Әз жь бьчʹуктайеда тʹәбийәте һʹьз дькьм. Малбәта мә тʹьме жь шәһәр дәрдькʹәт, чьмки мешә у голед бәдәԝ, кʹижан кӧ незики шәһәре мә Йуваскйул, Финләнда Навәнд бун, мә хԝәш дьһатьн. Әз һʹәйԝана жи гәләк һʹьз дькьм. Бьчʹуктайа хԝәда, чахе мьн кучʹьк у пьшик дьдитьм, мьн гәләк дьхԝәст ԝана һʹәмез кьм! Гава әз мәзьн бум у мьн дьдит, ԝәки гәләк мәрьв һьндава һʹәйԝанада хьраб ьн, дьле мьн дьшәԝьти. Ԝәʹдә шунда әз тʹәви тʹәшкиләтәке бумә йәк, йа кӧ һʹәйԝан дьпарастьн. У ԝедәре әз рʹасти мәрьвед ӧса һатьм, ньһерʹандьна кʹижана мина йа мьн бу.

Мә һәр тьшт дькьр, ԝәки һʹәйԝана бьпарезьн. Мәсәлә, мә информасийа дәрһәԛа һʹәйԝана бәла дькьр у бь кʹом дәрдькʹәтьн дәрва, сәва кӧ фьротана тьштед жь чʹәрм чекьри, бьдьнә сәкьнандьне у лабораторийада сәр һʹәйԝана щерʹьбандьна нәкьн. Мә һәла һе тʹәшкиләта хԝә жи саз кьр, кӧ һʹәйԝана бьпарезьн. Әм бона ве йәке мьԛабьли мәрийа дәрдькʹәтьн, ләма жи гәләк щара проблемед мә тʹәви һʹӧкӧмәтийе чедьбун. Чәнд щара әз һатьмә гьртьне у диԝанкьрьне.

Әз нә тʹәне дәрһәԛа һʹәйԝана хәмгин дьбум, ле жь бо проблемед дьнйайе жи. Ԝәʹдә шунда әз бумә әндәме чәнд тʹәшкиләта. Һьнәк жь ԝан әв бун: «Рехьстьна Әфуйе йа Навнәтәԝәйи» у «Аштийа Кʹәск». Мьн педа ԛәԝата хԝә дьда ве йәке, кӧ һʹәму алийава пьштгьрийа ԝан бькьм. Мьн ӧса жи мафе мәрьвед кʹәсиб, бьрчи у бәләнгаз, дьпараст.

Ле һеди-һеди мьн фәʹм кьр, кӧ жь ԛәԝата мьн дәр ә әве дьнйайе бьгӧһезьм. Рʹаст ә һьнә тʹәшкиләтед ви щурʹәйи дькарьбун проблемед бьчʹук сафи кьрана, ле проблемед мәзьн һе чәтьн дьбун. Мьнрʹа ӧса дьһатә кʹьфше, те бежи зӧлмийе тʹәмамийа дьнйайе зәфти хԝә кьрийә, ӧ хәма кәсәки нинә. Мьн тʹәхмин дькьр, кӧ ида нькарьм тьштәки бькьм.

Чахе мьн тʹәхмин дькьр кӧ жь ԛәԝата мьн дәр ә тьштәки бькьм, мьн дәстпекьр дәрһәԛа Хԝәде у Кʹьтеба Пироз бьфькьрьм. Ԝәхтәки Шәʹдед Йаһоԝа тʹәви мьн һинбуна Кʹьтеба Пироз дәрбаз дькьрьн. Һәмьки мьн хԝәш дьһат, кӧ әԝана һьндава мьнда ԛәнщ бун у бона мьн хәм дькьрьн, ле ԝи чахи әз һазьр нибум тьштәки жийина хԝәда бьгӧһезьм. Ле ижар һәр тьшт щурʹәки майин бу.

Мьн Кʹьтеба Пирозә хԝә дит у дәстпекьр бьхуньм. Әв ча бежи мәлһәм бу бона дьле мьни бьриндар. Мьн дит, кӧ Кʹьтеба Пироз һин дькә, ԝәки һьндава һʹәйԝанада ԛәнщ бьн. Мәсәлә, Мәтʹәлок 12:10 дьбежә, кӧ «дьле йе рʹаст сәр һʹәйԝане ԝи дьшәԝьтә». Мьн ӧса жи фәʹм кьр, ԝәки Хԝәде проблемед инсанәтеда нәһәԛ нинә. Проблем дьһа зедә дьбьн, чьмки һʹәчʹи зәʹф мәрьв бе рʹебәрийа Хԝәде дьжин. Чахе әз дәрһәԛа һʹьзкьрьн у сәбьра Йаһоԝа пеһʹәсийам, әв һʹӧнӧред Йаһоԝа гәләк дьле мьн гьрт (Зәбур 103:8-14).

