ТӘ ЧАХЕ гьлийе ԝан дӧ мәрьва хԝәнд, тӧ тʹәви гьлийед кʹижани рʹази буйи? Әԝан гьлийед Шаԝуле жь Тарсусе, кʹижан кӧ ӧса жи дьһатә навкьрьне Паԝлосе шанди, гәләк мәрьва дьлгәрьм дькә у ша дькә (Кʹаред Шандийа 17:26, 27). Ле диса гәләк гьлийед ӧса дь Кʹьтеба Пирозда һәнә. Мәсәлә, Иса чахе дӧа кьр, әԝи дӧайе хԝәда гот кӧ пәйчуйед ԝи дькарьн Хԝәде нас кьн у кʹәрәмкьрьна ԝи бьстиньн (Йуһʹәнна 17:3).

Ле Филон, у ӧса жи философед дьн, ӧса нәдьфькьрин. Ԝана дьгот кӧ әм тʹӧ щар нькарьн Хԝәде нас кьн, чьмки әԝ бь тʹәмами найе наскьрьне. Ле гәло әв йәк рʹаст ә?

Кʹьтеба Пироз әʹйан дьбежә, кӧ дәрһәԛа Хԝәде һәнә һьнә тьшт, кʹижан кӧ мәрьварʹа чәтьн ә фәʹм кьн. Мәсәлә, ԝәхте жийина Хԝәде, һʹьше ԝийи пʹьрʹ гьринг, у кʹурайа биланийа ԝи мәрьв нькарә чап кә у һʹәсаб кә. Чьмки әԝ йәк жь һʹьше мәрьва дәр ә. Ле әԝ йәк рʹе мә нагьрә кӧ Хԝәде нас кьн. Рʹасти жи, һәрге әм бьфькьрьн сәр ԝан тьштед гьринг, әме бькарьбьн «незики Хԝәде бьбьн» (Аԛуб 4:8). Ԝәрә әм һьнә тьшт дәрһәԛа Хԝәде  шеԝьр кьн, йед кӧ найенә фәʹмкьрьн. Паше әм дәрһәԛа Хԝәде шеԝьр кьн әԝан тьшта, кʹижан кӧ әм бь рʹастийе дькарьн фәʹм кьн.

ХԜӘДЕ ҺʹӘТА-ҺʹӘТАЙЕ ЙӘ: Кʹьтеба Пироз дьбежә, кӧ Хԝәде жь «бедәстпеки һʹәта бедаԝитийе» йә (Зәбур 90:2, ИМ). Демәк, дәстпебуна Хԝәде у хьлазийа ԝи тʹӧнә. Бь ньһерʹандьна мәрьва «леколин ль һәжмара салед ԝива набә» (Ибо 36:26).

Һун чь кʹаре дьстиньн: Хԝәде ԝәрʹа жийина һʹәта-һʹәтайе соз дьдә, һәрге һун бь рʹастийе ԝи нас дькьн (Йуһʹәнна 17:3). Гәло әԝ соз ԝе чьԛас нәбуйи бьбуйа һәрге хԝәха Хԝәде һʹәта-һʹәтайе нәжита? Тʹәне «Пʹадшайе һʹәта-һʹәтайе», дькарә әԝи сози бинә сери (1 Тимотʹейо 1:17).

ҺʹЬШЕ ХԜӘДЕ: Кʹьтеба Пироз һин дькә кӧ «гьһиштьна кʹурьтийа фәʹмкарийа» Хԝәде набә, чьмки фькьред ԝи жь фькьред мә гәләк бьльндтьр ьн (Ишайа 40:28; 55:9). У ләма Кʹьтеба Пирозда пьрсәки ӧса данийә: «Кʹе нет-фькьра Хӧдан пеһʹәсийа, кӧ ширәтәке бьдә ԝи?» (1 Корьнтʹи 2:16).

