SALA uemana mu kaxi ka dixilu anga u kala mu tala mu’axaxi. Xinganeka muhatu mukua Oriente Médio, uala ni mesu a uabha kiavulu. O kuila o mesu mê alondekesa kuila muene ua luuala? Se kiene, tuejiia ihi ia mu luualesa. Kua bhitile ima iavulu m’onzo iâ. Muene ni kazola kê, Mbalahamu, a sangulukile kiavulu mu mivu iavulu m’onzo iâ. * Kiiadi kiâ a sangulukile mu dibhata diâ.

Ene a tungile mu Ule, mbanza ia fuama, muezalele jihete mu kuiudika o ima ni asumbixi. Sé phata ene exile jinvuama. Maji phala Sala, o inzo iê ki iexile ngó kididi kia kubhaka-mu o imbamba iê, kana. Muene ni kazola kê a bhitile ithangana iavulu iambote ni iaiibha m’onzo mumu. A sambele nzungule ia jiveji kua Nzambi iâ, Jihova. Kuexile ima iavulu ia bhangesele Sala kuuabhela o mbanza ienióio.

Maji Sala ua kexile polondo phala kuia kididi kiengi ni kuxisa o imbamba ioso kudima. Muene nange ua kexile ni 60 a mivu, maji né kiki ueji kuia kididi kia kambele kuijiia, o muenhu uê ueji bhonza kiavulu ni kukala mu iluezu, nuka dingi ueji tena kuvutuka. Ihi ia mu bhangesa kubhanga o kima kiki kia dikota? Ihi i tu tena kudilonga mu kixikanu kiê lelu?

Sala nange ua kudila mu mbanza ia Ule. Lelu o mbanza ióio ia xala ngundu. Maji mu izuua ia Sala o jinaviu ja kexile mu kuijila mu menha ni mu milombo ia Ngiji ia Ufalate, ja kexile mu bheka imbamba ni makudia phala o mbanza ieniii. Athu avulu akexile mu kuendela mu ikoka ia tolo ia mbanza ia Ule, mua kexile mu bhusa kiavulu, o jinaviu ja kexile mu tula bhu thabhu, o imbamba akexile mu iambata mu itanda ia mbanza. Xinganeka Sala ua mu kudila mu mbanza ienióio iezala ni athu, ni kuijiia mundu uavulu, kala muthu mu dijina diê. Sé phata o athu ue a muijiidile, mukonda muene ua uabhele kiavulu. Muene ue ua kexile ni jindandu javulu mu mbanza muenhómo.

Sala a mu tumbula mu Bibidia mukonda dia kixikanu kiê—maji ki kixikanu ku nzambi ia dieji ia kexile mu bheza o athu mu mbanza ia Ule, o kiteka kia nzambi ióio a ki mikile moxi dia mbanza. Maji Sala ua kexile mu bheza o Nzambi ia kidi Jihova. O Mak’â Nzambi ka lombolola kiambote se kiebhi Sala kieza mu kala ni kixikanu. Mu ithangana iavulu tat’ê uexile mubhezi a iteka. O kima kia betele-o-kota o ku kazala ni Mbalahamu, ua mu tundile 10 dia muvu. * (Dimatekenu 17:17) Mu kubhita thembu Mbalahamu a muijiidile kala “tata ia oso a xikana Nzambi.” (Loma 4:11) Kiiadi kiâ a bhangele ioso phala kusuínisa o ukaza uâ, akexile mu ditumaka kiambote ni kudivua, ni ku dikuatekesa mu ithangana ia iibhidi. Maji o kima kia betele-o-kota mu ukaza uâ, o henda iâ kua Nzambi.

Sala ua zolele kiavulu muadi uê, kiiadi kiâ a tungile  o dibhata diâ bhu kaxi ka jindandu jâ mu mbanza ia Ule. Maji ki ku bhitile thembu iavulu, a bhiti ni maka a a luualesa. O Bibidia i tu tangela kuila Sala ua kexile “mbaku, ka moneka mona.” (Dimatekenu 11:30) Mu thembu ióio, o ukexilu ua Sala ua kukamba kuvuala ua bhonzele kiavulu. Maji Sala ua sulukile ni ufiiele uê kua Nzambi ni kua muadi uê. O muebhu uâ, Lote, ka kexile dingi ni tata, ua kituka kala mona phala ene. O muenhu uâ ua suluka katé kioso o ima ki ia lunguluka.

