ПРИНСИПА КʹЬТЕБА ПИРОЗ: «Тʹьвдира мәрьве хирәт әʹсә кʹаре тинә, ле һәр кәсе ләз кʹәти әʹсә зьраре тинә» (Мәтʹәлок 21:5).

ӘВ ЧЬ ТЕ ҺʹӘСАБЕ: Тӧ гәрәке пешда сафи ки кӧ ча пʹәра хәрщ ки у хԝәрʹа бәрнаме чеки. Пәй ве бәрнәма хԝә һәрʹә. Рʹьнд бьфькьрә, бир нәкә, ԝәки тӧ нькари һʹәму тьштед кӧ дьхԝази, бькʹьри. Ләма жи пʹәре хԝә бь билани хәрщ кә.

ТӦ ЧЬ ДЬКАРИ БЬКИ:

• Ль гора сафикьрьна хԝә бькә. Хԝәрʹа бьнвисә һʹәму тьштед кӧ дьхԝази бькʹьрʹи, у чьԛас пʹәрә сәр чь хәрщ ки. Һәрге тә зәʹф пʹәрә тьштәкида хәрщ кьрийә ԝе баш бә йед дьнда һʹәвәки хәрщед хԝә кем ки. Мәсәлә һәрге тʹә зәʹф пʹәрә хәрщ кьрийә сәр бензине ԝе баш бә пʹәре бона һесабуне кем ки.

• Нәкʹәвә бьн дәйна. Чьԛас дькари нәкʹәвә бьн дәйна. Ԝе баш бә һьнә пʹәре хԝә пашхи сәва тьштед лазьм бькʹьрʹи. Һәрге тӧ картед кредите дьди хәбате, бьхәбьтә кӧ һʹәта хьлазийа мәһе дәйне хԝә дади, сәва кӧ зедә сәләфа нәди. Һәрге дәйне тә һәнә, хԝәрʹа бьньвисә чь щурʹәйи әви дәйни дади, у ӧса бькә ча тә ньвисийә.

  Ль гора леколинәке әʹйан бу, ԝәки әԝед кӧ картед кредите дьдьн хәбате бь рʹасти дьһа зәʹф пʹәра хәрщ дькьн. Ләма жи һәрге тӧ карта кредите дьди хәбате, бь билани бьдә хәбате.

ПРИНСИПА КʹЬТЕБА ПИРОЗ: «Хԝәрʹанәдити ԝәʹдәда әʹрде рʹанакә, нандьрунеда ԝе ле бьгәрʹә, ле пʹәйда нәкә» (Мәтʹәлок 20:4).

ӘВ ЧЬ ТЕ ҺʹӘСАБЕ: Тʹәмбәли дькарә бәрбь кʹәсибийе бьвә. Хәбатһʹьз бә, бь билани пʹәре хԝә хәрщ кә, ԝәки бькарьби ԛазанщ ки ԝан тьшта, чь кӧ тәрʹа лазьм ьн.

ТӦ ЧЬ ДЬКАРИ БЬКИ:

• Бь дьл бьхәбьтә. Гава тӧ бь дьл у хирәт дьхәбьти, мәзьне хәбата тә ԝе тʹәхмин кә у хәбата тә ԛимәт кә.

• Дьлпʹак бә. Жь мәзне хәбата хԝә пʹәра нәдьзә. Ԛәлпийа тә ԝе наве тә хьраб кә у ахьрийе ԝе тәрʹа чәтьн бә хԝәрʹа хәбате бьвини.

• Тьма нибә. Һәрге тӧ дьхәбьти кӧ гәләк пʹәра чеки, ахьрийе сьһʹәт-ԛәԝата тә ԝе зьраре кʹәвә у һәләԛәтийа тә тʹәви мәрийа ԝе хьраб бә. Бир нәкә ԝәки пʹәрә жийина мәда щийе фәрз нагьрә.

ԜӘʹДЕ ХԜӘ У ПʹӘРЕ ХԜӘ БАДИҺӘԜА ХӘРЩ НӘКӘ.

«Чьмки йе вәхԝари у пʹьрʹхӧри бәләнгаз дьбьн у кʹьнщед пʹоньжийа дьпʹьзьньн» (МӘТʹӘЛОК 23:21).

ЗЕДӘ БӘРХԜӘ НӘКʹӘВӘ.

«Бона ә′мьре хԝә хәма нәкьн, кӧ һуне чь бьхԝьн у чь вәхԝьн, нә жи бона бәдәна хԝә, кӧ һуне чь ль хԝә кьн» (МӘТТА 6:25).

ЧʹӘʹВНӘБАРИЙЕ НӘКӘ.

«Мәрьве чʹәʹвбьрʹчи дькә кӧ дәԝләти бә, ле ньзанә кӧ бәләнгазийе сәрда бе» (МӘТʹӘЛОК 28:22).