Сәва Марийайе, Раул, Арне у гәләкед дьн, дӧа пʹешкʹешәкә мәхсус ә. Әԝана тʹәхмин дькьн, кӧ дькарьн бь дӧа дьле хԝә Хԝәдерʹа вәкьн, рʹазибуна хԝә жерʹа әʹйан кьн у аликʹарийе жь ԝи бьхԝазьн. Әԝана бь дьл баԝәрийа хԝә ван гьлийед жь Кʹьтеба Пироз тиньн: «Әм ль бәр Хԝәде рʹусьпи нә, чьмки әм заньн, һәгәр әм тьштәки ль гора хԝәстьна ԝи же бьхԝазьн, әԝ дәнге мә дьбьһе» (1 Йуһʹәнна 5:14).

Ле һьнә мәрийарʹа чәтьн ә гьлийе ве рʹезе баԝәр кьн. Стив дәрһәԛа дӧа ӧса дьбежә: «Чахе әз бумә 17 сали, се һәвалед мьн ԛәзийеда мьрьн. Йәк жь ԝана пе әʹрәбе кʹәтә ԛәзийе у мьр, дӧдӧйе дьн жи бәʹреда хәньԛин». Ле Стив чь кьр? Әԝ дьбежә: «Мьн дӧада  жь Хԝәде дьпьрси, кӧ чьма әв һʹәму тьшт ԛәԝьми, ле щаба пьрса хԝә нәдьстанд. Ләма жи әз дьфькьрим, дӧа бадиһәԝа йә». Бәле, жь бо ве йәке кӧ дӧайед гәләк мәрийа бе щаб дьминьн, әԝана дьфькьрьн ԝәки нәлазьм ә дӧа бькьн.

Диса һьнә мәʹни һәнә, жь бо чь жи мәрьв дьфькьрьн ԝәки дӧа али ԝан накә. Мәсәлә, һьнәк дьбежьн кӧ Хԝәде һәр тьшти занә, ләма жи әʹсәйи нинә дәрһәԛа дәрде дьле хԝә ԝирʹа гьли кьн.

Һьнәк жи дьбежьн, кӧ жь бо шашийед ԝани бәре, Хԝәде гӧһ надә дӧайед ԝан. Щени дьбежә: «Проблема мьнә сәрәкә әԝ ә, кӧ әз дьфькьрьм ԝәки бекер ьм. Мьн һьнә тьштед ӧса кьрьнә жь бо чь жи пʹошман бумә у бәрхԝә кʹәтьмә, ләма жи бь ньһерʹандьна мьн әз һежайи ве йәке ниньм, кӧ Хԝәде гӧһ бьдә мьн».

Ле тӧ дәрһәԛа дӧа чь дьфькьри? Дьбә кӧ ньһерʹандьна тә жи мина йа ԝан мәрийа йә. Ԝәки ӧса нә, тӧ дькари жь Кʹьтеба Пироз бәрдьлийе бьстини. Әм дькарьн баԝәр бькьн ԝе йәке, чь кӧ Кʹьтеба Пироз дәрһәԛа дӧа * дьбежә у әԝ ԝе али мә бькә щаба ԝан пьрса бьстиньн:

• Гәло Хԝәде бь рʹасти дӧайед мә дьбьһе?

• Чьма һьнә дӧа бе щаб дьминьн?

• Гәрәке чаԝа дӧа бькьн, ԝәки Хԝәде мә бьбьһе?

• Чаԝа дӧа дькарә али тә бькә?