Әз дь Франсайеда бакʹура-рʹоһʹьлатеда, мьһала Мӧлһауседа һатьмә буйине. Әԝ мьһал бь зӧлмийа хԝә әʹйан бу. Те бира мьн ча заротийа мьнда, ортʹа малбәта тʹьме шәрʹ-дәԝ бу. Дь малбәта мәда, ԛәдьра жьна нәдьгьртьн у мер жи ԝана ньмьз дькьрьн. Әз ӧса һатьмә һинкьрьне, ԝәки жьн гәрәке тʹәне хԝарьне чекә, у мьԛати мер у зарʹа бә.

Зарʹотийа мьн һеса нибу. Чахе әз дәһә сали бум, баве мьн жь бо ичʹкәвәхԝарьне мьр. Пенщ сал дәрбаз бун, бьре мьни мәзьн хԝә кӧшт. Ԝе саледа, мьн пе чʹәʹве хԝә дит, кӧ чаԝа жь бо шәрʹ-дәԝе малбәтәке, мәрьвәк һатә кӧштьне. Әв йәк гәләк ль сәр мьн һʹӧкӧм кьр. Нәфәред малбәта мьн, әз һин кьрьм кӧ чаԝа бьдьмә хәбате кʹер у силһә, сәва кӧ хԝә бьпʹарезьм. Һьнге щаһьлтийа хԝәда, мьн бәдәна хԝә бь татуа нәԛьш кьр у дәстпекьр ичʹке вәхԝьм.

Чахе әз 16 сали бум, мьн һәр рʹож ԝәкә 10-15 бӧтʹьл, бира (ава щәһ) вәдьхԝәр у зутьрәке дәстпекьр наркотике жи бьдьмә хәбате. Сәва кӧ дәйна дадьм, мьн һʹәсьн дьфротьн у дьзи дькьр. 17 салийа хԝәда әз ида кʹәтьм кәле. Бь тʹәмами жь бо дьзикьрьне у шәрʹ-дәԝа, әз 18 щара һатьмә диԝанкьрьне. Жь вана се щара әз кәледа рʹуньштьм у 15 щара жи әз һатьмә синоркьрьне, демәк һьнә тьшт бона мьн ԛәдәхә бун, мәсәлә әз жь бажер нькарьбум дәркʹәтама.

20 салийа хԝәда, һале мьн һе хьраб бу. Мьн рʹоже 20 льб марихуана дькʹьшанд, ӧса жи һеройин у тьштед дьнә беԛануни дьда хәбате. Чәнд щара һьндьк дьма әз бьмьрама жь бо гәләк кʹьшандьне. Мьн дәстпекьр наркотика бьфрошьм у ләма жи бәр дәсте мьн, тʹьме кʹер у силһа һәбун. Щарәке мьн хԝәст мерькәки гӧлә кьм, ле әԝ бьриндар нәбу! Чахе әз 24 сали бум, дийа мьн мьр у һерса мьн һе зедә бу. Мәрьвед кӧ дәрва мьн дьдитьн, дәрбази рʹийа дьн дьбун сәва кӧ жь мьн бьрʹәвьн. Жь бо шәрʹ-дәԝа әз гәләк щара полисханеда бум йан жи нәхԝәшханеда, кʹидәре кӧ бьринед мьн дьдрутьн.

28 салийа хԝәда, әз зәԝьщим. У һәмьки мьн ԛәдьре жьна хԝә нәдьгьрт. Мьн ле беһӧрмәт дькьр у дькʹӧта. Чаԝа щоте-зәԝьщи, мә тʹӧ тьшт тʹәвай нәдькьр. Әз дьфькьрим, кӧ ԝе бәс бә, һәрге әз гәләк тьштед бьһа, кӧ мьн дьзи, ԝерʹа бьдьм. Паше ньшкева тьштәк ԛәԝьми. Жьна мьн дәстпекьр тʹәви Шәʹдед Йаһоԝа Кʹьтеба Пироз һин бә. Һәма паши һинкьрьна хԝәйә пешьн, әԝе щьхарә тʹәрьканд. Әԝе ӧса жи нәхԝәст һьлдә пʹәред мьнә дьзийе у һʹәму тьштед бьһа йе хәмьландьне, пашда да мьн. Әз гәләк һерс кʹәтьм. Әз мьԛабьли ԝе йәке бум, кӧ әԝ Кʹьтеба Пироз һин бә. Чахе мьн щихаре дькʹьшанд,  мьн дуйе щьхаре ль сәр чʹәʹве ԝе бәрдьда. Мьн ӧса жи бәр һʹәмуйа ԛәрфе ԝе дькьр.

Еварәке чахе әз сәрхԝәш бум, мьн агьр мала хԝә хьст. Жьна мьн әз у ԛиза мәйә пенщ сали жь агьр хьлаз кьрьн. Чахе әз һатьм сәр һʹьше хԝә, исафа мьн әз дьчәрчьрандьм. Әз кʹурайа дьле хԝәда дьфькьрим, ԝәки Хԝәде ԝе тʹӧ щара мьн нәбахшинә. Гьлийе кʹәшишәки кʹәтә бира мьн, йе кӧ готьбу ԝәки һʹәму мәрьвед зӧлм ԝе бькʹәвнә щәньме. Һәла һе дохдьра мьнә пʹсихийатри жи готә мьн: «Ида тʹӧ тьшт ԝе али тә нәкә! Тӧ һежайи бахшандьне нини».

