Mu Bibidya o kizwelu difukunukinu dyatundu mu kizwelu anástasis mu dimi dya Ngeleku. O kizwelu kiki mu dimi didi, kilombolola, “kufundumuka,” mba “kwimana dingi.” Kyoso o muthu kya fukunuka, mwene ufundumuka bhukaxi ka madifundu anga ukala kála kyakexile mwene ande dya kufwa.—1 Kolindu 15:12, 13.

 O kizwelu “difukunukinu,” kikimoneka mu Mikanda ya Hebalayiku akixana we Kikutu Kyokulu. Maji mu mikanda yiyi tusangamu milongi yalungu ni maka enyá. Mu kifika, bhukaxi ka polofeta Izaya, Nzambi wakanena: “Hinu eme ng’a kula ku uzonda wa mbila, hádya eme ng’a tambula dingi ka kalunga-ngombe.”—Hozeyia 13:14; Jobe 14:13-15; Izaya 26:19; Daniyele 12:2, 13.

 Kwebhi kwanda tunga o athu anda kwa fukununa? Sayi athu anda kwa fukununa phala kuya ku dyulu, kutumina ni Kidistu. (2 Kolindu 5:1; Dijingunwinu 5:9, 10) O Bibidya izwela kwila, didi dyene o “difukunukinu dya dyanga,” kifwa o ‘difukunukinu dyanda dyanga o kubhita.’ O izwelu yiyi itena kutulombolola kwila, kwala dingi difukunukinu dyengi. (Dijingunwinu 20:6; Filipe 3:11) O difukunukinu didi dya kayadi dyanda bhita ni athu avulu; ene anda kutunga mu ixi.—Jisálamu 37:29.

 Kyebhi o athu anda kwa fukununa? Nzambi wabhana kwa Jezú o kutena kwa kufukununa o madifundu. (Nzwá 11:25) Jezú wanda bheka ku mwenyu o “athu oso ala mu jimbila.” Kala muthu wanda fukunuka ni ukexilu wê, ni idifwa yê, ni ilembalesu yê yokulu. (Nzwá 5:28, 29) O athu anda afukununa phala kuya ku dyulu, atambula mukutu mu nzumbi. Maji o athu anda kwa fukununa phala kutunga mu ixi, anda kala ni mukutu wa ubhe wa xitu, ni sawidi yambote.—Izaya 33:24; 35:5, 6; 1 Kolindu 15:42-44, 50.

 Ananyi anda kwa fukununa? O Bibidya yamba kwila “kwanda kala difukunukinu dya athu ayuka ni athu akambe o kuyuka.” (Ikalakalu 24:15) O athu ayuka, athu kala Nowé Sala ni Mbalahamu. (Dimatekenu 6:9; Jihebelewu 11:11; Tiyaku 2:21) O “akambe o kuyuka,” yó kabelesela o itumu ya Nzambi, mukonda kakexile ni kithangana kya kudilonga yalungu ni mwene ni ku mu kayela.

 Maji o yó akituka athu ayibha kinéne, katena kulungulula o kifwa kyâ, kanda kwa fukununa. Muthu wala ni ukexilu yú, kyoso kyafwa mwene utambula o kibwika kya kalelaku, kala dingi ni kidyelelu kya kuvutuka ku mwenyu.—Matesu 23:33; Jihebelewu 10:26, 27.

 O difukunukinu dyanda bhita thembu kuxi? O Bibidya ya kanene kwila, o difukunukinu phala yó anda tambula o mwenyu ku dyulu, dyeji bhita mu kithangana kya kutukuluka kwa Kidistu. O kithangana kiki, kyamateka kudimatekenu dya muvu wa 1914. (1 Kolindu 15:21-23) O difukunukinu dya athu anda tunga mu ixi dyanda bhita mu Utuminu wa Jezú Kidistu wa midi ya mivu, kyoso o ixi kyanda kala palayzu .—Luka 23:43; Dijingunwinu 20:6, 12, 13.

 Mukonda dyahi kima kyambote kuxikina ku difukunukinu? Mu Bibidya mwala misoso yalungu ni divwa dya athu a afukununa. Kwexile jimbangi amono o difukunukinu. (1 Jisobha 17:17-24; 2 Jisobha 4:32-37; 13:20, 21; Luka 7:11-17; 8:40-56; Nzwá 11:38-44; Ikalakalu 9:36-42; Ikalakalu 20:7-12; 1 Kolindu 15:3-6) O difukunukinu dya Lázalu dya betakota, mukonda kwabhitile kya izuwa iwana tundé kyafu, maji Jezú wa wabhange o madiwanu yâ bhu pholo ya athu avulu. (Nzwá 11:39, 42) Katé mwene ni jinguma ja Jezú katenene kudituna kwila mwene wafukunwine Lázalu. Mukonda dya kiki ene amesenene kujibha Jezú ni Lázalu.—Nzwá 11:47, 53; 12:9-11.

 O Bibidya ilonga kwila Nzambi wala ni kutena ni hanji yavulu yakubheka dingi ku mwenyu yó afu kya. O kilunji kya Nzambi ki kyala ni disukilu. Bhukaxi ka kutena kwé kwadikota, mwene ubhaka mu kilunji kyê o idifwa ya athu oso wanda kwa kufukununa. (Jobe 37:23; Matesu 10:30; Luka 20:37, 38) Nzambi wala ni kutena kwa kufukununa o athu, mwene wala ni hanji ya kubhanga kiki! Mu kuzwela yalungu ni difukunukinu dyanda bhita ku hádya, o Bibidya yamba: ‘Nzambi, wanda kala ni ngunzu ya kikalakalu kya maku mé!’—Jobe 14:15.

Ilongesu ya makutu yalungu ni difukunukinu

 Makutu: O difukunukinu o kubunda dingi o alma ni mukutu.

 Kidi: O Bibidya ilonga kwila, o alma o muthu mwéne, ki mbandu ya mukutu ibhuluka ku ufwilu wa muthu, kana. (Dimatekenu 2:7; Izekiyele 18:4) Kyenyiki o difukunukinu, ki kyalungu ni kubunda o alma ni mukutu, maji o kubhanga dingi o muthu.

 Makutu: Sayi athu anda kwa fukununa, mu kusuluka anda kwa bwika dingi.

 Kidi: O Bibidya yamba kwila, “oso abhange ima yayibha, anda kwa fukununa phala kwa fundisa.” (Nzwá 5:29) O athu anda kwa fundisa mu ima yabhange kyoso kya afukununa, ki mu ima yabhangele ande dya kufwa, kana. Jezú wambe: “Kithangana kikiza, . . . kya madifundu kwívwa o dízwi dya Mon’â Nzambi. Oso-phe abhana mátwi, anda vutuka ku mwenyu.” (Nzwá 5:25) Oso “abhana mátwi” mba abelesela o ima yadilongo kyoso kya afukununa, anda soneka o majina mâ mu “mukanda wa mwenyu”—Dijingunwinu 20:12, 13.

 Makutu: O muthu a mu fukunununa utambula o mukutu wexile nawu ande dya kufwa.

 Kidi: O muthu kyoso kyafwa, o mukutu wê uvutuka ku mavu, kifwa ujimuka.—Ndongixi 3:19, 20.