Гәло Хԝәде ԝе бьһелә ԝәки мәрьв бәрдәԝан кьн сәр мәрьва сәрԝертийе бькьн у ахьрийа инсанәте хьраб кьн? На. Ча әм пеһʹәсийан, әԝ ԝе бькʹәвә нав шьхӧле мәрьва, һьн жи ԝе кӧл-дәрда у нәһәԛийе бьдә һьлдане. Әʹфьрандаре инсанәте у әʹрде дьхԝазә ԝәки әм бьзаньбьн кӧ әԝ ԝәʹдә незик ә. Ле әԝ ча әʹйан дькә әԝе занәбуна фәрз?

Бьньһерʹьн мәсәле: Чахе тӧ бь әʹрәбе дьхԝази рʹекʹәви, пешийе тӧ дькари жь интернете бьньһерʹи, йан хәрите, йан жи рʹебәрикә дьн сәва бьзаньби ча һәрʹи. Паше, чахе тӧ ида рʹеда ни, у тӧ дьвини ԝәки нишанед сәр рʹе ль гора хәрите нә, һьнге тӧ ида фәʹм дьки кӧ тӧ незики ԝи щийе лазьм дьби. Ӧса жи Хԝәде Хәбәра хԝә дайә мә, кʹидәреда кӧ мәрʹа нишан дькә һʹале дьнйайе. Чахе әм дьвиньн кӧ чаԝа һʹале дьнйайе тенә гӧһастьне, әм баԝәр дьбьн кӧ әм дьжин ԝәʹде незикайа хьлазийе.

Кʹьтеба Пироз шьровәдькә кӧ дьнйа ԝе бьгьһижә ԝәхтәки ӧса кӧ тʹәрихийеда тʹӧнәбуйә, кʹижан кӧ ԝе дьнйайе бинә бәрбь хьлазийе. Ԝи ԝәʹдәйи һʹале дьнйайе ԝе ӧса бә у тьштед ӧса ԝе бьԛәԝьмьн, кӧ тʹӧ щар дь тʹәрихийа инсанәтеда ӧса нәбуйә. Ԝәрен бьньһерʹьн һьнә әʹламәти жь Хәбәра Хԝәде дәрһәԛа ԝи ԝәʹдәйи.

1. ҺʹАЛЕ ДЬНЙАЙЕ Дь ве пʹехәмбәртийеда йа кӧ ньвисар ә дь Мәтта сәре 24-да, һатийә рʹез кьрьне нишанед һʹале дьнйайе, кʹижан кӧ гьшк бь һәврʹа чаԝа нишанәк ә. Әԝ нишан гәрәке әʹйан кә «ахьрийа ве дьнйайе» у кʹьфш кә кӧ кʹәнге «хьлази ԝе бе» (Рʹезед 3, 14). Нишан әԝ ьн кӧ ԝе һәбьн шәрʹед мәзьн, хәлайи-щәлайи, әʹрдһʹәж, зедәбуна нәһәԛийе, һʹьзкьрьна гәләка ԝе сар бә, у сәрԝеред религийед дәрәԝ ԝе мәрийа бьхалфиньн (Рʹезед 6-26). Рʹаст ә тьштед ӧса бәреда жи һәбунә. Ле чахе хьлази незик дьбә, әԝ һʹәму тьшт гәрәке тʹәвайи бьԛәԝьмьн. У тʹәви ԝан нишана, диса се нишанед дьн гәрәке бенә сери.

2. ХӘЙСӘТ-ҺʹӦНӦРЕД МӘРЬВА Кʹьтеба Пироз дьбежә кӧ «рʹожед ахьрийеда», демәк ԝәʹде незикайа хьлазийе, ԝе әʹйан бә пе хьраббуна хәйсәт һʹӧнӧред мәрьва. Әм дьхуньн: «Мәрьве бьбьнә хԝәһʹьз, пʹәрәһʹьз, кʹӧбар, бабах, кʹьфьр, нә гӧрʹа де-бавада, бешекьр, һʹәрам, дьлсар, берʹәʹм, бӧхданбеж, тәмсьст, зӧлмкʹар, нәйаред ԛәнщийе, нәмам, щӧләʹт, хԝәрʹази, рʹьһʹәтиһʹьз, нә кӧ Хԝәдеһʹьз» (2 Тимотʹейо 3:1-4). Рʹаст ә әԝ тʹәзә нинә кӧ мәрьв һьндава һәвда беԛәдьр ьн, ле тʹәне «рʹожед ахьрийеда» ԝе мәрьв ӧса хьраб бьн кӧ ԝи ԝәʹдәйирʹа дькарьн бежьн «зәманед хьраб ьн». Дьбәкә тә хԝәха тʹәхмин кьрийә ԝәки ньһерʹандьн у хәйсәт-һʹӧнӧред мәрьва гәләк хьраб бунә.

