Зине: Рʹож баш Зәре. Әз гәләк ша бун чахе мьн тӧ дити ль сәр Евара Биранина Иса. a Тӧ чь дьшьрмиш дьби дәрһәԛа ве щьвате, тә хԝәш һат?

Зәре: Әре мьн хԝәш һат. Ле ԝедәре чь дьһатә готьне һʹәчʹи зәʹф мьн фәʹм нәкьр. Әз заньм ԝәки мәрьв щәжьна буйина Иса дәрбаз дькьн, у ӧса жи сахбуна ԝи ԝәʹде пасхе, ле мьн тʹӧ щар нәбьһистийә кӧ кәсәк рʹожа мьрьна ԝи дәрбаз кә.

Зине: Әз тʹәви тә ԛайил ьм, чьмки тʹәмамийа дьнйайеда щәжьна сала тʹәзә у пасха бәлабуйи нә. Ле Шәʹдед Йаһоԝа һʹәсаб дькьн, ԝәки гәләк фәрз ә кӧ дәрбаз кьн биранина мьрьна Иса. Һәрге ԝәʹде тә һәйә, әзе бь дьл у щан тәрʹа шьровәкьм мәʹнийа ԝе йәке.

Зәре: Бәле, кʹәрәм кә.

Зине: Әз тәрʹа кьн бежьм. Шәʹдед Йаһоԝа рʹожа мьрьна Иса дәрбаз дькьн, чьмки Иса хԝәха әԝ тʹәми да шагьртед хԝә. Ԝәрә әм бьньһерʹьн чь ԛәԝьми шәва пешийа мьрьна Иса. Тә ԛә бьһистийә дәрһәԛа ԝе шива мәхсус кʹижан кӧ Иса тʹәви шагьртед хԝә дәрбаз кьр?

Зәре: Тӧ дәрһәԛа Шива Пашьнә мәхсус дьбежи?

Зине: Әре. Әԝ ӧса жи те навкьрьне ча Шива Хӧдан. Сәр ԝе шиве Иса тʹәмийед конкрет да шагьртед хԝә. Тӧ дькари бьхуни Луԛа 22:19 кʹидәре кӧ гьлийед Иса ньвисар ьн?

Зәре: Әре әзе бьхуньм. «У нан һьлда шькьри да, кәркьр да ԝан у гот: ‹Әва бәдәна мьн ә, кӧ бона ԝә те дайине. Ве йәке бона биранина мьн бькьн›».

Зине: Зәʹф рʹази мә. Һәла бьньһерʹә хьлазийа ве рʹезе Иса чь тʹәмийе дьдә: «Ве йәке бона биранина мьн бькьн». Пешийа кӧ тʹәми бьда шагьртед хԝә, ԝәки әԝе йәке бира хԝәда хԝәй кьн, әԝи зәлал ԝанарʹа шьровәкьр кӧ чь гәрәке бира хԝәда хԝәй кьн. Әԝи гот ԝәки ԝе әʹмьре хԝә бона пәйчуйед хԝә бьдә. Әԝ фькьр ӧса жи дь Мәтта 20:28-да те кʹьфше. Ль ԝьр те готьне: «Чаԝа кӧ Кӧрʹе Инсан нәһатийә кӧ жерʹа бәрдәстийе бькьн, ле ԝәки әԝ хԝәха бәрдәстийе бькә у әʹмьре хԝә бьдә, кӧ гәләка бькʹьрʹә». Әԝа чәнд мәʹни нә кӧ чьрʹа Шәʹдед Йаһоԝа тʹоп дьбьн у дәрбаз дькьн Евара Биранина мьрьна Иса, ԝәки биньнә бира хԝә кӧ Иса бу ԛӧрбан. Мьрьна ԝи, дькарә әʹмьр бьдә ԝан йед кӧ гӧрʹа ԝида ньн.

Зәре: Мьн жи бьһистийә ԝәки мьрьна Иса дькарә әʹмьр бьдә мә, ле рʹаст бежьм мьн фәʹм нәдькьр ча мьрьна Иса дькарә әʹмьр бьдә мә.

Зине: Рʹаст ә әԝ йәк гәләкарʹа нәфәʹмдари йә, чьмки тʹемайа дәрһәԛа ԛӧрбанбуна Иса чәтьн ә. Ле әԝ һинкьрьна жь Хԝәдейә лапә фәрз ә. Ԝәʹде тә һәйә әм дәрһәԛа ԝе йәке жи хәбәр дьн?

Зәре: Бәле, чәнд дәԛе мьн һәйә.

Зине: Зәʹф баш. Мьн һәма тʹәзә дәрһәԛа ԝе тʹемайе леколин кьрийә, у әзе тәрʹа һеса шьровәкьм.

Зәре: Кʹәрәм кә.

Зине: Сәва әм фәʹм бькьн чьрʹа кʹьрʹин лазьм бу, ԝәрә әм биньнә бира хԝә, чь ԛәԝьми бахче Адәнеда чахе Адәм у Һеԝайе гӧнә кьрьн. Ве йәкеда Рʹомайи 6:23 ԝе али мә бькә. Кʹәрәма хԝә те бьхуни?

