«Һәгәр нәпʹак мина шинайе бьгьһижьн, һʹәмуйед нәһәԛийе дькьн, гӧл дьн, йәк ә әԝе һʹәта-һʹәтайе гәвәр бьн» (ЗӘБУР 92:7).

Чаԝа әм готара пешийа веда пеһʹәсийан, иро чьԛас дьчә һʹале дьнйайе дьһа хьраб дьбә. Ле әм гәрәке әʹщебмайи нәминьн, чьмки Кʹьтеба Пирозда 2 Тимотʹейо 3:1-5-да һатьбу пʹехәмбәртикьрьне кӧ «рʹожед ахьрийеда» мәрьв ԝе хьрабийеда пешда һәрʹьн. Ле рʹожед ахьрийа чь? Рʹожед ахьрийе йа ве дьнйа зӧлм у мәрьвед хьраб. Зутьрәке Хԝәде ԝе ԛьрʹа ԝан мәрьва бинә, йед кӧ нахԝазьн бенә гӧһастьне у хьрабийе бьһельн. Паше, тʹәне мәрьвед ԛәнщ, йед кӧ гӧрʹа Хԝәде дькьн, ԝе хьлаз бьн у сәр әʹрде бьжин. «Рʹасте ль әʹрде ԝар бьн у һәр-һәйе ԝе сәр бьжин» (Зәбур 37:29).

«Хԝәдейе әʹдьлайийе зутьрәке ԝе сәре Мирещьн бьне ньгед ԝәда бьпʹәлехә» (РʹОМАЙИ 16:20).

Гава Мире-щьна, щьнед ԝи у һʹәму мәрьвед хьраб ԛьрʹ бьн, әʹрд ԝе бь әʹдьлайе тʹьжә  бә. Әʹфьрандаре мә соз дьдә: «Йе кӧ ԝан бьтьрсинә тʹӧнә бә» (Миха 4:4).

«Коне Хԝәде нава мәрьвада йә! . . . Әԝе жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун» (ӘʹЙАНТИ 21:3, 4).

Кӧл-дәрд у нәхԝәши ԝе кʹӧта бьн, чьмки Хԝәде ԝе һʹәму зийан кӧ Мире-щьна, Адәм, Һеԝа у гӧнәкʹарийа мә мәрʹа анийә, бьдә һьлдане. Һәла һе мьрьн жи ԝе ида «тʹӧнәбә». Мәрьвед кӧ Хԝәде һʹьз дькьн у гӧрʹа ԝи дькьн, ԝе һʹәта-һʹәтайе бьжин. Ле әԝана ԝе кʹидәре бьжин?

«Ԝе чол у дәшта зьһа ша бьбә, ԝе бәрʹи дьлгәш бьбә, ԝәк гӧла кӧлилк бьдә» (ИШАЙА 35:1, ИМ).

Гава Хԝәде кʹока хьраба бинә, әʹрд ԝе гәш у шин бә! Әʹрд ԝе бьбә щики хԝәш, бь бахчед бәдәԝ у бәред әʹрде ԝе тʹер-тʹьжә бьн (Зәбур 72:16). Ава окйануса, гола у чʹәма ԝе зәлал у тʹәмьз бьн, у бь щурʹә-щурʹә мәʹсийа тʹьжә бьн. Һәла һе гьлийед «хьрабкьрьна тʹәбийәте» йан жи «ԛьрежайи» дьбәкә әме ида бир кьн жи! Мәрьв ԝе хԝәха хԝәрʹа мала ава бькьн у теда бьжин. У тʹӧ щар ида мәрьвед бемал, бьрʹчи у кʹәсиб ԝе тʹӧнә бьн (Ишайа 65:21, 22).

«Һʹәму . . . жь мьрьне рʹабьн» (КʹАРЕД ШАНДИЙА 24:15).

Һун дьхԝазьн диса мәрьвед хԝәйи дәлал кӧ мьрьнә, бьвиньн? Хԝәдейе һьмзор ԝе ԝана вәгәрʹинә жийине, демәк ԝе жь мьрьне рʹакә, бона жийина Щьнәта сәр әʹрде. Һуне ԝана нас кьн, у әԝана жи ԝе ԝә нас кьн. Бьдьнә бәр чʹәʹве хԝә, кӧ һьнге шабуна ньге ԝә ԝе әʹрд нәгьрә! Ле чьрʹа әм гәрәке ве һевийеда дӧдьли нәбьн? Чьмки Кʹьтеба Пирозда һәнә мәсәлед ԝан мәрьва у зарʹа, йед кӧ жь мьрьне рʹабун у вәгәрʹийанә щәм нәфәред хԝә. Хенщи ве йәке, Иса гәләк щара мьрийа жь мьрьне бәр чʹәʹве гәләк мәрьва сах дькьр (Луԛа 8:49-56; Йуһʹәнна 11:11-14, 38-44).