«Гәрәке мер жьна хԝә һʹьз бькә, чаԝа бәдәна хԝә. Йе кӧ жьна хԝә һʹьз дькә, әԝ хԝә һʹьз дькә. Чьмки бәдәна тʹӧ кәси бәр чʹәʹве ԝи нә рʹәш ә, ле ԝе тʹер дькә у хԝәй дькә» (ӘФӘСИ 5:28, 29).

Мер сәре малбәте йә (Әфәси 5:23). Ле мере баш, сәрт нинә у жь нәфәред хԝә гәләк тьшта дәʹԝа накә. Әԝ жьна хԝә ԛимәт дькә у бона һʹәԝщед ԝейә физики у емосийали хәм дькә. Әԝ ӧса жи алийе хԝәда һәр тьшти дькә ԝәки ле бәхтәԝар кә, нә кӧ тʹьме йа хԝә дькә (Филипи 2:4). Әԝ һеса дьле хԝә жерʹа вәдькә у гава әԝ хәбәр дьдә, гӧһ дьдә ԝе. Әԝ дьле ԝе наешинә, һьндава ԝеда берʹәʹм нинә у зийане надә ԝе, нә жь алийе физики нә жи емосийали (Колоси 3:19).

«Жьн жи ԛәдьре мере хԝә бьгьрә» (ӘФӘСИ 5:33, ДТʹ).

Гава жьн ԛәдьре мере хԝә дьгьрә у пьштгьрийа сафикьрьнед ԝи дькә, әԝ әʹдьлайа малбәта хԝә хԝәй дькә. Һәгәр мер шаши жи дькә, әԝ ԝи ньмьз накә, ле диса жи һьндава ԝида бь нәрми у бь ԛәдьр ә (1 Пәтрус 3:4). Чахе әԝ дьхԝазә дәрһәԛа проблемәке тʹәви ԝи хәбәр дә, әԝ ԝәхтәки баш бона ве йәке дьжберә у бь ԛәдьр тʹәви ԝи хәбәр дьдә (Ԝаиз 3:7).

«Мер . . . хԝә ль жьна хԝә бьгьрә у бьбьнә бәдәнәк» (ДӘСТПЕБУН 2:24).

Гава жьн у мер һәврʹа дьзәԝьщьн, һәләԛәтийа ԝан ортʹа һәвда дьһа незик дьбә. Ләма жи жьн-мер гәрәке жь алийе хԝәда һәр тьшти бькьн, ԝәки зәԝаща ԝан ԛәԝи бьминә. Бона ве йәке әԝана гәрәке бь һʹәлали тʹәви һәв хәбәр дьн у ԛәнщи һәвдӧрʹа бькьн. Әԝана гәрәке һәврʹа амьн бьн у тʹәви тʹӧ кәси нәкʹәвьнә һәләԛәтийа сексуали. Нәамьни әԝ тьштәки берʹәʹмти йә. Әԝ малбәтеда итʹбари һьлдьшинә у нәфәра жь һәв дьԛәтинә (Ибрани 13:4).

«[Зарʹ] зарʹотийеда рʹийа рʹаст һин бькә, гава әԝ кал бә, иди әԝе жь ԝе нәкʹәвә» (МӘТʹӘЛОК 22:6).

Хԝәде щабдари дайә де-бава ԝәки зарʹед хԝә һин кьн у ширәт кьн. Әԝ те һʹәсабе кӧ әԝана гәрәке рʹабун-рʹуньштьна баш зарʹед хԝә һин кьн у хԝәха жи ве йәкеда бьбьнә мәсәла баш (Ԛануна Дӧщари 6:6, 7). Гава зарʹ щарна нәʹсйе дькә у нәгӧһдар ә, де у баве билан гәләк сәрт һерса хԝә сәр ԝида нарʹежиньн. Дәԝсе әԝ «бьһистьнеда  сәрхԝә» нә, «хәбәрдан у һерскʹәтьнеда» жи ләз накʹәвьн (Аԛуб 1:19). Һәгәр де йан бав сафи дькә зарʹе щәза кә, әԝ бь һʹьзкьрьн ве йәке дькә, нә кӧ бь һерсе.

«Зарʹно . . . гӧрʹа де у баве хԝәда бьн . . . ‹Ԛәдьре де у баве хԝә бьгьрә›» (ӘФӘСИ 6:1, 2).

Зарʹ гәрәке гӧрʹа де-баве хԝәда бьн у ԛәдьре ԝан бьгьрьн. Гава зарʹ ԛәдьре де-баве хԝә дьгьрьн, әԝана нәфәред хԝә ша дькьн у малбәтеда әʹдьлайе хԝәй дькьн. Зарʹед мәзьн бь ве йәке ԛәдьре де-баве хԝә дьгьрьн кӧ һәр тьшти бона һʹалхԝәшийа ԝан дькьн. Мәсәлә, гава лазьм ә малда тьшта чекьн, йан жи алийе пʹәрада кʹомәке бьдьнә ԝан (1 Тимотʹейо 5:3, 4).