Һун чь кʹаре дьстиньн: Хԝәде дькарә бь милйона дӧа щарәкерʹа бьбьһе (Зәбур 65:2). Әԝ һәла һе дина хԝә дьдә сәр һәр чʹьвикәке жи кӧ дькʹәвә әʹрде. Гәло һʹьше Хԝәде дьвәстә у әв йәк дьбә мәʹни кӧ әԝ гӧһ нәдә дӧайе ԝә у дина хԝә нәдә ԝә? На, чьмки һʹьше Хԝәде беһʹәсаб ә. У «һун жь гәләк чʹьвика ԛимәттьр ьн» бона ԝи (Мәтта 10:29, 31).

РʹЕЙЕД ХԜӘДЕ: Кʹьтеба Пироз һин дькә кӧ «мьров нькарә жь дәстпеке һʹәта даԝийе кʹаре кӧ Хԝәде чекьрийә бьбинә у дәрхинә» (Ԝаиз 3:11). Ләма жи әм тʹӧ щар нькарьн һʹәму тьшти дәрһәԛа Хԝәде бьзаньбьн. Тʹӧ кәс сәрәдәрийе биланийа Хԝәде дәрнахә (Рʹомайи 11:33). Хԝәде һазьр ә рʹейед хԝә ԝанрʹа әʹйан кә, кʹе кӧ дьхԝазә дьле ԝи ша кә (Амос 3:7).

Һун чь кʹаре дьстиньн: Һәрге тӧ Кʹьтеба Пироз бьхуни у леколин бьки, тӧйе тʹьме бәрдәԝам ки пебьһʹәси тьштед тʹәзә дәрһәԛа Йаһоԝа у рʹейед ԝи. Әԝ те һʹәсабе, кӧ әм дькарьн незики Баве хԝәйи әʹзмана бьн һʹәта-һʹәтайе.

Әм кӧ нькарьн рʹастийа дәрһәԛа Хԝәде һʹәму тьшти фәʹм бькьн, әв найе һʹәсабе кӧ әм нькарьн дәрһәԛа ԝи тʹӧ тьшти бьзаньбьн. Кʹьтеба Пирозда һәнә гәләк информасйа, кʹижан кӧ дькарьн али мә бькьн, ԝәки һе рʹьнд дәрһәԛа Хԝәде бьзаньбьн. Бьньһерʹьн һьнә мәсәла:

НАВЕ ХԜӘДЕ: Кʹьтеба Пироз мә һин дькә кӧ Хԝәде хԝәха нав дайә сәр хԝә. Әԝи гот: «Әз Йаһоԝа мә. Әв ә наве мьн». Дь Кʹьтеба Пирозда наве Хԝәде жь һʹәму нава зедәтьр те готьне, әв һатийә ньвисаре ԝәкә 7 000 щара (Ишайа 42:8, ДТʹ).

Һун чь кʹаре дьстиньн: Иса дӧайе хԝәда гот: «Баве мәйи әʹзмана! Наве тә пироз бә» (Мәтта 6:9). Ле тӧ дькари дӧайе хԝәда наве Хԝәде бьди хәбате? Йаһоԝа һазьр ә хьлаз кә ԝан һʹәму мәрьва, йед кӧ наве ԝи рʹумәт дькьн (Рʹомайи 10:13).

ЩИЙЕ КӦ ХԜӘДЕ ДЬЖИ: Кʹьтеба Пироз һин дькә кӧ бона жийине, дӧ щи һәнә, йәк әрʹд ә кʹидәре кӧ әм дьжин, у йәк жи әʹзман, дәрһәԛа кʹижани Кʹьтеба Пироз дьбежә, кӧ әʹфьринед рʹӧһʹани ԝи щийи дьжин (Йуһʹәнна 8:23; 1 Корьнтʹи 15:44). Щийе жийина Әʹфьрандар һәма әʹзманда нә (1 Пʹадшати 8:43).

