Sayi makaza kala ni ukamba wambote mu ukaza wâ amba kwila, muveji dya twana twâ kutunga ni jitata azoka ithangana yoso, okubatula o ukaza kyene okima kyabetakota phala otwana. O izwelu yiyi ilondekesa ihi?

•  Kyebhi kyadivwa otwana kyoso ojitata jâ kyadisenga?

•  Okwila otwana twami andasanguluka se tudisenga?

•  Ihi ingatokala kwijiya yalungu ni kusasa otwana kyoso o ukaza ki ubatuka?

•  Webhi o ukexilu watokala wakubatula omaka mu ukaza?

 Akwa kutokwesa enemulondekesa kwila, okudisenga kwene mubhekela ibhidi yavulu kutwana. Otwana twa jitata adisenge enemulondekesa o idifwa kala:

•   njinda, hele ni kikote kumuxima

•   abhanga ima itena kwaluwalesa mba kuluwalesa akwâ

•   kenemukatula mbote mumilongi yaxikola mba alengamu

•   enemukata lwavulu

 Okudisenga kutena kubhekela ibhidi kutwana nemwene kyakituka adyakimi, ene atena kudivwa kwila kala ni valolo ni kukamba kudyelela ku athu.

 Kyoso kyandakazala, nange mukudibhana ni ibhidi mu ukaza wâ, ene andamesena we kudisenga.

 Kubhitulula: Sayi athu amba kwila okubatula o ukaza kyene okima kyabetakota phala otwana, maj kikyene kyene mubhita. Sayi ngijiye amwixana Penelope Leach wambe kwila, “okubatula o ukaza kutena kukatula okisangusangu kya twana.” a

 Ihi izwela o Bibidya: “Ki bhukale we muthu a xinganeke ngó ima yê-mwène, maji enu oso muxinganeka we ima ya akwenu.”—Filipe 2:4.

 Sayi athu amba kwila kyene. Maji lembalala kwila ojitata kene mudivwa kala kyadivwa otwana. Ojitata abanza kudisenga mukonda amesena kulungulula o ima kumyenyu yâ. Maji kikyene kibanza otwana, ene kamesena kulungulula omyenyu yâ. Ene amesena kwila ojitata akala kumoxi.

 O asoneki adivulu O Inesperado Legado do Divórcio, kyazubha kutokwesa twana twavulu twa jitata adisenge ambe: “Mukidi otwana kene muzwela kwila asanguluka dingi. Muveji dyakiki ene azwela kwila, okudisenga kwa jitata kwaluwalesa dingi.” Odivulu didi dijimbulula we kwila, “otwana akala ni hele yavulu, kadyelela ku athu mukonda o yó a adyelele kanangenena kumoxi.”

 Kubhitulula: Kyoso ojitata kyadisenga, otwana kasanguluka.

 Ihi izwela o Bibidya: ‘O muxima wabudika ni dilamba, ukukutisa ifuba.’—Jisabhu 17:22.

 Sayi jitata adisenge, asota kusasa otwana kala ala hanji kumoxi. Ene abhanga kiki mukuwana o ikalakalu yalungu ni kusasa otwana. Maji kubhonza kyavulu kubhanga kiki. O akwa kutokwesa amba kwila o athu adisenge, ene mubhanga o ima yiyi:

•   kene mubhita ithangana yavulu ni twana

•   kala ni kixinganeku kimoxi kyalungu ni kusasa otwana

•   Ehela otwana kubhanga yoso yamesena, mukonda adivuwa kwila, ala ni kikuma mba abhwila kyavulu

 Otwana twa jitata adisenge, ene mudivwa kwila, kabhingi kuxila o ungana wajitata. Mukonda ojitata kakumbidila o kikutu kyabhange, kyakukala kumoxi. Kyenyiki, otwana atena kuxinganeka: ‘Mukonda dyahi ngatokala kubelesela ojitata jami?’

 Kubhitulula: Kubhonza kyavulu phala ojitata kusasa otwana se ene adisenge. Maji kubhonza dingi phala otwana.

 Ihi izwela o Bibidya: “Kana kuthathamesa anenu, mbebhu ki mu a kwatese usudi.”—Kolose 3:21.

 Kyoso omuthu kyadisenga, kubhonza kyavulu kusuluka mukubhanga o ima ye kumwenyu. Kota wabhange nguzu phala kusuluka ni ukaza we, muveji dyakudisenga. O divulu Em Defesa do Casamento, dizwela: “O kukala ni maka mu ukaza, kikilombolola kwila kimutena kubatula omaka. Sayi makaza kudimatekenu kasangulukile mu ukaza wa, maji mukonda dyanguzu yabhange phala kusuluka kumoxi, lelu asanguluka.” Kiki kilombolola kwila otwana asanguluka dingi se ojitata asuluka kumoxi.

 Maji kiki kikilombolola kwila o muthu katokala kubatula o ukaza. Mu kidi o Bibidya ilondekesa kwila o muthu utena kudisenga se mukwa wate phanda. (Matesu 19:9) Maji o Bibidya izwela we kwila, ‘o njimu uzonga kyambote kyoso kyenda.’ (Jisabhu 14:15) Mukudibhana ni maka mu ukaza, diyala ni muhatu atokala kuxinganeka kyambote mu ima yoso. Ene abhingi kuxinganeka we kyebhi kyandakala otwana se adisenga.

 Mukidi o makaza kabhingi ngó kukolokota, maji atokala kubhanga kima phala kubatula maka mu ukaza. Mu Bibidya mwala itendelesu yambote ikwatekesa omakaza kukala ni idifwa yambote. Kyenyiki ene atena kukala ni ukaza wambote, andazediwa we dingi. Kiki kima kya kudiwana, mukonda Jihova Nzambi wavu o Bibidya, mwene watubhana o ujitu wa ukaza.—Matesu 19:4-6.

 Ihi izwela o Bibidya: “Eme Jihova Nzambi yé, ukulonga kyoso kyawabha.”—Izaya 48:17.