kia dikota kia Jimbangi ja Jihova mu dimi ia Chineji, mu ixi ia Peru. Phala kulondekesa o kisakidilu kiê, mu ioso ia mu bhange, o diiala uexana Alexandra ni jiphange ja mukuá kuia mu inzo iê ia kusumbisila kúdia.

Kubhana ni kukuatekesa akuetu, ku tu bhekela sauidi iambote. Mu kubhanga kiki eie u tena kukuatekesa akuenu kukala ni ukamba uambote ni Jihova Nzambi! (Tiiaku 1:17) O kuila uene mu uabhela o ima iambote iene mu ku bhana Nzambi?