Һәма ԝи чахи мьн купона бона сьфәрәшкьрьна кʹьтеба «Чь Һин Дькә Кʹьтеба Пироз?» дит. Мьн дәрберʹа әв купон тʹьжә кьр, кӧ әве кʹьтебе дьхԝазьм у шанд. Зутьрәке дӧ Шәʹдед Йаһоԝа һатьн щәм мьн у тʹәви мьн һинбуна Кʹьтеба Пироз дәстпекьрьн. Мьн ӧса жи дәстпекьр һәрʹьм сәр щьвата Ода Щьватада. Бь сайа ве йәке, рʹастийа Кʹьтеба Пироз кʹур дьле мьнда рʹуньшт.

Кʹьтеба Пироз али мьн кьр жийина хԝә бьгӧһезьм. Мьн тʹәрка щьхаре у ичʹкәвәхԝарьне да. Һьм жи мьн кʹьнщхԝәкьрьн у хәбәрдана хԝә гӧһаст, у ӧса жи ньһерʹандьна хԝә һьндава һʹӧкӧмәтийе (Рʹомайи 13:1). Бәре бона мьн тʹӧ синор тʹӧнә бун у мьн бь жийинәкә нәщайиз дьжит, ле мьн жийина хԝә гӧһаст.

Мьнрʹа дьһа чәтьн бу, ньһерʹандьна хԝә һьндава һьнә тʹәшкиләта бьгӧһезьм кʹидәреда мьн кʹар дькьр. Щарәкерʹа щәм мьн нәһатә стандьне. Пешийе мьн тʹьре, кӧ һәрге әз тʹәрка ԝан тʹәшкиләта бьдьм, әзе бьбьм нәмам. Ле ԝәʹдә шунда мьн фәʹм кьр, ԝәки тʹәне Пʹадшатийа Хԝәде дькарә әʹдьлайе у һевийа рʹаст бьдә инсанәте. Ләма жи мьн сафи кьр һʹәму ԛәԝата хԝә бьдьмә ԝе йәке, кӧ пьштгьрийа ве Пʹадшатийе бькьм у али мәрийа бькьм, кӧ дәрһәԛа ԝи пебьһʹәсьн (Мәтта 6:33).

Әз активист бум, у ләма жи мьн мәрьв ль сәр дӧ пʹара пʹарәвәдькьр, йед баш у йед хьраб. У әз һазьр бум мьԛабьли ԝан мәрийа шәрʹ кьм, кʹижан кӧ ль гора ньһерʹандьна мьн хьраб бун. Ле бь сайа Кʹьтеба Пироз әз ида мәрийа нәфрʹәт накьм. Дәԝсе әз дьхәбьтьм кӧ һʹьзкьрьна Мәсиһити һьндава һʹәмуйада бьдьмә кʹьфше (Мәтта 5:44). Һʹьзкьрьна мьн һьндава ԝан ве йәкеда те кʹьфше, кӧ әз мьзгинийа хере дәрһәԛа Пʹадшатийа Хԝәде бәла дькьм. Чахе әз дьвиньм кӧ әв шьхӧл әʹдьлайи, шабун у һевийа рʹаст дьдә мәрийа, әз гәләк дьлша дьбьм.

Һьнгева әз һин бум итʹбарийа хԝә Йаһоԝа биньм у мьн рʹьһʹәтийа дьл ԛазанщ кьр. Әз баԝәр ьм, кӧ Әʹфьрандаре мә ԝе нәһелә, ԝәки һәргав ԛәрфе хԝә мәрийа у һʹәйԝана бькьн, у кӧ әʹрде мәйи бәдәԝ, бе кʹӧтакьрьне. Һьм жи әԝ зийана кӧ мәрьва у әʹрде стандьнә, Хԝәде ԝе бь сайа Пʹадшатийа хԝә бьдә һьлдане (Ишайа 11:1-9). Әз шабунәкә гәләк мәзьн дьстиньм кӧ рʹастийа Кʹьтеба Пироз заньм у дькарьм али мәрийа бькьм, ԝәки баԝәрийа хԝә Хԝәде биньн. Ньһа әз ида нафькьрьм, кӧ гәрәке дьнйайе бьгӧһезьм.