Mbalahamu uai kua Sala ni ku sanguluka kuavulu. Muene ka tenene kuxikina mu ima ia bhitile. O Nzambi ia kexile mu bheza ua zuelele né, ua mu tukulukile bhu kaxi ka anju! Xinganeka Sala, ua mu tala muadi uê ni henda ioso ni kuibhudisa: “Ihi ia ku tangela? Nga kudióndo ngi tangele!” Kia dianga nange Mbalahamu ua xikamene iu ua sokejekele kiambote o ibanzelu iê; anga u zuela o maka a mu tangela Jihova: “Tunda m’oxi ié, ni mu jindandu jé, uize m’oxi ioso i nga kà ku idikiza Eme.” (Ikalakalu 7:2, 3) Kioso muene kia tululukisa o muxima uê, ene anga a banza kiua mu kikalakalu kia a bhanene Jihova. Ene eji xisa o muenhu uâ uambote, ni kutunga kala asonhi mu ixi iengi! Kiebhi kia divu Sala? Sé phata Mbalahamu ua mu tale kiambote. O kuila muene ueji xikina kulungulula o ukexilu ua muenhu uâ?

O ia bhiti ni Sala, mu izuua ia lelu ki iene mu bhita dingi. Nange tu xinganeka, ‘Nzambi nuka ua tu bhingi phala kutunda mu ixi ietu, ni kuia mu ixi iengi!’ Maji o kuila etu inióso ki tuene mu bhita ue ni maka a bhinga kusola? Tua tungu ku mundu uezala ni athu a zolo kiavulu o kitadi, o mundu iú uene mu tu suínisa kuta ku pholo o mbote ietu, jimbongo ni kukondama. Maji o Bibidia i tu tangela kuila tua tokala kusola ima iengi—ku dianga kusota o ima ia nzumbi, ni ku ta o vondadi ia Nzambi ku pholo ku muenhu uetu. (Matesu 6:33) Mu kuxinganeka mu ima ia bhange Sala, tu dibhuidisa ‘Ima iahi i nga-nda sola ku muenhu uami?’

Kioso Sala kia kexile mu longela o ima iê, nange ua dibhanene ni kibhidi kia dikota kia kusola o ima ieji xisa, ni ieji kuambata. Muene ka tokalele kusola ima ia makota, keji tena ku iambata ku jibulu ni ku jikamelu, ua tokalele kuambata ngó o ima ieji kua kuatekesa. Sé phata o ima ia mukuâ eji ku i sumbisa mba ku i uanena o athu. Ene eji xisa ue o ima ioso iambote ku dima—kala o kuia mu itanda, mua kexile mu sumba o masa, xitu, izuatu ni ima ia mukuá.

Nange kia bhonzele kiavulu Sala kuxisa o inzo iê. Se o inzo iâ ia difuile ni jinzo ja mukuá, ja sange akuá kutokuesa o ima koxi a mavu mu mbanza ia Ule, tu tena ku zuela kuila Sala ua kexile ni muenhu uambote. Sai jinzo ja kexile ni maxilu avulu, ja kexile ni jifixi ja menha a talala, ni ididi mua kexile mu tundila o menha a xidi. Katé muene ni jinzo ja  jingadiama, ja kexile ni jixapa jambote, iphapha iambote ni mabhitu a kexile ni jisabhi. O kuila o balaka ieji tena kua fikidila ku miii? Mba ku jihoji, ku jingo, ku jiulusu, ni ku imbungu ia vudile kiavulu mu izuua iâ?

Ihi i tu zuela ia lungu ni muiji uê? Sala ueji xisa nanhi? O kitumu kia Nzambi kiambele kuila “katuka m’oxi ienu, ni mu jindandu jenu” nange kia bhonzele kiavulu phala muene. Mu kukala muhatu ua henda, nange ua kexile ni jiphange ja mala ni ja ahatu, ebhu, jisekaje ni jisekulu, muene ua zolele kiavulu o athu enhá, maji keji tena kua mona dingi. Né muene kiki Sala ni kusuína kuoso ua kexile mu dipelepalala phala kuenda o njila.

