Kiene, i tena ku ku kuatekesa, mukonda o kikuatekesu kia beta-o-kota ki tunda kua “Nzambi, mukua kutululukisa oso a bhondalala.”—2 Kolindo 7:6.

•   Nguzu. Nzambi u ‘tululukisa oso a bhondalala,’ muéne ka bhanga kiki mu ku zubha o jiphaxi jê joso, kana, maji mu ku tambuijila o misambu iê kioso ki u bhinga nguzu kua muéne, phala u tene o ku kolokota. (Filipe 4:13) Eie u tena ku dielela kuila, muéne uala polondo phala kuívua o misambu iê, mbata o Bibidia i zuela: “Jihova ua zukama kua iá a toloka mixima, u bhulula oso a talamana mu nzumbi.” (Jisálamu 34:18) Kienhiki, Nzambi u tena kuívua kioso ki u dikola kua muéne, né muene se ku tena ku zuela ioso ia ku kala ku muxima.—Loma 8:26, 27.

•   Phangu jambote. Saí musoneki ua Bibidia, ua sambe kiki: “Tunde mua zongo mu nga kuzuka, nga dikola ko kué.” O ia kuatekesa o musoneki iú ku kolokota, o ku lembalala kuila Jihova u loloka o ituxi ietu. Kienhiki, muéne uambe: “Eie, Jihova se kuila u kuata konda ia ituxi ietu ioso, nanhi muene u tena kuimana bhu pholo ié? Maji eie-phe, u ngana, u mukua ku loloka phala athu ende jinge ni ku ku xila.”—Jisálamu 130:1, 3, 4.

•   Kidielelu. Nzambi ka tu bhana ngó nguzu kindala, muéne ua tu kanena ué kuila ku hádia ua-nda zubha o jiphaxi joso ji tolokesa o mixima ia athu. Kioso muéne kia-nda kumbidila o izuelu iê, “O ima ia bhiti kiá [kála o ku toloka o muxima] ki bhu kala dingi ku i banza, né ngó kuiza mu kilunji lémbua.”—Izaia 65:17.

 Tala: Sumbala o Jimbangi ja Jihova a dielela mu kikuatekesu ki bhana Nzambi, ene uá mu sota milongo mu ididi muene mu saka uoso ua toloka o muxima. (Marku 2:17) Maji etu ki tu tena ku tangela o athu se milongo iebhi ia tokala o ku i kaiela, mukonda kala muthu ua tokala ku sola o kididi ni milongo iebhi ia tokala ku i kaiela.