Зәре: Бәле әзе бьхуньм: «Чьмки маше гӧнә мьрьн ә, ле пʹешкʹеша Хԝәде жийина һʹәтаһʹәтайе йә, бь сайа Хӧдане мә Мәсиһ Иса».

Зине: Зәʹф рʹази мә. Ньһа ԝәрә әм ԝан гьлийа шьровәкьн. Һәла дина хԝә бьдә ван гьлийа: «Маше гӧнә мьрьн ә». Әԝа әв ԛәйдә йә чь кӧ Хԝәде дәстпебуна тʹәрихийа инсанәтеда кʹьфш кьрьбу, маше йан жи һәԛе гӧнә әԝ һәйә мьрьн. Сәре-серида, мәрьв бе гӧнә бун. Адәм у Һеԝа ԛәданди бун, ләма жи зарʹед ԝан гәрәке бе гӧнә бьбуна. Әԝ те һʹәсабе кӧ мьрьн жи гәрәке тʹӧнәбуйа. Адәм у Һеԝа, ӧса жи һʹәму рʹькʹьнйата ԝан гәрәке һʹәта-һʹәтайе бәхтәԝар бьжитана. Ле ча әм дьвиньн, әԝ һʹәму тьшт ӧса нә ԛәԝьми.

Зәре: Чьмки, Адәм у Һеԝайе дара ԛәдәхәкьри хԝарьн әре?

Зине: Рʹаст ә. Бь ԝи кьре хԝә ԝана гӧрʹа Хԝәде нәкьрьн, демәк гӧнә кьрьн. Ԝана хԝәха жьбарт кӧ бьбьнә гӧнәкʹар нә кӧ ԛәданди. Әԝе бьжартьне нә кӧ тʹәне Адәм у Һеԝайерʹа ахьрийа хьраб дьани, ле ӧса жи һʹәму рʹькʹьнйата ԝанрʹа.

Зәре: Бь ве йәке тӧ чь дьхԝази бежи?

Зине: Ньһа бь мәсәле тәрʹа бежьм. Тӧ һʹьз дьки бьпежи?

Зәре: Бәле. Әз пәʹтьне гәләк һʹьз дькьм.

Зине: Һʹәсаб кә кӧ тʹаԝа тәйә тʹәзә һәйә сәва нанпәʹтьне. Ле пешийа кӧ теда нан бьпежи, тʹаԝә жь дәсте тә кʹәт у тәвийа. Тӧ ча дьшьрмиш дьби чахе нане тә бьпьжә, ԝе форма ве чь щурʹәйи бә? Ԝе ви щурʹәйи нибә ча кӧ форма тʹаԝа тә?

Зәре: Әре ле ча.

Зине: Ӧса жи Адәм у Һеԝа, чахе ԝана сафи кьр гӧрʹа Хԝәде нәкьн, әԝана бунә гӧнәкʹар у нәԛәданди, бь ԝе йәке ча бежи әԝана тәвийан демәк дефект сьтандьн. Чьмки пешийа кӧ зарʹ ԝанрʹа бьбуна, ԝана гӧнә кьр ләма жи зарʹ ԝанрʹа бь «дәфекте» бун, демәк нәԛәданди һатьнә буйине. Хәбәра «гӧнә» нә кӧ тʹәне те һʹәсабе кьрьн, ле ӧса жи те һʹәсабе һʹал, чь кӧ гьһиштә мә ча миратʹ. Рʹастә мьн у тә тьштәки хьраб нәкьрийә, ле һе әм дьне нәкʹәтьбун, жь бо гӧнәкьрьна Адәм у Һеԝайе гӧнә у мьрьн ча миратʹ дәрбази мә бун. Чаԝа мә хԝәнд жь Рʹомайи 6:23, маше гӧнә мьрьн ә.

Зәре: Әԝ нәрʹасти йә. Чьрʹа гәрәке бона гӧне ԝан тʹәмамийа дьнйайе бьчәрчьрә?

Зине: Тӧ рʹаст и, әԝ йәк нәрʹасти йә! Ль ԝьр диса һе зедә тьшт һәйә. Хԝәде бь һәԛийа хԝәйә кʹамьл сафи кьр, кӧ Адәм у Һеԝа гәрәке бьмьрьн жь бо гӧне хԝә. Ле Хԝәде зӧрʹәта ԝан демәк әм, бе гӧман нәһиштийә. Хԝәде бона мә хәм кьр, ԝәки әм ԝи һʹале хьрабда нәминьн. Һәма бь ԛӧрбанбуна Иса әԝ проблем сафи бу. Ԝәрә әм диса щарәке бьньһерʹьн Рʹомайи 6:23. Паши гьлийе «маше гӧнә мьрьн ә» дь рʹезеда те готьне: «Ле  пʹешкʹеша Хԝәде жийина һʹәта-һʹәтайе йә, бь сайа Хӧдане мә Мәсиһ Иса». Бь ԝе йәке ԛӧрбана Иса мәщале дьдә кӧ әм жь дилтийа мьрьне у гӧнә хьлаз бьн. b

Зине: Ԝе рʹезеда диса тьштәк һәйә у әз дьхԝазьм дина тә бьдьмә сәр.

