ХӘМ дькарә мина кәвьрәки гьран сәр дьле мә бә (Мәтʹәлок 12:25). Тӧ ԛә кʹәти ви һʹали? Гәло тӧ щарна дьфькьри кӧ сәбьра тә ида нәмайә? Һәгәр ӧса йә, баԝәр бә ԝәки тӧ тʹәне нини. Гәләк кәс дьлтәнг дьбьн, дькʹәвьнә стресе йан депресйайе, чьмки мьԛати нәфәред хԝә дьбьн, мәрьве хԝәйи незик ӧнда дькьн, йан жи рʹасти тʹәшԛәләкә тʹәбийәте һатьнә. Гәло әм ча дькарьн бәр хәмед хԝә сәбьр кьн? *

Сәрһатийа Даԝьд Пʹадша дькарә али мә бькә. Әԝ жийина хԝәда рʹасти гәләк тәнгасийа дьһат, у әԝ чәнд щара бәр мьрьне бу жи (1 Самуйел 17:34, 35; 18:10, 11). Гәло Даԝьд чаԝа бәр хәмед хԝә сәбьр дькьр? Гәло әм ча дькарьн чʹәʹв бьдьнә ԝи?

Даԝьд щарәкерʹа рʹасти гәләк проблема дьһат. Мәсәлә, бинә бәр чʹәʹве хԝә кӧ гава әԝ жь Шаԝул Пʹадша дьрʹәвийа, йе кӧ дьхԝәст әԝ бькӧшта, чь ԛәԝьми. Чахе Даԝьд тʹәви әскәред хԝә жь шәрʹ вәгәрʹийа, ԝана дит кӧ дьжмьн мал у мьлкʹе ԝан дьзибун, ханийед ԝан шәԝьтандьбун у малбәтед ԝан рʹәвандьбун. Һьнге әԝана «бь дәнгәки бьльнд гьрийан». Сәрда жи, һьнә һәвалед Даԝьд әԝ сущдар дькьрьн у дьхԝәстьн ԝи «бьдьн бәр кәвьра» (1 Самуйел 30:1-6, ИМ). Һьнге Даԝьд рʹасти се проблемед мәзьн һат: Малбәта ԝи ԛәзийеда бу, һәвалед ԝи дьхԝәстьн ԝи бькӧжьн у Шаԝул Пʹадша һе пәй ԝи дькʹәт. Һәла бьфькьрә дәрде Даԝьд чьԛас гьран бу!

Һьнге Даԝьд чь кьр? Әԝи хԝә спартә Йаһоԝа у жь ԝи ԛәԝат станд. Гәло Даԝьд әв йәк чаԝа кьр? Әм заньн кӧ Даԝьд һәртʹьм Йаһоԝарʹа дӧа дькьр, жь ԝи аликʹари дьхԝәст у дьани бира хԝә, кӧ ԝәʹде бәре Йаһоԝа чаԝа али ԝи кьрьбу (1 Самуйел 17:37; Зәбур 18:2, 6). Ижар жи, Даԝьд заньбу кӧ әԝ һʹәԝще рʹебәрийа Йаһоԝа йә, ләма жи әԝи жь Йаһоԝа пьрси һәла әԝ гәрәке чь бькә. Чахе Даԝьд рʹебәрийа Йаһоԝа станд, әԝ дәрберʹа пәй ве рʹебәрийе чу. Ахьрийеда, Йаһоԝа али ԝан кьр, у ԝана малбәтед хԝә у мал у мьлкʹе хԝә пашда вәгәрʹандьн (1 Самуйел 30:7-9, 18, 19). Тә дина хԝә да кӧ Даԝьд кʹижан се тьштед фәрз кьрьн: Әԝи дӧа кьр кӧ Йаһоԝа али ԝи бькә, әԝи ани бира хԝә кӧ Йаһоԝа бәре чаԝа али ԝи кьрьбу, у әԝ дәрберʹа пәй рʹебәрийа Йаһоԝа чу. Гәло әм чаԝа дькарьн чʹәʹв бьдьнә Даԝьд? Дина хԝә бьдә ван се тьштед фәрз.