Né muene ni ibhidi, Sala ua kexile mu longela o ima phala kuenda o njila mu kizuua kia xindile. Tela mu kukala o dilemba dia muiji, muene ua tokalele kuenda kumoxi ni Mbalahamu ni Sala sumbala ua kexile kiá ni hama jiiadi ja mivu. (Dimatekenu 11:31) Sala ua kexile ni kikalakalu kia dikota kia kulanga tat’ê ua kukile kiá. Lote ua dibundu kumoxi ni ene mukonda dia ene kubelesela Jihova, ene anga a “tunda m’oxi ia akua Kaladeia.”—Ikalakalu 7:4.

Kia dianga ene ai mu ixi ia Halane, phala kubhixila-ku a kexile mu kuenda 960 a jikilometulu mu njila ia Ufalate. Kioso kia tula mu Halane o muiji ua nhonha bhuofele. Mu kithangana kiki, nange Tela ka tenene dingi kuenda o njila. O muiji uoso anga a kala mu Halane katé kia fu Tela mu kitala kia 205 kia mivu. Ande dia kutunda mu Halane, Jihova ua tangela dingi Mbalahamu, phala kutunda mu ixi ienióio n’ende mu ixi ieji ku mu londekesa Jihova. Mu kithangana kiki, Nzambi ua mu bhange kikanenu kia katunda uixi: “Eme-phe nga-nda ku ku sokolola n’ukala u muiji ua dikota.” (Dimatekenu 12:2-4) Maji kioso ene kia tundu mu ixi ia Halane, Mbalahamu ua kexile ni 75 kia mivu o Sala 65, ene kexile né ngó mona umoxi. Kiebhi Mbalahamu kieji kituka muiji ua dikota? O kuila muene ueji kazala ni muhatu uengi? O thembu ienióio o mala a kexile mu sakana ni ahatu avulu, mu kiki Sala nange kiene kia kexile mu xinganeka.

Ene a tundu mu ixi ia Halane ia a suluka o njila iâ. Maji mu kindala tala se nanhi uala na-u kumoxi. O musoso u tu londekesa kuila o muiji ua Mbalahamu uambata o jimbongo joso ja bhongoluele ni “athu a muenhu a di bande-nâ bhu Halane.” (Dimatekenu 12:5) A nanhi exile o athu enhó? Nange exile jiselevende. Maji se phata Mbalahamu ni Sala a zuela ni ió a mesenene kuivua o mak’â Nzambi. Sai Jijudé jokulu ambe kuila o athu a a tange mu velusu íii kexile jijudé, maji exile athu a di bundile kua Mbalahamu ni Sala phala kubheza Jihova. Se kiene o kixikanu kia Sala, se phata kia mu kuatekesa ku zuela ni kusuína ia lungu ni Nzambi iê ni kidielelu kiê. Kima kiambote kuxinganeka mu maka enhá, mukonda tua tungu ku mundu uezala ni athu a tolo o kixikanu ni kidielelu. Kioso ki u dilonga ima iambote mu Bibidia, o kuila u tena ku i tangela ue athu engi?

Kioso kia zauka o ngiji ia Eufalate, nange mu kizuua kia 14, ia mbeji ia Nizá ku muvu ua 1943 A.K.K., a kulumuka ni njila iia mu ixi ia a kanene Jihova. (Makatukilu 12:40, 41) Xinganeka Sala kutala o ima mu’axaxi kê, kala o kuuabha kua ixi ni ima ia idifua iavulu. Bhu mbandu ia mixi ia makota ia Molé ni Xikeme, Jihova ua tulukila dingi Mbalahamu, mu veji íii muene uambe: “O mbutu ié-eie hinu nga ká a bhana o ixi ienhi’ii.” O kizuelu kiki, “mbutu,” kieji kala ni kijimbuluilu kia dikota phala Mbalahamu! Sé phata o kizuelu kiki kia mu bhangesa kuxinganeka mu jaludim ia Edene, muenhómo Jihova ua kanene mbutu ieji buikisa Satanaji. Jihova ua tangele ue Mbalahamu kuila o kifuxi kieji tunda kua muene, kieji jikula o njila phala o athu mu ngongo kutambula mabesá.—Dimatekenu 3:15; 12:2, 3, 6, 7.