3. ХЬРАБКЬРЬНА ӘʹРДЕ Дь Кʹьтеба Пирозда те готьне кӧ Хԝәде ԝе «ԛьрʹа ԝан» бинә, йед кӧ «дьне хьраб дькьн» (Әʹйанти 11:18). Ле ча мәрьв дьне хьраб дькьн? Чаԝа кӧ ԝәʹде Нӧһ ӧса жи ньһа: «Әʹрд ль бәр чʹәʹве Хԝәде һʹәрами ԝеран бьбу у хьрабийава әʹрд тʹьжи бу. Хԝәде дина хԝә да дьнйайе, кӧ ва йә әԝ һʹәрʹьмийе ԝеран буйә». Ләма жи Хԝәде дәрһәԛа мәрьвед хьраб гот: «Әзе ԝан ԝеран кьм» (Дәстпебун 6:11-13, ПКʹМ). Тә хԝәха тʹәхмин кьрийә ԝәки әʹрд тʹьжә дьбә бь зӧлми у хьрабийе? Һьн жи мәрьв гьһиштьнә ԝи ԝәʹдәйи, кӧ бь рʹастийе жи ԛәԝата мәрьва һәйә ԝәки инсанәте бь тʹәмами ԛьрʹ кьн у бь ԝе йәке дьне хьраб кьн. Чʹәкед гәләк ԛәԝи дәстед ԝанда һәнә. Бь щурʹәки майин жи әԝана дькарьн әʹрде хьраб кьн. Система кӧ сәр әʹрде әʹмьр хԝәй дькә, әԝ һәйә һәԝа, һʹәйԝан, екосистема, океан, әԝ һʹәму тьшт чьԛас дьчә һе хьраб дьбьн жь бо мәрийа, чьмки әԝана ԛә хәм накьн бона ԝе йәке.

Һәла дьшьрмиш бә: «Һәма ԛьрʹнәк пешда чʹәкед мәрьва һаԛас һәбун, ԝәки бь тʹәмами инсанәт кʹӧтакьрана?» Ле рʹожа иройин мәрьв дькарьн бь тʹәмами инсанәте кʹӧта кьн. Чь щурʹәйи? Гәләк чʹәкед ԝанә ԛәԝи һәнә у һьн жи  әԝана тʹәбийәте хьраб дькьн. Техноложийа ӧса зу пешда дьчә, кӧ мәрьв нькарьн контрол кьн ԝәки әв техноложийа кʹаре ԝе бинә йан зьраре. Ле дәсте мәрьвада нинә ахьрийа әʹрде у контролкьрьна сәр ԝе. Пешийа кӧ әʹмьр ль сәр әʹрде кʹӧта бә, Хԝәде ԝе бькʹәвә нава ԝи шьхӧли, у ԛьрʹа ԝан бинә, кʹе әʹрде хьраб дькә. Әԝ һәйә созе Хԝәде!

4. ШЬХӦЛЕ ДАННАСИНКЬРЬНЕЙӘ ҺʹӘМДЬНЙАЙЕ Пʹарәкә нишана хьлазийе әԝ пʹехәмбәрти йә, кӧ шьхӧләкә нәбуйи ԝе бе кьрьне: «Әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти у һьнге хьлази ԝе бе» (Мәтта 24:14). Әԝ даннасинкьрьн гәрәке щӧдә бә жь даннасинкьрьна религийед дьн, кӧ нава ԛьрʹнада дьһатә даннасинкьрьне. Ԝәʹде ԝан рʹожед ахьрийе, әԝ даннасинкьрьна мәхсус гәрәке дина мәрьва бьдә сәр «Мьзгинийа Пʹадшатийе». Ле тӧ религийакә ӧса зани ԝәки мьзгинийа ӧса даннасин дькә? Һәрге әре, ле гәло әԝана әве мьзгинийа хере «нав тʹәмамийа дьнйайе . . . һʹәму мьләтарʹа» бәла дькьн?