Паше әм дәрбази мала де-баве жьна мьн бун. Чахе Шәʹдед Йаһоԝа һатьнә щәм жьна мьн, әз жь ԝана пьрсим, «Хԝәде дькарә һʹәму гӧнед мьн бьбахшинә?» Әԝана жь Кʹьтеба Пироз мьрʹа нишан кьрьн 1 Корьнтʹи 6:9-11. Ве дәре те готьне дәрһәԛа рʹабун-рʹуньштандьна кӧ бәр чʹәʹве Хԝәде рʹәш ә. Ль ԝьр ньвисар ә: «У жь ԝә һьнәк ӧса бун». Әԝ гьли гәләк дьле мьн гьртьн у мьн данә баԝәркьрьне, ԝәки әз дькарьм бемә гӧһастьне. Шәʹдед Йаһоԝа мьрʹа избат кьрьн, кӧ Хԝәде мьн һʹьз дькә у нишан кьрьн 1 Йуһʹәнна 4:8. Әз гәләк һелан бум у паше мьн хԝәст кӧ әԝана тʹәви мьн һʹәфтийе дӧ щара һинкьрьна Кʹьтеба Пироз дәрбаз кьн. Мьн дәстпекьр һәрʹьм сәр щьватед ԝан у мьн Йаһоԝарʹа дӧа дькьр.

Нава мәһәкеда мьн сафи кьр наркотике у ичʹке бьһельм. Зутьрәке әв йәк хьраб ль сәр бәдәна мьн һʹӧкӧм кьр! Евара әз дьчәрчьрим жь бо хәԝнед хоф, сәреше, тәвьзок мьн дьгьрт у гәләк тьштед дьн жи. Ле ԝи ԝәʹдәйда мьн ӧса жи тʹәхмин дькьр, ԝәки Йаһоԝа дәсте мьн дьгьрт у мьн ԛәԝи дькьр. Мьн хԝә мина Паԝлосе шанди тʹәхмин дькьр, кʹижани гот: «Әз һәр тьшти бь сайа ԝи дькарьм, йе кӧ ԛәԝате дьдә мьн» (Филипи 4:13). Ԝәʹдә шунда мьн карьбу кʹьшандьна тʹутʹуне жи бьдьмә сәкьнандьне (2 Корьнтʹи 7:1).

Кʹьтеба Пироз нә кӧ тʹәне аликʹари да мьн сәва кӧ жийина хԝә бькьмә бьн контроле, ле жийина малбәта мьн жи баш бу. Ньһерʹандьна мьн һьндава жьна мьн һатә гӧһастьне. Мьн дәстпекьр һе зедә ԛәдьре ԝе бьгьрьм у гьлийед ӧса бьдьмә хәбате ча «жь кʹәрәма хԝә» у «зәʹф рʹази мә». Әз ӧса жи бумә бавәки баш сәва ԛиза хԝә. Саләк шунда паши һинбуна Кʹьтеба Пироз, мьн чʹәʹв да жьна хԝә, жийина хԝә тʹәсмили Йаһоԝа кьрьм у һатьмә ньхӧмандьне.

Принсипед Кʹьтеба Пироз жийина мьн хԝәй кьрьн. Һәла һе нәфәред мала мьн, йед кӧ нә Шәʹдед Йаһоԝа нә, дьбежьн кӧ әзе зудава бьмьрама жь бо ичʹке у наркотике, йан жи кәсәк шәрʹ-дәԝада ԝе әз бькӧштама.

Бь аликʹарийа һинкьрьнед Кʹьтеба Пироз, жийина мьнә малбәте бь тʹәмами һатә гӧһастьне. Бь ве йәке мьн фәʹм кьр, ԝәки щабдарийа мьн ча мер у бав, чьда нә (Әфәси 5:25; 6:4). Мә ида дәстпекьр һʹәму тьшти тʹәвай бькьн. Ньһа әз фәʹм дькьм кӧ щабдарийа жьне тʹәне чекьрьна хԝарьне нинә. Иро әз ша мә пьштгьрийа ԝе бькьм у тʹәви ԝе хьзмәт кьм ча пешәнге һәртʹьм. Әз рʹуспийе щьвате мә у дь ве йәкеда жьна мьн жи пьштгьрийа мьн дькә.

Һʹьзкьрьн у дьлрʹәмийа Йаһоԝа Хԝәде, гәләк ль сәр жийина мьн һʹӧкӧм кьрьн. Әз тʹьме дьхԝазьм дәрһәԛа хәйсәт-һӧнӧред ԝи гьли кьм ԝан мәрийарʹа, йед кӧ һаләки хьрабда ньн, чаԝа кӧ әз бәре бум. Әз заньм ԝәки ԛәԝата Кʹьтеба Пироз дьгьһиже, сәва кӧ али һʹәмуйа бькә нета жийине бьвиньн у бәхтәԝар бьн. Кʹьтеба Пироз мьн һин кьр, мәрийа һʹьз бькьм у ԛәдьре жьна у мера бьгьрьм. Әԝ һьм али мьн кьр, ԝәки ԛәдьре хԝә жи бьзаньбьм.