Muveji javulu o Bibidya ixana Jezú kala “Mon’â Nzambi.” (Nzwá 1:49) O kizwelu “Mon’â Nzambi” kilondekesa kwila Nzambi mwene o Mubhangi mba Fixi ya ima yoso yene ni mwenyu, kate mwene o mwenyu wa Jezú. (Jisálamu 36:9; Dijingunwinu 4:11) O Bibidya ki izwela kwila Nzambi wavwala mona kala o athu kyene mu vwala o twana.

 O Bibidya ixana we o jianju kala “an’a Nzambi.” (Jobe 1:6) O Bibidya yambe we kwila, o diyala dya dyanga Adá, wexile “mon’â Nzambi.” (Luka 3:38) Kuma Jezú mwene adyanga ku mu bhanga kwala Nzambi ni kwila Nzambi wamubhange se kikwatekesu kya muthu, o Bibidya izwela ya lungu ni Jezú kala Mon’â wa betakota wa Nzambi.

•  O kwila Jezú wexile ku dyulu ande dya kwiza mu ixi?

•  Ihi yexile mubhanga Jezú ande dya kwiza mu ixi?

 Xe kyene. Jezú wexile muthu mu nzumbi ku dyulu, ande dya ku muvwala mu ixi. Jezú mwene wambe: “Eme nga tuluka ku dyulu.”—Nzwá 6:38; 8:23.

 Nzambi wabhange Jezú ande dya kubhanga kima kyoso kyoso. Tala izwela o Bibidya ya lungu ni Jezú:

•   “Mwene . . . o phande-kumbi ya ibhangelu yoso.”—Kolose 1:15.

•   Mwene “o dimatekenu dya ibhangelu ya Nzambi.”—Dijingunwinu 3:14..

 Jezú wa kumbidila o kikanenu kyambele kwila yó “wavu o matundilu mê ma kalelà-ku tunde mu xahulu, mu izuwa ya kalelà-ku.”—Mikeya 5:2; Matesu 2:4-6.

 Mwene wexile ni kididi kyakatunda ku dyulu. Bhukaxi ka musambu Jezú wazwela ya lungu ni kididi kiki kyakatunda ande dya kwiza mu ixi: “Tata ngijingise . . . ni kijingu ki ngakexile nakyu kyoso ki ngakexile bhu mbandu yé, ande dya kubhanga o ngongo.”—Nzwá 17:5.

 Mwene wakwatekesa Tat’ê kubhanga o ima yoso ya mukwa. Jezú wakalakala kumoxi ni Jihova kala “dixibulu dyê.” (Jisabhu 8:30) Ya lungu ni Jezú o Bibidya yamba: “Bhukaxi ka mwene, Nzambi wabhange o ima yoso ya mukwa kikale ku dyulu kikale mu ngongo.”—Kolose 1:16.

 Nzambi wabhange o ima yoso ni kikwatekesu kya Jezú. Kikale o jianju ni ngongo. (Dijingunwinu 5:11) Sayi ithangana o kuditendela kwa Nzambi ni Jezú mu kukalakala kumoxi, kwedile kala kwa mutungi ni muthu ukala kupholo kya kibuka kya kutunga. O muthu wala kupholo uzwela kyebhi kyanda kala o inzo mba sabhalalu, o mutungi anga ukayela o itendelesu yamubhana.

 Mwéne wexile o Dyambu. Mukuzwela yalungu ni mwenyu wa Jezú ande dya kwiza mu ixi, o Bibidya imwixana “o Dyambu.” (Nzwá 1:1) Kiki kilombolola kwila, Nzambi watumina Mon’ê kutumikisa jinjimbu ni itendelesu ku jianju jengi.

 Nange Jezú wexile we Dyambu dya Nzambi phala kuzwela ni athu. Kyoso Nzambi kyabhana itendelesu kwa Adá ni Eva mu njaludim ya Edene, nange wa ibhana bhukaxi ka Jezú. (Dimatekenu 2:16, 17) Jezú nange mwene o anju wendesa akwa Izalayele mu kikangalakata, atokalele kumubelesela ni ufiyele woso.—Makatukilu 23:20-23. a