Малпәра www.mt1130.com дина мәрьва дьдә сәр «Мьзгинийа Пʹадшатийе». Дь әʹдәбйәтед ве малпәреда, әв мьзгини те шьровәкьрьне сәр 700 зьмана зедәтьр. Тӧ зани религийәкә дьн кʹижан кӧ нава тʹәмамийа дьнйайеда, дәрһәԛа Пʹадшатийе мьзгинийа хере бәла дькә? Пешийа кӧ интернет дәркʹәта, Шәʹдед Йаһоԝа ида һатьбун наскьрьне бь ԝе йәке кӧ әԝана бь тʹәмамийа ԛәԝата хԝә мьзгинийа хере дәрһәԛа Пʹадшатийе бәла дькьрьн. Жь сала 1939, сәр рʹуйе журнала «Бьрща Ԛәрәԝьлийе» һәйә хәбәред ӧса «Дәрһәԛа Пʹадшатийа Йаһоԝа Әʹлам Дькә». Дь кʹьтебәкеда дәрһәԛа религийайе ньвисар ә, кӧ шьхӧле даннасинкьрьна Шәʹдед Йаһоԝа, бь бәлакьрьне у бь чапа даннасинкьрьне, найе бәрамбәркьрьне. Әԝ шәʹдәтикьрьн кʹьфш дькә ԝе мьзгинийа хере, кӧ зутьрәке «хьлази ԝе бе» бь сайа Пʹадшатийа Хԝәде.

Гәло тӧ тʹәхмин дьки ԝәки әԝ һʹәму чар нишанед жь Кʹьтеба Пироз, йе кӧ дь ве тʹәмайеда һатьнә готьне, дь әʹмьре тәда тенә кʹьфше? Әва журнала, нава сәда сала зедәтьр инфомасийайе дьдә хԝәндәванед хԝә, дәрһәԛа  дәрәщед дьнйайе. Әв информасийа али ԝан дькә кӧ хԝәха избат бьн ԝәки хьлази незик ә. Һьлбәт, һьнә скептик инкʹар дькьн әве йәке, у дьбежьн кӧ әԝ избаткьрьн у статистик ль сәр һʹиме ньһерʹандьна мәрийа йә, у дькарә нәрʹаст бә. Әԝана ӧса жи дьбежьн кӧ жь бо ԝе пешдачуйине кӧ мәрьв дькарә һаш жь тʹәмамийа дьнйайе һәбә, ӧса те кʹьфше кӧ һʹале дьнйайе те бежи хьраб дьбә. Ле һәйә избатбун кʹижан һе зедә дьбә, ԝәки тʹәрихийа инсанәтеда әм дьжин хьлазийа ԝәʹде гьрингда.

Һьнә експерт дьбежьн кӧ әм незики гӧһастьнед фәрз дьбьн ль сәр әʹрде. Мәсәлә, сала 2014-да, һьнә зандара гьли кьрьн дәрһәԛа хофийед мәзьн, кʹижан кӧ дькарьн хьлазийа сивилизасийайе биньн. Ԝан зандара гот: «Леколинкьрьна әԝан хофийа, мәрʹа дьдьнә әʹйанкьрьне, кӧ иро катастрофа техноложийе диса гәләк хоф ә бона сивилизасийайе». Гәләк мәрьв һе зедә избат дьбьн, кӧ дь тʹәрихийа дьнйайеда әм гьһиштьнә гӧһастьна гьринг. Йед кӧ әве журнале дәрдьхьн у йед кӧ дьхуньн, дӧдьли набьн ԝәки ньһа демәк әв ԝәʹде мәхсус рʹожед ахьрийе нә у хьлази незик ә. Дәԝса кӧ бьтьрсьн ахьри ԝе чаԝа бә, һун дькарьн ша бьн кӧ ахьри ԝе чь бинә. Ле чьрʹа? Чьмки һун дькарьн хьлаз бьн!