Усьв нәщаре Ньсрәте бу у әԝ ча бежи зьрбаве Иса бу. Ле гәло баве Усьв кʹи бу? Мәттайе Ньвискʹар дьбежә ԝәки Аԛуб ә, ле Луԛа дьбежә ԝәки Усьв кӧрʹе «Әʹли» бу. Гәло чьма фьрԛийа ӧса мәзьн һәйә? (Луԛа 3:23; Мәтта 1:16).

Кʹьтеба Мәттада ньвисар ә: «Аԛубрʹа Усьв бу». Вьра гьли-готьне Ибранийа һатийә хәбьтандьне, чь кӧ әʹшкәрә дьдә кʹьфше ԝәки Аԛуб бь рʹасти баве Усьв бу. Демәк Мәтта ньвиси дәрһәԛа рʹькʹьнийата Усьвә рʹаст. Әԝ рʹькʹьнийат жь хәза Даԝьд дьһат, жь кʹижани кӧ тʹәхте пʹадшатийе гәрәке дәрбази Иса буйа, йе кӧ кӧрʹе Усьве нәһәлал бу.

Ле дь кʹьтеба Луԛада дәрһәԛа Усьв ӧса ньвисар ә: «Усьве Әʹли». Хәбәра «Усьве» дькарә бе фәʹмкьрьне ча «зәве ԝи». Анәгори ԝе йәке, дь Луԛа 3:27-да ньвисар ә «Шалтийеле Нәри», ле бь рʹасти рʹезед дьнда те готьне ԝәки баве ԝийи рʹаст, Йәхонйа бу (1 Дирок 3:17; Мәтта 1:12). Шалтийел ԛиза Нәри стандьбу у бу зәве Нәри. Дәрһәԛа Усьв жи әм дькарьн тьштед ԝи щурʹәйи бежьн. Демәк чахе те готьне «Усьве Әʹли», әв те һʹәсабе ԝәки Усьв ԛиза Әʹли, демәк Мәрийәм стандьбу. Жь вьр әʹйан дьбә, ԝәки Луԛа «ль гор бәдәне» дәрһәԛа рʹькʹьнйата Исайә рʹаст гьли дькә, йа кӧ жь алийе дийа ԝи Мәрийәм бу (Рʹомайи 1:3). Кʹьтеба Пироз, дәрһәԛа дӧ рʹькʹьнйатед Иса, зәлал у фәʹмдари гьли дькә.

Бәре һьрийа пез, чаԝа һьрийа дәва у муйе бьзьна, ль Рʹоһьлата Навинда гәләк бәлабуй бу у ԝана сәва чекьрьна пʹәрчә дьданә хәбате. Жь ԝана лапи бәлабуйи пʹәрчед һьри бун. Ӧса жи Кʹьтеба Пирозда гәләк щара те готьне дәрһәԛа пез, мәсәлә чаԝа пәз дьбьрин у дәрһәԛа кʹьнщед һьри (1 Самуйел 25:2; 2 Пʹадшати 3:4; Ибо 31:20). Кʹьтан дьданә хәбате сәва нәԛьшандьне. Әв дь Мьсьреда у Исраеледа шин дьбу (Дәстпебун 41:42; Йешу 2:6). Дьԛәԝьмә Исраелийед бәре пәмбу нәдьчандьн, ле Ньвисаред Пироз дьбежә кӧ дь Фарьседа пәмбу гәләк баш дьданә хәбате (Әстәр 1:6). Пʹәрче һәвьрмьш гәләк ԛимәт бу у тʹәне базьргана дькарьбун жь Рʹоһьлата Дур бьанийана (Әʹйанти 18:11, 12).

Кʹьтебәкеда йа бь наве «Иса у Хәбәра Ԝи» ӧса те готьне: «Һьрийед бь щурʹә-щурʹә рʹәнга һәбун, дәстпебуйи жь рәнга сьпи һʹәта рʹәʹш. Хенщи ԝе йәке һьри гәләк щара рʹәнг дькьрьн. Мәсәлә рʹәнге пʹәрчед ширк, жь щурʹәк кʹезькед бәʹре чедькьрьн. Сәва кӧ рʹәнгед сор, зәʹр, шин у рʹәʹш чекьн, щурʹә-щурʹә шинкайи, кʹок у бәлгед шинкайа дьданә хәбате, ӧса жи кʹезьк.