1. Дӧа бькә: Гава әм рʹасти тәнгасийа тен, әм дькарьн Йаһоԝарʹа дӧа бькьн, ԝәки әԝ али мә бькә у биланийе бьдә мә. Әм дькарьн дьреж дӧа бькьн у һʹәму хәм у дәрдед хԝә ԝирʹа бежьн. Йан жи, һәгәр щара әԝ йәк найе стандьне, әм дькарьн кьн дьле хԝәда дӧа бькьн. Мина Даԝьд, ԝәрә әм жи һәртʹьм ӧса бежьн: «Хӧдан ә зьнаре мьн, кәла у хьлазкьре мьн, Хԝәдейе мьн, ԛәйайе мьн, әз хԝә дьдьмә бьн сийа Ԝи. Әԝ ә мәртʹал, стьруйе хьлазбуне у сьтʹаргәһа мьн» (Зәбур 18:2). Гәло кʹара дӧа бь рʹасти һәйә? Пешәнгәкә бь наве Каһлиа ӧса дьбежә: «Паши дӧакьрьне, әʹдьлайи дькʹәвә дьле мьн. Дӧа али мьн  дькә кӧ әз мина Йаһоԝа бьфькьрьм у һе зедә итʹбарийа хԝә ԝи биньм». Бәле, дӧа пʹешкʹешәкә пʹьрʹ ԛимәт ә, йа кӧ али мә дькә ԝәки әм бәр хәмед хԝә сәбьр кьн.

2. Бинә бира хԝә: Те бира тә кӧ бь сайа аликʹарийа Йаһоԝа, тә чаԝа бәр һьнә тәнгасийа сәбьр кьрьбу? Гава әм тиньн бира хԝә кӧ Йаһоԝа чаԝа пьштгьрийа мә у хьзмәткʹаред хԝәйә бәре кьрийә, ԛәԝата мә зедә дьбә, у әм дьһа зедә хԝә дьсперьн ԝи (Зәбур 18:17-19). Рʹуспики бь наве Щошуа ӧса дьбежә: «Мьн хԝәрʹа башԛә щабед дӧайед хԝә ньвисийә. Әв йәк али мьн дькә ԝәки әз биньм бира хԝә кӧ чаԝа Йаһоԝа әв тьшт дабу мьн, чь кӧ мьнрʹа лазьм бу». Бәле, һәгәр әм сәр тьштед кӧ Йаһоԝа ида бона мә кьрийә, кʹур бьфькьрьн, әме тʹәзәда ԛәԝате бьстиньн ԝәки бәр дьлтәнгийе сәбьр кьн.

3. Пәй рʹебәрийе һәрʹә: Пешийа кӧ әм тьштәки сафи кьн, ԝе баш бә ԝәки әм Хәбәра Хԝәдеда рʹебәрийе бьгәрʹьн (Зәбур 19:7, 11). Сәва кӧ әм рʹьнд фәʹм бькьн кӧ рʹезәк чаԝа һʹале мәва гьредайи йә, лазьм ә әм рʹьнд леколин бькьн. Рʹуспики бь наве Щерод дьбежә: «Бь сайа леколине, әз дьһа баш фәʹм дькьм кӧ фьлан рʹез чь те һʹәсабе у кӧ Йаһоԝа мьнрʹа чь дьбежә. Әв йәк дьле мьн дьгьрә, ԝәки әз пәй рʹебәрийа ԝи һәрʹьм». Һәгәр әм Ньвисаред Пирозда рʹебәрийа Йаһоԝа бьгәрʹьн у пәй ве рʹебәрийе һәрʹьн, ԝе мәрʹа дьһа һеса бә бәр хәмед хԝә сәбьр кьн.

Даԝьд фәʹм дькьр кӧ сәва әԝ бькарьбә бәр хәмед хԝә сәбьр бькә, әԝ һʹәԝще аликʹарийа Йаһоԝа йә. Жь ван готьнед ԝи әшкәрә йә, кӧ әԝи аликʹарийа Йаһоԝа гәләк ԛимәт дькьр: «Пе Тә әз һʹьщуми сәр ордийе дькьм у пе Хԝәдейе хԝә сәр сурарʹа банздьдьм. Хԝәде йә, Йе кӧ мьн ԛәԝат дькә» (Зәбур 18:29, 32). Әм дьбәкә дьфькьрьн ԝәки тәнгасийед мә мина «сур» ьн кӧ найенә алткьрьне, ле бь аликʹарийа Йаһоԝа, әм дькарьн бәр һʹәму тәнгасийа сәбьр кьн. Бәле, һәгәр әм дӧа бькьн ԝәки Йаһоԝа али мә бькә, биньн бира хԝә кӧ әԝи һʹәта ньһа чаԝа али мә кьрийә у дәрберʹа пәй рʹебәрийа ԝи һәрʹьн, әм дькарьн баԝәр бьн кӧ әԝе ԛәԝат у биланийе бьдә мә, ԝәки әм бькарьбьн бәр хәмед хԝә сәбьр кьн!