Бьдә бәр чʹәʹве хԝә, кӧ бав тʹәви кӧрʹе хԝәйи һʹәфт сали хәбәр дьдә. Әԝ дьбежә: «Гәләк ԝәхт пешда Хԝәде әʹрд әʹфьрандийә ӧса жи һәр тьштед сәр әʹрде. Әԝи тәʹв, һив у стәйрк әʹфьрандьнә. Кӧрʹ сәр гьлийе баве хԝә дьфькьрә у паше дьбежә: «Баво, ле кʹи Хԝәде әʹфьрандийә?»

Бав дьбежә: «Тʹӧ кәси Хԝәде нәәʹфьрандийә. Әԝ тʹьме һәбуйә». Зарʹ жь ве шьровәкьрьне рʹази дьбә. Ле чахе зарʹ мәзьн дьбә, әԝ диса ве пьрсе дьдә баве хԝә, чьмки ԝирʹа чәтьн ә фәʹм бькә: Чаԝа кәсәк дькарә тʹьме һәбә у дәстпека ԝи жи тʹӧнә бә? Нә һәла һе дәстпека гәрдуне жи һәйә? Кӧрʹ әʹщебмайи дьпьрсә: «Хԝәде жь кʹӧ һатийә?»

Кʹьтеба Пироз чаԝа щаба ԝан пьрса дьдә? Дькарьн бежьн әԝ ӧса шьровәдькә, чаԝа кӧ бав кӧрʹе хԝәрʹа гот. Муса пʹехәмбәр ньвиси: «Йа Хӧдан, . . . Бәри буйина чʹийа, бәри әʹфьрандьна әʹрде у тʹопа дьне, жь һәр-һәйе һʹәта-һʹәтайе, Тӧ Хԝәде йи» (Зәбур 90:1, 2). Ле Ишайа пʹехәмбәр гот: «Ма тә феʹм нәкьр? Ма тә нәбьһист? Хԝәдайе абадин, ХӦДАН, йе кӧ ничʹькед дьне әʹфьрандийә» (Ишайа 40:28). Анәгори ве йәке, нәʹма Щьһудада те готьне, ԝәки Хԝәде «бәри һәр-һәйе» һәбуйә (Щьһуда 25).

Әԝ рʹез нишан дькьн, ԝәки Хԝәде «Пʹадшайе һʹәта-һʹәтайейи нәмьри» йә (1 Тимотʹейо 1:17). Әв те һʹәсабе, ԝәки Хԝәде тʹьме һәбуйә у ԝе тʹьме һәбә (Әʹйанти 1:8). Демәк Хԝәдайе Һьмзор бь ве йәке щӧдә дьбә, кӧ дәстпека ԝи тʹӧнә.

Чьрʹа ӧса чәтьн ә әве йәке фәʹм бькьн? Чьмки әʹмьре мә кьн ә у ньһерʹандьна мә дәрһәԛа ԝәʹдә жь ньһерʹандьна Йаһоԝа лап щӧдә дьбә. Хԝәде Хԝәдайе һʹәта-һʹәтайе йә, у ләма жи сәва ԝи рʹожәк мина һʹәзар сали йә (2 Пәтрус 3:8). Бәʹса хәбәре: кӧлийе кӧ ԝәкә 50 рʹожа дьжи, гәло дькарә фәʹм бькә кӧ чь те һʹәсабе 70 йан 80 сал бьжин? Һәмьки на! Кʹьтеба Пироз шьровәдькә ԝәки әм һьмбәри Әʹфьрандаре Һьмзор, мина кӧлийа нә. У фәʹме мә жь фәʹме Хԝәде лап щӧдә дьбә (Ишайа 40:22; 55:8, 9). Ләма жи фәʹмдари йә, кӧ чьма мәрьв нькарьн һʹәта хьлазийе ньһерʹандьна Йаһоԝа йа сәр һьнә пьрса, фәʹм бькьн.

Рʹаст ә мәрʹа чәтьн ә фәʹм бькьн, ԝәки Хԝәде тʹьме һәбуйә, ле әв йәк логики йә. Мәсәлә, һәрге Хԝәде бь дәсте кәсәки бьһата әʹфьрандьне, демәк әԝ кәс ԝе тʹьме һәбуйа у Әʹфьрандар буйа. Ле Кʹьтеба Пирозда те готьне, кӧ тʹәне Йаһоԝа «һәр тьшт әʹфьрандьн» (Әʹйанти 4:11). Хенщи ԝе йәке, әм заньн, ԝәки һәбу ԝәʹдә чахе гәрдуна мә тʹӧнә бу (Дәстпебун 1:1, 2). Гәло гәрдун чаԝа чебу? Демәк пешийе гәрәке кәсәк һәбуйа, ԝәки гәрдун чекьра. Әԝ ӧса жи гәрәке һе пешийа һәр тьшти һәбуйа у һәла һе жи пешийа әʹфьринед ӧса сәрԝахт, чаԝа Кӧрʹе тайе-тʹәне у мәләк (Ибо 38:4, 7; Колоси 1:15). Әʹйан ә, ԝәки ԝәхтәки әԝ тʹәне бу. Әԝ бь дәсте тʹӧ кәси нәһатьбу әʹфьрандьне, чьмки һьнге тʹӧ кәс тʹӧнә бу.

Гәрдун у жийина мә дьдьнә кʹьфше, ԝәки Хԝәдайе һәрһәйи һәйә. Демәк әԝе кӧ дәстпекьр һʹиме гәрдуне дайнә у ԛанун кʹьфш кьрьн, гәрәке тʹьме һәбуйа. Бәле, тʹәне әԝи дькарьбу жийин бьда (Ибо 33:4).