 Һун чь кʹаре дьстиньн: Тӧ дькари зәлал Хԝәде бьди бәр чʹәʹве хԝә. Хԝәде нә әв ԛәԝат ә кӧ һәр дәра һәйә. Йаһоԝа Кәсе реали йә, кʹижан кӧ дьжи ль щийе реали. У «тʹӧ әʹфьрин жь ԝи вәшарти нинә» (Ибрани 4:13).

ҺʹӦНӦРЕД ХԜӘДЕ: Кʹьтеба Пироз һин дькә кӧ һʹӧнӧред Йаһоԝайи баш һәнә. «Хԝәде һʹьзкьрьн ә» (1 Йуһʹәнна 4:8). Әԝ тʹӧ щар нахапинә (Тито 1:2). Әԝ фьрԛийе накә нава мьләта, рʹәʹм ә, дьлшәԝат ә, у зу һерснәкʹәвә (Дәркʹәтьн 34:6; Кʹаред Шандийа 10:34). У дьбәкә гәләкарʹа әʹщебмайи бә, кӧ Әʹфрандар зәʹф дьхԝазә незик һәвалтийе бькә тʹәви ԝан, йед кӧ ԛәдьр дьдьнә кʹьфше һьндава ԝи (Зәбур 25:14).

Һун чь кʹаре дьстиньн: Тӧ дькари бьби досте Йаһоԝа (Аԛуб 2:23). Һәгәр тӧ һе зедә пебьһʹәси кӧ Хԝәде йәки ча нә, тӧйе һе рʹьнд фәʹм бьки рʹастийа жь Кʹьтеба Пироз.

Әм дәрһәԛа Йаһоԝа Хԝәде жь Кʹьтеба Пироз педьһʹәсьн. Әԝ йәки ӧса нинә кӧ нәйе наскьрьне. Бь рʹастийе Әʹфрандар хԝәха дьхԝазә кӧ әм ԝи нас кьн. Хәбәра ԝи, демәк Кʹьтеба Пироз, соз дьдә: «Һәгәр тӧ ль ԝи бьгәрә, әԝе хԝә бь тә бьдә дитьн» (1 Дирок 28:9). Бь хԝәндьн у леколинкьрьна Кʹьтеба Пироз һун дькарьн һе зедә пебьһʹәсьн дәрһәԛа Хԝәде. Һәрге һун ӧса бькьн, Кʹьтеба Пироз соз дьдә, кӧ Хԝәде «ԝе незики ԝә бә» (Аԛуб 4:8).

Дьбәк тӧ дьфькьри: «Һәрге әз дәрһәԛа Әʹфьрандар нькарьм һʹәму тьшти фәʹм кьм, әзе ча бьбьмә досте ԝи?» Ԝәрьн әм бьньһерʹьн мәсәлә: Гәло әʹсәйи йә досте һʹәким, һʹәким бә? На! Професийа досте һʹәким дькарә тьштәки дьн бә, ле һәвалтийа ԝан дькарә незик у баш бә. Лапә фәрз әԝ ә, кӧ досте һʹәким ԝи рʹьнд нас дькә у ӧса жи занә әԝ чь һʹьз дькә у чь һʹьз накә. Тӧ жи дькари жь Кʹьтеба Пироз Йаһоԝа ча кәс нас ки у бьби досте ԝи.

Дь Кʹьтеба Пирозда һәнә информасийа, кʹижан кӧ дькарьн али мә бькьн ԝәки әм Хԝәде рʹьнд нас кьн. Тӧ дьхԝази дәрһәԛа Йаһоԝа Хԝәде гәлә тьшт бьзаньби? Шәʹдед Йаһоԝа тә тʹәглиф дькьн сәр һинбуна Кʹьтеба Пироз бе пʹәрә. Текли бьн тʹәви Шәʹдед Йаһоԝа йан жи бькʹәвьнә малпәра мә, ԝԝԝ.mt1130.com.