Зәре: Һәла әԝ чь йә?

Зине: Бьньһерʹә ԝьра лекьри йә: «Пʹешкʹеша Хԝәде жийина һʹәта-һʹәтайе йә, бь сайа Хӧдане мә Мәсиһ Иса». Һәла дьшьрмиш бә һәрге Иса чәрчьри йә у әʹмьре хԝә бона мә дайә, ле чьрʹа сәва кʹьрʹине ньвисар ә «пʹешкʹеша Хԝәде», нә кӧ пʹешкʹеша «Хӧдане мә Мәсиһ Иса»? c

Зәре: Әз ньзаньм.

Зине: Хԝәде хԝәха Адәм у Һеԝа әʹфьрандьн у ԝана әʹйни мьԛабьли Хԝәде гӧнә кьрьн. Һьлбәт дьле Хԝәде гәләк ешийа, ԝәки зарʹед ԝийә әʹԝльн сәр әʹрде мьԛабьли дәркʹәтьн. Ле Йаһоԝа дәрберʹа ԝе йәкерʹа чʹарәк кьр. d Әԝи сафи кьр ԝәки әʹфьринәки ԝийи рʹӧһʹани бе сәр әʹрде, бьжи ча кәсе ԛәданди, у бьбә ԛӧрбан. Бь ԝе йәке кʹьрʹин һатә дайине, ләма жи әԝ пʹешкʹеша жь Хԝәде йә. Хенщи ве йәке диса мәʹник һәйә кӧ чьрʹа кʹьрʹин те һʹәсабе пʹешкʹеша Хԝәде. Тӧ ԛә дьшьрмиш буйи, Хԝәдерʹа дәрдәки ча бу чахе кӧрʹе ԝи кӧштьн?

Зәре: На, әз дәрһәԛа ԝе йәке дьшьрмиш нәбумә.

Зине: Әз һʹәйата ԝәда дьвиньм тьштед листьке бона зарʹа, демәк зарʹед ԝә һәнә.

Зәре: Әре, ԛиз у кӧрʹәки мьн һәйә.

Зине: Ча хԝәйи зарʹ, дәԛәке бьфькьрә, Йаһоԝа баве Иса чь дәрд дит чахе Иса кӧштьн. Һәла бьдә бәр чʹәʹве хԝә, Хԝәде чь һʹалида бу чахе жорва дьдит, кӧ ча кӧрʹе ԝи дьгьрьн, пе дькʹәньн, у дькʹӧтьн? Йан жи чахе бав дьвинә кӧ кӧрʹе ви сәр стуне дардакьрьнә у әԝ бь щәфа дьмьрә?

Зәре: Рʹасти жи, һьлбәт әԝ жи гәләк дьчәрчьри. Әз тʹӧ щар дәрһәԛа ԝе йәке нәфькьримә!

Зине: Әре ӧса нә, бь рʹастийе әм нькарьн рʹаст бежьн кӧ Хԝәде ԝе дәме чь сәр хԝә тʹәхмин дькьр. Ле әм заньн ԝәки һәстед Хԝәде һәнә у ӧса жи заньн кӧ чьрʹа әԝи һишт әԝ һʹәму тьшт бьԛәԝьмә. Әв йәк рʹьнд һатийә шьровәкьрьне дь Йуһʹәнна 3:16-да. Тӧ дькари бьхуни?

Зәре: Бәле. «Чьмки Хԝәде ӧса дьнйа һʹьз кьр, кӧ Кӧрʹе хԝәйи тайе тʹәне бәрва да, ԝәки һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә».

Зине: Зәʹф рʹази мә. Дина хԝә бьде, әԝ рʹез ча дәстпедьбә: «Чьмки Хԝәде ӧса дьнйа һʹьз кьр». Һәма мәʹни һʹьзкьрьна Хԝәде йә. Һʹьзкьрьне Хԝәде һелан кьр, кӧ кӧрʹе хԝә шандә сәр әʹрде, кʹижан кӧ гәрәке сәва мә бьмьра. Әԝ кʹьрʹин те һʹәсабе ԛӧрбана жь һʹьзкьрьна пʹьрʹ мәзьн. У ләма жи Шәʹдед Йаһоԝа һәр сал тʹоп дьбьн, ԝәʹде Евара Биранина мьрьна Иса Мәсиһ. Мә хәбәрданәкә һʹәԝас дәрбаз кьр, ӧса нинә?

Зәре: Рʹасти жи гәләк һʹәԝас бу. Зәʹф жь тә рʹази мә, сәва ԝе хәбәрдане.