Maji né muene kiki, o muiji ua bhitile ue mu ibhidi ia mundu iú. Mu ixi ia Kanana mua moneka nzala, mu kiki Mbalahamu ua kulumuka ni muiji uê mu ixi ia Ijitu. Maji kia tula-mu uôma ua mu kuata. Mu kiki, muene ua dikundu ni Sala, uixi: “Eie-ze u muhatu ua uabha kiavulu ku mesu a athu. Tuenda kuila akua Ijitu kia ku mona, ela muéne uavu mukaji’ê, a mesena eme a ngi jibha eie-phe a ku bhaka ni muenhu. Nga ku diondo-phe, ua kéla kuma u phange iami ia muhatu; phala a ngi bhange o mbote mukonda di’eie, mu henda ie-eie eme ngi xale ni muenhu.” (Dimatekenu 12:10-13) Mukonda diahi Mbalahamu ua zuela kiki?

 Mbalahamu kexile mukuá makutu mba mukuá uôma, kala kiene mu zuela a moxi. Mu kidi Sala uexile phang’iê ia katata. Mbalahamu ka zuele ngó mu kingóho. Mbalahamu ni Sala ejidile kuila, ki kuexile kima kia betele-o-kota o kia ku vuala o mbutu ni kifuxi kia katunda kia kanene Nzambi bhu kaxi ka Mbalahamu ndenge, mu kiki Mbalahamu ua kituka muthu ua kexi ni valolo ia dikota. O misoso ia akuá kutokuesa o ima koxi a mavu, ilondekesa kuila m’ukulu o jisobha mu ixi ia Ijitu, a kexile ni kifua kia kutambula o muhatu ua diiala ni kujibha o diiala. Ni unjimu uoso Mbalahamu ua soto ndunge iambote, o Sala ua belesela mu ndunge íii.

Ki ku bhitile thembu iavulu, o izulukutu ia londekesa kuila o uôma ua Mbalahamu ki uexile ngó uôma ua hatu kana; sai ilamba ia Falaó a mono kuila Sala uexile muhatu ua uabha o pholo—ka difuile ni muhatu uoso-uoso mu kuuabha. Ene a tangela Falaó, muene ua a tumina ku mu takana! Ki bhonza kuxinganeka o ndolo ia Mbalahamu ni uôma ua Sala. Maji nange Sala ka mu talatala kala muthu a mu kutu, maji a mu talatala ni kijingu. Nange Falaó ua mesenene ku mu tangesa ni ku mu londekesa o unvuama uê. Falaó anga u bhanga mbote kua “phang’iê” Mbalahamu, phala Sala kukala muhatu uê.—Dimatekenu 12:14-16.

Xinganeka Sala mu mbalanda ia palaxu ua mu tala o kuuabha kua Ijitu. Kiebhi muene kia divu mu kutunga mu inzu ia uabha, ni kúdia kiambote? O kuila iexile tendasá kumona o unvuama, iu ua banzele kuila o ua kexile na-u mu Ule ndenge? Xinganeka o kisangu-sangu kieji kala na-kiu Satanaji, se Sala ua xile Mbalahamu phala ku sakana ni Falaó! Maji Sala ka bhange kiki. Muene uexile fiiele kuá muadi uê, mu ukaza ni kua Nzambi iê. Kieji kala kima kiambote se makaza oso ku mundu iú uaiibha a dilondekesa o ufiiele! O kuila u tena kukaiela o phangu ia Sala ku muiji ni mu ukamba ué ni akuenu?

Jihova ua lange o muhatu iú ua kazola, mu kutumikisa mabhebhu kua Falaó ni ku dibhata diê. Kioso Falaó kievu kuila Sala uexile muhatu ua Mbalahamu, muene ua mu tumikisa kuá muadi uê, iú ua bhingi kuila muiji uâ uoso a tunde mu ixi ia Ijitu. (Dimatekenu 12:17-20) Mbalahamu ua sangulukile kiavulu mu kutambula muhatu uê! Lembalala kuila muene ni henda ioso, uambela muhatu uê uixi: “Eie-ze u muhatu ua uabha kiavulu ku mesu a athu.” Maji muene ka kexile ngó mu ximana Sala mukonda dia kuuabha kua pholo. Sala uexile muthu ua uabhele o muxima, o kuuabha kua beta-o-kota kua mesena Jihova. (1 Phetele 3:1-5) Kuku kuene o kuabha ku tua tokala kukala na-ku. Se tu tula o ima ia nzumbi ku pholo dia ima ia xitu, ni ku tangela o athu o kidi kia lungu ni Nzambi, ni kubelesela o itumu ia iuka ia Nzambi, kioso ki ku moneka jitendasá, tua-nda kaiela o phangu ia kixikanu kia Sala.